Фармонга мувофиқ:
1) Қуйидагилар ушбу Фармоннинг асосий мақсадлар этиб белгиланди:
а) ногиронлиги бўлган шахсларнинг бандлигини таъминлашга кўмаклашган тадбиркорлик субъектлари учун молиявий рағбатлантириш тизимини яратиш;
б) ногиронлиги бўлган шахсларнинг самарали фаолият кўрсатиши учун махсус хизматлар тизимини жорий этиш;
в) ногиронлиги бўлган шахслар томонидан ишлаб чиқарилган товарларни бозорга чиқариш ва реализация қилишга кўмаклашиш;
г) ногиронлиги бўлган ёшларни замонавий касбларга ўқитиш, уларнинг меҳнат бозорига кириши учун қўшимча имкониятлар яратиш;
д) 2025 йил якунига қадар 80 минг нафар ногиронлиги бўлган шахснинг барқарор бандлиги ва муносиб даромад топишини таъминлаш;
2) Қуйидаги тартиб ўрнатилди, унга мувофиқ:
а) Ўзбекистон Республикаси Президентининг 2024 йил 27 декабрдаги ПФ-229-сон Фармонининг 2-бандида тикув-трикотаж, пойабзал ва чарм-атторлик саноати йўналишларида ишлаб чиқариш фаолиятини юритаётган тадбиркорлик субъектлари учун белгиланган солиқ имтиёзлари унда кўрсатилган шартлар асосида Ижтимоий ҳимоя ягона реестри ёки Камбағал оилалар реестрига киритилмаган I ва II гуруҳ ногиронлиги бўлган шахслар ишга қабул қилинганда ҳам қўлланилиши;
б) I ва II гуруҳ ногиронлиги бўлган шахсларни ишга қабул қилган ҳамда уларга меҳнатга ҳақ тўлашнинг энг кам миқдоридан кам бўлмаган миқдорда иш ҳақи тўлайдиган нодавлат юридик шахсларга ушбу шахслар учун ижтимоий солиқ ставкаси 1 фоиз миқдорида ҳисобланади, якка тартибдаги тадбиркорларга эса ижтимоий солиқ ҳисобланмаслиги;
в) 2025 йил 1 июлдан бошлаб ногиронлиги бўлган шахсларга қонунчиликда белгиланган солиқ имтиёзлари уларнинг мурожаатисиз проактив шаклда қўлланилиши белгиланди;
3) 2025 йил 1 июндан бошлаб:
а) I ва II гуруҳ ногиронлиги бўлган шахсларни ишга қабул қилган тадбиркорлик субъектларига 50 миллион сўмгача субсидия ажратилиши;
б) Қорақалпоғистон Республикаси, Андижон, Қашқадарё, Наманган, Самарқанд, Сурхондарё ва Фарғона вилоятларида, 2026 йил 1 январдан бошлаб республиканинг қолган ҳудудларида I ва II гуруҳ ногиронлиги бўлган шахсларни қуйидаги шартларга бир вақтда жавоб берадиган меҳнат шароитлари асосида ишга қабул қилган ёки шундай ишга жойлашишига кўмаклашган тадбиркорлик субъектларига 500 миллион сўмгача субсидия ажратиш йўлга қўйилиши;
в) мазкур банднинг “б” кичик бандидаги субсидия бандлиги таъминланган ҳар бир ногиронлиги бўлган шахс учун меҳнатга ҳақ тўлашнинг энг кам миқдорининг 3 баравари миқдорида берилиши белгиланди;
4) Ногиронлиги бўлган шахсларнинг бандлигини таъминлаш бўйича қуйидаги тартиб жорий этилди:
а) 2025 йил 1 июндан бошлаб “Ягона миллий ижтимоий ҳимоя” ахборот тизимида Меҳнатга лаёқатли ногиронлиги бўлган шахсларнинг электрон реестри (электрон реестр) юритилади;
б) 2025 йил 1 августдан бошлаб “Ягона миллий меҳнат тизими” идоралараро дастурий-аппарат комплексида ногиронлиги бўлган шахслар учун иш ўринларини захиралашнинг электрон тизими жорий этилади. Бунда ташкилотлар томонидан иш ўринларини захиралаш электрон реестр маълумотлари орқали ўзлари жойлашган ҳудуддаги ногиронлиги бўлган шахсларнинг жисмоний ҳолати ва имкониятлари ҳамда малака даражасидан келиб чиқиб амалга оширилади;
