Ўзбекистон Республикаси Вазирлар Маҳкамасининг «2013 — 2018 йиллар даврида кўмир саноати корхоналарини модернизациялаш, техник ва технологик жиҳатдан қайта жиҳозлаш ҳамда уни мувозанатли ривожлантириш дастурини тасдиқлаш тўғрисида» 2013 йил 6 июндаги 161-сон қарори ижросини сўзсиз таъминлаш, кўмир тармоғини модернизация қилиш ва ривожлантириш учун зарур молиявий маблағлар билан таъминлаш мақсадида, Вазирлар Маҳкамаси қарор қилади:

1. 2015 йил 1 январдан бошлаб кўмир тармоғи корхоналари томонидан сотиладиган 1 тонна кўмиринг улгуржи сотиш нархига махсус устама миқдори 54 000 сўм этиб белгилансин, аҳолига ва Ўзбекистон Республикаси Давлат бюджетидан молиялаштириладиган ташкилотларга сотиладиган кўмир ҳажмлари бундан мустасно.

2. Белгилансинки:

махсус устамани қўллашдан келиб тушадиган маблағлар фақат кўмир тармоғини модернизация қилиш, техник ва технологик жиҳатдан қайта жиҳозлаш ва уни бир меъёрда ривожлантириш бўйича инвестиция лойиҳаларини амалга оширишга, инвестиция лойиҳалари доирасида жалб қилинган кредит қарзларини сўндиришга, кўмир тармоғи корхоналари томонидан амалга ошириладиган қўшимча кон устини очиш ишларини бажаришга йўналтирилади;

1 тонна кўмир учун махсус устама миқдорини ўзгартириш бўйича таклифлар Ўзбекистон Республикаси Молия вазирлиги ва Ўзбекистон Республикаси Иқтисодиёт вазирлиги билан келишган ҳолда «Ўзбекистон темир йўллари» AЖ томонидан Ўзбекистон Республикаси Вазирлар Маҳкамасига киритилади.

3. 2015 йил 1 январдан бошлаб Ўзбекистон Республикаси Вазирлар Маҳкамасининг «Кўмир учун махсус улгуржи-сотиш нархлари устамасини жорий етиш тўғрисида» 2013 йил 27 декабрдаги 345-сон қарори ўз кучини йўқотган деб ҳисоблансин.

4. Мазкур қарорнинг бажарилишини назорат қилиш Ўзбекистон Республикаси Бош вазир ўринбосари Г.И. Ибрагимов зиммасига юклансин.