Tegishli qonun hujjatlari qabul qilingungacha “Aholini ish bilan taʼminlash toʻgʻrisida” Oʻzbekiston Respublikasi Qonuniga muvofiq Oʻzbekiston Respublikasi fuqarolarining chet ellarda kasbi boʻyicha ishlash huquqlarini roʻyobga chiqarish, chet ellarda respublika fuqarolarini ishga joylashtirishni davlat tomonidan boshqarish va muvofiqlashtirishni taʼminlash, ularning huquqi va manfaatlarini himoya qilish maqsadida Vazirlar Mahkamasi qaror qiladi:

1. Oʻzbekiston Respublikasi Mehnat vazirligining Vazirlik huzurida yuridik shaxs huquqiga ega boʻlgan va xoʻjalik hisobi asosida faoliyat koʻrsatadigan Koʻchma mehnatchilar ishlari respublika agentligini tashkil etish toʻgʻrisidagi taklifi qabul qilinsin.

2. Quyidagilar tasdiqlansin:

Oʻzbekiston Respublikasi Mehnat vazirligi huzuridagi Koʻchma mehnatchilar ishlari respublika agentligi toʻgʻrisida Nizom (1-ilova);

Ishchi kuchlarini chetdan keltirish va chetga chiqarishni boshqarish tartibi toʻgʻrisida Nizom (2-ilova);

Mehnat faoliyatini litsenziyalash tartibi toʻgʻrisida Nizom (3-ilova).

3. Belgilab qoʻyilsinki, Koʻchma mehnatchilar ishlari respublika agentligi faoliyatini tashkil etish uchun mablagʻlar dastlabki bosqichda ish bilan taʼminlashga koʻmaklashish jamgʻarmasi hisobidan ajratiladi.

4. Oʻzbekiston Respublikasi Mehnat vazirligi Koʻchma mehnatchilar ishlari respublika agentligini layoqatli kadrlar bilan toʻldirsin, bitim (kontrakt)larga muvofiq agentlikning ishchi va mutaxassislarni tanlash, test usulida sinash hamda chet ellarga oʻz vaqtida yuborishga doir ishlarining samaradorligini taʼminlasin.

5. Belgilab qoʻyilsinki, chet elda ishlashga joʻnab ketayotgan Oʻzbekiston Respublikasi Fuqarolari uchun hujjatlar va vizalarni rasmiylashtirish Mehnat vazirligining talabnomasiga binoan Oʻzbekiston Respublikasi Ichki ishlar vazirligining viza va ruxsatnomalar berish boshqarmasi boʻlinmalari tomonidan amalga oshiriladi.

7. Oʻzbekiston Respublikasi Tashqi ishlar vazirligiga ishlash uchun chet elga kelgan Oʻzbekiston Respublikasi fuqarolarini roʻyxatga olish, shuningdek ularga borgan mamlakatida ishga joylashishda huquqiy yordam koʻrsatish va ularni himoya qilish yuklatilsin.

8. Oʻzbekiston Respublikasi Mehnat vazirligi, Ichki ishlar vazirligi, Tashqi ishlar vazirligi, Tashqi iqtisodiy aloqalar vazirligi, Moliya vazirligi, xalqaro tajribani hisobga olgan holda, “chet eldan kelish va chet elga ketish toʻgʻrisida” hamda “Chet elda ishlayotgan Oʻzbekiston Respublikasi fuqarolarining huquq va manfaatlarini himoya qilish toʻgʻrisi”da qonunlar loyihalarini ishlab chiqsinlar va Vazirlar Mahkamasiga kiritsinlar.

9. Oʻzbekiston Respublikasi Sogʻliqni saqlash vazirligiga chet elda ishlash uchun hujjatlarini rasmiylashtirayotgan ishchi va mutaxassislarni oʻz vaqtida tibbiy koʻrikdan oʻtkazishni tashkil etish yuklatilsin.

