Ўзбекистон Республикаси Президентининг «2017 йилда ғўзани навлар бўйича жойлаштириш ва пахта етиштиришнинг прогноз ҳажмлари тўғрисида» 2017 йил 3 февралдаги ПҚ-2756-сонли қарорига асосан 2017 йилда Тошкент вилояти Бўка туманида 693 та пахтачилик йўналишидаги фермер хўжаликларининг 2784 та контуридаги 14475 гектар майдонларига чигит экилиб, давлатга пахта сотиш шартномавий режаси 36100 тонна миқдорида белгиланган.

Бироқ, туманнинг 4 та сектор раҳбарлари томонидан назорат ўрнатилмаганлиги, мутасадди идоралар раҳбарларининг ўз вазифаларини зарур даражада бажармаганлиги натижасида шартномавий режа 73,2 фоизга бажарилган ёки 9685 тонна пахта хом ашёси кам топширилиши сабабли 8,4 млрд. сўм даромад олинмай қолган.

Йўл қўйилган камчиликларнинг сабаблари ўрганилганда маълум бўлдики, аксарият ҳолларда назорат ва ташкилотчиликнинг талаб дарадасида йўлга қўйилмаганлиги натижасида:

биринчидан, ғўзани балл бонитети паст (35 — 40), сув билан етарли таъминланмаган ва кам ҳосилли (18 — 20 ц/га) ерга жойлаштириш оқибатида 740 гектар майдонлардан бор йўғи 15-16 центнер ҳосил олинган ва ҳар гектаридан 1,7 млн.сўм зарар кўрилган;

иккинчидан, жорий йилда тумандаги 186 та фермер хўжаликларининг 1367 гектар ғўза майдонида кўсак қурти, 213 та фермер хўжаликларининг 4100 гектар майдонларида ўргимчак кана зараркунандалари билан зарарланиши натижасида жами 2200 тонна пахта ҳосили йўқотилган;

учинчидан, фермер хўжаликлари балансидаги 37 та ички насослардан суғориладиган 1648 гектар ғўза майдонларида йилнинг июль ва август ойларида қарздорлиги ҳисобига МИБ томонидан электр тармоғидан узилганлиги сабабли 660 тонна ҳамда бир неча йиллар давомида тумандаги ички ариқ-зовурларнинг тозаланмаганлиги, лотокларнинг бузилиши, сув иншоотларининг эскириб қолганлиги натижасида 1845 тонна режадаги ҳосил етиштирилмаган;

тўртинчидан, тумандаги мавжуд 70 та ҳайдов тракторларининг 35 фоизи эскирганлиги сабабли 1630 га майдонни шудгорлаш сифатсиз ва саёз ўтказилган, 127 та фермер хўжаликларида культиваторларнинг етишмаслиги агротехник тадбирларнинг кечикишига олиб келган.

Юқоридаги каби қўпол агротехник хатоликлардан тўғри хулоса чиқариш ва 2018 йилда ерлардан самарали фойдаланишда сектор раҳбарлари, мутасаддилар, таъминотчи ва хизмат кўрсатувчи ташкилотлар ҳамда фермер хўжаликлари раҳбарларининг масъулияти ва жавобгарлигини ошириш мақсадида Вазирлар Маҳкамаси қарор қилади:

1. Тошкент вилояти Бўка туманида:

пахта етиштириш ва уни йиғиб-териб олишдаги жиддий хато ва камчиликларга йўл қўйилганлиги, ғўза парваришида агротехник тадбирларнинг белгиланган муддатда сифатли ўтказилмаганлиги учун Бўка туман ҳокими Х. Холбоев эгаллаб турган лавозимидан озод этилганлиги инобатга олинсин;

пахта етиштирувчи фермер хўжаликлари билан тайёрловчи ва хизмат кўрсатувчи ташкилотлар ўртасида дебитор ва кредитор қарздорликларнинг ўсишига йўл қўйганлиги учун туман ҳокимининг иқтисодиёт ва тадбиркорлик масалалари бўйича биринчи ўринбосари М. Суннатуллаев лавозимидан озод этилганлиги маълумот учун қабул қилинсин.

2. Ўзбекистон Республикаси Бош прокуратураси, Ички ишлар вазирлиги, Давлат солиқ қўмитасига тегишли равишда бир ой муддатда туман прокурори, туман Ички ишлар бўлими бошлиғи, туман Давлат солиқ инспекцияси бошлиғига йўл қўйган камчиликлари учун белгиланган тартибда тегишли чоралар кўриш тавстя этилсин.

