Axborotlashtirishning milliy tizimini shakllantirish, iqtisodiyot va jamiyat hayotining barcha sohalarida zamonaviy axborot texnologiyalarini, kompyuter texnikasi va telekommunikatsiya vositalarini ommaviy ravishda joriy etish hamda ulardan foydalanish, fuqarolarning axborotga ortib borayotgan talab-ehtiyojlarini yanada toʻliqroq qondirish, jahon axborot hamjamiyatiga kirish hamda jahon axborot resurslaridan bahramand boʻlishni kengaytirish uchun qulay shart-sharoitlarni yaratish maqsadida:

1. Quyidagilar kompyuterlashtirish va axborot-kommunikatsiya texnologiyalarini rivojlantirish hamda ularning zamonaviy tizimlarini joriy etishning birinchi galdagi eng muhim vazifalari deb hisoblansin:

zamonaviy ishonchli va xavfsiz milliy maʼlumotlar axborot bazalarini yaratish, axborot resurslari va xizmatlarining bozorini rivojlantirish, axborot almashuvning elektron shakllariga izchillik bilan bosqichma-bosqich oʻtish;

real iqtisodiyot tarmoqlarida, boshqaruv, biznes, fan va taʼlim sohalarida kompyuter va axborot texnologiyalarini keng joriy etish, aholi turli qatlamlarining zamonaviy kompyuter va axborot tizimlaridan keng bahramand boʻlishlari uchun shart-sharoitlar yaratish;

maktablar, kasb-hunar kollejlari, akademik litseylar va oliy oʻquv yurtlarining taʼlim jarayoniga zamonaviy kompyuter va axborot texnologiyalarini egallashga hamda ularni faol qoʻllanishga asoslangan ilgʻor taʼlim tizimlarini kiritish;

axborot-kommunikatsiya texnologiyalari sohasida, birinchi navbatda dasturiy vositalarni, maʼlumotlarning axborot bazalarini ishlab chiqish, respublika, tarmoq va mahalliy axborot-kommunikatsiya tarmoqlarini shakllantirish, kompyuter va telekommunikatsiya texnikasini ishlab chiqish sohalarida ishlash uchun yuqori malakali mutaxassis kadrlar tayyorlashni tashkil qilish;

axborot-kommunikatsiya tarmoqlari va xizmatlari konvergensiyasini nazarda tutgan holda mamlakatning barcha hududida axborot-kommunikatsiya texnologiyalarining texnikaviy infratuzilmasini, shu jumladan koʻchma aloqa, IP texnologiyalari, boshqa zamonaviy telekommunikatsiya va maʼlumot uzatish vositalarini jadal rivojlantirish;

milliy va xalqaro axborot tarmoqlariga gʻoyat tezkorlik bilan kirib borishni joriy etish, aholi punktlari, shu jumladan qishloq aholi punktlarining ularga kirib borishini taʼminlash;

sifatli mahalliy dasturiy mahsulotlar ishlab chiqarish va ularni eksport qilishni ragʻbatlantirishning samarali mexanizmini yaratish;

mahalliy kompyuter texnikasi va unga butlovchi buyumlar ishlab chiqish hamda ishlab chiqarishni tashkil etishga koʻmaklashish.

2. Ilovaga* muvofiq tarkibda kompyuterlashtirish va axborot-kommunikatsiya texnologiyalarini rivojlantirish boʻyicha Muvofiqlashtiruvchi Kengash tuzilsin.

Belgilab qoʻyilsinki, Muvofiqlashtiruvchi Kengash kompyuterlashtirish va axborot-kommunikatsiya texnologiyalarini rivojlantirish sohasida yuqori muvofiqlashtiruvchi organ hisoblanadi.

3. Muvofiqlashtiruvchi Kengash zimmasiga quyidagi vazifalarni hal etish yuklansin:

kompyuterlashtirish va axborot-kommunikatsiya texnologiyalarini rivojlantirishning zamonaviy xalqaro tendensiyalarga va mamlakatni ijtimoiy-iqtisodiy rivojlantirish strategiyasiga mos keluvchi ustuvor yoʻnalishlarini belgilash;

kompyuterlashtirish va axborot-kommunikatsiya texnologiyalarini jadal rivojlantirish uchun qulay shart-sharoitlar hamda iqtisodiy omillarni vujudga keltirish yuzasidan Hukumatga takliflar kiritish;

kompyuterlashtirish va axborot-kommunikatsiya texnologiyalarini rivojlantirish sohasiga oid dasturlar, loyihalar, meʼyoriy-huquqiy hujjatlarning ishlab chiqilishi hamda ekspertizadan oʻtkazilishini tashkil etish;

axborot-kommunikatsiya texnologiyalari sohasida malakali kadrlar tayyorlash va qayta tayyorlash, jumladan mutaxassislarni chet ellarda oʻqitish borasidagi ishlarni muvofiqlashtirish;

axborot-kommunikatsiya texnologiyalari sohasida raqobat muhitini shakllantirishga koʻmaklashish, innovatsiya biznesini, shu jumladan mahalliy dasturiy vositalar va kompyuter texnikasini ishlab chiqish hamda ishlab chiqarishni qoʻllab-quvvatlash, iqtisodiyotning barcha sohalari va tarmoqlarini kompyuterlashtirish uchun shart-sharoitlar yaratish;

axborot-kommunikatsiya texnologiyalari sohasida xalqaro hamkorlikni rivojlantirishga, axborot-kommunikatsiya texnologiyalarining infratuzilmasini rivojlantirish uchun xorijiy investitsiyalar, homiylik mablagʻlari va grantlarni jalb etishga, taʼlim muassasalarining axborot tarmoqlaridan foydalanish imkoniyatini kengaytirishga koʻmaklashish.

