LexUZ sharhi
Mazkur Asosiy shartlar O‘zbekiston Respublikasi adliya vazirining 2019-yil 26-avgustdagi 367-mh-sonli “Idoraviy normativ-huquqiy hujjatlarni davlat reyestridan chiqarish to‘g‘risida”gi buyrug‘iga (ro‘yxat raqami 524-2, 26.08.2019-y.) asosan davlat reyestridan chiqarilgan.
1. Mazkur shartlar O‘zbekiston Respublikasi Vazirlar Mahkamasining 1996-yil 26-martdagi 119-sonli Qaroriga asosan ishlab chiqilgan va davlat qisqa muddatli obligatsiyalarining (bundan buyon matnda Obligatsiyalar deb yuritiladi) chiqarilishi va muomalada bo‘lishini tartibga soladi. Obligatsiyalarning emitenti O‘zbekiston Respublikasi Moliya vazirligi hisoblanadi. Obligatsiyalarning joylashtirilishi va to‘lovlarining amalga oshirilishi Markaziy bank tomonidan Moliya vazirligi nomidan va hisobidan amalga oshiriladi.
2. Obligatsiyalar emissiyasi muntazam ravishda alohida chiqarilishlar shaklida amalga oshiriladi. Har bir chiqarilish, qoida tariqasida, oyiga bir marotaba amalga oshiriladi. Obligatsiyalar bir yilgacha bo‘lgan muddatga chiqariladi.
4. Yuridik shaxslar obligatsiyalarning egalari bo‘lishi mumkin. Obligatsiyalarning har bir chiqarilishi uchun ularning bo‘lajak egalari bo‘yicha cheklovlar belgilanishi mumkin.
Obligatsiya egasi to‘lovi amalga oshirilgan obligatsiyalar qiymatiga teng summadagi keyingi chiqarilish obligatsiyalarini sotib olish huquqiga ega.
5. Obligatsiyalar to‘lovi O‘zbekiston Respublikasi Moliya vazirligi nomidan va hisobidan Markaziy bank tomonidan vakolatli tashkilotlarga (bundan buyon matnda Dilerlar deb yuritiladi) obligatsiyalarning nominal qiymatini naqd pulsiz shaklda o‘tkazish yo‘li bilan amalga oshiriladi. Dilerlar obligatsiyalar to‘lovini ularning egalariga, tuzilgan shartnomalarga muvofiq obligatsiyalarni to‘lash paytida ularning nominal qiymatini naqd pulsiz shaklda o‘tkazish yo‘li bilan amalga oshiradilar.
6. Obligatsiyalardan olingan daromad xarid bahosi bilan sotish bahosi (yoki to‘lov bahosi) o‘rtasidagi farq hisoblanadi.
7. Obligatsiyalar maxsus qog‘oz blanklari shaklida tayyorlanmaydi. Obligatsiyalarning har bir chiqarilishi maxsus Global sertifikat ko‘rinishida, ikkita asl nusxada rasmiylashtiriladi, ulardan bittasi O‘zbekiston Respublikasi Moliya vazirligida, ikkinchisi esa O‘zbekiston Respublikasi Markaziy bankida saqlanadi. Obligatsiyalarga egalik qilish huquqi O‘zbekiston Respublikasi valyuta birjasi savdo tizimida obligatsiyaga egalik qilish huquqi va uni saqlash bo‘yicha ochilgan tegishli hisobvaraqqa (bundan buyon matnlarda “depo” hisobvarag‘i) kirim yozuvi kiritilishi bilan yuzaga keladi.
8. O‘zbekiston Respublikasi Markaziy banki obligatsiyalar chiqarilishiga xizmat ko‘rsatish bo‘yicha bosh agent hisoblanadi. U Moliya vazirligi bilan kelishgan holda, ushbu Asosiy shartlarda belgilanmagan obligatsiyalarni joylashtirish va muomalada bo‘lish masalalarini tartibga soladi.
9. Obligatsiyalarni joylashtirish, muomalada bo‘lishi va so‘ndirish, kliring va hisob-kitoblarni amalga oshirish hamda obligatsiya egalari hisobini yuritish va ular bilan hisob-kitob qilish O‘zbekiston Respublikasi Valyuta birjasi tomonidan O‘zbekiston Respublikasi Markaziy banki bilan tuzilgan shartnoma asosida amalga oshiriladi.
Diler O‘zbekiston Respublikasi Markaziy banki bilan obligatsiyalar bozorida dilerlik vazifasini bajarish bo‘yicha shartnoma tuzadi.
10. Obligatsiyalarni chiqarishga doir qaror O‘zbekiston Respublikasi Markaziy banki bilan kelishilgan holda O‘zbekiston Respublikasi Moliya vazirligi tomonidan qabul qilinadi. Obligatsiyalar chiqarish uchun qaror qabul qilishda uning chegaraviy miqdori, joylashtirish sanasi va bo‘lajak egalariga qo‘yiladigan cheklovlar belgilanadi.
11. Ushbu Asosiy shartlarning 10-bandida ko‘rsatilgan obligatsiyalarning keyingi chiqarilishiga doir ma’lumotlar ularni joylashtirish boshlanishidan kamida 7 kundan kam bo‘lmagan muddatda e’lon qilinadi. Chiqarishga mo‘ljallangan obligatsiyalar miqdorining kamida 20 foizi sotilgan taqdirda chiqarilish amalga oshgan hisoblanadi.
12. O‘zbekiston Respublikasi Markaziy banki obligatsiyalarni ikkilamchi bozorda sotib olishi mumkin.
13. O‘zbekiston Respublikasi Moliya vazirligi obligatsiyalarni ikkilamchi bozorda qayta sotib olish operatsiyasini amalga oshirishi mumkin.