Hujjat kuchini yo‘qotgan " " 16.08.2024
Oʻzbekiston Respublikasi Prezidentining
Farmoni
XUSUSIY TADBIRKORLIKDA TASHABBUS KOʻRSATISH VA UNI RAGʻBATLANTIRISH TOʻGʻRISIDA
 LexUZ sharhi
Mazkur Farmoni Oʻzbekiston Respublikasi Prezidentining 2024-yil 16-avgustdagi PF-111-sonli “Ijtimoiy munosabatlarni huquqiy tartibga solishning barqarorligini taʼminlash, sifati va samaradorligini oshirish chora-tadbirlari toʻgʻrisida”gi Farmoniga asosan oʻz kuchini yoʻqotgan.
Respublika aholisini tadbirkorlik sohasiga keng koʻlamda jalb etishni taʼminlash, ishlab chiqarish va xizmat koʻrsatish sohasida xususiy biznesning rolini sifat jihatidan oshirish maqsadida:
1. Qoraqalpogʻiston Respublikasining Vazirlar Kengashi, viloyatlar va Toshkent shahar hokimlari, vazirliklar va idoralar, korporatsiyalar, konsernlar, uyushmalar va respublikaning boshqa tashkilotlari oʻzlarining kundalik faoliyatida:
moddiy-texnika, axborot va kadr resurslariga erishishda tadbirkorlar bilan davlat korxonalarining toʻla teng huquqliligini ogʻishmay taʼminlasinlar;
qonunlarda koʻzda tutilgan hollardan tashqari, tadbirkorlarning tezkor-xoʻjalik va xoʻjalik-tijorat faoliyatiga aralashishga yoʻl qoʻymasinlar;
 LexUZ sharhi
Qarang: Oʻzbekiston Respublikasining “Xoʻjalik yurituvchi subyektlar faoliyatini davlat tomonidan nazorat qilish toʻgʻrisida”gi Qonunining 9-moddasi.
tomonlardan birining aybi bilan koʻrilgan zararni va boy berilgan foydani qoplash sharti bilan, iqtisodiy munosabatlarda boshqaruv organlari bilan tadbirkorlarning ikki tomonlama masʼuliyati prinsipiga amal qilsinlar.
Oʻzbekiston Respublikasining Prokuraturasi va Adliya vazirligi tadbirkorlar va xususiy mulk egalarining huquqlariga rioya etish yuzasidan qabul qilingan qonunlar hamda Farmonlarning qatʼiyan bajarilishini nazorat qilishni taʼminlasinlar. Ularni soʻzsiz bajarish va qonunbuzarliklarning oldini olish borasida tezkor choralarni koʻrsinlar.
Oldingi tahrirga qarang.
(2-band Oʻzbekiston Respublikasi Prezidentining 2004-yil 21-iyuldagi PF-3466-sonli Farmoniga asosan oʻz kuchini yoʻqotgan — OʻR QHT, 2004-y., 29-son, 329-modda)
3. Oʻzbekiston Respublikasining Davlat mulki qoʻmitasi 1995-yilda Kichik va oʻrta biznesni rivojlantirishga koʻmaklashuvchi jamgʻarmaga davlat mulkini xususiylashtirishdan tushgan, rekonstruksiyalash, texnika bilan qayta qurollantirish va tadbirkorlikni qoʻllab-quvvatlash uchun moʻljallangan mablagʻlarning 50 foizga qadarini topshirsin.
Mazkur mablagʻlar avvalo loyihalarni amalga oshirishda oʻz ulushi bilan qatnashish, kreditlar berish, shuningdek tijorat banklarining kreditlari boʻyicha kafolatlar berish yoʻli bilan tadbirkorlarni qoʻllab-quvvatlashga sarflansin.
Oldingi tahrirga qarang.
