Paxta tozalash zavodlari tomonidan chigitni qayta ishlash uchun yetkazib berish tizimi va mexanizmlarini yanada takomillashtirish, oʻsimlik yogʻi va boshqa yogʻ-moy mahsulotlarini sotishni tartibga solish, paxta tozalash va yogʻ-moy sanoati korxonalarida hisobga olish va hisobot tizimini takomillashtirish maqsadida:

1. Yogʻ-moy va oziq-ovqat sanoati uyushmasi, “Oʻzpaxtasanoat” uyushmasi oʻzlarining tarkibiga kiruvchi korxonalar hamda Oʻzbekiston “Sifat” markazi bilan birgalikda:

Oʻzbekiston “Sifat” markazining chigitdan foydalanishni nazorat qilish boʻyicha Inspeksiyasi vakillari ishtirokida yogʻ-moy korxonalari tomonidan texnik chigitni bevosita paxta tozalash korxonalarida qabul qilishning belgilangan tartibiga soʻzsiz rioya etilishini taʼminlasin;

har yili paxta xomashyosi va chigitni qayta ishlash yakunlanganidan soʻng barcha paxta tozalash va yogʻ-moy korxonalarida chigitni inventarizatsiya qilish va tozalashni amalga oshirsin. Inventarizatsiya maʼlumotlarini Oʻzbekiston Respublikasi Vazirlar Mahkamasiga hisobot yilining 1-avgustigacha taqdim etsin.

2. Respublika yogʻ-moy korxonalari chigitdan ishlab chiqaradigan oʻsimlik yogʻi respublika ichki isteʼmol bozorida va eksportga toʻliq sotiladigan tartib-qoida belgilansin. Bunda oʻsimlik yogʻi 1-ilovaga* muvofiq:

Oʻzbekiston Respublika tovar-xomashyo birjasidagi ochiq, birja savdolari orqali — savdo tashkilotlariga hamda sanoatda qayta ishlashga;

toʻgʻridan toʻgʻri shartnomalar va tartibga solinadigan narxlar boʻyicha — budjet tashkilotlari hamda maxsus isteʼmolchilarga sotiladi;

birja savdolari orqali va respublikaning tashqi savdo kompaniyalari bilan tuzilgan toʻgʻridan toʻgʻri shartnomalar boʻyicha eksport qilinadi.

Belgilansinki, aholiga oʻsimlik yogʻini sotish faqat yuridik shaxs maqomiga ega chakana savdo tashkilotlari tomonidan nazorat-kassa apparatlari bilan jihozlangan muqim savdo shaxobchalari orqali amalga oshiriladi.

3. Oʻzbekiston Respublikasi Iqtisodiyot vazirligi, Qishloq va suv xoʻjaligi vazirligining shrot va paxta sheluxasini sotishning amaldagi tartibini saqlab qolish toʻgʻrisidagi taklifi qabul qilinsin, bunda paxta yetishtiruvchi xoʻjaliklar amalda oʻzlari sotgan paxta xomashyosidan ishlab chiqarilgan shrot va paxta sheluxasining 70 foizi ular tasarrufida qoladi.

4. Belgilab qoʻyilsinki:

paxta yetishtiruvchi xoʻjaliklarga shrot va paxta sheluxasi faqat yogʻ-moy sanoati korxonalari tomonidan qishloq joylarda tashkil etiladigan shrot va sheluxa sotish boʻyicha ixtisoslashtirilgan punktlar orqali ulgurji savdo narxlarida sotiladi;

ulgurji savdo narxlariga mazkur mahsulotlarni ixtisoslashtirilgan punktlargacha yetkazib berish xarajatlari, shuningdek, ushbu punktlarning moddiy taʼminotiga sarflanadigan xarajatlar kiritilmaydi, bu sarf-xarajatlar yogʻ-moy korxonalari tomonidan birja savdolari orqali oʻsimlik yogʻini sotishdan olinadigan qoʻshimcha daromadlar hisobiga qoplanadi;

shrot va sheluxa resurslari birja savdolari orqali chorvachilik mahsulotlari yetishtirish bilan shugʻullanadigan paxtachilik qishloq xoʻjaligi korxonalariga emas, balki shaxsiy yordamchi va dehqon xoʻjaliklarida chorva mol yetishtirish bilan band boʻlgan aholiga qishloq hududlarida tashkil etiladigan shrot va sheluxa sotishga ixtisoslashtirilgan punktlar orqali 2-ilovadagi* sxemaga muvofiq sotiladi.

