Oʻzbekiston Respublikasi Konstitutsiyasining 111-moddasiga muvofiq Oʻzbekiston Respublikasi Oliy Kengashi qonun loyihalari tayyorlash ustida ish olib borish, Oʻzbekiston Respublikasi Oliy Kengashi ixtiyoridagi masalalarni dastlabki tarzda koʻrib chiqish va tayyorlash uchun, Oʻzbekiston Respublikasi qonunlari, Oʻzbekiston Respublikasi Oliy Kengashining boshqa qarorlari davlat hamda jamoat idoralari va tashkilotlari tomonidan amalga oshirilishiga yordam berish hamda bu ishni nazorat qilish uchun, xalq deputatlari mahalliy Sovetlari va ularning doimiy komissiyalari bilan hamkorlik qilish uchun deputatlari orasidan Mandat komissiyasi va qoʻmitalar saylaydi.

Oʻzbekiston Respublikasi Oliy Kengashining Mandat komissiyasi va qoʻmitalari oʻz zimmalariga yuklatilgan vazifalarni bajara borib, Oʻzbekiston Respublikasi davlat hokimiyatining oliy idorasi boʻlmish Oʻzbekiston Respublikasi Oliy Kengashi samarali faoliyat koʻrsatishiga yordam berishlari kerak.

Oʻzbekiston Respublikasi Oliy Kengashi Mandat komissiyasi va qoʻmitalarining asosiy vazifalari quyidagilardan iborat:

Oʻzbekiston Respublikasi qonunlarining va Oʻzbekiston Respublikasi Oliy Kengashi boshqa qarorlarining loyihalarini ishlab chiqish;

Oʻzbekiston Respublikasi Oliy Kengashi ixtiyoridagi masalalarni dastlabki tarzda qarab chiqish va tayyorlash;

Oʻzbekiston Respublikasi qonunlarini va Oʻzbekiston Respublikasi Oliy Kengashi qabul qilgan boshqa qarorlarni amalga oshirishga yordam berish.

Oʻzbekiston Respublikasi Oliy Kengashining Mandat komissiyasi va qoʻmitalari yangi saylangan Oʻzbekiston Respublikasi Oliy Kengashining qoʻmitalari yangi saylangan Oʻzbekiston Respublikasi Oliy Kengashining birinchi sessiyasida Oliy Kengashining vakolat muddati davriga tuziladi.

Qoʻmitalarning roʻyxati Oʻzbekiston Respublikasi Oliy Kengashi tomonidan tasdiqlanadi. Oʻzbekiston Respublikasi Oliy Kengashi vakolat muddati davomida, zarur boʻlib qolganda, Yangi qoʻmitalar tashkil etishi, ilgari tuzilgan qoʻmitalarni tugatish va qayta tuzishi, Mandat komissiyasi va qoʻmitalar tarkibiga oʻzgarishlar kiritish mumkin.

Oʻzbekiston Respublikasi Oliy Kengashining Mandat komissiyasi va qoʻmitalari Oʻzbekiston Respublikasi Oliy Kengashi tomonidan raislar va aʼzolardan iborat tarkibida saylanadi. Mandat komissiyasi va qoʻmitalar raislarining oʻrinbosarlari hamda komissiya va qoʻmitalarning kotiblari ularning majlislarida saylanadilar va keyinchalik Oʻzbekiston Respublikasi Oliy Kengashining Rayosati tomonidan tasdiqlanadilar.

Mandat komissiyasi va qoʻmitalar ochiq ovoz berish yoʻli bilan Oʻzbekiston Respublikasi xalq deputatlari orasida saylanadi.

Ovoz berish raisning nomzodi boʻyicha alohida, soʻngra esa komissiyasi, qoʻmita tarkibi boʻyicha bir yoʻla yoki har bir nomzod boʻyicha alohida-alohida oʻtkaziladi.

Mandat komissiyasi va qoʻmitalarni tuzish chogʻida Oʻzbekiston Respublikasi xalq deputatlarining ishchanlik fazilatlari, kasb va boshqa qiziqishlari, ularning ishlab chiqarish va hayotiy tajribalari, erkin bildirgan xohish-istaklari inobatga olinadi.

Oʻzbekiston Respublikasi xalq deputati, qoida tariqasida, Oʻzbekiston Respublikasi Oliy Kengashining bitta qoʻmitasi yoki komissiyasi aʼzosi qilib saylanish mumkin.

Oʻzbekiston Respublikasi Oliy Kengashi Mandat komissiyasi yoki qoʻmitasining raisi qilib saylashga tavsiya etilgan Oʻzbekiston Respublikasi xalq deputati Oʻzbekiston Respublikasi Oliy Kengashining sessiyasida soʻzga chiqib, oʻz faoliyat dasturini bayon etishi mumkin. U sessiya qatnashchilarining savollariga javob beradi.

Mandat komissiyasi va qoʻmitalarning tarkibiga doir takliflar komissiya yoki qoʻmitalarning raislari tomonidan tayyorlanishi mumkin.

Oʻzbekiston Respublikasi Oliy Kengashining Raisi, uning oʻrinbosarlari, Oʻzbekiston Respublikasi Prokurori Mandat komissiyasi va qoʻmitalar tarkibiga saylana olmaydilar.

Mandat komissiyasi va qoʻmitalar tarkibiga saylangan Oʻzbekiston Respublikasi xalq deputatlarining hammasi teng huquqlardan foydalanadi.

Mandat komissiyasi yoki qoʻmita tarkibiga saylanmagan Oʻzbekiston Respublikasi xalq deputati ularning ishida maslahat ovozi huquqi bilan ishtirok etishi mumkin.

