Oʻzbekiston Respublikasi Oliy Kengashi qaror qiladi:

1. “Oʻzbekiston Respublikasi nogironlarni ijtimoiy himoya qilish toʻgʻrisida”gi Oʻzbekiston Respublikasi Qonuni matbuotda eʼlon qilingan kundan boshlab kuchga kiritilsin, ushbu Qonunning 8, 9, 10 va 12-moddalarida koʻzda tutilgan qoidalar bundan mustasno.

2. Oʻzbekiston Respublikasi Prezidenti huzuridagi Vazirlar Mahkamasi 1992-yil 1-yanvariga qadar:

Oʻzbekiston Respublikasi Hukumatining qarorlarini “Oʻzbekiston Respublikasida nogironlarni ijtimoiy himoya qilish toʻgʻrisida”gi Oʻzbekiston Respublikasining Qonuniga moslashtirsin;

Oʻzbekiston Respublikasi vazirliklari, davlat qoʻmitalari va idoralari mazkur Qonunga zid boʻlgan normativ hujjatlarni qayta koʻrib chiqishlari va bekor qilishlarini taʼminlasin;

1992-yil 1-aprelga qadar:

nogiron deb hisoblash uchun asoslar roʻyxatini ishlab chiqsin;

nogironlarni ijtimoiy himoya qilish respublika jamgʻarmasini tashkil etish toʻgʻrisida takliflar tayyorlasin;

1992-yil 1-iyulgacha qonunning 8, 9, 10 va 12-moddalarida koʻzda tutilgan qoidalarning bosqichma-bosqich amalga kiritish toʻgʻrisida takliflar kiritsin;

quyidagi masalalarni:

salomatlikni tiklash markazlarini tashkil etish tartibi va muddatlariga, pul bilan taʼminlashga, ularning moddiy-texnikaviy va kadrlar taʼminotiga doir;

nogironlarning jamoat birlashmalariga ixtisoslashtirilgan korxonalar barpo etish hamda ularning moddiy bazasini mustahkamlashda yordam berish haqidagi;

tibbiy, kasb va ijtimoiy jihatdan tiklash boʻyicha mutaxassislar, shu jumladan chet elda mutaxassislar tayyorlash haqidagi;

nogironlar uchun maxsus ish joylari yaratish haqidagi masalalarni hal etsin;

1992—1994-yillarda ijtimoiy infrastruktura obyektlarini, birinchi navbatda transport vositalari va kommunikatsiyalarni, vokzal komplekslarini, aeroportlar, shuningdek nogironlar yashaydigan turar joy binolarini nogironlarning ehtiyojlarini hisobga olgan holda qayta jihozlash choralarini koʻrsin.