10. “Oʻzbekiston havo yoʻllari” milliy aviakompaniyasi, Koʻchma mehnatchilar ishlari respublika agentligining talabnomasiga binoan, chet elga ketuvchi mehnatkashlar uchun aviachiptalarni band qilib qoʻyishni taʼminlasin.

11. Vazirlar Mahkamasining “Aholini ish bilan taʼminlash toʻgʻrisida”gi Oʻzbekiston Respublikasi Qonunini amalga oshirish chora-tadbirlari toʻgʻrisida” 1992-yil 13-maydagi 235-son qarorining 2-ilovasi oʻz kuchini yoʻqotgan deb hisoblansin.

12. Koʻchma Mehnatchilar ishlari boʻyicha respublika agentligi Toshkent shahar, Kosmonavtlar shox koʻchasidagi 6-uyga joylashtirilsin.

13. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari oʻrtoq B. S. Hamidov zimmasiga yuklatilsin.

Koʻchma mehnatchilar ishlari respublika agentligi (bundan keyin Agentlik deb ataladi) Oʻzbekiston Respublikasi Vazirlar Mahkamasining 1993-yil 14-iyuldagi 353-son qaroriga asosan Oʻzbekiston Respublikasi Mehnat vazirligining fuqarolarning ishlash uchun chet elga ketishini amalga oshiruvchi mustaqil boʻlinmasi hisoblanadi.

Agentlik oʻzining asosiy faoliyatini ishchi kuchlarini yollash boʻyicha chet ellik ish beruvchilar bilan tuzilgan davlatlararo bitimlar va kontraktlarga, Oʻzbekiston Respublikasining amaldagi qonunchiligiga muvofiq xoʻjalik hisobi asosida amalga oshiradi. Agentlik oʻz faoliyatini viloyatlar va Toshkent shahar hokimliklari, shuningdek manfaatdor vazirliklar va idoralar bilan oʻzaro hamkorlikda yuritadi.

Agentlik yuridik shaxs hisoblanadi, mustaqil balansga, banklarda hisob-kitob, valyuta va boshqa schyotlariga, oʻz nomi yozilgan gerbli va yumaloq muhrlarga, toʻrt burchakli muhrga va bosma ish qogʻozlapiga ega boʻladi.

Agentlik ushbu Nizomdan kelib chiqadigan vazifa va xizmatlarni bajarish uchun javob beradi.

Quyidagilar Agentlikning asosiy vazifalari va xizmatlari hisoblanadi:

chet mamlakatlarning Mehnat bozorlarini oʻrganish, chet ellik ish beruvchilarni qidirish;

Oʻzbekiston Respublikasi Mehnat vazirligining qaroriga binoan Oʻzbekiston Respublikasidan ishchi-kuchlarini eksport qilish yuzasidan chet ellik sheriklar bilan bitim va kontraktlar tuzish.

Agentlik ushbu vazifalarni bajarish uchun:

tuzilgan kontraktlarga muvofiq chet elda ishlash uchun kadrlarni tanlashni, ularning kasbi boʻyicha layoqatini test usulida sinashni tashkil etishni, boriladigan mamlakatlarning asosiy qonunlarini oʻrgatishni, til boʻyicha minimal tayyorgarlikni amalga oshiradi;

kasb boʻyicha dastlabki tanlovdan oʻtgan ishchilar va mutaxassislar bilan mehnat kontraktlari tuzadi;

Oʻzbekiston Respublikasi Ichki ishlar vazirligining viza va ruxsatnomalar berish boshqarmasi boʻlinmalari bilan chet elga ishlash uchun joʻnab ketayotgan respublika fuqarolarining hujjatlarini va vizalarini rasmiylashtiradi;

ishchilar va mutaxassislarni ishga joylashiladigan mamlakatga joʻnatishni tashkil etadi;

