Vatanimiz tibbiyot va farmatsevtika sanoatini jadal rivojlantirishni ta’minlash, tarmoqda iqtisodiy islohotlarni chuqurlashtirish, dori-darmon vositalari va tibbiy anjomlar ishlab chiqarish sohasini kengaytirish maqsadida Vazirlar Mahkamasi qaror qiladi:

1. “O‘zistiqbolstat” davlat qo‘mitasi “O‘zfarmsanoat” konserni, boshqa manfaatdor vazirliklar va idoralar bilan birgalikda xorijiy investorlarni jalb etgan holda “O‘zfarmsanoat” konsernining importning o‘rnini bosuvchi dori-darmon vositalari va tibbiy anjomlar ishlab chiqarish dasturini ishlab chiqsin hamda uni respublikaning 1997-yilgi investitsiya dasturiga kiritsin.

2. “O‘zkimyosanoat” uyushmasi “O‘zfarmsanoat” konserni bilan birgalikda o‘ziga qarashli korxonalarning mavjud ishlab chiqarish quvvatlaridan foydalangan holda mahalliy o‘simlik xom ashyosi va texnologiyalar asosida dori-darmon vositalari substansiyalarini sanoat yo‘li bilan ishlab chiqarish dasturini bir oy muddatda ishlab chiqsin va tasdiqlasin.

3. Tashqi iqtisodiy faoliyat milliy bankiga va “Agrobank” ATBga, O‘zbekiston Respublikasining boshqa tijorat banklariga tibbiyot va farmatsevtika sanoati korxonalarini texnika bilan qayta jihozlash maqsadlari uchun ustuvor tartibda imtiyozli kreditlar berish tavsiya etilsin.

4. Vatanimiz tibbiyot va farmatsevtika sanoatini rivojlantirishni iqtisodiy rag‘batlantirish maqsadida:

“O‘zfarmsanoat” konserni korxonalari va tashkilotlariga soliqlarning barcha turlari bo‘yicha budjetga to‘lanishi kerak bo‘lgan summaning 50 foizi miqdorida 3 yil muddatga imtiyozlar berilsin, ushbu summa farmatsevtika industriyasini rivojlantirishga yo‘naltirilsin;

“O‘zfarmsanoat” konserni korxonalari, shu jumladan qo‘shma korxonalar tomonidan ishlab chiqarilayotgan tayyor mahsulotga qo‘shilgan qiymat solig‘ini hisoblab chiqishda importdan olinayotgan xom ashyo va butlovchi materiallar qiymati 3 yil muddatga soliq solinadigan bazadan chiqarilsin.

6. O‘zbekiston Respublikasi Sog‘liqni saqlash vazirligi:

Asosiy dori vositalari ro‘yxatini ikki yilda kamida bir marta ishlab chiqsin va tasdiqlasin;

Tibbiy buyumlar ro‘yxatini tasdiqlasin;

Asosiy dori vositalari ro‘yxatiga kiritilgan dori vositalari, shuningdek tibbiy buyumlar ro‘yxatiga kiritilgan tibbiy buyumlarning davlat buyurtmasini shakllantirsin va ularning davlat tibbiyot muassasalarida bir oylik zaxirasi mavjud bo‘lishini ta’minlasin.

7. “O‘zistiqbolstat” davlat qo‘mitasi, “O‘zulgurjibirjasavdo” uyushmasi, O‘zbekiston Respublikasi Moliya vazirligi markazlashtirilgan kapital mablag‘lar va moddiy resurslar limitlari prognozlarini, qurilishning aniq maqsadli dasturlarini tuzishda tibbiyot va farmatsevtika sanoati obyektlari ularga birinchi navbatda kiritilishini nazarda tutsinlar.

8. “O‘zistiqbolstat” davlat qo‘mitasi, “O‘zdavpaxtasanoatsotish” uyushmasi har yili tibbiy bog‘lash materiallarini kooperatsiya asosida qayta ishlash va o‘zimizda ishlab chiqarishni rivojlantirish uchun “O‘zfarmsanoat” konserniga paxta tolasi limitlarini nazarda tutsinlar.

9. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari farmatsevtika sanoatini rivojlantirishga, dori-darmon xom ashyosi, tayyor dori-darmon vositalari, tibbiy anjomlar va tibbiy texnika ishlab chiqarish va qayta ishlash korxonalarini texnika bilan qayta jihozlash, rekonstruksiya qilish va yangilarini qurishga mulkchilikning barcha shakllaridagi korxonalar mablag‘larini jalb etish ishlarini tashkil etsinlar.

10. Pul-kredit siyosati bo‘yicha respublika komissiyasi ulgurji operatsiyalar bo‘yicha dori vositalari, tibbiy buyumlar xarid qilishga yo‘naltiriladigan pul mablag‘lari ustuvor konvertatsiya qilinishini ta’minlasin.

11. Vazirlar Mahkamasining “Tashqi iqtisodiy faoliyatni yanada erkinlashtirish va takomillashtirish chora-tadbirlari to‘g‘risida” 1995-yil 25-iyuldagi 287-son qaroriga 5-ilovaning “Dori-darmon vositalari” 1-bandidan TIF TN 3003 va 3004 tovar kodlari chiqarib tashlansin.

12. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari S. Saidqosimov va B. Hamidov zimmasiga yuklansin.