Deputatlarning Mandat komissiyasi va qoʻmitalardagi vakolatlarini Oʻzbekiston Respublikasi Oliy Kengashi shu kishilarning iltimoslariga koʻra, shuningdek, ularning oʻz vazifalarini bajarishini mumkin boʻlmaydigan qilib qoʻyadigan holatlar munosabati bilan muddatidan avval toʻxtatish mumkin.

Mandat komissiyasi va qoʻmitalar tarkibini yangilash toʻgʻrisidagi takliflarni Mandat komissiyasi va qoʻmitalar muhokama qiladi va bu takliflar Oʻzbekiston Respublikasi Oliy Kengashi rayosatining roziligi bilan ularning raislari tomonidan Oʻzbekiston Respublikasi Oliy Kengashida koʻrib chiqish uchun kiritiladi.

Oʻzbekiston Respublikasi Oliy Kengashining Mandat komissiyasi yoki qoʻmitalari tarkibiga saylangan Oʻzbekiston Respublikasi xalq deputatlari komissiya yoki qoʻmitaning taklifiga muvofiq Oʻzbekiston Respublikasi Oliy Kengashi Rayosatining qarori bilan Oʻzbekiston Respublikasi Oliy Kengashi, uning Rayosati, Mandat komissiyasi va qoʻmitalarning topshiriqlarini bajarish uchun zarur boʻlgan davrga ishlab chiqarish yoki xizmat vazifalarini bajarishdan ozod etilishlari mumkin, bunda ularning deputatlik faoliyati bilan bogʻliq xarajatlari Oʻzbekiston Respublikasi budjeti mablagʻlari hisobidan qoplanadi.

Oʻzbekiston Respublikasi Oliy Kengashining Mandat komissiyasi va qoʻmitalari Oʻzbekiston Respublikasi Oliy Kengashi oldida masʼuldirlar va unga hisob beradilar.

Oʻzbekiston Respublikasi Oliy Kengashining Mandat komissiyasi va qoʻmitalari ishini yuritish, ularning huquq va burchlari, ularni tuzish tartibi va faoliyati masalalari Oʻzbekiston Respublikasi Konstitutsiyasi, Oʻzbekiston Respublikasi qonunlari, Oʻzbekiston Respublikasi Oliy Kengashining Ish tartibi, ushbu Qonun bilan va shularga muvofiq Oʻzbekiston Respublikasi Oliy Kengashi tomonidan belgilanadi.

Oʻzbekiston Respublikasi Oliy Kengashining Mandat komissiyasi va qoʻmitalari oʻz ishlarini masalalarni kollektiv ravishda, erkin muhokama qilish va hal etish, oshkoralik hamda Mandat komissiyasi va qoʻmitalar aʼzolarining keng tashabbuskorligi asosida tashkil etadilar.

Oʻzbekiston Respublikasi Konstitutsiyasining 109-moddasiga muvofiq Oʻzbekiston Respublikasi Oliy Kengashi Mandat komissiyasi va Qoʻmitalarining raislari lavozimlariga koʻra Oʻzbekiston Respublikasi Oliy Kengashi Rayosati tarkibiga kiradilar.

Oʻzbekiston Respublikasi Oliy Kengashi qoʻmitasining Raisi boshqa biror-bir haq toʻlanadigan lavozimni egallashi mumkin emas.

Oʻzbekiston Respublikasi Oliy Kengashining Rayosati Oʻzbekiston Respublikasi Oliy Kengashi Mandat komissiyasi va qoʻmitalari faoliyatini muvofiqlashtirib turadi.

Oʻzbekiston Respublikasi Oliy Kengashi Rayosati:

qoʻmitalarning kelishib bahamjihat ishlashni tashkil etish uchun zarur chora-tadbirlar koʻradi;

xalq deputatlarini, davlat va jamoat idoralari vakillari Mandat komissiyasi va qoʻmitalarning majlislaridan xabardor qilib turadi;

Mandat komissiyasi va qoʻmitalarni ular qarab chiqadigan masalalarga doir materiallar va hujjatlar bilan oʻz vaqtida taʼminlaydi;

Qoʻmitalar faoliyati ilmiy-metodik, texnikaviy jihatdan taʼminlanishga koʻmaklashadi, ularga huquqiy, tashkiliy va boshqa zarur yordam koʻrsatadi;

Sessiyalarning kun tartibi va ish tartibi loyihalarini tayyorlash chogʻida Mandat komissiyasi va qoʻmitalarning takliflarini umumlashtiradi hamda ularni Oʻzbekiston Respublikasi Oliy Kengashi muhokamasiga topshiradi.

Oʻzbekiston Respublikasi Oliy Kengashining Mandat komissiyasi va qoʻmitalari ishlarni oʻz rejalariga, Oʻzbekiston Respublikasi Oliy Kengashi, Oʻzbekiston Respublikasi Oliy Kengashi Rayosati, Oʻzbekiston Respublikasi Oliy Kengashining Raisi va uning oʻrinbosarlari topshiriqlari va tavsiyalariga muvofiq tashkil etadi.

Oʻzbekiston Respublikasi Oliy Kengashining Mandat komissiyasi va qoʻmitalari oʻz zimmalariga yuklatilgan vazifalarni yuksak samara bilan hal etish maqsadida oʻz tarkibidan faoliyatning asosiy yoʻnalishlari boʻyicha tayyorlov komissiyalarini tuzish mumkin.