(4 va 5-bandlar Oʻzbekiston Respublikasi Prezidentining 2004-yil 21-iyuldagi PF-3466-sonli Farmoniga asosan oʻz kuchini yoʻqotgan — OʻR QHT, 2004-y., 29-son, 329-modda)
6. Xususiy korxonalarda yollanib ishlaydigan xodimlar soni boʻyicha amaldagi cheklashlar bekor qilinsin.
7. Iqtisodiy sudlarga xususiy korxona egalaridan poshlina haqini oldindan toʻlattirmay daʼvo arizalarini qabul qilishga ruxsat berilsin, keyinchalik uning haqi sud qarori chiqarilgandan soʻng soʻzsiz undirib olinsin.
(7-band Oʻzbekiston Respublikasi Prezidentining 2017-yil 11-sentabrdagi PF-5187-sonli Farmoni tahririda — OʻR QHT, 2017-y., 37-son, 980-modda)
8. Xususiy tadbirkorlikni rivojlantirishning moddiy-texnika negizini amalda mustahkamlash maqsadida Oʻzbekiston Respublikasining Davlat raqobat qoʻmitasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, korporatsiyalar, konsernlar va uyushmalar bilan birgalikda:
(8-bandning birinchi xatboshisi Oʻzbekiston Respublikasi Prezidentining 2013-yil 28-avgustdagi PF-4561-sonli Farmoni tahririda — OʻR QHT, 2013-y., 36-son, 477-modda)
mahsulot ishlab chiqarishni, savdo-sotiqni va turli xizmatlar koʻrsatishni tashkil qilish uchun foydalanilmay yotgan ishlab chiqarish binolarini belgilangan tartibda xususiy korxonalarga ijaraga berishni;
 LexUZ sharhi
Qarang: Oʻzbekiston Respublikasi Fuqarolik kodeksining 573 — 578-moddalari va Oʻzbekiston Respublikasining “Ijara toʻgʻrisida”gi Qonuni.
chala qurilgan ishlab chiqarish inshootlari hamda foydalanilmayotgan uskunalarni kimoshdi savdosi va tanlovlar orqali sotishni amalda keng joriy qilsinlar.
9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari, Oʻzbekiston Respublikasining Davlat mulki qoʻmitasi, “Oʻzbeksavdo” davlat uyushmasi, “Oʻzbekbirlashuv”, “Oʻztayyorlovsavdo” uyushmasi:
1995-yilning I choragida dehqon (fermer)lardan va xususiy korxona egalaridan qishloq xoʻjalik va sanoat mahsulotlarini xarid qiluvchi doimiy ishlaydigan ulgurji ixtisoslashtirilgan bozorlarni tashkil qilsinlar;
boʻsh yotgan binolarni tadbirkorlarning tayyor mahsulotlari saqlanadigan omborlarga aylantirish va ulardan foydalanishga koʻmaklashsinlar.
10. “Oʻzulgurjibirjasavdo” uyushmasi, “Oʻzbekyengilsanoat” davlat uyushmasi, “Mahalliy sanoat” davlat korporatsiyasi, “Oʻzbekbirlashuv”, “Oʻzqishloqxoʻjaliktaʼminottuzatish” davlat qoʻmitasi:
tovar ishlab chiqaruvchi tadbirkorlarni mahalliy xom ashyo va materiallar bilan taʼminlaydigan ulgurji-vositachi tuzilmalarni;
xom ashyo va materiallarga buyurtmalarni yigʻish, ularni xarid qilish, navlarga ajratish, saqlash, zarur holga yetkazish hamda ularni tadbirkorlarning buyurtmalari boʻyicha sotish bilan shugʻullanuvchi tijorat markazlari va savdo uylarini tashkil qilsinlar.
11. Oʻzbekiston Respublikasi Bosh vazirining oʻrinbosari M. Z. Usmonov respublikaning katta shaharlarida supermarketlar barpo etishda xususiy korxona egalariga yordam koʻrsatsin.
Oldingi tahrirga qarang.
