“Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonuniga muvofiq Vazirlar Mahkamasi qaror qiladi:

1. Quyidagilar:

Qimmatbaho metallar va toshlardan zargarlik buyumlari tayyorlash faoliyatini litsenziyalash toʻgʻrisidagi nizom 1-ilovaga muvofiq;

Vazirlar Mahkamasining qimmatbaho metallar va toshlardan zargarlik buyumlari tayyorlash faoliyatini litsenziyalash komissiyasi tarkibi 2-ilovaga muvofiq;

Vazirlar Mahkamasining qimmatbaho metallar va toshlardan zargarlik buyumlari tayyorlash faoliyatini litsenziyalash komissiyasi toʻgʻrisidagi nizom 3-ilovaga muvofiq tasdiqlansin.

2. Oʻzbekiston Respublikasi Hukumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Mazkur Nizom Oʻzbekiston Respublikasida qimmatbaho metallar va toshlardan zargarlik buyumlari tayyorlash faoliyatini litsenziyalash tartibini belgilaydi.

2. Litsenziyalar berish va ularni bekor qilish, ularning amal qilishini toʻxtatish toʻgʻrisidagi qarorlar Vazirlar Mahkamasining qimmatbaho metallar va toshlardan zargarlik buyumlari tayyorlash faoliyatini litsenziyalash komissiyasi (keyingi oʻrinlarda Komissiya deb ataladi) tomonidan qabul qilinadi

Komissiya faoliyati Komissiya toʻgʻrisidagi nizomga muvofiq tashkil etiladi.

Oʻzbekiston Respublikasi Markaziy banki huzuridagi Qimmatbaho metallar agentligi (keyingi oʻrinlarda ishchi organ deb ataladi) Komissiyaning ishchi organi funksiyasini bajaradi.

3. Ishchi organ litsenziya berish toʻgʻrisidagi arizalarni tegishli hujjatlar bilan qabul qiladi, ular yuzasidan ekspert xulosasi tayyorlaydi, litsenziyalarni rasmiylashtiradi va qayta rasmiylashtiradi, litsenziya bitimlari tuzadi, litsenziyalar reyestrini yuritadi, litsenziatlar tomonidan litsenziya talablari va shartlariga rioya etilishini nazorat qiladi, litsenziyalarning amal qilishini toʻxtatib turadi va tiklaydi.

4. Qimmatbaho metallar va toshlardan zargarlik buyumlari tayyorlash faoliyati yuridik va jismoniy shaxslar tomonidan amalga oshirilishi mumkin.

5. Qimmatbaho metallar va toshlardan zargarlik buyumlari tayyorlash faoliyatini amalga oshirish huquqiga namunaviy (oddiy) litsenziyalar beriladi.

Litsenziya talabgorining arizasiga koʻra litsenziya umuman faoliyat turiga yoxud uning bir qismiga beriladi.

6. Qimmatbaho metallar va toshlardan zargarlik buyumlari tayyorlash faoliyatini amalga oshirishga litsenziya amal qilish muddati cheklanmagan holda beriladi.

7. Quyidagilar qimmatbaho metallar va toshlardan zargarlik buyumlari tayyorlash faoliyatini amalga oshirishda litsenziya talablari va shartlari hisoblanadi:

qimmatbaho metallar va toshlardan zargarlik buyumlari tayyorlash, qimmatbaho metallardan yasalgan buyumlarning asillik darajasini belgilash va tamgʻalash sohasidagi qonun hujjatlariga, qimmatbaho metallar va toshlarning, tarkibida qimmatbaho metallar va toshlar boʻlgan buyumlarning muomalada boʻlishiga oid normativ-texnik va boshqa talablarga majburiy tarzda rioya qilish;

qimmatbaho metallar va toshlardan zargarlik buyumlari tayyorlashni tartibga solishga doir normativ-texnik hujjatlarning mavjud boʻlishi;

litsenziyalanadigan faoliyatni amalga oshirish uchun zarur va belgilangan talablarga muvofiq boʻlgan moddiy-texnika bazasi, asbob-uskunalar va boshqa texnik vositalarning mavjud boʻlishi;