Oʻzbekiston Respublikasi Oliy Kengashining Mandat komissiyasi va qoʻmitalari oʻzlari qarab chiqayotgan masalalarni tayyorlash hamda puxta ishlab chiqish uchun oʻz ishlariga komissiya va qoʻmitalar tarkibiga kirmagan Oʻzbekiston Respublikasi xalq deputatlarini jalb etishga, ishchi guruhlari tuzishga haqlidirlar. Ishchi guruhlariga Oʻzbekiston Respublikasi xalq deputatlari bilan birga vazirliklarning, davlat qoʻmitalarining, idoralarning, boshqa davlat va jamoat idoralari va tashkilotlarining, ilmiy muassasalarning vakillari, olimlar, mutaxassislar kirishi mumkin. Oʻzbekiston Respublikasi Oliy Kengashining Mandat komissiyasi, qoʻmitalari qoʻshma ishchi guruhlari tuzishlari mumkin. Ishchi guruhlari tarkibida ishlash davrida mutaxassislar va olimlarning asosiy ish joylaridagi oʻrtacha ish haqlari Oʻzbekiston Respublikasi Qonunlariga muvofiq saqlanib qoladi.

Oʻzbekiston Respublikasi Oliy Kengashining Mandat komissiyasi va qoʻmitalari oʻzlarining ixtiyoridagi masalalarni qarab chiqish chogʻida teng huquqlardan foydalanadilar hamda teng vazifalarni bajaradilar.

Oʻzbekiston Respublikasi Oliy Kengashi Mandat komissiyasi va qoʻmitalarining aʼzolari Mandat komissiyasi va qoʻmitalar faoliyatida ishtirok etishlari, ularning qarorlarini amalga oshirishga koʻmaklashishlari, komissiya va qoʻmitalarning topshiriqlarini bajarishlari shart.

Mandat komissiyasi yoki qoʻmitaning aʼzosi komissiya yoki qoʻmita qarab chiqayotgan barcha masalalarda hal qiluvchi ovozdan foydalanadi, komissiyada va qoʻmitada qarab chiqish uchun istalgan masalalarni va takliflarni kiritish, ularni tayyorlash, muhokama qilish va qaror qabul qilishda, shuningdek Oʻzbekiston Respublikasi Oliy Kengashi, Mandat komissiyasi va qoʻmitaning qarorlarini bajarishni tashkil etishda qatnashish huquqiga ega.

Mandat komissiyasi yoki qoʻmita tomonidan takliflari qoʻllab-quvvatlanmagan Mandat komissiyasi yoki qoʻmitaning aʼzosi ushbu masala Oʻzbekiston Respublikasi Oliy Kengashida muhokama qilinayotgan paytda takliflarini yozma yoki ogʻzaki tarzda kiritishi mumkin.

Mandat komissiyasi yoki qoʻmita aʼzosiga komissiya yoki qoʻmita qarab chiqayotgan barcha masalalarni hal etishda faol qatnashish uchun sharoit yaratib beriladi, buning uchun zarur hujjatlar va boshqa materiallar unga oldindan yuboriladi.

Oʻzbekiston Respublikasi Oliy Kengashi Mandat komissiyasi va qoʻmitalarining aʼzolari komissiya va qoʻmitalarning topshirigʻiga binoan hamda oʻz tashabbuslari bilan masalalarni joylarda oʻrganadilar, davlat va jamoat idoralari hamda tashkilotlarining, shuningdek fuqarolarning takliflarini umumlashtiradilar hamda komissiya yoki qoʻmitalarga oʻz xulosa va takliflarini maʼlum qiladilar.

Oʻzbekiston Respublikasi Oliy Kengashi Mandat komissiya va qoʻmitalarining majlislari zaruratga qarab chaqiriladi va Oʻzbekiston Respublikasi Oliy Kengashining majlislari oʻrtasida ham, shuningdek sessiyalar oraligʻidagi davrda ham oʻtkaziladi.

Oʻzbekiston Respublikasi Oliy Kengashi Mandat komissiyasi va qoʻmitalarning majlislari, agar ularda komissiya yoki qoʻmita tarkibining kamida yarmi hozir boʻlsa, qonuniy kuchga ega boʻladi. Majlisga kelish imkoniyati boʻlmagan taqdirda komissiya yoki qoʻmita aʼzosi bu haqda Mandat komissiyasi yoki qoʻmita raisiga xabar qiladi.

Mandat komissiyasi va qoʻmitalar yoki bir necha qoʻmita ixtiyoridagi masalalar Mandat komissiyasi va qoʻmitalar tomonidan hamkorlikda tayyorlanishi hamda qarab chiqilishi mumkin.

Mandat komissiyasi va qoʻmitaning yoki qoʻshma majlislarini ularning raislari oʻzaro kelishgan holda boshqaradilar.

Mandat komissiyasi yoki qoʻmita oʻzi qarab chiqayotgan masalalar boʻyicha boshqa qoʻmitalarning fikrini soʻrashi mumkin.

Agar Mandat komissiyasi yoki qoʻmitalar qarab chiqmoq uchun oʻziga topshirilgan masala boshqa qoʻmitaga ham daxldor deb hisoblasa, yoki boshqa qoʻmita qarab chiqayotgan masala yuzasidan oʻz fikrini bildirishi zarur deb topsa, u holda Oʻzbekiston Respublikasi Oliy Kengashiga, Oʻzbekiston Respublikasi Oliy Kengashi Rayosatiga yoki Oʻzbekiston Respublikasi Oliy Kengashining Raisiga bu xususda taklif kiritishga haqli.

Mandat komissiyasining, boshqa qoʻmitalarning iltimosiga binoan qoʻmita oʻz ixtiyoridagi masalalar boʻyicha shu komissiya yoki qoʻmitalar qarab chiqayotgan masalalarni tayyorlashda qatnashishi mumkin.