Oʻzbekiston Respublikasi fuqarolarining oʻzlari borgan mamlakatlarda mehnat faoliyatining bajarilishini doimiy nazorat qilib borishni, u yerda ish beruvchilar va vositachi firmalar bilan paydo boʻladigan ijtimoiy-maishiy va moliyaviy muammolarni Oʻzbekiston Respublikasi Mehnat vazirligining vakili orqali tezkorlik bilan hal qilishni amalga oshiradi;

respublikada qoʻshimcha ishchi oʻrinlari tashkil qilish va ish bilan band boʻlmagan aholini ishga jalb etish maqsadida qoʻshma korxonalar (shu jumladan, MDH) korxonalari va chet el firmalari ishtirokida tashkil etadi;

davlat statistika organlari tomonidan koʻzda tutilgan tegishli hisobotni taqdim etadi;

oʻz huquqi doirasida qarorlar qabul qiladi;

tegishli hujjatlar va Agentlikning buyrugʻi asosida ishchi va mutaxassisning chet elda ishlagan davri toʻgʻrisida uning Mehnat daftarchasiga yozib qoʻyadi;

sudlarda va boshqa davlat organlarida daʼvogar yoki javobgar boʻladi.

Agentlikni Oʻzbekiston Respublikasi Mehnat vazirining buypygʻi bilan tayinlanadigan va ozod qilinadigan direktor boshqaradi.

Direktor mazkur Nizomga muvofiq Agentlik zimmasiga yuklatilgan vazifalar va xizmatlarning sifatli hamda oʻz vaqtida bajarilishi uchun shaxsan javob beradi.

Agentlikning tuzilmasi, xodimlarning soni va xarajatlar smetasi Oʻzbekiston Respublikasi Mehnat vazirligi tomonidan tasdiqlanadi. Shtatlar jadvali agentlik direktori tomonidan, Oʻzbekiston Respublikasi Mehnat vazirligi bilan kelishilgan holda tasdiqlanadi.

Agentlik toʻla xoʻjalik hisobini va boshqalarni yuritish huquqlari bilan ustav jamgʻarmasiga va alohida mol-mulkka ega boʻladi.

Agentlik oʻz mulkini xoʻjalik jihatidan toʻliq yuritish huquqini amalga oshirib mazkur mulkka egalik qiladi, undan foydalanadi va uni tasarruf etadi hamda mulk boʻyicha oʻz ixtiyori bilan respublika qonunchiligiga zid boʻlmagan istalgan ishlarni amalga oshiradi.

Agentlik quyidagi jamgʻapmalap va zaxiralarni tashkil qiladi:

faoliyatni rivojlantirish jamgʻarmasi;

ragʻbatlantirish jamgʻapmasi;

moliya zaxirasi;

yangi ishchi oʻrinlarni tashkil etish jamgʻarmasi.

Agentlik faoliyatini Oʻzbekiston Respublikasi Mehnat vazirligi va boshqa organlar belgilangan tartibda nazorat va taftish qiladilar.

Agentlik belgilangan tartibda Oʻzbekiston Respublikasi Vazirlar Mahkamasi tomonidan qayta tashkil qilinadi va tugatiladi.

Toshkent sh. — 700031, Kosmonavtlar shox koʻchasi, 6-uy.

Mazkur Nizom umumiy ravishda qabul qilingan xalqaro amaliyotdan kelib chiqqan holda Xalqaro mehnat tashkilotining tashqi mehnat migratsiyasi sohasidagi konvensiyalari va tavsiyalari asosida ishlab chiqilgan va Oʻzbekiston Respublikasi fuqarolarining xorijdagi, shuningdek Oʻzbekiston Respublikasi hududida ishlayotgan chet el fuqarolarining mehnat faoliyati asoslarini belgilab beradi.