belgilangan talablarga muvofiq xomashyo, materiallar va tayyor mahsulotlarni, qimmatbaho metallar va toshlar chiqindilari hamda parchalarini hisobga olish va saqlashning taʼminlanishi;

yuridik shaxs shtatida qimmatbaho metallar va toshlardan zargarlik buyumlari tayyorlash sohasida maxsus maʼlumotga yoki ushbu sohada kamida uch yillik ish stajiga ega boʻlgan kamida bir nafar xodim boʻlishi;

jismoniy shaxsning qimmatbaho metallar va toshlardan zargarlik buyumlari tayyorlash sohasida maxsus maʼlumotga yoki ushbu sohada kamida uch yillik ish stajiga ega boʻlishi;

Oʻzbekiston Respublikasi Markaziy banki huzuridagi Qimmatbaho metallar agentligi Davlat asillik darajasini belgilash palatasining qimmatbaho metallar va toshlar bilan operatsiyalarni amalga oshirishga berilgan roʻyxatdan oʻtkazish guvohnomasining mavjud boʻlishi.

8. Litsenziya bitimida mazkur Nizomning 7-bandida koʻrsatib oʻtilgan litsenziya talablari va shartlaridan aniq talablar va shartlar nazarda tutilishi mumkin.

9. Litsenziya olish uchun litsenziya talabgori quyidagi hujjatlarni taqdim etadi:

a) litsenziya berish toʻgʻrisida ariza, unda quyidagilar koʻrsatiladi:

yuridik shaxs uchun — yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bankdagi hisob raqami;

jismoniy shaxs uchun — familiyasi, ismi, otasining ismi, fuqaroning shaxsini tasdiqlovchi hujjatga oid maʼlumotlar;

litsenziyalanadigan faoliyat turi;

b) quyidagilar:

yuridik shaxs uchun — yuridik shaxsning davlat roʻyxatidan oʻtkazilganligi toʻgʻrisidagi guvohnomaning notarial tasdiqlangan nusxasi;

jismoniy shaxs uchun — yakka tartibdagi tadbirkorning davlat roʻyxatidan oʻtkazilganligi toʻgʻrisidagi guvohnomaning notarial tasdiqlangan nusxasi;

v) ariza koʻrib chiqilganligi uchun litsenziya talabgori tomonidan yigʻim toʻlanganligini tasdiqlovchi hujjat;

g) litsenziyalanadigan faoliyatni amalga oshirish uchun zarur boʻlgan mavjud moddiy-texnika bazasi, asbob-uskunalar va boshqa texnik vositalar toʻgʻrisidagi maʼlumotlar;

d) litsenziyalanadigan faoliyat amalga oshiriladigan binolar va xonalarga mulk huquqini yoki boshqa ashyoviy huquqlarni tasdiqlovchi hujjat;

e) mavjud bino va xonalarning yongʻin xavfsizligi qoidalari talablariga, sanitariya-gigiyena va ekologiya normalariga muvofiqligi toʻgʻrisida yongʻindan saqlash va sanitariya-epidemiologiya organlari, tabiatni muhofaza qilish organlarining xulosalari.

10. Litsenziya talabgoridan mazkur Nizomda nazarda tutilmagan hujjatlarning taqdim etilishini talab qilishga yoʻl qoʻyilmaydi.

11. Hujjatlar litsenziya talabgori tomonidan ishchi organga bevosita yoxud olinganligi toʻgʻrisidagi bildirishnoma bilan pochta aloqa vositasi orqali yetkazib beriladi.

Hujjatlar ishchi organning masʼul xodimi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda ariza beruvchiga yuboriladi (topshiriladi).

Notoʻgʻri yoki buzilgan maʼlumotlar taqdim etilganligi uchun litsenziya talabgori qonun hujjatlariga muvofiq javob beradi.

12. Ariza koʻrib chiqilganligi uchun litsenziya talabgoridan qonun hujjatlarida toʻlov kunida belgilangan eng kam oylik ish haqining ikki baravari miqdorida yigʻim undiriladi. Ariza koʻrib chiqilganligi uchun yigʻim summasi ishchi organ hisob raqamiga oʻtkaziladi.