Aynan bir masala boʻyicha Mandat komissiyasi, qoʻmitalarning fikri turlicha boʻlgan taqdirda ular kelishmovchilikni bartaraf etish choralarini koʻradilar. Ana shu maqsadda ushbu qoʻmitalar tarkibiga kiradigan xalq deputatlari orasidan murosaga keltiruvchi guruhlar tuzilishi mumkin. Agar ular kelisha olmasalar, oʻz takliflarini Oʻzbekiston Respublikasi Oliy Kengashining Raisi, Oʻzbekiston Respublikasi Oliy Kengashining Rayosati, zarur hollarda esa Oʻzbekiston Respublikasi Oliy Kengashi eʼtiboriga yetkazadilar.

Koʻrib chiqilayotgan masalalar yuzasidan Mandat komissiyasi, qoʻmitalar tavsiya tarzida qarorlar qabul qiladilar va xulosalar chiqaradilar.

Oʻzbekiston Respublikasi Oliy Kengashining Mandat komissiyasi va qoʻmitalarida barcha masalalar komissiya yoki qoʻmita aʼzolari umumiy tarkibining oddiy koʻpchilik ovozi bilan hal etiladi.

Qoʻshma majlislar oʻtkazilayotganda qarorlar Mandat komissiyasi yoki qoʻmitalar aʼzolari umumiy tarkibining oddiy koʻpchilik ovozi bilan qabul qilinadi.

Oʻzbekiston Respublikasi Oliy Kengashi Mandat komissiyasi, qoʻmitalarining majlislari ochiq oʻtkaziladi. Majlislarga davlat va jamoat idoralari hamda tashkilotlarining, ilmiy muassasalarning vakillari, mutaxassislar va olimlar taklif etilishi mumkin, ular majlislarda maslahat ovozi huquqi bilan qatnashadilar.

Zarur boʻlgan taqdirda Mandat komissiyasi yoki qoʻmita yopiq majlis oʻtkazish toʻgʻrisida qaror qabul qilishi mumkin.

Mandat komissiyasi yoki qoʻmitaning raisi ularning ishiga rahbarlik qilar ekan:

zarur materiallarning tayyorlanishini tashkil etadi, komissiya yoki qoʻmitaning majlislarini chaqiradi va ularda raislik qiladi;

komissiya yoki qoʻmita aʼzolariga topshiriqlar beradi, ularga komissiya yoki qoʻmita faoliyati bilan bogʻliq materiallar va hujjatlarni yuboradi;

tayyorlov komissiyalari va ishchi guruhlarining ishida qatnashish uchun, shuningdek komissiya yoki qoʻmitaning boshqa topshiriqlarini bajarish uchun komissiya yoki qoʻmita aʼzolarini chaqiradi;

davlat va jamoat idoralari hamda tashkilotlarining vakillarini, mutaxassis va olimlarni komissiya yoki qoʻmita ishida qatnashishga taklif etadi;

Oʻzbekiston Respublikasi Oliy Kengashining sessiyalarida, davlat va jamoat idoralari hamda tashkilotlari bilan boʻladigan munosabatlarda komissiya yoki qoʻmita nomidan vakillik qiladi;

Komissiya yoki qoʻmita qarorlarini bajarish yuzasidan ishlarni tashkil etadi;

Oʻzbekiston Respublikasi Oliy Kengashiga uning topshiriqlarini bajarish yuzasidan axborot beradi;

Komissiya yoki qoʻmitaning qarorlari bajarilganligi va uning tavsiyalari qarab chiqilganligi haqida komissiya yoki qoʻmita aʼzolariga axborot beradi.

Mandat komissiya yoki qoʻmita raisining oʻrinbosari rais bergan vakolatga koʻra uning ayrim vazifalarini bajaradi hamda rais yoʻq boʻlganda yoki u oʻz vazifalarini bajara olmaydigan hollarda rais vazifasini bajarib turadi.

Mandat komissiyasining yoki qoʻmitaning kotibi komissiya yoki qoʻmita Oʻzbekiston Respublikasi Oliy Kengashi Kotibiyatining tegishli boʻlinmalari bilan samarali ishlashini taʼminlaydigan muvofiqlashtirish ishlarini amalga oshiradi:

komissiya yoki qoʻmita ish rejasining loyihasini tayyorlaydi;

uning bajarilishini nazorat qiladi;

komissiya yoki qoʻmitaning yozishmalarini va ish qogʻozlari yuritishni idora qiladi.

Mandat komissiyasi yoki qoʻmitaning qarorlari, xulosalari va majlis bayonlarini komissiya yoki qoʻmita raisi imzolaydi.

Mandat komissiyasi va qoʻmitalarning birgalikda qabul qilgan qarorlari hamda ular tomonidan hamkorlikda tayyorlangan xulosalarni, shuningdek birgalikdagi majlislarning bayonlarini ularning raislari imzolaydilar.

Oʻzbekiston Respublikasi Konstitutsiyasining 107-moddasiga muvofiq Oʻzbekiston Respublikasi Oliy Kengashining Mandat komissiyasi va qoʻmitalari Oʻzbekiston Respublikasi Oliy Kengashida qonun loyihalari taklif etishga teng huquqlidirlar.

