Avtomobil transporti sohasida monopoliyadan chiqarish jarayonlarini chuqurlashtirish, bozor munosabatlarini shakllantirish va transport xizmatlari bozorida raqobat muhitini yaratish, avtomobil va daryo transporti boshqaruv tizimini takomillashtirish maqsadida:

1. Avtomobil va daryo transporti sohasida boshqaruvni takomillashtirish va monopoliyadan chiqarishni chuqurlashtirishning asosiy yoʻnalishlari sifatida quyidagilar belgilansin:

avtotransportda yoʻlovchilar va yuk tashish sohasida bozor munosabatlari va raqobat muhitini yanada rivojlantirish, avtomobil transporti tashkilotlari va korxonalarini keng xususiylashtirish, xususiy avtomobil tashuvchilar faoliyati sohasini kengaytirish, transport xizmatlari bozorida mulkchilikning barcha shakllaridagi avtomobilda tashuvchilar uchun teng shart-sharoitlar yaratish;

avtomobil va daryo transportida yuk va yoʻlovchilar tashishni boshqarishning ortiqcha boʻgʻinlarini tugatish, boshqaruvning bir va ikki boʻgʻinli tizimiga oʻtish;

avtomobil transportida boshqarishni markazlashtirishdan chiqarish va avtomobilda yoʻlovchilar tashuvchi, yuklarni viloyat ichida tashuvchi, transport-foydalanish va axborot xizmatlari koʻrsatuvchi korxonalar faoliyatini muvofiqlashtirish, avtomobilda yoʻlovchilar va yuk tashish sohasida kadrlarni qayta tayyorlash funksiyalarini bevosita Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ixtiyoriga berish;

yoʻlovchilar tashish xavfsizligi chora-tadbirlarini mustahkamlash, avtomobilda yoʻlovchilar va yuk tashish sohasida isteʼmolchilarning huquqlari himoya qilinishining kuchli tizimini yaratish, transport xizmatlari tizimida sugʻurtaning mustaqil bozorini rivojlantirish.

2. “Oʻzavtotrans” korporatsiyasi tarkibiga kiruvchi umumiy foydalanishdagi avtomobil transporti tizimi korxonalari va tashkilotlarining hamda Oʻzbekiston Respublikasi Davlat mulki qoʻmitasining quyidagi takliflari qabul qilinsin:

Oʻzbekiston avtomobil transporti davlat-aksionerlik korporatsiyasini (“Oʻzavtotrans”ni) tugatish;

tugatilayotgan “Oʻzavtotrans” tarkibiga kirgan hududiy davlat-aksionerlik konsernlari va birlashmalarini avtomobilda tashuvchilarning hududiy uyushmalariga aylantirgan holda ularni Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ixtiyoriga berish toʻgʻrisidagi taklifi qabul qilinsin.

3. Avtotransport xizmatlariga tarif siyosatini shakllantirish masalalari Oʻzbekiston Respublikasi Moliya vazirligi hamda Oʻzbekiston avtomobil va daryo transporti agentligiga yuklansin.

4. Avtomobilda yoʻlovchilar va yuk tashish sohasida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining asosiy vazifalari etib quyidagilar belgilansin:

avtomobil va daryo transportini rivojlantirishning kompleks mintaqaviy dasturlarini ishlab chiqish va amalga oshirish, iqtisodiyotga va mintaqa aholisiga barqaror avtotransport xizmati koʻrsatish uchun shart-sharoitlar yaratish;

avtotransport xizmatlari bozorida raqobat muhitini shakllantirish, mulkchilikning barcha shakllaridagi avtomobilda tashuvchilar uchun faoliyat koʻrsatishning teng shart-sharoitlarini yaratish;

shaharda, shahar atrofida, shaharlararo (viloyat ichida) qatnovchi yoʻlovchilar tashuvchi avtomobil transportini yoʻlovchilar tashish yoʻnalishlarini va harakat jadvallarini oʻrnatish;

tegishli hududda avtotransportda yoʻlovchilar tashish xizmatlarga va ijtimoiy ahamiyatli yuklarni tashish ustidan tarif siyosati amalga oshirilishini nazorat qilish.

5. Avtomobil tashuvchilarning hududiy uyushmalariga quyidagi asosiy vazifalar va funksiyalar yuklansin:

avtomobil transporti sohasida bozor islohotlarini yanada chuqurlashtirish, avtotransport korxonalarini xususiylashtirish va aksiyalashtirish jarayonlarini rivojlantirish;

yoʻlovchilarga xizmat koʻrsatish madaniyati va sifatini oshirish, avtotransport xizmatlari servisini kengaytirish;

zamonaviy texnika va texnologiyalarni joriy etish, taʼmirlash bazasini rivojlantirish va zamonaviylashtirish, harakat vositalaridan foydalanish samaradorligini oshirish boʻyicha investitsiya dasturlarini shakllantirish va amalga oshirish;

yoʻlovchilar va yuklarni shaharlarda, shaharlararo, viloyatlararo tashishni taʼminlash yuzasidan avtotransport korxonalari faoliyatini muvofiqlashtirish.

6. “Oʻzavtotrans” davlat-aksionerlik korporatsiyasi tugatilishi munosabati bilan Oʻzbekiston avtomobil va daryo transporti agentligiga quyidagilar yuklatilsin:

avtomobil va daryo transportida yoʻlovchilar va yuk tashish xavfsizligini tashkil etish va taʼminlashga doir normativ-huquqiy hujjatlarni ishlab chiqish va tasdiqlash, boshqaruv organlari va xoʻjalik yurituvchi subyektlar tomonidan ularga rioya etilishi ustidan nazorat oʻrnatish;

yoʻlovchilar va yuk tashish yoʻnalishlarini tender asosida realizatsiya qilish mexanizmini joriy etish, mulkchilikning barcha shakllaridagi tashuvchilar uchun faoliyat koʻrsatishning teng shart-sharoitlarini yaratish;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining takliflari asosida avtomobilda yoʻlovchilarni tashishning xalqaro va viloyatlararo yoʻnalishlarini tasdiqlash;

avtomobilda tashuvchilar faoliyati litsenziyalanishini amalga oshirish hamda avtomobil va daryo transporti sohasida litsenziya talablari va shartlariga rioya etilishi ustidan nazorat oʻrnatish;

avtomobil va daryo transporti sohasida xalqaro hamkorlikni amalga oshirish hamda avtomobil va daryo transportining xalqaro tashkilotlariga Oʻzbekiston Respublikasi manfaatlarini ifoda etish.

7. Oʻzbekiston Respublikasi Prezidentining "Oʻzbekiston avtomobil transporti (“Oʻzavtotrans”) davlat aksionerlik korporatsiyasini tashkil etish toʻgʻrisida” 1993-yil 8-yanvardagi PF-538-sonli Farmoni oʻz kuchini yoʻqotgan deb hisoblansin.

8. Oʻzbekiston Respublikasi Adliya vazirligi, Davlat mulki qoʻmitasi hamda boshqa manfaatdor vazirliklar va idoralar bilan birgalikda bir oy muddatda Vazirlar Mahkamasiga Oʻzbekiston Respublikasi qonun hujjatlariga mazkur Farmondan kelib chiquvchi oʻzgartirish va qoʻshimchalar kiritish haqida takliflar kiritsin.

9. Oʻzbekiston Respublikasi Vazirlar Mahkamasi mazkur Farmonni amalga oshirish yuzasidan 10 kun muddatda qaror qabul qilsin.