Litsenziya talabgori berilgan arizadan voz kechgan taqdirda toʻlangan yigʻim qaytarilmaydi.

13. Qimmatbaho metallar va toshlardan zargarlik buyumlari tayyorlash faoliyatini litsenziyalash ushbu Nizomga ilova qilinayotgan Sxemaga muvofiq amalga oshiriladi.

Litsenziya berish yoki litsenziya berishni rad etish toʻgʻrisida qaror litsenziya talabgorining arizasi olingan kundan boshlab oʻttiz kundan ortiq boʻlmagan muddatda qabul qilinadi.

Ishchi organ ariza olingan kundan boshlab yigirma kundan ortiq boʻlmagan muddatda hujjatlarni koʻrib chiqadi, ular boʻyicha ekspert xulosasi tayyorlaydi va litsenziya talabgoriga litsenziya berish yoki litsenziya berishni rad etish toʻgʻrisidagi taklifni tegishli qaror protokoli loyihasi bilan tasdiqlash uchun Komissiyaga taqdim etadi.

Komissiya ishchi organ taklifi olingandan keyin oʻn kundan ortiq boʻlmagan muddatda uni koʻrib chiqadi hamda qabul qilingan qaror toʻgʻrisidagi protokolni tasdiqlaydi. Komissiya tomonidan qabul qilingan qaror protokoli Komissiya raisi (uning oʻrinbosari) tomonidan imzolanadi. Zarur hollarda Komissiya qarorlari soʻrov yoʻli bilan qabul qilinishi mumkin.

14. Ishchi organ tegishli qaror qabul qilingandan keyin uch kun muddatda litsenziya talabgorini qabul qilingan qaror toʻgʻrisida xabardor qiladi.

Litsenziya berishga qaror qilinganligi toʻgʻrisidagi bildirishnoma litsenziya talabgoriga bank hisob raqami rekvizitlari, davlat boji toʻlash muddati koʻrsatilgan holda yozma shaklda yuboriladi (topshiriladi). Litsenziya berish toʻgʻrisida qabul qilingan qaror toʻgʻrisidagi bildirishnoma bilan bir vaqtda litsenziya talabgoriga imzolash uchun litsenziya bitimi yuboriladi.

Litsenziyalovchi organ va litsenziatning oʻzaro huquq va majburiyatlarini belgilovchi litsenziya bitimi ishchi organ va litsenziat oʻrtasida tuziladi hamda unda quyidagilar boʻlishi kerak:

bitimni imzolagan shaxslarning familiyasi, ismi, otasining ismi, egallab turgan lavozimi;

tomonlarning rekvizitlari;

amalga oshirilishiga litsenziya berilayotgan faoliyat turining nomi;

litsenziyaning amal qilish muddati;

litsenziatga qoʻyiladigan litsenziya talablari va shartlari;

litsenziya bitimi talablari va shartlari buzilganligi uchun tomonlarning javobgarligi;

litsenziat tomonidan litsenziya bitimi talablari va shartlari bajarilishini ishchi organ tomonidan nazorat qilish tartibi.

Litsenziya bitimi ikki nusxada — litsenziat va ishchi organ uchun bir nusxadan tuziladi.

15. Litsenziyalar blankalari qatʼiy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziyalar blankalari namunalari ishchi organ tomonidan ishlab chiqiladi, Komissiya tomonidan tasdiqlanadi hamda ishchi organ buyurtmanomasiga koʻra “Davlat belgisi” davlat-ishlab chiqarish birlashmasi tomonidan bosmaxona usulida tayyorlanadi. Litsenziyalar blankalarining hisobga olinishi, saqlanishi va maqsadli foydalanilishi uchun ishchi organ rahbari belgilangan tartibda shaxsan javob beradi.

Litsenziyalar ishchi organ tomonidan rasmiylashtiriladi va Komissiya raisi (uning oʻrinbosari) tomonidan imzolanadi.