Qonun loyihalarini taklif etish huquqi Oʻzbekiston Respublikasining yangi qonun loyihalarini, Oʻzbekiston Respublikasining amaldagi qonunlarini oʻzgartirish toʻgʻrisidagi qonun loyihalarini kiritish shaklida, shuningdek Oʻzbekiston Respublikasining yangi qonunlarini qabul qilish yoki Oʻzbekiston Respublikasining amaldagi qonunlariga oʻzgartirishlar kiritish haqidagi takliflarni (qonunchilik borasidagi takliflarni) kiritish shaklida amalga oshiriladi.

Oʻzbekiston Respublikasi Oliy Kengashining Mandat komissiyasi va qoʻmitalari Oʻzbekiston Respublikasi Oliy Kengashi Rayosatiga Oʻzbekiston Respublikasining qonun loyihalarini va davlat hayotining boshqa gʻoyat muhim masalalarini xalq muhokamasiga qoʻyish toʻgʻrisida taklif kiritishga haqlidir.

Fuqarolardan, mehnat jamoalaridan, muassasalardan va tashkilotlardan qonun loyihalari va boshqa masalalar yuzasidan muhokama davomida tushgan takliflar amaldagi qonunlarda belgilangan tartibda qarab chiqiladi va umumlashtiriladi.

Oʻzbekiston Respublikasi Oliy Kengashining Mandat komissiyasi va qoʻmitalari Oʻzbekiston Respublikasi Oliy Kengashi sessiyasining kun tartibi yuzasidan takliflar kiritish, oʻz ixtiyorlaridagi masalalar boʻyicha Oʻzbekiston Respublikasi Oliy Kengashi majlislarida maʼruza va qoʻshimcha maʼruza bilan soʻzga chiqish huquqiga ega.

Mandat komissiyasi va qoʻmitalar oʻzlari Oʻzbekiston Respublikasi Oliy Kengashiga kiritgan masalalar boʻyicha yoxud dastlabki tarzda yoki qoʻshimcha ravishda qarab chiqish uchun komissiyaga yo boʻlmasa qoʻmitalarga berilgan masalalar boʻyicha oʻz maʼruzachilari yoki qoʻshimcha maʼruzachilarini belgilaydilar.

Mandat komissiyasi va qoʻmitalar oʻzlari birgalikda tayyorlagan masalalar boʻyicha qoʻshma maʼruzalar yoki qoʻshimcha maʼruzalar bilan soʻzga chiqishlari yoxud oʻz taklif va mulohazalarni alohida taqdim etishlari mumkin.

Oʻzbekiston Respublikasi Konstitutsiyasining 113-moddasiga muvofiq Mandat komissiyasi va qoʻmitalar Oʻzbekiston Respublikasi Prezidentiga, Oʻzbekiston Respublikasi Oliy Kengashining Raisiga, Oʻzbekiston Respublikasi Oliy Kengashi tuzadigan yoki saylaydigan boshqa idoralarning rahbarlariga, shuningdek Oʻzbekiston Respublikasi hududida joylashgan ishlab chiqarish birlashmalari, korxonalar, muassasalar, tashkilotlar rahbarlariga Oʻzbekiston Respublikasi ixtiyoridagi masalalar yuzasidan soʻrov bilan murojaat etish huquqiga egalar.

Oʻzbekiston Respublikasi Konstitutsiyasining 112-moddasiga muvofiq Oʻzbekiston Respublikasi Oliy Kengashining Mandat komissiyasi va qoʻmitalari oʻz ixtiyorlaridagi masalalar boʻyicha davlat va jamoat idoralari hamda tashkilotlaridan, mansabdor shaxslardan hujjatlar, yozma xulosalar, hisobot maʼlumotlari va boshqa materiallarni berishni talab qilishga haqlidirlar.

Barcha davlat va jamoat idoralari, tashkilotlar va mansabdor shaxslar Mandat komissiyasi va qoʻmitalarning talablarini bajarishlari, ularga zarur materiallarni va hujjatlarni berishlari shart.

Davlat va jamoat tashkilotlarining rahbarlari, boshqa mansabdor shaxslar Oʻzbekiston Respublikasi Oliy Kengashining Mandat komissiyasi va qoʻmitalariga notoʻgʻri axborot berganliklari yoxud axborotni atayin yashirganliklari uchun Oʻzbekiston Respublikasi qonunlariga muvofiq javobgar boʻladilar.

Oʻzbekiston Respublikasi Oliy Kengashining Mandat komissiyasi va qoʻmitalari oʻz ixtiyorlaridagi masalalar boʻyicha Oʻzbekiston Respublikasi Hukumatiga takliflar bilan kirish huquqiga egadirlar.

Oʻzbekiston Respublikasi Oliy Kengashining Mandat komissiyasi va qoʻmitalari Oʻzbekiston Respublikasi Hukumatining aʼzolarini, Oʻzbekiston Respublikasi vazirliklari, davlat qoʻmitalari va idoralarining rahbarlarini, Qoraqalpogʻiston MSSR Vazirlar Kengashi, viloyat ijroiya qoʻmitalari, Toshkent shahar ijroiya qoʻmitasining, Oʻzbekiston Respublikasi hududida joylashgan korxonalar, muassasalar va tashkilotlarning rahbarlarini oʻz majlislariga taklif etib, ularning Oʻzbekiston Respublikasi qonunlari, Oʻzbekiston Respublikasi Oliy Kengashining qarorlari, Mandat komissiyasi va qoʻmitalarning tavsiyalari qanday bajarilayotgani haqidagi axborotlarini tinglashga haqlidirlar.

Mandat komissiyasi yoki qoʻmitaning taklifiga koʻra mazkur tashkilotning rahbarlari yoki vakillari komissiya yoki qoʻmitaning majlisiga kelishga hamda ular qarab chiqayotgan masalalar boʻyicha tushuntirishlar berishga majburdirlar.