Nizom Oʻzbekiston Respublikasi fuqarolariga xalqaro mehnat bozorida erkin qatnashish imkonini beradi, shuningdek, chet elda ishlayotgan Oʻzbekiston Respublikasi fuqarolarining (bundan keyin koʻchma mehnatchilar deb ataladi) ijtimoiy-iqtisodiy kafolatlarini, qonuniy huquqlarini belgilab beradi.

1. Oʻzbekiston Respublikasi fuqarolari vaqtincha chet elda boʻlgan davrda kasb boʻyicha faoliyatni amalga oshirish huquqiga egadirlar.

2. Koʻchma mehnatchilarning xorijdagi mehnat faoliyati bitimlar (kontraktlar) tuzish va Oʻzbekiston Respublikasi Mehnat vazirligida, belgilangan tartibda litsenziyalar olish yoʻli bilan amalga oshiriladi.

3. Koʻchma mehnatchilar xorijga ketishdan oldin, oʻzlari borayotgan mamlakatning mehnat, mulkchilik toʻgʻrisida amaldagi qonunchiligi, mehnat sharoitlari, tili, dini, milliy urf-odatlari va anʼanalari, tabiiy iqlim sharoitlari bilan shaxsan tanishib chiqadilar.

4. Koʻchma mehnatchilar borilayotgan mamlakatlarga oʻzlariga va ular bilan birga ketishga ruxsat berilgan oila aʼzolariga tegishli shaxsni mulkni belgilangan meʼyorlarga muvofiq olib ketish huquqiga egadirlar.

5. Koʻchma mehnatchilar oʻzlari borayotgan mamlakatning qonunchiligiga muvofiq ijtimoiy himoya huquqiga egadirlar.

6. Koʻchma mehnatchilar oʻzlarining sogʻliqlarini himoya qilish va xavfsiz mehnat sharoitlarida ishlash huquqiga egadirlar.

7. Koʻchma mehnatchilar, agar ularning nomuvofiq mehnat sharoitlari yoki ijtimoiy taʼminot boʻyicha shikoyatlari boʻlsa, u holda oʻzlari borgan mamlakatning fuqarolari bilan teng darajada tegishli sud muassasalariga murojaat qilish huquqiga egadirlar.

8. Koʻchma mehnatchilar oʻz imkoniyatlariga qarab va shu mamlakatning chet el valyutasini olib chiqish va olib kirish qonunchiligi doirasida jamgʻapmalapini va oʻzlari istagan boshqa barcha pul mablagʻlarini oʻz Vataniga yuborish huquqiga egadirlar.

9. Koʻchma mehnatchilar oʻzlari ishga joylashgan mamlakatlardagi qonunchilikka muvofiq dam olish (dam olish va ovqatlanish uchun tanaffus qilish, dam olish va bayram kunlari, har yillik mehnat taʼtili) huquqiga egadirlar.

10. Koʻchma mehnatchilar chet elda ishlash davrida ishlab chiqarishda mehnat qilish qobiliyatini yoʻqotgan taqdirda belgilangan tartibda sugʻurta boʻyicha kompensatsiya toʻlovlar olish huquqiga egadirlar.

11. Koʻchma mehnatchilar Vataniga joʻnashga tayyorlanish vaqtida vujudga keladigan (ularga toʻlanmaydigan ish haqini, mehnat nafaqasini, foydalanilmagan mehnat taʼtili uchun kompensatsiya va hokazolarni olish boʻyicha) muammolarni hal qilishda yordam olish huquqiga egadirlar.

12. Koʻchma mehnatchilar Vataniga qaytganlaridan soʻng ishga joylashish va ijtimoiy taʼminot boʻyicha tadbirlardan foydalanish huquqiga egadirlar.

1. Koʻchma mehnatchilar va ularning chet elga birga ketishga ruxsat olgan oila aʼzolari borilgan mamlakatda tibbiy koʻrikdan oʻtishlari va tibbiy xizmat bilan taʼminlanishlari kerak.