16. Litsenziya litsenziya talabgori tomonidan davlat boji toʻlanganligini tasdiqlovchi hujjat taqdim etilgandan va litsenziya bitimi imzolangandan keyin uch kun muddatda beriladi.

17. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida ishchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa Komissiya litsenziyani bekor qilish toʻgʻrisida qaror qabul qilishga haqlidir.

18. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida nazarda tutilgan asoslar boʻyicha rad etilishi mumkin.

Litsenziya talabgori litsenziya berishni rad etish toʻgʻrisidagi qaror, shuningdek ishchi organ mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga ega.

19. Litsenziya berishni rad etish toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni qayta koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi).

20. Litsenziya talabgori tomonidan litsenziya berishning rad etilishiga asos boʻlgan sabablar bartaraf etilgan taqdirda, hujjatlarni qayta koʻrib chiqish litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi.

Bunda ishchi organ hujjatlar qayta taqdim etilgandan keyin olti kundan ortiq boʻlmagan muddatda ular boʻyicha ekspert xulosasi tayyorlaydi, litsenziya talabgoriga litsenziya berish yoki litsenziya berishni rad etish toʻgʻrisidagi taklifni tegishli qaror protokoli loyihasi bilan birga tasdiqlash uchun Komissiyaga taqdim etadi.

Komissiya ishchi organ taklifi olingandan keyin toʻrt kun muddatda uni koʻrib chiqadi va qabul qilingan qaror toʻgʻrisidagi protokolni tasdiqlaydi. Komissiya tomonidan qabul qilingan qaror protokoli Komissiya raisi (uning oʻrinbosari) tomonidan imzolanadi.

Litsenziya talabgorlarining arizalari takroran koʻrib chiqilganligi uchun yigʻim undirilmaydi.

Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

21. Litsenziat — yuridik shaxs qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin bir hafta muddatda ishchi organga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

Litsenziat — jismoniy shaxsning familiyasi, ismi, otasining ismi yoki yashash joyi oʻzgargan taqdirda litsenziat qayta roʻyxatdan oʻtkazilgandan keyin bir hafta muddatda ishchi organga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

22. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.

23. Litsenziyani qayta rasmiylashtirishda ishchi organ litsenziyalar reyestriga tegishli oʻzgartirishlar kiritadi. Litsenziyani qayta rasmiylashtirish ishchi organ tomonidan tegishli hujjatlar ilova qilingan holda litsenziyalarni qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.

Litsenziyani qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi ishchi organning hisob raqamiga oʻtkaziladi.

24. Yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra dublikat berilishi mumkin.

Litsenziya dublikati berishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi ishchi organning hisob raqamiga oʻtkaziladi.

25. Litsenziya talablari va shartlariga rioya etilishi ustidan nazorat qonun hujjatlarida belgilangan tartibda ishchi organ tomonidan amalga oshiriladi.

26. Litsenziya talablari va shartlariga rioya etilishi ustidan nazoratni amalga oshirishda ishchi organ oʻz vakolatlari doirasida quyidagi huquqlarga ega:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziya talablari va shartlari litsenziat tomonidan buzilganligidan dalolat beruvchi holatlar mavjud boʻlgan taqdirda litsenziat tomonidan litsenziya talablari va shartlariga rioya etilishini qonunda belgilangan tartibda rejadan tashqari tekshirish;

tekshirishlar natijalari asosida, litsenziat tomonidan litsenziya talablari va shartlarining aniq buzilishlarini koʻrsatgan holda dalolatnomalar (maʼlumotnomalar) tuzish;

litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash;

litsenziyaning amal qilishini toʻxtatish yoxud uni bekor qilish toʻgʻrisida Komissiyaga koʻrib chiqish uchun takliflar kiritish;

xoʻjalik yurituvchi subyektlar tomonidan litsenziyalanadigan faoliyat litsenziya rasmiylashtirmasdan amalga oshirilishining aniqlangan holatlari toʻgʻrisidagi materiallarni qonun hujjatlarida nazarda tutilgan choralarni koʻrish uchun soliq organlariga belgilangan tartibda yuborish.

