“OʻzDEUavto” aksiyadorlik jamiyatida avtomobillarining yangi modellariga talabni va ularni ishlab chiqarishni kengaytirish istiqbollarini oʻrganish maqsadida:

1. Oʻzbekiston Respublikasi Iqtisodiyot vazirligi, Moliya vazirligi va “Oʻzavtosanoat” aksiyadorlik kompaniyasining:

sedan “Shevrole Epika” (DEU “Toska”) 1008 dona, yoʻlsiz joylarda yura oladigan “Shevrole Kaptiva” (DEU “Vinstorm”) — 696 dona, miniven “Shevrole Takuma” (DEU “Rezzo”) — 888 dona yangi avtomobillar modellarining yirik blokli ishlab chiqarishini tashkil etish toʻgʻrisidagi;

mazkur avtomobillar yangi modellari taqdimotini Oʻzbekistonda 2007-yilning 13-14-sentabri mobaynida oʻtkazish toʻgʻrisidagi taklifi qabul qilinsin.

2. Shunday tartib oʻrnatilsinki, unga muvofiq ushbu avtomobillarning yangi modellarini ishlab chiqarish va sotishdan “OʻzDEUavto” AJ oladigan daromad mamlakatimiz avtomobil tarmogʻini rivojlantirish boʻyicha yangi loyihalarni moliyalashtirish uchun “Oʻzavtosanoat” aksiyadorlik kompaniyasining jamgʻarib boriladigan maxsus hisob raqamiga yoʻnaltiriladi.

3. “Oʻzavtosanoat” aksiyadorlik kompaniyasi Oʻzbekistonda chuqur texnologiya boʻyicha birinchi bosqichda sedan “Shevrole Epika” (DEU “Toska”) modeli, ikkinchi bosqichda yoʻlsiz joylarda yura oladigan “Shevrole Kaptiva” (DEU “Vinstorm”) modelini sanoat koʻlamida ishlab chiqarishni tashkil etish masalasi yuzasidan “Jeneral Motors DEU Avto va Texnologiyalar” kompaniyasi bilan muzokaralar oʻtkazsin.

4. “OʻzDEUavto” aksiyadorlik jamiyatining yangi modellar ishlab chiqarish uchun yirik blokli butlovchi qismlarni import qilishga sarflanadigan valyuta xarajatlarini qoplashni taʼminlash uchun ichki bozorda mazkur modeldagi avtomobillarning 50 foizgacha qismini amaldagi qonun hujjatlariga muvofiq, respublika tijorat banklari tomonidan chiqarilgan plastik kartochkalar yordamida mijozlarning valyuta hisob raqamlaridan xorijiy valyutaga sotishga ruxsat berilsin.

5. “Jeneral Motors DEU Avto va Texnologiyalar” kompaniyasi bilan tuzilgan tegishli shartnomalarga asosan “OʻzDEUavto” aksiyadorlik jamiyati tomonidan olib kelinadigan umumiy miqdori 2592 dona “Shevrole Takuma”, “Shevrole Epika” va “Shevrole Kaptiva” (TN TIF kodi 8703) avtomobillarini yigʻish uchun ilovada* koʻrsatilgan butlovchi qismlar va uzellar bojxona toʻlovlari toʻlashdan (bojxona rasmiylashtiruvi yigʻimlaridan tashqari) ozod etilsin.

6. Ushbu qarorning ijrosini nazorat qilish Oʻzbekiston Respublikasi Bosh vazirining oʻrinbosarlari Q.S. Sanaqulov va R.S. Azimov zimmalariga yuklansin.