“Bankrotlik toʻgʻrisida”gi Oʻzbekiston Respublikasi Qonuniga muvofiq Vazirlar Mahkamasi qaror qiladi:

1. Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi hamda Oʻzbekiston matbuot va axborot agentligining “Birja” gazetasini “Bankrotlik toʻgʻrisida”gi Oʻzbekiston Respublikasi Qonunida nazarda tutilgan maʼlumotlar (keyingi oʻrinlarda bankrotlik toʻgʻrisidagi maʼlumotlar deb ataladi) eʼlon qilinadigan rasmiy nashr (keyingi oʻrinlarda rasmiy nashr deb ataladi) etib belgilash toʻgʻrisidagi taklifi qabul qilinsin.

2. Belgilab qoʻyilsinki, rasmiy nashr:

Oʻzbekiston Respublikasining butun hududida kamida 5000 nusxada tarqatiladi va bankrotlik toʻgʻrisidagi maʼlumotlarning har haftada eʼlon qilinishini taʼminlaydi. Bankrotlik toʻgʻrisidagi maʼlumotlar matnlari davlat tilida eʼlon qilinadi va boshqa tillarga tarjima qilinishi mumkin;

bankrotlik toʻgʻrisidagi maʼlumotlarni ular manfaatdor shaxslardan olingandan va eʼlon qilinganlik haqi toʻliq hajmda toʻlangandan keyin oʻn kun mobaynida eʼlon qiladi;

bankrotlik toʻgʻrisidagi maʼlumotlarning gazetaning Internetdagi saytida qoʻshimcha haq undirilmasdan joylashtirilishini, shuningdek saytda joylashtirilgan maʼlumotlardan bepul foydalanilishini taʼminlaydi;

bankrotlik toʻgʻrisidagi maʼlumotlarning Qoraqalpogʻiston Respublikasi, viloyatlar va Toshkent shahrida oʻz vaqtida qabul qilib olinishini hamda koʻrsatib oʻtilgan maʼlumotlarni eʼlon qilish boʻyicha rasmiy nashr xizmatlari uchun toʻlovlarni, shu jumladan elektron toʻlovlar tizimi orqali taʼminlaydi.

3. Belgilansinki:

bankrotlik toʻgʻrisidagi maʼlumotlarni rasmiy nashrda eʼlon qilish qiymati, shriftning yirikligi kamida 7 punkt va interlinyaji kamida 8 punkt boʻlgan taqdirda, qoʻshilgan qiymat soligʻini hisobga olgan holda bir kvadrat santimetr uchun eng kam oylik ish haqining 1,0 foizidan oshishi mumkin emas;

bankrotlik toʻgʻrisidagi maʼlumotlarni eʼlon qilish bilan bogʻliq xarajatlarni qoplash “Bankrotlik toʻgʻrisida”gi Oʻzbekiston Respublikasi Qonunida nazarda tutilgan tartibda amalga oshiriladi.

4. Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi manfaatdor vazirliklar va idoralar bilan birgalikda bir oy muddatda idoraviy normativ-huquqiy hujjatlarning ushbu qarorga muvofiqlashtirilishini taʼminlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.