27. Litsenziya talablari va shartlariga rioya etilishini tekshirishda ishchi organ xodimlari tomonidan ikki nusxada dalolatnoma tuziladi, ularning bittasi litsenziatga beriladi, ikkinchi nusxasi ishchi organda qoladi.

28. Litsenziyaning amal qilishini toʻxtatib turish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22-moddasida nazarda tutilgan hollarda va tartibda ishchi organ tomonidan amalga oshiriladi.

Ishchi organning litsenziyaning amal qilishini toʻxtatib turish toʻgʻrisidagi qarori yuzasidan sudga shikoyat qilish mumkin. Litsenziyaning amal qilishi toʻxtatib turilishi asossiz ekanligi sud tomonidan eʼtirof etilgan taqdirda ishchi organ litsenziat oldida litsenziat koʻrgan zarar miqdorida javob beradi.

29. Litsenziyaning amal qilishini toʻxtatish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 23-moddasida nazarda tutilgan hollarda va tartibda Komissiya qaroriga koʻra amalga oshiriladi.

Komissiyaning litsenziyaning amal qilishini toʻxtatish toʻgʻrisidagi qarori yuzasidan sudga shikoyat qilish mumkin. Litsenziyaning amal qilishi toʻxtatilishi asossiz ekanligi sud tomonidan eʼtirof etilgan taqdirda Komissiya litsenziat oldida litsenziat koʻrgan zarar miqdorida javob beradi.

30. Litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 24-moddasida nazarda tutilgan hollarda va tartibda Komissiya qaroriga koʻra amalga oshiriladi.

Komissiyaning litsenziyani bekor qilish toʻgʻrisidagi qarori yuzasidan sudga shikoyat qilish mumkin. Litsenziyaning bekor qilinishi asossiz ekanligi sud tomonidan eʼtirof etilgan taqdirda Komissiya litsenziat oldida litsenziat koʻrgan zarar miqdorida javob beradi.

31. Ishchi organ litsenziyalar reyestrini yuritadi.

Litsenziyalar reyestrida quyidagilar koʻrsatilishi kerak:

yuridik shaxsning nomi, uning tashkiliy-huquqiy shakli, pochta manzili, telefon raqami;

jismoniy shaxs uchun — familiyasi, ismi, otasining ismi, yashash joyi, telefon raqami;

litsenziyaning berilgan sanasi va tartib raqami;

litsenziya umuman faoliyat turiga yoki uning bir qismiga berilganligi toʻgʻrisidagi maʼlumotlar;

litsenziyani qayta rasmiylashtirish, uning amal qilishini toʻxtatib turish va tiklashning asoslari va sanasi;

litsenziyaning amal qilishini toʻxtatish asoslari va sanasi;

dublikat berish asoslari va sanasi;

litsenziyani bekor qilishning asoslari va sanasi.

32. Litsenziyalar reyestridagi maʼlumotlar ular bilan yuridik va jismoniy shaxslarning tanishishi uchun ochiq hisoblanadi, ular toʻlov asosida ishchi organdan aniq litsenziatlar toʻgʻrisida litsenziyalar reyestridan koʻchirma sifatida maʼlumot olishga haqlidir.

Litsenziyalar reyestridan maʼlumot berilganligi uchun eng kam oylik ish haqining yarmi miqdoridagi toʻlov ishchi organ hisob raqamiga oʻtkaziladi.

Litsenziyalar reyestridan maʼlumotlar davlat hokimiyati va boshqaruvi organlariga tekin beriladi.

33. Reyestrdan maʼlumot berish muddati tegishli ariza berilgan kundan boshlab uch kundan oshmasligi kerak (maʼlumot berilishi uchun toʻlov toʻlanganligi toʻgʻrisida hujjat taqdim etilgan taqdirda).

34. Qimmatbaho metallar va toshlardan zargarlik buyumlari tayyorlash faoliyatini amalga oshirish huquqiga litsenziya berilganligi uchun qonun hujjatlarida toʻlov kunida belgilangan eng kam oylik ish haqining yetti baravari miqdorida davlat boji undiriladi.