(12-band Oʻzbekiston Respublikasi Prezidentining 2023-yil 19-iyundagi PF-99-sonli Farmoniga asosan oʻz kuchini yoʻqotgan — Qonunchilik maʼlumotlari milliy bazasi, 20.06.2023-y., 06/23/99/0403-son)
Oldingi tahrirga qarang.
(13-band Oʻzbekiston Respublikasi Prezidentining 2008-yil 24-oktabrdagi PF-4045-sonli Farmoni bilan oʻz kuchini yoʻqotgan — OʻR QHT, 2008-y., 44-45-son, 440-modda)
14. Har yili xususiy korxonalar egalarining tanlovlarini oʻtkazib, gʻoliblarni — eksportga mahsulot chiqarish bilan shugʻullanuvchi firmalarni xalqaro koʻrgazmalar va yarmarkalarda tanishtirib turish toʻgʻrisida Tadbirkorlar uyushmasi bilan Kichik va oʻrta biznesni rivojlantirishga koʻmaklashuvchi jamgʻarmaning taklifi qabul qilinsin.
15. Oʻzbekiston Respublikasi Oliy va oʻrta maxsus taʼlim vazirligi Davlat mulk qoʻmitasi bilan birgalikda bir oy muddat ichida bozor munosabatlari sohasidagi mutaxassislarni tayyorlash va qayta tayyorlash tarmogʻini kengaytirishga oid tadbirlar tizimini ishlab chiqsin.
16. Toshkent shahar hokimi shu yilning I choragida Respublika jamgʻarma birjasi va Respublika koʻchmas mulk birjasiga ularning faoliyati uchun normal shart-sharoitlarni taʼminlab beradigan binolar ajratilishini taʼminlasin.
17. Oʻzteleradio, gazeta va jurnallarning tahririyatlari xususiy korxona egalarining ish tajribasini targʻib qilishni avj oldirsinlar, ularning aniq-ravshan namunalari asosida tayyorga ayyorlik psixologiyasini bartaraf etish va ular shu negizga tayanib oʻzlarining moddiy farovonligini taʼminlash, shuningdek xayriya faoliyatini amalga oshirishi sohasidagi keng imkoniyatlarni namoyish qilsinlar.
18. Vazirlar Mahkamasi oʻn kun muddat ichida ushbu Farmonni roʻyobga chiqarishga oid qaror qabul qilsin.
 LexUZ sharhi
Qarang: Oʻzbekiston Respublikasi Vazirlar Mahkamasining 1995-yil 14-fevraldagi 55-sonli “Xususiy tadbirkorlikda tashabbus koʻrsatish va uni ragʻbatlantirish boʻyicha kechiktirib boʻlmaydigan chora-tadbirlar toʻgʻrisida”gi, 1995-yil 4-apreldagi 117-sonli “Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklar apparati tarkibida xalq isteʼmol tovarlari ishlab chiqarish, savdo va xizmat koʻrsatish sohasida tadbirkorlik, xususiy biznes va tijorat ishlarini muvofiqlashtirish va qoʻllab-quvvatlash boʻlimlari tashkil etish toʻgʻrisida”gi va 1995-yil 19-apreldagi 135-sonli “Supermarketlar shoxobchalarini tashkil etish va kengaytirish chora-tadbirlari toʻgʻrisida”gi qarorlari.
Oʻzbekiston Respublikasining Prezidenti I. KARIMOV
Toshkent sh.,
1995-yil 5-yanvar,
PF-1030-son
(Oʻzbekiston Respublikasi Oliy Majlisining Axborotnomasi, 1995-y., 4-son, 51-modda; Oʻzbekiston Respublikasi qonun hujjatlari toʻplami, 2004-y., 29-son, 329-modda; 2008-y., 44-45-son, 440-modda; 2013-y., 36-son, 477-modda; 2017-y., 37-son, 980-modda; Qonunchilik maʼlumotlari milliy bazasi, 20.06.2023-y., 06/23/99/0403-son)