Tarmoqda nazorat, hisobga olish va boshqarishni maqbullashtirish asosida qog‘oz chiqindilarini tayyorlash tizimini rivojlantirish va takomillashtirish, real sektor korxonalarining, kichik va xususiy biznes subyektlarining ikkilamchi qog‘ozga bo‘lgan ehtiyojlarini yanada to‘liq ta’minlash uchun ikkilamchi xomashyodan sanoat yo‘li bilan foydalanishning samarali mexanizmlarini joriy etish, shuningdek tarmoq korxonalarining, shu jumladan “Sanoatqalinqog’ozsavdo” XI OAJ va “O‘zbek qog‘ozi” OAJning mavjud quvvatlaridan foydalanishni ko‘paytirish maqsadida Vazirlar Mahkamasi qaror qiladi:

1. “Sanoatqalinqog’ozsavdo” XI OAJ va “O‘zbek qog‘ozi” OAJning kelgusida qayta ishlash uchun joylarda to‘plangan ikkilamchi xomashyo — qog‘oz chiqindilarini qabul qilish punktlari tashkil etish to‘g‘risidagi taklifiga rozilik berilsin.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, O‘zbekiston Respublikasi Davlat mulki qo‘mitasi foydalanilmayotgan turar joy bo‘lmagan binolarni qog‘oz chiqindilarini qabul qilish punktlari tashkil etish uchun “Sanoatqalinqog’ozsavdo” XI OAJ va “O‘zbek qog‘ozi” OAJga belgilangan tartibda bersin.

3. Davlat va xo‘jalik boshqaruvi organlari, ularning hududiy bo‘linmalari, mahalliy davlat hokimiyati organlari tasdiqlangan prognoz ko‘rsatkichlarga muvofiq qog‘oz chiqindilarini to‘plash va topshirishni belgilangan tartibda amalga oshirsinlar.

4. Belgilab qo‘yilsinki, “Sanoatqalinqog’ozsavdo” XI OAJ va “O‘zbek qog‘ozi” OAJ qabul qilish punktlari qog‘oz chiqindilarini tayyorlash va topshirish bo‘yicha hisob-kitoblarni erkin narxlarda, shu jumladan ularni jismoniy shaxslardan qabul qilib olishda — naqd pul bilan va yuridik shaxslardan qabul qilib olishda — naqd pulsiz amalga oshiradilar.

5. O‘zbekiston Respublikasi Monopoliyadan chiqarish, raqobat va tadbirkorlikni qo‘llab-quvvatlash qo‘mitasi Iqtisodiyot vazirligi, Moliya vazirligi, Markaziy bank, “Sanoatqalinqog’ozsavdo” XI OAJ “O‘zbek qog‘ozi” OAJ hamda boshqa manfaatdor vazirliklar va idoralar bilan birgalikda Qog‘oz chiqindilarini to‘plash, tayyorlash va qayta ishlash uchun yetkazib berish tartibi to‘g‘risidagi nizomni bir oy muddatda ishlab chiqsin va tasdiqlasin.

6. Belgilab qo‘yilsinki:

qog‘oz chiqindilarini to‘plash va topshirishning tashkil etilishi uchun davlat va xo‘jalik boshqaruvi organlari, mahalliy davlat hokimiyati organlari rahbarlari javob beradilar;

budjet tashkilotlari bo‘yicha qog‘oz chiqindilarini sotishdan olingan mablag‘lar ularning budjetdan tashqari hisob raqamiga o‘tkaziladi va ulardan tashkilotning moddiy-texnika bazasini mustahkamlashda foydalaniladi.

7. Respublika tijorat banklariga tarmoq qayta ishlash korxonalariga, shu jumladan texnologik asbob-uskunalarni modernizatsiyalash uchun, kreditlar ajratish tavsiya etilsin.

8. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari E.R. Shoismatov va N.M. Xanov zimmasiga yuklansin.