Mandat komissiyasi va qoʻmitalar tegishli idoralar va tashkilotlarni qarab chiqiladigan masalalar xususida barvaqt xabardor qiladilar.

Oʻzbekiston Respublikasi vazirliklari, davlat qoʻmitalari va idoralari, boshqa umumittifoq, respublika va mahalliy davlat hamda jamoat idoralari va tashkilotlarining faoliyatiga doir masalalar boʻyicha Oʻzbekiston Respublikasi Oliy Kengashining Mandat komissiyasi va qoʻmitalari ishlab chiqqan tavsiyalar tegishli idoralarga va tashkilotlarga yuboriladi hamda zarur hollarda Oʻzbekiston Respublikasi Oliy Kengashi Rayosatiga, Oʻzbekiston Respublikasi Hukumatiga maʼlum qilinadi.

Oʻzbekiston Respublikasi Konstitutsiyasining 112-moddasiga muvofiq Oʻzbekiston Respublikasi Oliy Kengashi Mandat komissiyasi va qoʻmitalarining tavsiyalarini davlat hamda jamoat idoralari va tashkilotlari koʻrib chiqishlari shart. Koʻrib chiqish natijalari yoki koʻrilgan choralar haqida komissiya yoki qoʻmitalarga, agar Mandat komissiyasi yoki qoʻmitalar boshqa muddat belgilagan boʻlmasalar, uzogʻi bilan bir oy muddat ichida xabar berilishi lozim.

Oʻzbekiston Respublikasi Konstitutsiyasining 116-moddasiga muvofiq Oʻzbekiston Respublikasi Oliy Kengashining Mandat komissiyasi va qoʻmitalari Oʻzbekiston Respublikasi Konstitutsiyaviy nazorat qoʻmitasi tomonidan davlat idoralari va jamoat tashkilotlarining hujjatlari Oʻzbekiston Respublikasi Konstitutsiyasiga hamda Oʻzbekiston Respublikasining qonunlariga qanchalik muvofiqligi toʻgʻrisida xulosalar tayyorlash xususida taklif kiritish mumkin.

Oʻzbekiston Respublikasi Konstitutsiyasining 112-moddasiga muvofiq Oʻzbekiston Respublikasi qonunlari va Oʻzbekiston Respublikasi Oliy Kengashining boshqa qarorlari, qoida tariqasida, ularning loyihalari Oʻzbekiston Respublikasi Oliy Kengashining Mandat komissiyasida, tegishli qoʻmitalarida dastlabki tarzda muhokama etilgandan keyin qabul qilinadi. Qonunlarni tayyorlash, qabul qilish, ushbu masalalarda Oʻzbekiston Respublikasi Oliy Kengashi Mandat komissiyasi va qoʻmitalarining ishtirok etish tartibi Oʻzbekiston Respublikasi Oliy Kengashining ish tartibi bilan belgilanadi.

Oʻzbekiston Respublikasi Oliy Kengashining Mandat komissiyasi va qoʻmitalari Oʻzbekiston Respublikasi Oliy Kengashi, Oʻzbekiston Respublikasi Oliy Kengashi Rayosatining, Oʻzbekiston Respublikasi Oliy Kengashi Raisining topshirigʻiga binoan yoki oʻz tashabbuslariga koʻra komissiya yoki qoʻmitalar ixtiyoridagi masalalar yuzasidan Oʻzbekiston Respublikasi qonunlarining hamda Oʻzbekiston Respublikasi Oliy Kengashi boshqa qarorlarining hamda Oʻzbekiston Respublikasi Oliy Kengashi boshqa qarorlarining loyihalarini ishlab chiqadilar, qonunlarni takomillashtirish bilan bogʻliq masalalarni tayyorlaydilar.

Oʻzbekiston Respublikasi Oliy Kengashining qoʻmitalari davlat, xoʻjalik va ijtimoiy-madaniy qurilishning tegishli tarmoqlaridagi ahvol hamda ularni rivojlantirish masalalarini dastlabki tarzda qarab chiqadilar va tayyorlaydilar, shu masalalar yuzasidan takliflar ishlab chiqadilar.

Oʻzbekiston Respublikasi Konstitutsiyasining 112-moddasiga muvofiq Oʻzbekiston Respublikasi Oliy Kengashi Rayosatiga yoki Oʻzbekiston Respublikasi Oliy Kengashining Raisiga kelib tushgan qonun loyihalari yoki qonun chiqarish haqidagi takliflar dastlabki tarzda qarab chiqish hamda ular ustida bundan buyon ish olib borish tartibi toʻgʻrisida takliflar tayyorlash uchun Oʻzbekiston Respublikasi Oliy Kengashining Mandat komissiyasi yoki tegishli qoʻmitalariga va ayni bir vaqtda Oʻzbekiston Respublikasi Oliy Kengashining Qonunchilik, qonuniylik va huquq-tartibot masalalari qoʻmitasiga yuboriladi. Oʻzbekiston Respublikasi Oliy Kengashi yoki Oʻzbekiston Oliy Kengashining Rayosati qonun loyihasi tayyorlovchi bosh qoʻmitani belgilaydi.

Oʻzbekiston Respublikasi qonunlarining loyihalari va qonun chiqarish haqidagi takliflar qarab chiqmoq uchun ularni ishlab chiqish zarurligi asoslangan, boʻlgʻusi qonunlarning maqsadlari, vazifalari va asosiy qoidalari batafsil taʼriflangan holda, shuningdek ularni qoʻllashdan kutilayotgan ijtimoiy-iqtisodiy oqibatlarni koʻrsatgan holda taqdim etiladi. Bunda qonun loyihasini tayyorlashda ishtirok etgan jamoalar va shaxslar koʻrsatiladi. Amalga oshirilishi qoʻshimcha moddiy va boshqa xarajatlarni talab qiladigan loyihalarni taqdim etish chogʻida uni moliyaviy-iqtisodiy asoslaydigan hujjatlar ilova etiladi.