4. Muvofiqlashtiruvchi Kengash 2002-yilning 1-oktabriga qadar:

2003—2010-yillarda telekommunikatsiya va maʼlumot uzatish milliy tarmogʻini rivojlantirish dasturini;

2003—2010-yillarda davlat boshqaruvida elektron texnologiyalarni joriy etish dasturini;

2010-yilgacha boʻlgan davrda elektron tijoratni rivojlantirish dasturini ishlab chiqsin va tasdiqlash uchun Vazirlar Mahkamasiga taqdim etsin.

5. Oʻzbekiston pochta va telekommunikatsiyalar agentligi Oʻzbekiston aloqa va axborotlashtirish agentligi etib qayta tashkil etilsin hamda unga quyidagi asosiy vazifalarni hal etish yuklansin:

mahalliy, shaharlararo, xalqaro telefon-telegraf va pochta aloqasi, matbuot tarqatish, maʼlumot uzatish tarmoqlari, shu jumladan Internet, radioaloqa, radio eshittirish va televideniye tarmoqlarini barpo etish, faoliyatini yoʻlga qoʻyish va xizmatlar koʻrsatish sohasidagi strategik ustuvor yoʻnalishlarni roʻyobga chiqarish;

pochta aloqasi tizimi faoliyatini boshqarish, telekommunikatsiyalar va axborot uzatish tarmoqlarini rivojlantirishni davlat tomonidan boshqarish, ushbu sohalarda raqobat muhitini vujudga keltirish, tegishli faoliyat turlarini litsenziyalash;

axborot tizimlari, telekommunikatsiyalar va maʼlumot uzatish tarmoqlarini rivojlantirish hamda takomillashtirishga xorijiy investitsiyalarni jalb etish uchun sharoit yaratish;

zamonaviy xalqaro standartlarni joriy etish, telekommunikatsiya va axborot texnologiyalariga oid mahalliy standartlarni, texnik shartlar va talablarni ishlab chiqib, ularni tasdiqlash;

axborot resurslari bozorini rivojlantirish, davlat boshqaruvi, biznes, sogʻliqni saqlash, fan va taʼlim sohalarida, shuningdek jamiyat hayotining boshqa sohalarida axborot almashuvning elektron shakllariga oʻtish dasturlarini ishlab chiqish va amalga oshirishni tashkil qilish.

Oʻzbekiston aloqa va axborotlashtirish agentligi kompyuterlashtirish va axborot-kommunikatsiya texnologiyalarini rivojlantirish boʻyicha Muvofiqlashtiruvchi Kengashning ishchi organi etib belgilansin.

Oʻzbekiston aloqa va axborotlashtirish agentligi 2002-yilning 1-avgustiga qadar yirik xorijiy va mahalliy kompyuter hamda axborot kompaniyalari bilan birgalikda Kompyuter va axborot texnologiyalarini rivojlantirish hamda joriy etish markazini tashkil qilsin.

6. Pochta va telekommunikatsiyalarni rivojlantirishni davlat tomonidan qoʻllab-quvvatlash budjetdan tashqari jamgʻarmasining nomi Axborot-kommunikatsiya texnologiyalarini rivojlantirish budjetdan tashqari jamgʻarmasi deb oʻzgartirilsin.

Budjetdan tashqari jamgʻarmaga maʼlumot uzatish tarmoqlari va axborot texnologiyalarini rivojlantirish sohasidagi ustuvor loyihalar va ilmiy-tadqiqot ishlarini mablagʻ bilan taʼminlash vazifasi yuklansin.

7. Toshkent elektrotexnika aloqa instituti Toshkent axborot texnologiyalari universitetiga aylantirilsin.

2002/2003 oʻquv yilidan boshlab Toshkent axborot texnologiyalari universitetida dasturiy mahsulotlar ishlab chiqish, tarmoq texnologiyalari, koʻchma radiotelefon aloqasi, elektron tijorat va axborot xavfsizligi sohalari boʻyicha mutaxassislar tayyorlanishi nazarda tutilsin.

8. 2006-yilning 1-yanvarigacha boʻlgan muddatga:

respublikaga olib kelinayotgan kompyuter maʼlumotlarini uzatish tarmoqlarini barpo etishga moʻljallangan asbob-uskunalar, kompyuter texnikasi va unga butlovchi buyumlar, shuningdek dasturiy vositalar bojxona toʻlovlarini (bojxona rasmiylashtirishi uchun yigʻim bundan mustasno) toʻlashdan;

kompyuter va axborot texnologiyalariga oʻqitish boʻyicha xizmatlar, dasturiy vositalarni sotish, shuningdek ularga servis xizmatlari koʻrsatish qoʻshilgan qiymat soligʻidan ozod etilsin.

9. 2002-yilning 1-iyulidan boshlab dasturiy vositalar ishlab chiqarish, kompyuter texnikasi va dasturiy vositalarga servis xizmatlari koʻrsatish, aholiga kompyuter texnikasida va axborot texnologiyalari bilan ishlashni oʻrgatish yuzasidan xizmat koʻrsatish boʻyicha ixtisoslashgan tashkilotlarga (ularning katta-kichikligidan qatʼi nazar) yagona soliq toʻlash tartibi tadbiq etilsin.

10. Oʻzbekiston Respublikasi Adliya vazirligi bir oy muddatda manfaatdor idoralar bilan birgalikda amaldagi qonun hujjatlariga mazkur Farmondan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

11. Oʻzbekiston Respublikasi Vazirlar Mahkamasi ikki hafta muddatda ushbu Farmonni amalga oshirish yuzasidan qaror qabul qilsin.

12. Mazkur Farmon matbuotda eʼlon qilinsin.