Ўзбекистон Республикаси Президентининг «Давлат бюджетига солиқлар ва тўловлар бўйича имтиёзлар беришни тартибга солиш тўғрисида» 1999 йил 26 июлдаги ПФ-2343-сон Фармонини бажариш мақсадида Вазирлар Маҳкамаси қарор қилади:
1. Хайрия ҳамда бошқа жамғармалар ва жамиятларга, шунингдек улар томонидан ташкил қилинган корхоналар ва бошқа шуъба тузилмаларига солиқлар, йиғимлар ҳамда божхона тўловлари бўйича берилган имтиёзларнинг қўлланиш тартиби тўғрисидаги низом иловага мувофиқ тасдиқлансин.
2. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.С. Ҳамидов зиммасига юклансин.
1. Ушбу Низом Ўзбекистон Республикаси Президентининг хайрия ҳамда бошқа жамғармалар ва жамиятларга* (бундан кейин нотижорат ташкилотлар деб аталади), шунингдек улар томонидан ташкил қилинган корхоналар ва бошқа шуъба тузилмаларига нисбатан «Давлат бюджетига солиқлар ва тўловлар бўйича имтиёзлар беришни тартибга солиш тўғрисида» 1999 йил 26 июлдаги ПФ-2343-сон Фармонини амалга ошириш механизмини белгилайди.
2. Юқорида қайд этилган Фармоннинг амал қилиши Ўзбекистон Республикаси Президентининг алоҳида фармонлари, Вазирлар Маҳкамасининг қарорлари билан Ўзбекистон Республикасининг Солиқ, Божхона кодексларида ва «Бож тарифи тўғрисида»ги Ўзбекистон Республикаси Қонунида назарда тутилган солиқлар, йиғимлар ва божхона тўловлари бўйича имтиёзларга қўшимча белгиланган имтиёзлар нотижорат ташкилотларга, улар томонидан ташкил қилинган корхоналарга ҳамда бошқа тузилмаларга татбиқ этилади.
3.1. Қуйидагилардан божхона тўловлари (божхона расмийлаштиришлари учун йиғимлар бундан мустасно) ундирилмайди:
а) ўзининг моддий-техника базасини мустаҳкамлаш учун нотижорат ташкилотлари, шунингдек улар томонидан ташкил қилинган корхоналар ва шуъба тузилмалари томонидан олиб келинаётган товарлардан;
Кейинги таҳрирга қаранг.
— таъсис ҳужжатларида назарда тутилган тадбиркорлик фаолиятидан даромад олишни кўзламайдиган ижтимоий-хайрия мақсадлари ва бошқа мақсадлар учун ташкил этилган нотижорат ташкилотлардан;
— мазкур ташкилотнинг ходимлари, муассислари ёки аъзоларининг шахсий манфаатларига қаратилмаган молиявий ва бошқа маблағларни тақсимловчи ва инвестицияловчи нотижорат ташкилотлардан (қонун ҳужжатларида белгиланган меҳнат учун тақдирлашдан ташқари);
Кейинги таҳрирга қаранг.
б) уставда назарда тутилган фаолиятни амалга ошириш учун нотижорат ташкилотлар томонидан олинган юридик ва жисмоний шахсларнинг ҳомийлик бадаллари ва бошқа ажратмаларидан.
4. Олиб келинган товарлардан мазкур Низомнинг 3.1-кичик бандида назарда тутилмаган мақсадларда фойдаланилганда, ёхуд кейинчалик товарлар беш йил мобайнида ҳақи тўланган ҳолда сотилганда Ўзбекистон Республикасига олиб келишда божхона тўловлари тўлашдан озод қилинган товарлар қийматидан амалдаги қонун ҳужжатларига мувофиқ белгиланган миқдорларда пеня қўшилган ва жазолар қўлланилган ҳолда, божхона декларацияси расмийлаштирилган санада амалда бўлган барча божхона тўловлари ундирилади.
Кейинги таҳрирга қаранг.
5. Ўзбекистон Республикаси Солиқ кодексининг 32-моддасида назарда тутилган ҳолларда Президентнинг алоҳида фармонлари ва Ўзбекистон Республикаси Вазирлар Маҳкамасининг қарорлари билан нотижорат ташкилотларнинг мулки бўлган корхоналар учун даромад (фойда)дан олинадиган солиқ юзасидан солиқ солинадиган база ушбу нотижорат ташкилотларнинг уставда қайд этилган фаолиятини амалга оширишга йўналтириладиган даромад (фойда)дан ажратмалар миқдорига камайтирилади.
Кўрсатиб ўтилган имтиёз фақат нотижорат ташкилотлар мулки бўлган, яъни устав сармояси 100 фоиз миқдорда ушбу жамғармалар ва жамиятлар томонидан шакллантирилган корхоналарга ва бошқа тузилмаларга татбиқ этилади.
Агар нотижорат ташкилотлар корхона ва бошқа тузилмаларнинг муассисларидан бири бўлган тақдирда, яъни ташкил этилаётган корхонанинг устав сармояси нотижорат ташкилотлар маблағлари ҳисобига тўлиқ шакллантирилмаган бўлса, у ҳолда бундай корхоналарга ва бошқа тузилмаларга юқорида кўрсатиб ўтилган имтиёз татбиқ этилмайди. Корхоналарнинг мазкур тоифасига, қонун ҳужжатларида назарда тутилган ҳоллардан ташқари, Ўзбекистон Республикасининг Солиқ кодексига мувофиқ солиқ солинади.
Кейинги таҳрирга қаранг.
6. Нотижорат ташкилотлар ҳамда улар томонидан ташкил этилган корхоналар ва бошқа тузилмалар томонидан тадбиркорлик фаолияти амалга оширилган тақдирда уларга нисбатан Ўзбекистон Республикасининг Солиқ, Божхона кодексларида ва «Бож тарифи тўғрисида»ги Ўзбекистон Республикаси Қонунида назарда тутилган солиқлар, йиғимлар ва божхона тўловлари ундириш тартиби татбиқ этилади.