Ўзбекистон Республикаси Президентининг «2017 йилда ғазани навлар бўйича жойлаштириш ва пахта етиштиришнинг прогноз ҳажмлари тўғрисида» 2017 йил 3 февралдаги ПҚ-2756-сон қарорига асосан 2017 йил Жиззах вилояти Дўстлик туманида пахтачилик йўналишидаги 629 та фермер хўжалигининг 1060 та контуридаги 18700 гектар майдонга чигит экилиб, давлатга пахта сотиш шартнома режаси 50650 тонна миқдорида белгиланган.

Бироқ, тумандаги 4 та сектор раҳбарлари томонидан назорат ўрнатилмагани, мутасадди идоралар раҳбарларининг ўз вазифаларини тегишли даражада бажармагани натижасида шартнома режаси 69,1 фоизга бажарилган ёки 15660 тонна пахта хом ашёси кам топширилиши сабабли 29,8 млрд. сўм даромад олинмай қолган.

Йўл қўйилган камчиликларнинг сабаблари ўрганилганда маълум бўлдики, аксарият ҳолларда назорат ва ташкилотчилик ишларининг талаб даражасида йўлга қўйилмаганлиги натижасида:

биринчидан, ғазани балл бонитети паст (37 — 41), сув билан етарли таъминланмаган ерларга (22 — 25 ц/га) жойлаштирилиши оқибатида 4352 гектар майдондан атиги 15 центнердан ҳосил олинган ва ҳар гектардан ўртача 1 млн.сўмдан даромад олинмай қолган;

иккинчидан, мелиоратив ҳолати оғир бўлган 1014 гектар майдонда чигит экиш тадбирлари кечиктирилганлиги оқибатида 1200 тонна пахта ҳосили етиштирилмаган;

учинчидан, туманда 46,1 км. суғориш тармоқлари (лоток ариқлар) яроқсиз ҳолатга келганлиги сабабли 51 та фермер хўжалигининг 1200 гектар майдони сув билан умуман таъминланмаганлиги оқибатида гектарига ўртача режалаштирилган 25 центнер ўрнига 14,8 центнер ҳосил олиниб, 1800 тонна пахта ҳосили йўқотилган;

тўртинчидан, тумандаги 140 та фермер хўжалигининг 2700 гектар ғўза майдони умуман ягана қилинмагани, 2000 гектар ғўза майдонида ўргимчаккана ва кўсак қурти тарқалишига йўл қўйилгани ҳамда зараркунандаларга қарши кураш чоралари етарли даражада ташкил этилмагани оқибатида 1000 тонна кам ҳосил олинган;

бешинчидан, тумандаги мавжуд юқори унумли ҳайдов тракторларининг 30 таси таъмирталаб, шунингдек, 24 та ҳайдов ва 99 та чопиқ тракторлари, 50 та культиваторлар етишмаслиги агротехника тадбирларини кечиктириб ўтказилишига олиб келган.

Юқорида қайд этилган қўпол агротехник хатолардан тўғри хулоса чиқариш ва 2018 йилда ердан унумли фойдаланишда сектор раҳбарлари, мутасаддилар, таъминотчи ва хизмат кўрсатувчи ташкилотлар ҳамда фермер хўжаликлари раҳбарларининг масъулияти ва жавобгарлигини ошириш мақсадида Вазирлар Маҳкамаси қарор қилади:

1. Жиззах вилояти Дўстлик туманида:

пахта етиштириш ва уни йиғиб-териб олишдаги жиддий хато ва камчиликларга йўл қуйилгани, ғўза парваришида агротехника тадбирларни белгиланган муддатда сифатли ўтказилмагани учун Жиззах вилояти Дўстлик тумани ҳокими А. Арипов эгаллаб турган лавозимидан озод этилгани инобатга олинсин;

пахта етиштирувчи фермер хўжаликлари билан тайёрловчи ва хизмат кўрсатувчи ташкилотлар ўртасида дебитор-кредитор қарздорликлар ўсишига йўл қўйганлиги учун туман ҳокимининг иқтисодиёт ва тадбиркорлик масалалари бўйича биринчи ўринбосари Б. Дониёров огоҳлантирилсин.

2. Ўзбекистон Республикаси Бош прокуратураси, Ички ишлар вазирлиги, Давлат солиқ қўмитасига тегишли равишда бир ой муддатда туман прокурори, туман ички ишлар бўлими бошлиғи, туман Давлат солиқ инспекцияси бошлиғига нисбатан йўл қўйилган камчиликлар учун белгиланган тартибда тегишли чоралар кўриш тавсия этилсин.

