Toshkent shahrida joylashgan konsert zallari va saroylarini boshqarishni tashkil etish samaradorligini oshirish, ularning moddiy-texnika bazasini mustahkamlash hamda ommaviy tadbirlar o‘tkazish chog‘ida jamoat tartibi va xavfsizligini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Madaniyat ishlari vazirligi va “O‘zbeknavo” estrada birlashmasi “Xalqlar do‘stligi” saroyi va “Turkiston” saroyini 2004-yil 1-fevraldan boshlab belgilangan tartibda Toshkent shahar hokimligi ixtiyoriga bersinlar.

2. Belgilansinki, “Xalqlar do‘stligi” saroyi va “Turkiston” saroyini moliyalashtirish saroylar faoliyatidan olinadigan o‘z daromadlari, shuningdek homiylar mablag‘lari va davlat budjetidan ajratiladigan maqsadli mablag‘lar hisobiga amalga oshiriladi.

3. O‘zbekiston Respublikasi Moliya vazirligi va Toshkent shahar hokimligi:

har yili Toshkent shahri shahar budjeti parametrlarida “Xalqlar do‘stligi” va “Turkiston” saroylari uchun ularning moddiy-texnika bazasini mustahkamlash, xodimlarga ish haqi to‘lash va binolarni qo‘riqlash xizmatlariga haq to‘lash xarajatlarini moliyalashtirishga budjet mablag‘lari ajratilishini nazarda tutsinlar;

Toshkent shahri shahar budjetidan maqsadli mablag‘lar ajratishda saroylarning xarajatlari smetasini, shtatdagi xodimlar sonining asoslanganligini o‘rganib chiqsinlar hamda budjet va budjetdan tashqari mablag‘lar hisobiga ta’minlanishi kerak bo‘lgan shtat lavozimlarining aniq ro‘yxatini belgilasinlar.

4. Toshkent shahar hokimligi:

ko‘rsatib o‘tilgan saroylarning moddiy-texnika bazasini mustahkamlash, ularni zarur maxsus asbob-uskunalar, shuningdek xavfsizlik va himoyaning texnik vositalari bilan jihozlash chora-tadbirlarini ko‘rsin;

“Xalqlar do‘stligi” va “Turkiston” saroylarining daromadlari shakllantirilishi, mablag‘lardan oqilona va maqsadli foydalanilishi ustidan muntazam nazoratni amalga oshirsin;

O‘zbekiston Respublikasi Ichki ishlar vazirligi, boshqa manfaatdor vazirliklar va idoralar bilan birgalikda ikki oy muddatda Toshkent shahridagi yirik madaniyat saroylari, konsert zallari va stadionlarning binolari va inshootlari, muhandislik kommunikatsiyalari texnik holatini, ularning yong‘in xavfsizligi vositalari bilan jihozlanganligini o‘rganib chiqsin;

o‘rganishlar natijalari bo‘yicha Toshkent shahridagi madaniyat saroylari, konsert zallari va stadionlarida ommaviy tadbirlarni o‘tkazish vaqtida yong‘in xavfsizligini, jamoat tartibini va fuqarolar xavfsizligini ta’minlash bo‘yicha aniq chora-tadbirlarni ishlab chiqsin va amalga oshirsin.

5. O‘zbekiston Respublikasi Madaniyat va sport ishlari vazirligi Vazirlar Mahkamasining 2001-yil 26-iyundagi 272-son qarori bilan tuzilgan Estrada san’atini rivojlantirish va muvofiqlashtirish kengashi bilan birgalikda respublika madaniyat saroylarida, konsert zallarida va stadionlarida o‘tkaziladigan madaniy-ma’rifiy va konsert tadbirlarining mavzulari, repertuar rejasi va dasturlarini takomillashtirish ishlarining muvofiqlashtirilishini ta’minlasin

6. Belgilab qo‘yilsinki, respublika madaniyat saroylarida, konsert zallarida va stadionlarida ommaviy tadbirlarni o‘tkazish uchun binolarning ijaraga berilishiga faqat tadbirlarni tashkil etuvchilarda jamoat tartibini va fuqarolar xavfsizligini ta’minlash yuzasidan ichki ishlar organlari bilan shartnomalar mavjud bo‘lgan taqdirdagina yo‘l qo‘yiladi.

7. O‘zbekiston Respublikasi Davlat mulki qo‘mitasi, Madaniyat ishlari vazirligi, Moliya vazirligi bir oy muddatda:

Respublika teatr va tomosha muassasalari binolarini chet tashkilotlarga ijaraga berish va ijara haqini belgilash tartibini;

O‘zbekiston Respublikasi Markaziy banki bilan birgalikda — respublika teatr va tomosha muassasalarida chiptalar bo‘yicha ishlarni yuritish tartibini ishlab chiqsinlar va belgilangan tartibda tasdiqlasinlar.

8. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari A.Azizxo‘jayev va Toshkent shahar hokimi R.M.Shoabdurahmonov zimmasiga yuklansin.