O‘zbekiston Respublikasi bilan Latviya Respublikasi o‘rtasidagi siyosiy, savdo-iqtisodiy, ilmiy-texnik va madaniy hamkorlikni yanada faollashtirish, ishbilarmonlik va turistik maqsadlarda O‘zbekiston Respublikasiga tashrif buyurayotgan Latviya Respublikasi fuqarolari uchun vizalarni rasmiylashtirish tartibotlarini takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Tashqi ishlar vazirligi:

ishbilarmonlik maqsadlarida O‘zbekistonga tashrif buyurayotgan Latviya Respublikasi fuqarolari uchun bir yil muddatga ko‘p martalik vizalarni, O‘zbekiston Respublikasidagi taklif qilayotgan yuridik shaxsning O‘zbekiston Respublikasi Tashqi ishlar vazirligiga murojaat qilishiga doir talabni bekor qilgan holda O‘zbekiston Respublikasining xorijiy muassasalarida, hujjatlarni qabul qilish kunidan tashqari, 2 ish kuni mobaynida rasmiylashtirsin;

turist sifatida O‘zbekistonga tashrif buyurayotgan Latviya Respublikasi fuqarolari uchun 1 oygacha bo‘lgan muddatga ko‘p martalik vizalarni, turistik tashkilotlarning turistik vaucherlarini taqdim etish zarurligiga doir talabni bekor qilgan holda, hujjatlarni qabul qilish kunidan tashqari, 2 ish kuni mobaynida rasmiylashtirsin.

2. O‘zbekiston Respublikasining manfaatdor vazirliklari va idoralari o‘z idoraviy hujjatlarini mazkur qarorga muvofiqlashtirsinlar.

3. Mazkur qarorning bajarilishini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.