1. Mazkur Yoʻriqnoma koʻmir, neft, gaz qazib olish va geologiya-razvedka ishlari tizimi xodimlarining majburiy davlat shaxsiy sugʻurtasi boʻyicha hujjatlarni rasmiylashtirish hamda toʻlovlarni toʻlash tartibini belgilab beradi.

Oʻzbekiston neft va gaz sanoati milliy korporatsiyasi (Oʻzneftgaz), Oʻzbekiston Respublikasi geologiya va mineral resurslar Davlat qoʻmitasi, Oʻzbekiston Respublikasi koʻmir qazib olish va sotish aksionerlik birlashmasi (Koʻmir AO) sugʻurtalangan har bir xodimi uchun Oʻzbekiston Respublikasida belgilangan eng kam oylik ish haqining 20 foizi miqdoridagi sugʻurta badallarini, shu jumladan, davlat sugʻurta tashkilotlarining sugʻurtani oʻtkazish bilan bogʻliq ushbu badallarning 8 foizi miqdoridagi xarajatlarini har yili Oʻzbekiston Respublikasi Davlat sugʻurta bosh boshqarmasining hisob raqamiga oʻtkazadi.

Eng kam oylik ish haqining miqdori oshirilgan taqdirda sugʻurta puli va badalning miqdori qayta hisoblanadi va farqi Oʻzdavsugʻurtaning hisob raqamiga oʻtkaziladi.

2. Korxona sugʻurta badalini oʻtkazgan kundan boshlab xodim sugʻurtalangan hisoblanadi.

Sugʻurta badallari oʻz vaqtida va toʻliq oʻtkazilishi Oʻzbekiston Respublikasi Davlat sugʻurta bosh boshqarmasi tomonidan nazorat qilinadi.

Yangi xodim ishga olinganda uning uchun ham sugʻurta badali oʻtkaziladi.

Korxona, tashkilot oʻz xodimlarini ular sugʻurtalanganligi toʻgʻrisida xabardor qiladi.

3. Ushbu Yoʻriqnomada koʻzda tutilgan sugʻurta hodisalari yuz berganda sugʻurta pulini sugʻurtalangan shaxsning yashash (roʻyxatga olingan) joyidagi davlat sugʻurta muassasasi jamgʻarma bankining tegishli muassasasiga oluvchining nomidagi omonatga pul oʻtkazish, bankiga chek berish yoki pochta orqali oʻtkazish yoʻli bilan toʻlaydi. Balogʻatga yetmagan oluvchiga sugʻurta puli faqat uning yashash joyidagi jamgʻarma banki muassasasiga uning nomiga pul oʻtkazish yoʻli bilan toʻlanadi va bu haqda vasiylik hamda homiylik idoralariga maʼlum qilinadi.

4. Sugʻurta puli:

a) sugʻurtalangan shaxs xizmat vazifasini ado etayotganda halok boʻlsa (oʻlsa) uning merosxoʻrlariga Oʻzbekiston Respublikasida belgilangan eng kam oylik ish haqining 35 baravari miqdorida;

b) sugʻurtalangan shaxs xizmat vazifasini bajarayotganda shikast olishi bilan bogʻliq nogironlik belgilanganda:

I guruh nogironiga eng kam oylik ish haqining 36 baravari hajmidagi pulning 50 foizi;

II guruh nogironiga eng kam oylik ish haqining 36 baravari hajmidagi pulning 30 foizi;

III guruh nogironiga eng kam oylik ish haqining 36 baravari hajmidagi pulning 20 foizi miqdorida toʻlanadi.

Sugʻurtalangan shaxs bilan yuz bergan, ammo uning nogiron boʻlib qolishiga olib kelmagan baxtsiz hodisaning oqibatlari “Sugʻurta hodisalari munosabati bilan sugʻurta pulini va bir marta beriladigan nafaqalarni aniqlash hamda toʻlash tartibi toʻgʻrisida”gi uslubiy koʻrsatmalarga asosan aniqlanadi.

Sugʻurta puli sugʻurtaning boshqa turlari boʻyicha toʻlovlar va zararni qoplash yoʻsinidagi toʻlovlardan qatʼi nazar, toʻlanaveradi.

5. Sugʻurta puli davlat sugʻurta muassasasi barcha zarur hujjatlarni olgan kundan boshlab 3 kun ichida toʻlanadi.

Sugʻurta pulini toʻlash rad etilgan taqdirda davlat sugʻurta muassasasi bu haqda 3 kun mobaynida sugʻurtalangan shaxsga yoki uning merosxoʻrlariga rad etish sabablarini koʻrsatgan holda yozma ravishda maʼlum qiladi.

6. Sugʻurtalangan shaxs (merosxoʻrlari) sugʻurta pulini toʻlash haqidagi arizani sugʻurta hodisasi roʻy bergan kundan boshlab 3 yil mobaynida davlat sugʻurta muassasasiga berishi lozim.

7. Tomonlarning sugʻurtaga taalluqli munosabatlaridan kelib chiquvchi barcha nizolar sudlar tomonidan ularning vakolatiga muvofiq va Oʻzbekiston Respublikasi qonunlarida belgilab qoʻyilgan tartibda hal etiladi.

8. Agar sugʻurtalangan shaxsning halok boʻlishi (oʻlimi) yoki shikast olishi:

uning oʻzi ataylab sodir etgan yoki boshqa aybli xatti harakatlari bilan bogʻliq boʻlsa;

sugʻurta tashkilotiga sugʻurta obyekti haqida atayin soxta maʼlumotlar xabar qilingan boʻlsa;

sugʻurta hodisasi sugʻurta shartnomasida nazarda tutilgan boshqa hollar tufayli yuz bergan boʻlsa, sugʻurta tashkiloti sugʻurta talanuvchiga sugʻurta pulini (sugʻurta tovonini) toʻliq yoki qisman toʻlashni rad etishga haqlidir.

9. sugʻurtalangan shaxs shikast olgan taqdirda davlat sugʻurta muassasasiga quyidagi hujjatlarni taqdim etadi:

sugʻurta pulini toʻlash haqidagi ariza;

№ N-1 shaklli dalolatnoma;

DMEK maʼlumotnomasining nusxasi (nogironlik belgilangan boʻlsa);

shaxsini tasdiqlovchi hujjat. Sugʻurtalangan shaxs oʻlganda ushbular taqdim etiladi:

sugʻurta pulini toʻlash haqidagi ariza;

oʻlganlik toʻgʻrisidagi guvohnomaning nusxasi;

merosxoʻrlik huquqini tasdiqlovchi notarial idora guvohnomasining nusxasi;

shaxsini tasdiqlaydigan hujjat.

10. Sugʻurtalangan shaxs yoki merosxoʻrlari sugʻurta puli toʻlashni soʻrab murojaat qilganlarida davlat sugʻurta muassasasi arizani yuqorida aytilgan tizimlar xodimlarining arizalari va toʻlangan sugʻurta puli roʻyxatga olinadigan 184 raqamli daftarda qayd qilib qoʻyishga majbur.

11. Davlat sugʻurta tashkilotlarining talabi bilan viloyatlararo idoralar sugʻurta pulini toʻlash masalasini hal etish uchun sugʻurta hodisalari yuz bergan sharoitlar haqidagi hujjatlarni taqdim etadilar.