Litsenziyalar berilganligi uchun davlat boji mablagʻlari respublika budjeti daromadiga oʻtkaziladi.

1. Ushbu Nizom Vazirlar Mahkamasining qimmatbaho metallar va toshlardan zargarlik buyumlari tayyorlash faoliyatini litsenziyalash komissiyasining (keyingi oʻrinlarda Komissiya deb ataladi) vazifalari, funksiyalari va huquqlarini, shuningdek uning faoliyatini tashkil etish tartibini belgilaydi.

2. Komissiya oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga hamda ushbu Nizomga amal qiladi.

3. Oʻzbekiston Respublikasi Markaziy banki huzuridagi Qimmatbaho metallar agentligi (keyingi oʻrinlarda ishchi organ deb ataladi) Komissiyaning ishchi organi funksiyasini bajaradi.

4. Quyidagilar Komissiyaning asosiy vazifalari hisoblanadi:

yuridik va jismoniy shaxslarning qimmatbaho metallar va toshlardan zargarlik buyumlari tayyorlash boʻyicha faoliyati litsenziyalanishini taʼminlash;

litsenziatlar tomonidan litsenziya talablari va shartlariga rioya etilishi ustidan nazoratni tashkil qilish;

qimmatbaho metallar va toshlardan zargarlik buyumlari tayyorlash boʻyicha faoliyatni tartibga soluvchi qonun hujjatlarini takomillashtirishga doir takliflar tayyorlash.

5. Komissiya oʻziga yuklangan vazifalarni bajarish uchun quyidagi funksiyalarni amalga oshiradi:

ishchi organning litsenziya talabgorlariga litsenziya berish yoki berishni rad etish toʻgʻrisidagi ekspert xulosalari va takliflarini koʻrib chiqadi hamda ular boʻyicha qarorlar qabul qiladi;

ishchi organ, davlat boshqaruvi organlari, huquqni muhofaza qilish va nazorat organlarining litsenziyalarning amal qilishini toʻxtatish yoki litsenziyalarni bekor qilish toʻgʻrisidagi xulosalarini koʻrib chiqadi va ular boʻyicha qarorlar qabul qiladi;

ishchi organning litsenziyalar berish toʻgʻrisidagi arizalarni va tegishli hujjatlarni qabul qilish, ekspert xulosalari tayyorlash, litsenziyalarni rasmiylashtirish va qayta rasmiylashtirish, litsenziya bitimlarini tuzish, litsenziyalar reyestrini yuritish, litsenziyalarning amal qilishini toʻxtatib turish va tiklash boʻyicha faoliyati ustidan nazoratni amalga oshiradi;

ishchi organning litsenziatlar tomonidan litsenziya talablari va shartlariga rioya qilinishi toʻgʻrisidagi hisobotlarini eshitadi;

ishchi organning taqdimnomasiga koʻra litsenziya bitimining namunaviy shaklini, shuningdek litsenziya blankalari namunasini tasdiqlaydi.

Komissiya qonun hujjatlariga muvofiq boshqa funksiyalarni ham amalga oshiradi.

6. Komissiya oʻziga yuklangan vazifalar va funksiyalarni amalga oshirishda quyidagi huquqlarga ega:

ishchi organdan, tegishli vazirliklar va idoralardan oʻzining faoliyatini taʼminlash uchun zarur boʻlgan axborotlarni soʻrash va olish;

davlat va xoʻjalik boshqaruvi tegishli organlariga, huquqni muhofaza qilish va nazorat organlariga litsenziyalanadigan faoliyatning litsenziya olmasdan amalga oshirilishi, qimmatbaho metallar va toshlardan zargarlik buyumlari tayyorlash boʻyicha qonun hujjatlarining buzilishi holatlari boʻyicha takliflar kiritish;

qimmatbaho metallar va toshlardan zargarlik buyumlari tayyorlash boʻyicha faoliyatni litsenziyalashning ayrim masalalari yuzasidan takliflar va xulosalar tayyorlash uchun vaqtinchalik ishchi va ekspert guruhlar tashkil etish;

Oʻzbekiston Respublikasi Vazirlar Mahkamasiga qimmatbaho metallar va toshlardan zargarlik buyumlari tayyorlash boʻyicha faoliyatni tartibga soluvchi qonun hujjatlarini takomillashtirishga doir takliflarni koʻrib chiqish uchun kiritish.