5) Қуйидагилар белгиланди, унга кўра:
а) 2025 йил 1 июндан бошлаб Ўзбекистон Республикаси Президентининг 2022 йил 12 октябрдаги ПҚ-390-сон қарорига мувофиқ юритилаётган Ягона реестрга (Ягона реестр) фақатгина қуйидаги тадбиркорлик фаолияти субъектлари ҳамда улар томонидан ишлаб чиқарилган товарлар ва кўрсатиладиган хизматлар ҳақидаги маълумотлар киритилади:
(i) ходимлари умумий сонининг камида 25 фоизи, бироқ камида 4 нафари ушбу ташкилотда 6 ойдан кам бўлмаган муддатда фаолият олиб бораётган ногиронлиги бўлган шахслардан иборат ва ногиронлиги бўлган шахслар меҳнатига ҳақ тўлаш фонди умумий меҳнатга ҳақ тўлаш фондининг камида 25 фоизини ташкил этувчи тижорат ташкилотлари;
(ii) камида 6 ойдан буён фаолият юритаётган ногиронлиги бўлган якка тартибдаги тадбиркорлар;
б) давлат буюртмачилари ва Ягона реестрга киритилган тадбиркорлик субъектларига қуйидаги ҳуқуқлар берилади:
(i) давлат буюртмачиларига Ишлаб чиқарувчилар экотизими портали ҳамда Электрон кооперация портали орқали ўз ҳудудида жойлашган Ягона реестрга киритилган тадбиркорлик субъектлари билан улар томонидан ишлаб чиқарилган товарларни (ишларни, хизматларни) харид қилиш бўйича бир молия йилида базавий ҳисоблаш миқдорининг бир минг беш юз бараваригача қийматда тўғридан-тўғри шартномалар тузиш;
(ii) Ягона реестрга киритилган тадбиркорлик субъектларига давлат харидлари электрон тизимларида талаб этиладиган қўшимча закалат тўловини киритмаслик;
(iii) Ягона реестрга киритилган тадбиркорлик субъектларига ҳар йили ўтказиб бориладиган “Инсон учун” шиори остида ногиронлиги бўлган шахслар томонидан ишлаб чиқарилган маҳсулотлар кўргазмаси доирасида фақатгина маҳаллий ишлаб чиқарилган товар тўғрисидаги сертификат берилган товарлари билан қатнашишига ва бир давлат буюртмачиси билан базавий ҳисоблаш миқдорининг уч минг бараваригача қийматда тўғридан-тўғри шартномалар тузиш.
6. Қуйидаги тартиб ўрнатилди, унга мувофиқ:
а) 2025 йил 1 июндан бошлаб:
(i) Электрон кооперация порталида Ягона реестрга киритилган субъектлар томонидан ишлаб чиқарилган товарлар, кўрсатиладиган хизматларнинг давлат хариди учун электрон савдо майдончаси фаолияти йўлга қўйилади;
(ii) давлат буюртмачиларига электрон савдо майдончаси орқали Ягона реестрга киритилган субъектлардан бир шартнома бўйича қиймати базавий ҳисоблаш миқдорининг ўн минг бараваригача бўлган товар (хизмат)ларни харид қилишга рухсат берилади. Бунда электрон савдода 48 соат ичида бир нафар иштирокчи қатнашган тақдирда, давлат буюртмачисига иштирокчи билан электрон равишда савдолашиш орқали ёки давлат харидларининг бошқа тури асосида харидни амалга ошириш ҳуқуқи берилади;
б) ногиронлиги бўлган шахслар бандлигини таъминлаган ҳамда уларнинг ижтимоийлашувига кўмаклашган тадбиркорлик субъектлари Ижтимоий ҳимоя миллий агентлиги томонидан “Инклюзив иш берувчи” мукофоти билан тақдирланади;
в) Агентлик ва Савдо-саноат палатаси томонидан Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари билан биргаликда ҳар йили май ойида “Инсон учун” шиори остида ногиронлиги бўлган шахслар томонидан ишлаб чиқарилган маҳсулотлар кўргазмаси ўтказиб борилади.