2. Ish beruvchi koʻchma mehnatchilarning ish joyiga yetib borish va vataniga qaytish, yuklarini tashish va boshqa transport xizmatlari xarajatlarini oʻz zimmasiga oladi.

3. Ish beruvchi Koʻchma mehnatchilarni, ish joylariga yetib kelishgach, ularni tegishli ish, turar joy va boshqa zarur turmush vositalari bilan taʼminlaydi.

4. Koʻchma mehnatchilar bitimlarda (kontraktlarda) koʻzda tutilgan faoliyat turlariga muvofiq, yaʼni oʻz mutaxassisligi va malaka darajasi boʻyicha ish bilan taʼminlanadilar. Ularning mehnat kontraktlarida koʻzda tutilmagan ishlarga jalb qilinishiga yoʻl qoʻyilmaydi.

5. Koʻchma mehnatchilarning ish haqi ular ishga joylashgan mamlakatdagi eng kam ish haqi miqdoridan past boʻlmasligi kerak.

6. Koʻchma mehnatchilar ish vaqtining meʼyori va mehnat sharoitlari ular ishga joylashgan mamlakatning qonun hujjatlari bilan tartibga solinadi, ishdan tashqari vaqtda ishlash xodimning roziligi bilan amalga oshirilishi mumkin.

7. Koʻchma mehnatchilarga xizmatda yuqori martabaga koʻtarilish boʻyicha ular ishga joylashgan mamlakat fuqarolari bilan teng imkoniyatlar yaratiladi.

8. Haq toʻlanadigan har yilgi mehnat taʼtili vaqtida, agar ularning oilalari bilan birga boʻlish imkoniyatlari boʻlmasa, kamida 1 yil ishlaganlaridan soʻng ularga oilasini borib koʻrib kelishga ruxsat beriladi. Xuddi shuningdek, uning oilasiga ham oʻz mablagʻlari hisobiga mehnatchini borib koʻrib kelishga ruxsat beriladi.

9. Koʻchma mehnatchilarning chet elda ishlagan davri ularning umumiy (uzluksiz) mehnat stajiga qoʻshiladi;

10. Koʻchma Mehnatchilar chet elda ishlagan vaqtda ularning Oʻzbekiston Respublikasi fuqaroligi saqlab qolinadi.

11. Koʻchma mehnatchilar kontrakti shartlarining bajarilishini nazorat qilish ular ishga joylashgan mamlakatdagi Oʻzbekiston Respublikasining vakillik organlari tomonidan amalga oshiriladi.

12. Ish beruvchilar bilan koʻchma mehnatchilar oʻrtasida paydo boʻlgan kelishmovchiliklar Oʻzbekiston Respublikasining ishga joylashilgan mamlakatdagi vakillik organlari orqali sudda hal qilinadi.

1. Koʻchma mehnatchilar quyidagilarga majburdirlar:

bitim (kontrakt)da koʻzda tutilgan ishlarni bajarish;

mehnat muhofazasi va xavfsizlik texnikasi talablarini bajarish;

borgan mamlakatining amaldagi qonunlari va tartibiga rioya qilish;

ishga joylashgan mamlakatining urf-odatlari, anʼanalari va marosimlarini hurmat qilish.

2. Koʻchma mehnatchilar, agar ular borgan mamlakati hududida qonuniy ravishda turgan boʻlsalar, mazkur mamlakatda istalgan vaqtda joydan-joyga erkin borishi mumkin va mazkur mamlakat mehnatkashlari uchun mavjud boʻlgan cheklashlar ularga nisbatan ham qoʻllaniladi.

