Oʻzbekiston Respublikasi Hukumati bilan Amerika Qoʻshma Shtatlari Hukumati oʻrtasida “Taraqqiyot yoʻlida oziq-ovqat bilan taʼminlash” dasturi boʻyicha qishloq xoʻjaligi mahsuloti yetkazib berish toʻgʻrisidagi Bitim qoidalarining samarali amalga oshirilishini taʼminlash, AQSH Qishloq xoʻjaligi vazirligi tomonidan berilgan grantni oʻzlashtirish maqsadida Vazirlar Mahkamasi qaror qiladi:

1. Maʼlumot uchun qabul qilinsinki, Amerika Qoʻshma Shtatlari Hukumati bilan Oʻzbekiston Respublikasi Hukumati oʻrtasida 2004-yil 1-sentabrda imzolangan Bitimga muvofiq:

AQSH Qishloq xoʻjaligi vazirligi tomonidan “Taraqqiyot yoʻlida oziq-ovqat bilan taʼminlash” dasturi doirasida grant asosida jami 5,19 mln AQSH dollari miqdorida hisoblangan 10 ming tonna soya dukkaklari yetkazib beriladi;

koʻrsatib oʻtilgan qishloq xoʻjaligi mahsulotini sotishdan olingan mablagʻlar respublikaning agrar sektorini yanada isloh qilishga, agrar sektorning qishloq xoʻjaligidagi ulushi va ahamiyatini oshirishga koʻmaklashadigan loyihalarni moliyalashtirishga yoʻnaltiriladi.

2. Oʻzbekiston Respublikasining AQSHdagi Elchixonasiga “Taraqqiyot yoʻlida oziq-ovqat bilan taʼminlash” dasturi (keyingi oʻrinlarda Dastur deb yuritiladi) boʻyicha yuk joʻnatuvchi vakolati berilsin.

Oʻzbekiston Respublikasining AQSHdagi Elchixonasi zarur yuk joʻnatish, tovarga ilova qilinadigan va transport hujjatlarining, shu jumladan sifat sertifikatlarining rasmiylashtirilishini hamda yukning AQSHning belgilangan portlaridan va Amerika tomoni bilan kelishilgan muddatlarda yuklab joʻnatilishini tashkil etishni taʼminlasin.

3. “Yogʻmoytamakisanoat” uyushmasi belgilangan tartibda:

yukning AQSH portlaridan tushirib olinadigan oxirgi punktgacha boʻlgan butun yoʻnalish boʻyicha roʻy berishi mumkin boʻlgan xavf-xatarlardan sugʻurta qilinishini taʼminlasin;

Oʻzbekiston Respublikasi Qishloq va suv xoʻjaligi vazirligi huzuridagi Davlat karantin inspeksiyasi bilan birgalikda chegaradosh davlatlar hududi boʻylab tranzit uchun zarur boʻlgan import karantin ruxsatnomasini rasmiylashtirsin;

olib kelinadigan soya dukkaklarini qabul qilib olish va saqlashni amalga oshirsin.

4. Dasturga binoan import qilinadigan soya dukkaklari bojxona toʻlovlaridan, shuningdek xorijiy sugʻurta kompaniyalari daromadlari — Oʻzbekiston Respublikasidagi toʻlov manbaida daromad (foyda) soligʻi toʻlovidan ozod qilinsin.

5. Oʻzbekiston Respublikasi Davlat bojxona qoʻmitasi:

Dasturni amalga oshirish doirasida respublikaga olib kelinadigan yuklarning oluvchi omborida tezkorlik bilan va oʻz vaqtida rasmiylashtirilishini;

Dasturni amalga oshirish davrida soya dukkaklari va ularni qayta ishlashdan olingan mahsulotlarning eksport qilinishini bartaraf etish yuzasidan qatʼiy nazoratni taʼminlasin.

6. “Oʻzstandart” agentligi Oʻzbekiston Respublikasi Sogʻliqni saqlash vazirligi bilan birgalikda soya dukkaklari Oʻzbekiston Respublikasining bojxona hududiga tushgandan keyin, taqdim etilgan tovarga ilova hujjatlarni, AQSH Qishloq xoʻjaligi vazirligining mahsulot sifatini tasdiqlovchi yoʻriqnomalarini, shuningdek Amerika tomoni vakolatli organining laboratoriya tadqiqotlari toʻgʻrisidagi hisobotini hisobga olgan holda barcha zarur sertifikatlarning oʻn kun muddatda, belgilangan tartibda rasmiylashtirilishini taʼminlasin.

