Oʻzbekiston Respublikasining “Baholash faoliyati toʻgʻrisida”gi Qonuniga (Oʻzbekiston Respublikasi Oliy Majlisining Axborotnomasi, 1999-y., 9-son, 208-modda), Oʻzbekiston Respublikasi Prezidentining 2008-yil 24-apreldagi PQ-843-sonli “Baholovchi tashkilotlar faoliyatini yanada takomillashtirish va koʻrsatilayotgan xizmatlar sifati uchun ularning masʼuliyatini oshirish toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 18-son, 145-modda) muvofiq Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi qaror qiladi:

1. “Baholash faoliyati toʻgʻrisidagi maʼlumotlar” shakli 1-ilovaga muvofiq;

“Baholash faoliyati toʻgʻrisidagi maʼlumotlar” shaklini toʻldirish boʻyicha qoidalar 2-ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

1. Oʻzbekiston Respublikasi Prezidentining 2008-yil 24-apreldagi PQ-843-sonli “Baholovchi tashkilotlar faoliyatini yanada takomillashtirish va koʻrsatilayotgan xizmatlar sifati uchun ularning masʼuliyatini oshirish toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 18-son, 145-modda) muvofiq baholovchi tashkilotlar tomonidan baholash faoliyati toʻgʻrisidagi maʼlumotlarni (bundan keyingi oʻrinlarda — Maʼlumotlar) taqdim etish baholash faoliyatini amalga oshirishda litsenziya talablari va shartlaridan biri hisoblanadi.

2. Maʼlumotlar pochta yoki Internet tarmogʻi orqali 31-dekabr holatiga koʻra keyingi yilning 20-yanvaridan kechiktirmasdan Oʻzbekiston Respublikasi Davlat raqobat qoʻmitasiga taqdim etiladi. III va IV-boblarning koʻrsatkichlari 31-dekabr holatiga yil boshidan buyon jamlangan holda toʻldiriladi.

3. Maʼlumotlarda barcha rekvizitlar, satrlar va ustunlar toʻldirilishi lozim. Baholovchi tashkilotda tegishli maʼlumotlar mavjud boʻlmaganligi sababli u yoki bu satr (ustun) toʻldirilmagan taqdirda, ushbu satr (ustun) chizib qoʻyiladi. Maʼlumotlardagi yozuvlar yozuv mashinkalari, mexanizatsiya vositalari yoki axborot texnologiyalari yordamida bajarilishi lozim.

4. Maʼlumotlarning manzil qismi quyidagi tartibda toʻldiriladi:

“Baholovchi tashkilotining nomi”da — belgilangan tartibda roʻyxatga olingan taʼsis hujjatlariga muvofiq baholovchi tashkilotining toʻliq nomi koʻrsatiladi;

“Pochta manzili”da — belgilangan tartibda roʻyxatga olingan taʼsis hujjatlariga muvofiq toʻliq pochta manzili (pochta indeksi bilan birgalikda) koʻrsatiladi;

“Litsenziya raqami va berilgan sanasi, hamda baholash faoliyatining yoʻnalishi”da — berilgan litsenziyaning raqami va sanasi koʻrsatilgan holda baholash faoliyatining yoʻnalishi koʻrsatiladi;

“Ustav kapitali”da — amalda shakllantirilgan ustav kapitalining summasi koʻrsatiladi;

“Soliq toʻlovchining identifikatsiya raqami”da — baholovchi tashkilotning identifikatsiya raqami koʻrsatiladi;

“Professional baholovchilar birlashmalariga aʼzoligi”da — baholovchi tashkilot aʼzo boʻlgan baholovchilar jamoat birlashmasining nomi qayd etiladi;

“Telefon/faks, e-mail”ida — baholovchi aloqa telefoni raqami, elektron pochtasi (e-mail)ning manzili koʻrsatiladi.

5. Baholovchi tashkiloti filiallarining faoliyati toʻgʻrisidagi maʼlumotlar baholovchi tashkilotning Maʼlumotlariga kiritilishi lozim.

6. Maʼlumotlar baholovchi tashkilot rahbari tomonidan imzolanib, tashkilot muhri bilan (muhr mavjud boʻlgan taqdirda) tasdiqlanadi.

7. Maʼlumotlarda boʻyab tuzatishlar va oʻchirib yozishlar boʻlmasligi lozim. Xatolar tuzatilgan taqdirda rahbar tomonidan tasdiqlangan tegishli izohlar beriladi.