3. Мавжуд қарздорликларнинг 2018 йилнинг 1 апрелига қадар ундирилишини таъминламаган тақдирда 4 та сектор раҳбарларига нисбатан вазифасидан озод қилишгача бўлган интизомий жазо чоралари кўрилиши тўғрисида огоҳлантирилсин.

4. Қуйидагилар:

Тошкент вилояти Бўка туманида 2017 йил пахта ҳосилини етиштириш ва шартнома мажбуриятларини бажаришда йўл қўйилган камчиликлар ва уларни келгусида бартараф этиш чора-тадбирлари дастури 1-иловага мувофиқ;

Тошкент вилояти Бўка туманидаги фермер хўжаликларига янги қишлоқ хўжалиги техникалари ва механизмларини етказиб беришнинг 2018 йилга мўлжалланган прогноз режалари 2-иловага мувофиқ;

Тошкент вилояти Бўка туманида барча тоифадаги пахта етиштирувчи фермер хўжаликларининг хизмат кўрсатувчи ва таъминотчи ташкилотлар олдидаги дебитор ва кредитор қарздорликларини ундириш жадвали 3-иловага мувофиқ;

Тошкент вилояти Бўка туманида 2018 йилда фермер хўжаликлари томонидан экин майдонларидан ташқаридаги қишлоқ хўжалигида фойдаланилмайдиган ерларда енгил конструкцияли ва кам харажатли дала шийпонлари, иссиқхоналар қуриш, парранда, соғин сигир ҳамда асалари боқишни ташкил этиш прогноз режаси 4-иловага мувофиқ;

Тошкент вилояти Бўка туманида 2018 йилда фермер хўжаликлари томонидан пахта ва ғалла экинлари экиладиган ер майдонлари контурларининг дала четлари ҳисоб-китоби 5-иловага мувофиқ;

Тошкент вилояти Бўка туманида 2018 йил ҳосили учун кузги бошоқли дон экинлари экилган ва чигит экиладиган майдонлар атрофларидаги дала четларига қишлоқ хўжалиги экинларини жойлаштириш ҳамда маҳсулот етиштиришнинг прогноз режаси 6 ва 6а-иловаларга мувофиқ;

Тошкент вилояти Бўка туманида 2018 йил бошоқли дон экинларидан бўшайдиган майдонларга такрорий экинларни жойлаштиришнинг прогноз режаси 7-иловага мувофиқ тасдиқлансин.

5. Ўзбекистон Республикаси Бош прокуратураси ҳузуридаги Мажбурий ижро бюросининг Тошкент вилояти бошқармасига фермер хўжаликларининг хизмат кўрсатувчи ва таъминотчи ташкилотлар олдидаги дебитор ва кредитор қарздорликларини белгиланган тартибда ундириш тавсия этилсин.

6. Ўзбекистон Республикаси Қишлоқ хўжалиги вазирлиги, Сув хўжалиги вазирлиги, Ер ресурслари, геодезия, картография ва давлат кадастри давлат қўмитаси Тошкент вилояти ҳокимлиги билан биргаликда 15 кун муддатда Бўка туманида 2018 йил учун экиладиган экинларни тупроқ-иқлим шароитларини инобатга олган ҳолда самарали жойлаштирилишини таъминласинлар.

7. Ўзбекистон Қишлоқ хўжалиги илмий-ишлаб чиқариш маркази Тошкент вилояти ҳокимлиги билан биргаликда фермер хўжаликлари раҳбарлари учун 2018 йилда фермер хўжаликларида режалаштирилган экинларни парваришлаш, зараркунандаларга қарши курашиш ва агротехник тадбирларни ўз вақтида амалга ошириш юзасидан жорий йилнинг март ойида жойларда семинарлар ўтказилишини ва мавсум давомида амалий ёрдам кўрсатилишини таъминласин.

8. Мазкур қарор ижроси бўйича ҳар чоракда Халқ депутатлари туман Кенгаши сессиясида 4 та сектор раҳбарларининг ҳисоботлари тингланиши ҳамда Тошкент вилояти ҳокимлиги амалга оширилган ишлар юзасидан Ўзбекистон Республикаси Бош вазирининг ўринбосари З.Т. Мирзаевга ахборот бериб бориши белгилаб қўйилсин.

9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари З.Т. Мирзаев ҳамда Тошкент вилояти ҳокими Ғ.И. Ибрагимов зиммасига юклансин.