Komissiya qonun hujjatlariga muvofiq boshqa huquqlarga ham ega.

7. Komissiya oʻziga yuklangan vazifalar va funksiyalarning zarur darajada, samarali va oʻz vaqtida bajarilishi uchun javob beradi.

8. Komissiya oʻz faoliyatini jamoatchilik asosida amalga oshiradigan rais, uning oʻrinbosari, Komissiya aʼzolari va uning kotibidan iborat boʻladi. Komissiyaning shaxsiy tarkibi Oʻzbekiston Respublikasi Vazirlar Mahkamasi tomonidan tasdiqlanadi.

9. Komissiya raisi:

Komissiya ishini tashkil qiladi va unga rahbarlik qiladi;

Komissiya aʼzolari oʻrtasida vazifalarni taqsimlaydi;

Komissiya majlislari protokollarini tasdiqlaydi, litsenziyalarni imzolaydi;

Komissiya aʼzolariga, ishchi organga hamda davlat va xoʻjalik boshqaruvi organlariga Komissiya faoliyati bilan bogʻliq masalalar boʻyicha topshiriqlar beradi;

boshqa vakolatlarni amalga oshiradi.

Komissiya raisi boʻlmagan hollarda, shuningdek uning topshirigʻiga koʻra raisning funksiyalarini uning oʻrinbosari bajaradi.

10. Ishchi organ:

litsenziyalar berish toʻgʻrisidagi arizalarni tegishli hujjatlar bilan birga qabul qiladi, ular boʻyicha ekspert xulosasi tayyorlaydi;

litsenziyalarni rasmiylashtiradi va qayta rasmiylashtiradi;

litsenziya bitimlari tuzadi;

litsenziyalar reyestrini yuritadi;

litsenziatlar tomonidan litsenziya talablari va shartlariga rioya qilinishi ustidan nazoratni amalga oshiradi;

litsenziyalarning amal qilishini toʻxtatib turadi va tiklaydi;

qonun hujjatlariga muvofiq boshqa funksiyalarni amalga oshiradi.

11. Komissiya faoliyatini tashkiliy-texnik taʼminlash ishchi organ tomonidan amalga oshiriladi.

12. Litsenziya talabgoriga litsenziya berish yoki litsenziya berishni rad etish toʻgʻrisidagi qaror Komissiya tomonidan litsenziya talabgorining arizasi olingan kundan boshlab oʻttiz kundan oshmaydigan muddatda qabul qilinadi.

Ishchi organ ariza olingan kundan boshlab yigirma kundan oshmaydigan muddatda hujjatlarni koʻrib chiqadi, ular boʻyicha ekspert xulosasi tayyorlaydi hamda litsenziya talabgoriga litsenziya berish yoki litsenziya berishni rad etish toʻgʻrisidagi taklifni qaror protokolining tegishli loyihasi bilan Komissiyaga tasdiqlash uchun taqdim etadi.

13. Komissiya oʻz majlislarini zaruriyatga koʻra, shuningdek ishchi organning litsenziyalar berish yoki litsenziyalar berishni rad etish, litsenziyalarni bekor qilish, ularning amal qilishini toʻxtatish toʻgʻrisidagi takliflari olingandan keyin 10 kun mobaynida oʻtkazadi. Komissiya oʻz majlisida ishchi organning taklifini koʻrib chiqadi va qaror protokolini tasdiqlaydi.

14. Komissiya majlisini tayyorlashda Komissiya kotibi majlisdan kechi bilan bir kun oldin Komissiya aʼzolarini Komissiya majlisi oʻtkaziladigan sana, joy va vaqt toʻgʻrisida xabardor qiladi.

15. Komissiya majlisi unda Komissiya aʼzolarining kamida toʻrtdan uch qismi ishtirok etgan taqdirda qaror qabul qilish vakolatiga ega boʻladi. Komissiya qarorlari soʻrov yoʻli bilan qabul qilinishi mumkin.