5. Yogʻ-moy va oziq-ovqat sanoati uyushmasi Qoraqalpogʻiston Respublikasi Vazirlar Kengashi va viloyat hokimliklari bilan birgalikda 2006-2007-yillarda qishloq xoʻjaligi korxonalari va aholiga qulay shart-sharoitlar yaratishni hisobga olib joylashtirilishini nazarda tutgan holda qishloq joylarda shrot va sheluxa sotishga ixtisoslashtirilgan punktlar tashkil etilishini 3-ilovadagi* vazifaga muvofiq taʼminlasin;

6. “Oʻzpaxtasanoat” uyushmasi va uning “Paxtasanoat” hududiy aksiyadorlik birlashmalari, Yogʻ-moy va oziq-ovqat sanoati uyushmasining raislari hamda yogʻ-moy va paxta tozalash sanoati korxonalari rahbarlari zimmasiga tegishli tarzda:

texnik chigit va uni qayta ishlash mahsulotlari hisobga olinishini;

oʻsimlik yogʻi, shrot va paxta sheluxasi sotishning belgilangan mexanizmini taʼminlash uchun shaxsiy javobgarlik yuklansin.

7. “Oʻzpaxtasanoat” uyushmasi, Oʻzbekiston Respublikasi Qishloq va suv xoʻjaligi vazirligi, Oʻzbekiston qishloq xoʻjaligi ilmiy-ishlab chiqarish markazi, Oʻzbekiston “Sifat” markazi 2006-yil 1-avgustgacha boʻlgan muddatda amaldagi idoraviy hujjatlarni qayta koʻrib chiqsin hamda gʻoʻzaning har bir seleksiya qilingan va sanoat navlari boʻyicha paxta tolasi, chigit va paxta xomashyosidan boshqa paxta mahsulotlari chiqishi normativlari boʻyicha takliflarni Oʻzbekiston Respublikasi Vazirlar Mahkamasiga kiritsin.

8. Yogʻ-moy va oziq-ovqat sanoati uyushmasi 2006-yil 1-avgustgacha boʻlgan muddatda:

Oʻzbekiston Respublikasi Moliya vazirligi, Iqtisodiyot vazirligi, Davlat soliq qoʻmitasi bilan birgalikda yogʻ-moy sanoati korxonalarida xomashyo, materiallar va tayyor mahsulotni hisobga olish tartibi toʻgʻrisidagi Nizomni;

“Oʻzstandart” agentligi, Oʻzbekiston “Sifat” markazi va boshqa manfaatdor idoralar bilan birgalikda yogʻ-moy sanoati korxonalarida paxta xomashyosining texnik chigitini qayta ishlashda mahsulot chiqishi va nobudgarchiligi normativlarini ishlab chiqsin va tasdiqlasin.

9. Qoraqalpogʻiston Respublikasi Vazirlar Kengashi, viloyatlar va tumanlar hokimliklari:

Oʻzbekiston Respublikasi Qishloq va suv xoʻjaligi vazirligi, Oʻzbekiston Fermer xoʻjaliklari uyushmasi bilan birgalikda paxta yetishtiruvchi xoʻjaliklarga shrot va paxta sheluxasini sotishning ochiq va oshkoraligini taʼminlasin;

“Oʻzulgurjisavdoinvest” uyushmasi, Yogʻ-moy va oziq-ovqat sanoati uyushmasi bilan birgalikda qishloq tumanlari aholisini, ayniqsa uzoq va togʻli tumanlarda joylashgan aholi punktlarini oʻsimlik yogʻi bilan uning narxi asossiz qimmatlashuviga yoʻl qoʻymagan holda barqaror taʼminlash boʻyicha zarur chora-tadbirlarni amalga oshirsin.

10. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin;

vazirlik va idoralarning normativ hujjatlari mazkur qarorga muvofiq boʻlishini taʼminlasin.

11. Ushbu qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.