3. Мавжуд қарздорликларни 2018 йилнинг 1 апрелига қадар ундириш таъминланмаган тақдирда, 4 та сектор раҳбарлари уларга нисбатан вазифасидан озод қилишгача бўлган интизомий жазо чоралари кўрилиши тўғрисида огоҳлантирилсин.

4. Қуйидагилар:

Жиззах вилояти Дўстлик туманида 2017 йил пахта ҳосилини етиштириш ва шартнома мажбуриятларини бажаришда йўл қўйилган камчиликларни келгусида бартараф этиш чора-тадбирлари дастури 1-иловага мувофиқ;

Жиззах вилояти Дўстлик туманидаги фермер хўжаликларига янги ҳайдов ва чопиқ тракторлари, культиваторлар, чигит экиш сеялкалари, омочлар, пуркаш мосламалари (ОВХ) ҳамда тиркамалар етказиб беришнинг 2018 йилга мўлжалланган прогноз режаси 2 ва 2а-иловаларга мувофиқ;

Жиззах вилояти Дўстлик туманидаги барча тоифадаги пахта етиштирувчи фермер хўжаликлари билан хизмат кўрсатувчи ва таъминотчи ташкилотлар ўртасидаги дебитор ва кредитор қарздорликларни бартараф этиш жадвали 3-иловага мувофиқ;

Жиззах вилояти Дўстлик туманида 2018 йилда фермер хўжаликлари томонидан экин майдонларидан ташқаридаги қишлоқ хўжалигида фойдаланилмайдиган ерларда енгил конструкцияли ва кам харажатли дала шийпонлари, иссиқхоналар қуриш, парранда, соғин сигирлар ҳамда асалари боқишни ташкил этишнинг прогноз режаси 4-иловага мувофиқ;

Жиззах вилояти Дўстлик туманида 2018 йилда фермер хўжаликлари томонидан пахта ва ғалла экиладиган майдонлар контурларининг дала четларига, суғориш ва коллектор-дренаж тармоқлари бўйларига экиладиган қишлоқ хўжалик экинларини жойлаштириш ҳамда маҳсулот етиштиришнинг прогноз режаси 5 ва 5а-иловаларга мувофиқ;

Жиззах вилояти Дўстлик туманида 2018 йилда бошоқли дон экинларидан бўшайдиган майдонларга такрорий экинларни жойлаштиришнинг прогноз режаси 6-иловага мувофиқ тасдиқлансин.

5. Ўзбекистон Республикаси Бош прокуратураси ҳузуридаги Мажбурий ижро бюросининг Жиззах вилояти бошқармасига фермер хўжаликларининг хизмат кўрсатувчи ва таъминотчи ташкилотлар олдидаги дебитор ва кредитор қарздорликларини белгиланган тартибда ундириш тавсия этилсин.

6. Ўзбекистон Республикаси Қишлоқ хўжалиги вазирлиги, Ер ресурслари, геодезия, картография ва давлат кадастри давлат қўмитаси Жиззах вилояти ҳокимлиги билан биргаликда 15 кун муддатда Дўстлик туманида тупроқ-иқлим шароитларини инобатга олган ҳолда 2018 йил учун экиладиган экинларнинг самарали жойлаштирилишини таъминласинлар.

7. Ўзбекистон Қишлоқ хўжалиги илмий-ишлаб чиқариш маркази Жиззах вилояти ҳокимлиги билан биргаликда фермер хўжаликлари раҳбарлари учун 2018 йилда фермер хўжаликларида режалаштирилган экинларни парваришлаш, зараркунандаларга қарши курашиш ва агротехника тадбирларини ўз вақтида амалга ошириш юзасидан жорий йилнинг март ойида жойларда семинарлар ўтказилишини ва мавсум давомида амалий ёрдам кўрсатилишини таъминласин.

8. Мазкур қарор ижроси бўйича ҳар чоракда Халқ депутатлари туман Кенгаши сессиясида 4 та сектор раҳбарларининг ҳисоботлари тингланиши ҳамда Жиззах вилояти ҳокимлиги томонидан амалга оширилган ишлар юзасидан Ўзбекистон Республикаси Бош вазирининг ўринбосари З.Т. Мирзаевга ахборот бериб борилиши белгилаб қўйилсин.

9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари З.Т. Мирзаев ҳамда Жиззах вилояти ҳокими вазифасини вақтинча бажарувчи Э.А. Солиев зиммасига юклансин.