8. Maʼlumotlarda qiymatda ifodalangan koʻrsatkichlar ming soʻmda, boshqa koʻrsatkichlar — birlikda keltiriladi.

9. Baholovchi tashkilot amalda faoliyat koʻrsatgan vaqtidan qatʼi nazar, maʼlumotlar har yarim yilda toʻldiriladi.

10. “Baholovchi tashkiloti rahbari bobida quyidagilar koʻrsatiladi:

rahbarning familiyasi, ismi va sharifi (toʻliq) (01-satr);

rahbarning lavozimiga tayinlash toʻgʻrisidagi buyruqning raqami va sanasi (02-satr);

pasport maʼlumotlari, yashash joyi (pasport boʻyicha) (03-satr);

rahbarga berilgan baholovchi malaka sertifikatining raqami va sanasi (04-satr);

malaka oshirish kurslarini oʻtganligi toʻgʻrisida maʼlumotlar: kurslarni oʻtgan sanasi, kurslarni oʻtagan oʻquv markazining nomi (05-satr).

11. 06-satrda hisobot sanasi holatiga baholovchi tashkilotda ishlayotgan xodimlarning umumiy soni koʻrsatiladi.

12. 07-satrda hisobot sanasi holatiga baholovchi tashkilotda ishlayotgan baholovchilarning soni koʻrsatiladi. Qayd etilgan son shtatdagi baholovchilar (08-satr) va fuqarolik-huquqiy tusdagi shartnomalarga (09-satr) asosan ishlayotgan auditorlar boʻyicha taqsimlanadi.

07-satr koʻrsatkichi 08 va 09-satrlarning koʻrsatkichlari yigʻindisiga teng boʻlishi lozim.

13. “Baholovchilar toʻgʻrisida maʼlumot (shtatdagi va fuqarolik-huquqiy tusdagi shartnomalar boʻyicha jalb qilingan baholovchilar)” jadvalida baholovchining familiyasi, ismi va sharifi (1-ustun), uning lavozimga tayinlangan sanasi (2-ustun), malaka sertifikatining raqami va berilgan sanasi (3-ustun), baholovchi tomonidan malaka oshirilganligi sanasi va oʻtgan joyi (4-ustun) koʻrsatiladi.

Jadvalda koʻrsatilgan baholovchilarning soni 07-satrda keltirilgan songa teng boʻlishi lozim.

14. 10-satrning 3 va 4-ustunlarida hisobot davrida tuzilgan shartnomalarning umumiy soni va koʻrsatilgan xizmatlarning umumiy summasi, mos ravishda, qayd etiladi.

15. 11 — 18-satrlarning 3 va 4-ustunlarida baholashning turli maqsadlaridan kelib chiqqan holda tuzilgan shartnomalar soni va koʻrsatilgan xizmatlar summasi, mos ravishda, qayd etiladi.

16. 10-satr koʻrsatkichlari 11 — 18-satrlarning koʻrsatkichlari yigʻindisiga teng boʻlishi lozim.

17. “Baholangan mulk turiga qarab koʻrsatilgan xizmatlar hajmi” jadvalida:

19-satrning 3 va 4-ustunlarida hisobot davrida baholash xizmatlari boʻyicha tuzilgan shartnomalarning umumiy soni va summasi, mos ravishda, qayd etiladi. 5 va 6-ustunlarda oʻtgan yilning tegishli davri boʻyicha xuddi shunday koʻrsatkichlar aks ettiriladi;

20 — 27-satrlarning 3 va 4-ustunlarida baholangan mulk turlaridan kelib chiqqan holda tuzilgan shartnomalar soni va koʻrsatilgan xizmatlar summasi, mos ravishda, qayd etiladi. 5 va 6-ustunlarda oʻtgan yilning tegishli davri boʻyicha xuddi shunday koʻrsatkichlar aks ettiriladi.

19-satr koʻrsatkichlari 20 — 27-satrlarning koʻrsatkichlari yigʻindisiga teng boʻlishi lozim.

18. 28-29-satrlardagi 3-ustunda taqdim etilgan baholash hisobotlari va ekspert xulosalarining umumiy soni koʻrsatiladi. 4-ustunda taqdim etilgan baholash hisobotlari va ekspert xulosalarini tuzishning rad etish holatlari umumiy soni koʻrsatiladi.