3. Koʻchma mehnatchilardan soliqlar va boshqa toʻlovlar belgilangan tartibda Oʻzbekiston Respublikasida undiriladi.

1. Oʻzbekiston Respublikasi Tashqi iqtisodiy aloqalar vazirligida roʻyxatga olingan va Oʻzbekiston Respublikasiga ishlash uchun kelayotgan xorijiy fuqarolarni yollash bilan shugʻullanadigan yuridik va jismoniy shaxslar, shu jumladan, xorijiy va aralash korxonalar respublikaga kelishdan oldin Mehnat faoliyatini litsenziyalash tartibi toʻgʻrisidagi nizomga muvofiq ishlash uchun ruxsatnomani (litsenziyani) rasmiylashtirishlari kerak.

2. Respublika hududida xorijiy fuqarolarning Mehnat faoliyati Oʻzbekiston Respublikasining amaldagi qonunchiligiga muvofiq tartibga solib boriladi.

Mazkur Nizom “Aholini ish bilan taʼminlash toʻgʻrisida”gi Oʻzbekiston Respublikasi Qonuni talablariga muvofiq, ishlab chiqilgan va uning fuqarolarni yollash hamda ishga joylashtirish bilan shugʻullanadigan barcha yuridik va jismoniy shaxslar, chet elda ishlash uchun xususiy Mehnat bitimlariga ega boʻlgan respublika Fuqarolari hamda Oʻzbekiston hududida Mehnat faoliyatini amalga oshirish uchun kelgan chet el fuqarolari, shuningdek, kadrlarni oʻqitish, qayta tayyorlash va ixtisosini oʻzgartirish hamda ularni ishga joylashtirish boʻyicha pulli xizmat koʻrsatuvchi yuridik shaxslar tomonidan bajarilishi majburiydir.

Barcha yuridik shaxslar, shu jumladan, xorijiy shaxslar fuqarolarni respublikada hamda chet elda yollash va ishga joylashtirish uchun, yuqorida koʻrsatib oʻtilgan jismoniy shaxslar esa Mehnat faoliyatini amalga oshirish huquqiga ega boʻlish uchun Oʻzbekiston Respublikasi Mehnat vazirligida tegishli litsenziya oladilar. Kadrlarni oʻqitish, qayta tayyorlash va ixtisosini oʻzgartirish hamda ularni ishga joylashtirish boʻyicha pulli xizmat koʻrsatadigan yuridik shaxslar oʻzlari oʻrnashgan joyda — Oʻzbekiston Respublikasi Mehnat vazirligida, Qopaqalpogʻicton Respublikasi Mehnat vazirligida, viloyatlar va Toshkent shahar mehnat, aholini ish bilan taʼminlash va ijtimoiy himoya qilish boshqarmalarida litsenziya oladilar.

Mehnat faoliyatini amalga oshirish uchun litsenziya quyidagi tartibda beriladi:

1. Faoliyat turiga litsenziya olish uchun yuridik shaxslar, shu jumladan, xorijiy shaxslar va qoʻshma korxonalar Mehnat vazirligiga quyidagi hujjatlarni taqdim qiladilar:

a) litsenziya berish toʻgʻrisida ariza;

b) Oʻzbekiston Respublikasi Tashqi iqtisodiy aloqalar vazirligi tomonidan tashqi iqtisodiy faoliyatni amalga oshirish uchun berilgan rasmiy ruxsatnoma nusxasi (Oʻzbekiston va chet el korxonalari, shuningdek, qoʻshma korxonalar uchun);

v) fuqarolarni ham respublikada, ham chet elda ishga joylashtirish sohasida xorijiy sheriklar bilan tuzilgan bitim yoki shartnomaning nusxasi;

g) litsenziya uchun davlat boji toʻlanganligi haqida bank (kassa) hujjati (beriladigan litsenziya uchun toʻlov);

d) faoliyat turi va xususiyatlarini asoslash;

e) Oʻzbekiston Respublikasi Mehnat vazirligining litsenziyalar berish komissiyasi talabi boʻyicha boshqa qoʻshimcha hujjatlar.