Oʻzbekiston Respublikasi qonun loyihalarini yoki qonun chiqarish haqidagi takliflarni qarab chiqish tartibini Mandat komissiyasi yoki tegishli qoʻmita Oʻzbekiston Respublikasi Oliy Kengashi Ish tartibining talablariga muvofiq mustaqil belgilaydi.

Deputatlarning tayyorlov komissiyasi yoki ishchi guruhi tayyorlanayotgan loyihani xalq deputatlari tegishli Sovetlarining ishtirokida joylarda — mehnat jamoalarida, ilmiy muassasalarda, jamoat tashkilotlarida, fuqarolarning yigʻilishlarida, ijtimoiy tashabbuskor idoralarda dastlabki tarzda muhokama qilish haqida shu qonun loyihasi yoki qonun chiqarish haqidagi taklif boʻyicha bosh deb hisoblangan komissiya yoki qoʻmita roziligi bilan qaror qabul qilishga haqli.

Qonun loyihasini muhokama qilish davomida tushgan taklif va mulohazalar deputatlar tayyorlov guruhi tomonidan hamda bu guruhning ish natijalari toʻgʻrisidagi maʼruzasi boʻyicha bosh qoʻmitaning majlislarida qarab chiqiladi.

Zarur hollarda qonun loyihalari ilmiy ekspertizaga yuboriladi, ular yuzasidan Oʻzbekiston Respublikasi Hukumatining xulosasi, Oʻzbekiston Respublikasi hamda Qoraqalpogʻiston MSSR tegishli vazirliklari va idoralarining, davlat va jamoat idoralarining, shuningdek mutaxassis olimlarning fikri soʻralishi mumkin.

Mandat komissiyasi va qoʻmitalar oʻrganib chiqish uchun oʻzlariga berilgan qonun loyihalarini dastlabki tarzda qarab chiqish natijalari yuzasidan Oʻzbekiston Respublikasi Oliy Kengashi Rayosatiga yoki Oʻzbekiston Respublikasi Oliy Kengashiga oʻz xulosalarini taqdim etadilar. Xulosalarda Oʻzbekiston Respublikasi qonuni loyihasini Oʻzbekiston Respublikasi Oliy Kengashining navbatdagi sessiyasi kun tartibiga kiritish yoxud qonun loyihasini rad etish yoki qonun loyihasi ustida ishlashni xuddi shu yoki boshqa tarkibda davom ettirish toʻgʻrisidagi taklif boʻladi.

Qonun loyihasini birinchi oʻqishda muhokama qilish chogʻida qonun loyihasining tashabbuskori boʻlgan bosh komissiya yoki qoʻmita Oʻzbekiston Respublikasi Oliy Kengashining sessiyasida maʼruza qiladi, tashabbuskor boʻlmagan komissiya yoki qoʻmita esa qoʻshimcha maʼruza qiladi.

Shundan keyingi oʻqishlarda Mandat komissiyasi yoki qoʻmitalar maʼruza bilan ham, qoʻshimcha maʼruzalar bilan ham chiqishlari mumkin.

Oʻzbekiston Respublikasi Konstitutsiyasining 102 va 112-moddalariga muvofiq Oʻzbekiston Respublikasi Vitse-prezidentini, Oʻzbekiston Respublikasi Vazirlar Mahkamasi Raisning birinchi oʻrinbosarlarini, oʻrinbosarlarini, Oʻzbekiston Respublikasi Prezidenti huzuridagi Vazirlar Mahkamasi, Oʻzbekiston Respublikasi Oliy sudi tarkibiga kiruvchi boshqa mansabdor shaxslarni, Oʻzbekiston Respublikasi Prokurori, Oʻzbekiston Respublikasi Xalq nazorati qoʻmitasi raisini, Oʻzbekiston Respublikasi Oliy hakamlik sudi Raisini, viloyat va Toshkent shahar sudlarining sudʼyalarini, Oʻzbekiston Respublikasi Tabiatni muhofaza qilish davlat qoʻmitasining raisini, Oʻzbekiston Respublikasi Davlat banki Boshqaruvining raisini tasdiqlash, tayinlash yoki saylash, Hukumat tomonidan tayyorlangan Oʻzbekiston Respublikasi budjetini, respublikani iqtisodiy va ijtimoiy rivojlantirishning eng muhim respublika dasturini tasdiqlash, shuningdek tasdiqlangan budjetni, dasturlarni oʻzgartirish toʻgʻrisidagi takliflarni tasdiqlash Oʻzbekiston Respublikasi Oliy Kengashi tegishli qoʻmitalarining xulosalari mavjud boʻlgan taqdirda amalga oshiriladi.

Oʻzbekiston Respublikasi Oliy Kengashi tomonidan saylanishi, tasdiqlanishi yoki tayinlanishi kerak boʻlgan mansabdor shaxslarning nomzodlarini Oʻzbekiston Respublikasi Oliy Kengashining qoʻmitalarida dastlabki tarzda muhokama qilish tartibi Oʻzbekiston Respublikasi Oliy Kengashi Rayosati yoki Oʻzbekiston Respublikasi Oliy Kengashi tomonidan belgilanadi.

