Chorvachilikni yanada rivojlantirish, chorva mollarining nasldorlik va mahsuldorlik sifatlarini takomillashtirishning samarali usullarini ishlab chiqish, seleksiya-naslchilik ishlarini yaxshilash, ilg‘or ilmiy yutuqlarni fermer va dehqon xo‘jaliklari faoliyatiga joriy etish, sanoat asosida go‘sht-sut mahsulotlari yetishtirish bo‘yicha zamonaviy kompleks tashkil etish, yem-xashak ekinlari urug‘larining elita navlarini o‘stirish, chorvachilik sohasida kadrlarni o‘qitish va qayta tayyorlash uchun qulay shart-sharoitlar yaratish maqsadida Vazirlar Mahkamasi qaror qiladi:

1. O‘zbekiston Respublikasi Qishloq va suv xo‘jaligi vazirligi, O‘zbekiston qishloq xo‘jaligi ilmiy-ishlab chiqarish markazi hamda Toshkent viloyati hokimligining Toshkent viloyati, Qibray tumani, Qizil shalola shaharchasida joylashgan “Shalola-naslli mol tayyorlash” davlat korxonasining bino va inshootlarini davlat ulushini ko‘paytirish hisobiga “O‘zavtosanoat” aksiyadorlik kompaniyasi ustav jamg‘armasiga belgilangan tartibda berish to‘g‘risidagi taklifiga rozilik berilsin.

2. “O‘zavtosanoat” aksiyadorlik kompaniyasi va O‘zbekiston qishloq xo‘jaligi ilmiy-ishlab chiqarish markazining “Shalola-naslli mol tayyorlash” davlat korxonasi negizida “O‘znaslelita” mas’uliyati cheklangan jamiyatni (keyingi o‘rinlarda “O‘znaslelita” MCHJ deb ataladi) tashkil etish to‘g‘risidagi taklifi qabul qilinsin.

Belgilab qo‘yilsinki, “O‘znaslelita” MCHJning ustav fondi ushbu qarorning 1-bandiga muvofiq “O‘zavtosanoat” aksiyadorlik kompaniyasi ustav jamg‘armasiga berilayotgan bino va inshootlar hamda O‘zbekiston qishloq xo‘jaligi ilmiy-ishlab chiqarish markazining intellektual mulki hisobiga baholash tashkilotlari tomonidan aniqlanadigan qiymati bo‘yicha shakllantiriladi.

“O‘zavtosanoat” aksiyadorlik kompaniyasiga “O‘znaslelita” MCHJ faoliyati sohasi bo‘yicha investorlarni hammuassislar sifatida jalb etishga ruxsat berilsin.

3. Quyidagilar “O‘znaslelita” MCHJning asosiy vazifalari etib belgilansin:

sanoat asosida go‘sht-sut mahsulotlari yetishtirish bo‘yicha zamonaviy texnologik kompleks tashkil etish;

yem-xashak ekinlari urug‘larining elita navlarini yetishtirishni tashkil etish;

qoramollar seleksiyasi, ularni oziqlantirish va parvarish qilish texnologiyasi, yem-xashak ekinlari o‘stirish agrotexnikasi, chorva mollarining nasldorlik va mahsuldorlik sifatlarini takomillashtirishning samarali usullarini ishlab chiqish bo‘yicha ilmiy tadqiqotlar o‘tkazish uchun Chorvachilik va parrandachilik ilmiy-tadqiqot instituti olimlariga zarur shart-sharoitlar yaratish;

mustahkam yem-xashak bazasi, yuqori mahsuldor sigirlarning “nasl yadrosi”ni tashkil etish, ulardan poda to‘ldiradigan buzoqlar olish;

ilg‘or ilmiy yutuqlarni ishlab chiqarishga joriy etish.

4. “O‘zavtosanoat” aksiyadorlik kompaniyasi:

O‘zbekiston Respublikasi Qishloq va suv xo‘jaligi vazirligi bilan birgalikda ikki oy muddatda “O‘zavtosanoat” aksiyadorlik kompaniyasi tomonidan zarur investitsiyalar kiritishni nazarda tutadigan texnik-iqtisodiy asoslash ishlab chiqilishini;

Qishloq xo‘jaligi va oziq-ovqat ta’minoti ilmiy-ishlab chiqarish markazi bilan birgalikda “O‘znaslelita” MCHJ negizida qoramollarni parvarish qilish, oziqlantirish, ko‘paytirish va chorvachilik mahsulotlari olishning zamonaviy texnologiyalarini ishlab chiqish bo‘yicha ilmiy tadqiqotlar o‘tkazish uchun zarur shart-sharoitlar yaratilishini ta’minlasin.

5. Qishloq xo‘jaligi va oziq-ovqat ta’minoti ilmiy-ishlab chiqarish markazi “O‘znaslelita” MCHJ negizida:

seleksiya-naslchilik ishlarini, qoramollarni oziqlantirish va parvarish qilish texnologiyalarini takomillashtirishga yo‘naltirilgan ilmiy tadqiqotlar o‘tkazishni;

asosiy va oraliq yem-xashak ekinlarining serhosil navlarini yaratish bo‘yicha seleksiya ishlarini amalga oshirishni;

fermer va dehqon xo‘jaliklari faoliyatiga chorvachilik va yem-xashak yetishtirishni rivojlantirish sohasidagi ilg‘or ilmiy yutuqlarni joriy etishni;

chorvachilik masalalari bo‘yicha muntazam ravishda ilmiy-amaliy seminarlar o‘tkazishni tashkil etsin.

6. Toshkent viloyati hokimligi O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi bilan birgalikda bir oy muddatda “O‘znaslelita” MCHJga mustahkam yem-xashak bazasi tashkil etish va yem-xashak ekinlari urug‘larining elita navlarini yetishtirish uchun belgilangan tartibda zarur yer uchastkasi ajratsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari U.U.Rozuqulov zimmasiga yuklansin.