2. Kadrlarni oʻqitish, qayta tayyorlash, ixtisosini oʻzgartirish va ularni ishga joylashtirish boʻyicha pulli xizmat koʻrsatish sohasidagi faoliyat turiga litsenziya olish uchun yuridik shaxslar Oʻzbekiston Respublikasi Mehnat vazirligi, Qoraqalpogʻiston Respublikasi Mehnat vazirligi, viloyatlar va Toshkent shahar mehnat aholini ish bilan taʼminlash va ijtimoiy himoya qilish boshqarmalariga quyidagi hujjatlarni taqdim qiladilar:

a) xizmat koʻrsatish niyati haqida yozma murojaat;

b) ustavning nusxasi yoki undan koʻchirma;

v) mazkur tashkilotning roʻyxatdan oʻtganligi haqida mahalliy hokimiyat qarorining nusxasi;

g) litsenziya uchun davlat boji toʻlanganligi haqida bank (kassa) hujjati (beriladigan litsenziya uchun toʻlov).

3. Xususiy Mehnat kontraktlariga (taklifnomalarga) ega boʻlgan va Mehnat faoliyatini amalga oshirish uchun chet elga ketayotgan shaxslar Mehnat vazirligiga quyidagi hujjatlarni taqdim qiladilar:

a) xorijiy firma kontraktining (taklifnomasining) davlat tilidagi tarjimasi bilan birgalikdagi nusxasi, unda davlat organida qonunlashtirilgan barcha ijtimoiy kafolatlar va tibbiy cygʻypta koʻrsatilishi kerak;

b) ish joyidan taqdimnoma (zarurat boʻlsa) va litsenziya berilishi haqida yozma ariza;

v) chet elda ishlashga borishning maqsadga muvofiqligini mehnatchini yuborayotgan tashkilot tomonidan asoslash (zarurat boʻlsa),

g) joʻnab ketayotgan xodim haqida maʼlumotnoma yoki uning Mehnat daftarchasi nusxasi;

d) salomatligi haqida Oʻzbekiston Respublikasi Sogʻliqni saqlash vazirligi tomonidan tasdiqlangan tegishli shakldagi maʼlumotnoma.

4. Litsenziyalarning hamma turlari bir yilga beriladi va arizachining iltimosiga koʻra uning muddati uzaytirilishi mumkin.

5. Davlat bojlari (litsenziya berilishi uchun toʻlovlar) mazkur Nizomning ilovasida koʻrsatilgan miqdorlarda undiriladi.

Litsenziya berilishi boʻyicha hujjatlarni koʻrib chiqish bilan bogʻliq xarajatlarni qoplash, vazirlik tizimining moddiy-texnika negizini mustahkamlash, chet el rasmiy delegatsiyalarini qabul qilishni tashkil etish, Mehnat vazirligi tizimi xodimlarini chet elga xizmat safarlariga borishi bilan bogʻliq xarajatni qoplash, shuningdek, vazirlik xodimlarining ishchi kuchlarni chetdan keltirish va chetga chiqarish sohasidagi faoliyatining yangi yoʻnalishlarini izlash va ushbu faoliyat sohasini kengaytirish boʻyicha ishlarini ragʻbatlantirish maqsadida litsenziya uchun oʻtkazilgan soʻm va valyutadagi tushumlarning 20 foizi Oʻzbekiston Respublikasi Mehnat vazirligida, mazkur Nizomning 2-bandida koʻrsatilgan faoliyatga litsenziya berish uchun tushumlarning 20 foizi esa vazirlikning joylardagi tarkibiy boʻlinmalarida qoldiriladi,

6. Murojaatlar natijalari boʻyicha bir oy muddat ichida litsenziya berish yoki bermaslik haqida qaror qabul qilinadi va rad qilishning sabablari koʻrsatilib bu haqda arizachiga maʼlum qilinadi.

7. Litsenziya bosma qogʻozida oʻchirishlarga, dogʻlapga, oldindan kelishilmagan va tasdiqlanmagan tuzatishlarga yoʻl qoʻyilmaydi. Litsenziyani boshqa yuridik va jismoniy shaxslarga berish mumkin emas.