Oʻzbekiston Respublikasi Oliy Kengashining tegishli qoʻmitalariga Oʻzbekiston Respublikasi Oliy Kengashi Rayosati yoxud Oʻzbekiston Respublikasi Oliy Kengashining Raisi Oʻzbekiston Respublikasi Xalq nazorati qoʻmitasi, Oʻzbekiston Respublikasi Oliy sudi va Oʻzbekiston Respublikasi Oliy hakamlik sudining hisobotlarini xulosalar berish uchun yuboradi, qoʻmitalar oʻz xulosalari bilan birga ushbu hisobotlar yuzasidan Oʻzbekiston Respublikasi Oliy Kengashi qarorlarining loyihalarini tayyorlaydilar.

Oʻzbekiston Respublikasi Oliy Kengashining Mandat komissiyasi va qoʻmitalari Oʻzbekiston Respublikasi xalq deputatlariga berilgan nakazlar boʻyicha taklif va mulohazalar kiritadilar. Mandat komissiyasi va qoʻmitalarning taklif hamda mulohazalarini hisobga olgan holda Oʻzbekiston Respublikasi Oliy Kengashi Rayosati va Oʻzbekiston Respublikasi Prezidenti huzuridagi Vazirlar Mahkamasi Oʻzbekiston Respublikasi xalq deputatlariga berilgan nakazlarni umumlashtiradilar va dastlabki tarzda qarab chiqadilar.

Qoʻmitalar oʻzlariga Oʻzbekiston Respublikasi Oliy Kengashi Rayosati yoʻllagan Oʻzbekiston Respublikasi budjetining loyihalarini, uning ijrosi toʻgʻrisidagi hisobotlarni, shuningdek Oʻzbekiston Respublikasini iqtisodiy va ijtimoiy rivojlantirishning gʻoyat muhim dasturlari loyihalarini dastlabki tarzda qarab chiqadilar hamda ana shu loyihalar va tegishli qonun hamda qarorlarning loyihalari yuzasidan oʻz xulosalarini tayyorlaydilar.

Oʻzbekiston Respublikasi Oliy Kengashining qoʻmitalari Oʻzbekiston Respublikasi Oliy Kengashiga taqdim etish uchun Oʻzbekiston Respublikasi budjeti, iqtisodiy va ijtimoiy rivojlantirish dasturlarining yoki ularning ayrim boʻlimlarining muqobil variantlarini ishlab chiqishlari mumkin.

Oʻzbekiston Respublikasi Oliy Kengashining qoʻmitalari Oʻzbekiston Respublikasi budjeti, shuningdek iqtisodiy va ijtimoiy rivojlantirishning eng muhim dasturlari Oliy Kengash sessiyasida qarab chiqilishidan kamida ikki hafta oldin Plan va budjet-moliya masalalari qoʻmitasiga budjet, iqtisodiy va ijtimoiy rivojlanish dasturlari yuzasidan, shuningdek Oʻzbekiston Respublikasining tegishli qonunlari hamda Oʻzbekiston Respublikasi Oliy Kengashining qarorlari loyihalari yuzasidan oʻz taklif va mulohazalarini maʼlum qiladilar.

Oʻzbekiston Respublikasi Oliy Kengashining topshirigʻiga, Oʻzbekiston Respublikasi Oliy Kengashi Rayosatining tavsiyalariga binoan, Oʻzbekiston Respublikasi Oliy Kengashining Mandat komissiyasi va qoʻmitalari saylovchilari nakazlarini amalga oshirish tadbirlarining, shuningdek Oʻzbekiston Respublikasi Oliy Kengashi sessiyalarida xalq deputatlari bildirgan taklif va tanqidiy mulohazalar, soʻrovlarning bajarilishini nazorat qiladilar.

Oʻzbekiston Respublikasi Oliy Kengashining Mandat komissiyasi, qoʻmitalari Oʻzbekiston Respublikasi Prezidenti huzuridagi Vazirlar Mahkamasining butun ishi yuzasidan yoki faoliyatining ayrim masalalari boʻyicha uning hisobotini tinglash haqida takliflar kiritishi mumkin.

Oʻzbekiston Respublikasi Prezidenti huzuridagi Vazirlar Mahkamasining hisoboti natijalari boʻyicha qoʻmitalari va komissiya Oʻzbekiston Respublikasi Hukumatining ayrim aʼzolari egallab turgan lavozimlariga loyiqligi yoki loyiq emasligi haqida takliflar kiritishlari mumkin.

Oʻzbekiston Respublikasi Oliy Kengashining Mandat komissiyasi va qoʻmitalari oʻz faoliyatlarini oshkoralik asosida amalga oshiradilar, faoliyatlari haqida jamoatchilikni keng xabardor qiladilar. Mandat komissiyasining, qoʻmitalarning, tayyorlov komissiyalarining va ishchi guruhlarining majlislariga matbuot organlari, televideniye, radio va boshqa ommaviy axborot vositalarning vakillari taklif etilishi mumkin.

Mandat komissiyasi va qoʻmitalarning ishi toʻgʻrisidagi axborotlar “Oʻzbekiston Respublikasi Oliy Kengashining Axborotnomasi”da Oʻzbekiston Respublikasi Oliy Kengashining boshqa nashrlarida, respublika roʻznomalarida bosib chiqariladi, shuningdek televideniye va radio orqali eshittiriladi.

Oʻzbekiston Respublikasi Oliy Kengashi Mandat komissiyasi va qoʻmitalariga tashkiliy, texnikaviy va boshqa xizmatlar koʻrsatishni Oʻzbekiston Respublikasi Oliy Kengashining Kotibiyati taʼminlaydi.