Ҳужжат кучини йўқотган " " 28.10.2024
Ўзбекистон Республикаси Олий Мажлиси Қонунчилик палатаси кенгашининг ва
Ўзбекистон Республикаси Олий Мажлиси Сенати кенгашининг
қўшма қарори
Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди тўғрисидаги низомга ҳамда Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди маблағларини бошқариш бўйича Парламент комиссияси тўғрисидаги низомга қўшимчалар киритиш ҳақида
 LexUZ шарҳи
Мазкур қарор Ўзбекистон Республикаси Олий Мажлиси Қонунчилик палатаси Кенгашининг ва Ўзбекистон Республикаси Олий Мажлиси Сенати Кенгашининг 2024 йил 28 октябрдаги 5005-IV/КҚ-842-IV-сонли «Фуқаролик жамияти институтларини қўллаб-қувватлашни янада кучайтириш чора-тадбирлари тўғрисида»ги Қўшма қарорига асосан ўз кучини йўқотган.
Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенатининг Кенгаши қарор қиладилар:
1. Ўзбекистон Республикаси Олий Мажлиси Қонунчилик палатаси Кенгашининг ва Ўзбекистон Республикаси Олий Мажлиси Сенати Кенгашининг 2008 йил 10 июлда қабул қилинган 843-I/515-I-сонли Қўшма қарори билан тасдиқланган (Ўзбекистон Республикаси Олий Мажлиси Қонунчилик палатаси Кенгашининг ва Ўзбекистон Республикаси Олий Мажлиси Сенати Кенгашининг 2015 йил 13 майда қабул қилинган 132-III/КҚ-15-III-сонли Қўшма қарори таҳририда) Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди тўғрисидаги низомнинг (Ўзбекистон Республикаси Олий Мажлиси палаталарининг Ахборотномаси, 2015 йил, № 5, 219-модда) 29-банди қуйидаги мазмундаги тўртинчи хатбоши билан тўлдирилсин:
«Парламент комиссияси томонидан тасдиқланган нодавлат нотижорат ташкилотларидан, оммавий ахборот воситаларидан ва фуқаролик жамиятининг бошқа институтларидан қайтарилган молиявий маблағлардан фойдаланиш тартибига мувофиқ Олий Мажлис ҳузуридаги Жамоат фонди ўз ҳисобварақларида жамланган бўш маблағлар қолдиқларини:
нодавлат нотижорат ташкилотларини ва фуқаролик жамиятининг бошқа институтларини қўшимча равишда қўллаб-қувватлашга;
белгиланган тартибда тижорат банкларининг депозит ҳисобварақларига вақтинча жойлаштиришга йўналтиради».
2. Ўзбекистон Республикаси Олий Мажлиси Қонунчилик палатаси Кенгашининг ва Ўзбекистон Республикаси Олий Мажлиси Сенати Кенгашининг 2008 йил 10 июлда қабул қилинган 843-I/515-I-сонли Қўшма қарори билан тасдиқланган (Ўзбекистон Республикаси Олий Мажлиси Қонунчилик палатаси Кенгашининг ва Ўзбекистон Республикаси Олий Мажлиси Сенати Кенгашининг 2015 йил 13 майда қабул қилинган 132-III/КҚ-15-III-сонли Қўшма қарори таҳририда) Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди маблағларини бошқариш бўйича Парламент комиссияси тўғрисидаги низомнинг (Ўзбекистон Республикаси Олий Мажлиси палаталарининг Ахборотномаси, 2015 йил, № 5, 219-модда) 4-бандига қуйидаги ўзгартиш ва қўшимча киритилсин:
қуйидаги мазмундаги ўн учинчи ва ўн тўртинчи хатбошилар билан тўлдирилсин:
«нодавлат нотижорат ташкилотларининг ва фуқаролик жамияти бошқа институтларининг Олий Мажлис ҳузуридаги Жамоат фонди ҳисобварақларида бўш маблағлар қолдиқлари сифатида жамланадиган, қайтарилган молиявий маблағларидан фойдаланиш тартибини белгилайди;
қайтарилган бўш маблағларнинг қолдиқларини Олий Мажлис ҳузуридаги Жамоат фонди томонидан Ўзбекистон Республикаси Молия вазирлиги ва Ўзбекистон Республикаси Марказий банки билан келишилган ҳолда тижорат банкларининг депозит ҳисобварақларига вақтинчалик жойлаштириш, шунингдек ҳисоблаб чиқариладиган фоизли депозит тўловларни сарфлаш тартиби ва шартларини белгилайди»;
ўн учинчи ва ўн тўртинчи хатбошилар тегишинча ўн бешинчи ва ўн олтинчи хатбошилар деб ҳисоблансин.
3. Ушбу Қўшма қарор тегишинча Ўзбекистон Республикаси Олий Мажлисининг Қонунчилик палатаси ва Сенати тасдиғига киритилсин.
4. Ушбу Қўшма қарор қабул қилинган кундан эътиборан кучга киради.
Ўзбекистон Республикаси Олий Мажлиси Қонунчилик палатасининг Спикери Н. ИСМОИЛОВ
Тошкент ш.,
2016 йил 2 май,
442-III-сон
Ўзбекистон Республикаси Олий Мажлиси Сенатининг Раиси Н. ЙЎЛДОШЕВ
Тошкент ш.,
2016 йил 2 май,
№ КҚ-87-III

(Ўзбекистон Республикаси Олий Мажлиси палаталарининг Ахборотномаси, 2016 й., 5-сон, 150-модда)