8. Yuridik va jismoniy shaxslar, shu jumladan, xorijiy va qoʻshma korxonalar tomonidan mehnat migratsiyasi masalalariga taalluqli boʻlgan, chalkashtiruvchi axborotlar ataylab tarqatilganda, koʻchma Mehnatchilar va ularning oilalarini noqonuniy, shuningdek, maxfiy ravishda chet elga oʻtkazishni uyushtirish va amalda oshirishga yordam koʻrsatilganda Oʻzbekiston Respublikasi Mehnat vazirligi berilgan litsenziyaning amal qilishini toʻxtatib qoʻyishi va keyinchalik uni bekor qilishi mumkin.

Yuridik va jismoniy shaxslar berilgan litsenziyada qayd etilgan shartlarni buzishgan taqdirda hujjat olib qoʻyiladi va haqiqiy emas deb eʼlon qilinadi.

Agar yuridik va jismoniy shaxslar litsenziya olingan kundan boshlab 6 oy davomida undan foydalanmasalar yoki oʻz faoliyatlarini toʻxtatib qoʻysalar, litsenziya oʻz kuchini yoʻqotgan deb hisoblanadi va uni olish uchun toʻlangan pul qaytarilmaydi.

9. Quyidagi shaxslar Oʻzbekiston Respublikasi hududida va uning tashqarisida mehnat faoliyatini litsenziya olmagan holda amalga oshirishlari mumkin:

a) Oʻzbekiston Respublikasining chet eldagi diplomatiya (savdo) vakolatxonalarning va Oʻzbekiston Respublikasi hududidagi chet el diplomatiya (savdo) vakolatxonalarining xodimlari va ularning oila aʼzolari;

b) xorijiy diplomatiya (savdo) va boshqa tijorat vakolatxonalari xodimlari tarkibida ishlash uchun yollangan Oʻzbekiston Respublikasi fuqarolari;

v) oʻquvchilar talabalar, aspirantlar hamda 6 oygacha boʻlgan muddatga xizmat safariga yuborilgan va mazkur mamlakatda ish haqi olmayotgan olimlar va tajriba oʻrganayotganlar;

g) Oʻzbekiston Respublikasining va xorijiy davlatlarning xalqaro tashkilotlarda ishlayotgan yoki hukumatlararo bitimlar asosida ishlayotgan rasmiy vakillari.

10. Oʻzbekiston Respublikasi Mehnat vazirligi va uning joylardagi tarkibiy boʻlinmalari (Mehnat vazirligining topshirigʻiga binoan) Vazirlar Mahkamasining 1993-yil 11-martdagi 127-son qarori hamda mazkur Nizomga muvofiq, Oʻzbekiston Respublikasi hududida yollash va ishga joylashtirish bilan shugʻullanuvchi tashkilotlar faoliyatini tekshirish va nazorat qilishni amalga oshirish huquqiga egadirlar.

1 . Oʻzbekiston fuqarolarini chet elda ishga joylashtirishni amalga oshiradigan yuridik shaxslar, shuningdek, xususiy va boshqa kontraktlar boʻyicha chet elda vaqtincha ishlashga ketayotgan shaxslar uchun

II. Xususiy va boshqa bitimlar boʻyicha Oʻzbekiston hududida ishga joylashayotgan xorijiy fuqarolar, shuningdek, fuqarolarni ishga joylashtirishda pulli xizmatlar koʻrsatadigan xorijiy yuridik shaxslar uchun

III. Kadrlarni oʻqitish, qayta tayyorlash, ixtisosini oʻzgartirish va ishga joylashtirishda pulli xizmatlar koʻrsatadigan yuridik shaxslar uchun

I va III bandlardagi boj miqdorlari pulning qadrsizlanishi darajasiga muvofiq indeksatsiya qilinadi