7. Quyidagilar:

Dastur doirasida yetkazib berilayotgan soya dukkaklari umumiy hajmining kamida 50 foizi ochiq tender savdolari oʻtkazish yoʻli bilan xususiy sektor korxonalariga sotilishi;

soya dukkaklari umumiy hajmining koʻpi bilan 50 foizi “Yogʻmoytamakisanoat” uyushmasi korxonalariga sotilishi maʼlumot uchun qabul qilinsin.

8. Dastur doirasida yetkazib beriladigan soya dukkaklarini sotish boʻyicha tender komissiyasi tarkibi 1-ilovaga* muvofiq tasdiqlansin.

Tender komissiyasi “Oʻzbektenderkonsalting” agentligi bilan birgalikda mazkur Dastur doirasida respublikaga olib kelinayotgan soya dukkaklari hajmining kamida 50 foizini sotish yuzasidan ochiq tender savdolari oʻtkazsin, savdolarda xususiy sektor korxonalari ishtirok etishini nazarda tutsin.

9. Qishloq xoʻjaligi mahsulotlarini sotishdan tushgan mablagʻlardan ustuvor yoʻnalishlar boʻyicha tadbirlar va loyihalarni moliyalashtirish uchun samarali foydalanilishini taʼminlash maqsadida Oʻzbekiston — Amerika qoʻshma ishchi guruh tashkil etish toʻgʻrisida Hukumatlararo bitim qoidasiga muvofiq, ishchi guruhning Oʻzbekistonga oid qismi tarkibi 2-ilovaga* binoan tasdiqlansin.

Ishchi guruhning Oʻzbekistonga doir qismi kotibiyati funksiyasi Oʻzbekiston Respublikasi Tashqi iqtisodiy aloqalar agentligi yuklansin.

10. Belgilansinki, “Yogʻmoytamakisanoat” uyushmasi:

“Oʻztenderkonsalting” agentligi bilan birgalikda “Yogʻmoytamakisanoat” uyushmasining yukning Oʻzbekiston Respublikasi hududida sugʻurta qilinishi, qabul qilib olinishi va saqlanishi bilan bogʻliq amaldagi xarajatlarini hisobga olgan holda soya dukkaklarining ochiq tender savdolari orqali xususiy sektor korxonalariga sotiladigan qismiga boshlangʻich narxlarni belgilangan tartibda belgilaydi va Oʻzbekiston Respublikasi Moliya vazirligi bilan kelishadi;

Oʻzbekiston Respublikasi Moliya vazirligi bilan kelishgan holda ichki bozor konyunkturasidan kelib chiqib, shuningdek “Yogʻmoytamakisanoat” uyushmasining yukning Oʻzbekiston Respublikasi hududida sugʻurta qilinishi, qabul qilib olinishi va saqlanishi bilan bogʻliq amaldagi xarajatlarini hisobga olgan holda keyinchalik qayta ishlash uchun idoraviy mansub korxonalarga beriladigan soya dukkaklari hajmiga narxlarni belgilaydi.

11. Oʻzbekiston Respublikasi Moliya vazirligi “Yogʻmoytamakisanoat” uyushmasining yogʻ-moy korxonalari va tender savdolarida gʻolib chiqqan xususiy sektor korxonalari tomonidan oʻtkaziladigan Dastur doirasida olingan soya dukkaklarini sotishdan olingan mablagʻlarni maxsus hisob raqamida jamlasin.

12. “Yogʻmoytamakisanoat” uyushmasi korxonalari, shuningdek tender savdolarida gʻolib chiqqan xususiy sektor korxonalari soya yogʻi, shroti va soapstokini sotishdan tushgan soʻmdagi mablagʻlarining Oʻzbekiston Respublikasi Moliya vazirligi bilan tuzilgan shartnomalarga muvofiq soya dukkaklariga teng qiymatdagi summada Moliya vazirligining maxsus hisob raqamiga oʻtkazilishini taʼminlasinlar.

13. Oʻzbekiston Respublikasi Moliya vazirligiga maxsus hisob raqamiga tushgan mablagʻlarni tijorat banklarining depozit hisob raqamlariga joylashtirish va olingan daromaddan qoʻshma ishchi guruh bilan kelishgan holda Dastur doirasidagi loyihalarni moliyalashtirish uchun foydalanish huquqi berilsin.

Oʻzbekiston Respublikasi Moliya vazirligining Nazorat-taftish bosh boshqarmasi soya dukkaklari sotilishini, shuningdek tushumning Oʻzbekiston Respublikasi Moliya vazirligi maxsus hisob raqamiga oʻz vaqtida oʻtkazilishini har oyda nazorat qilib borsin.

14. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari E.M.Gʻaniyev va M.Z.Usmonov zimmasiga yuklansin.