Komissiya qarorlari koʻpchilik ovoz bilan qabul qilinadi va protokollar bilan rasmiylashtiriladi. Ovozlar teng boʻlgan taqdirda Komissiya raisining (u boʻlmaganda — rais oʻrinbosarining) ovozi hal qiluvchi hisoblanadi. Komissiya majlisi protokolida litsenziya talabgorining hujjatlarini koʻrib chiqish natijalari va ular boʻyicha qisqacha ekspert xulosasi aks ettiriladi.

Komissiya qabul qilgan qaror protokoli Komissiya raisi (uning oʻrinbosari) tomonidan, Komissiya majlisidan keyin bir kundan oshmaydigan muddatda (takroriy koʻrib chiqishda — Komissiya qarori protokoli loyihasi taqdim etilgandan keyin toʻrt kun mobaynida) imzolanadi.

Imzolangan protokolni Komissiyaning masʼul kotibi roʻyxatdan oʻtkazadi, u protokolning birinchi nusxasini saqlash uchun oʻzida qoldiradi, ikkinchi nusxasini esa ishchi organga joʻnatadi.

16. Ishchi organ litsenziya talabgorini qabul qilingan qaror toʻgʻrisida Komissiyaning tegishli qarori qabul qilgandan keyin uch kun mobaynida xabardor qiladi.

Litsenziya berish yuzasidan qaror qabul qilinganligi toʻgʻrisidagi bildirishnoma litsenziya talabgoriga bank hisob raqami rekvizitlari, davlat bojini toʻlash muddati koʻrsatilgan holda yozma shaklda joʻnatiladi (topshiriladi).

17. Litsenziat tomonidan litsenziya bitimi imzolangandan va davlat boji toʻlangandan keyin 2 kun muddatda ishchi organ litsenziya blankalarini rasmiylashtiradi.

Rasmiylashtirilgan litsenziya blankalari ularni Komissiya raisi (uning oʻrinbosari) imzolashi uchun ishchi organ tomonidan Komissiyaga joʻnatiladi.

18. Ishchi organ imzolangan litsenziyalarni muhr bilan tasdiqlaydi va litsenziatga beradi hamda reyestrda tegishli yozuvni qayd etadi.

1. Vazirlar Mahkamasining “Qimmatbaho metallar va toshlardan zargarlik buyumlari tayyorlash faoliyatini litsenziyalash toʻgʻrisidagi nizomni tasdiqlash haqida” 2003-yil 12-noyabrdagi 503-son qarori (Oʻzbekiston Respublikasi QT, 2003-y., 11-son, 115-modda).

2. Vazirlar Mahkamasining “Respublika komissiyalari va kengashlari tarkibini tasdiqlash toʻgʻrisida” 2004-yil 26-iyuldagi 358-son qaroriga 33-ilova.

3. Vazirlar Mahkamasining “Oʻzbekiston Respublikasi Hukumatining ayrim qarorlarini oʻz kuchini yoʻqotgan deb hisoblash hamda baʼzilariga oʻzgartirishlar kiritish toʻgʻrisida” 2005-yil 22-fevraldagi 73-son qaroriga 2-ilova 36-bandining yigirma toʻqqizinchi xatboshi (Oʻzbekiston Respublikasi QT, 2005-y., 2-son,13-modda).

4. Vazirlar Mahkamasining “Ayrim respublika komissiyalari va kengashlari tarkibiga oʻzgartirishlar kiritish toʻgʻrisida” 2005-yil 7-noyabrdagi 244-son qaroriga 1-ilova 10-bandining oʻn yettinchi xatboshi.

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Prezidentining “Tadbirkorlik faoliyati yuritish uchun ruxsatnoma turlarini qisqartirish va ularni berish tartib-qoidalarini soddalashtirish toʻgʻrisida” 2005-yil 21-sentabrdagi PQ–186-son qarori)” 2006-yil 22-maydagi 92-son qaroriga ilovaning 32-bandi.