Oʻzbekiston Respublikasining Budjet kodeksiga muvofiq buyuraman:

1. Oʻzbekiston Respublikasi moliya vazirining 2014-yil 14-noyabrdagi 74-son buyrugʻi (roʻyxat raqami 2634, 2014-yil 15-dekabr) (Oʻzbekiston Respublikasi qonun hujjatlari toʻplami, 2014-y., 51-son, 612-modda) bilan tasdiqlangan Budjet tashkilotlari va budjet mablagʻlari oluvchilarning xarajatlar smetasi va shtat jadvallarini tuzish, tasdiqlash va roʻyxatdan oʻtkazish tartibi toʻgʻrisidagi nizomga ilovaga muvofiq oʻzgartirishlar va qoʻshimcha kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. 3-bandning ikkinchi xatboshisidagi “maktabgacha taʼlim muassasalari” degan soʻzlar “maktabgacha taʼlim tashkilotlari” degan soʻzlar bilan almashtirilsin.

2. Quyidagi mazmundagi 7²-band bilan toʻldirilsin:

“7². Oʻzbekiston Respublikasi Budjet kodeksining 112-moddasi oltinchi qismida koʻrsatilgan quyidagi mablagʻlarga xarajatlar smetalarini tuzish talab qilinmaydi:

a) budjet tashkilotlari va budjet mablagʻlari oluvchilarning xarajatlar smetalarini roʻyxatdan oʻtkazish hamda ijro etish jarayonida boʻshaydigan;

b) tovar-moddiy qimmatliklarning normativdan ortiq zaxiralari boʻyicha hisobga olingan;

v) advokatlar tomonidan koʻrsatilgan yuridik yordam uchun davlat hisobidan toʻlanishi nazarda tutiladigan;

g) qoʻshilgan qiymat soligʻi summasini soliq toʻlovchilarga qaytarish uchun nazarda tutiladigan;

d) davlat organlari yoki ular mansabdor shaxslarining qonunga xilof harakatlari (harakatsizligi) natijasida jismoniy yoki yuridik shaxslarga yetkazilgan zararning oʻrnini qoplash uchun nazarda tutiladigan;

e) budjet tashkilotlarida ishlovchi ayollarga homiladorlik va tugʻish nafaqasini toʻlash uchun nazarda tutiladigan, budjet tashkilotlarining xarajatlar smetalariga qonunchilikda belgilangan tartibda oʻzgartirishlar kiritilgan hollar bundan mustasno;

j) bir yoʻla beriladigan davlat pul mukofotlari va mukofotlarini toʻlash uchun nazarda tutiladigan;

z) Chernobil AES halokati oqibatlarini tugatish ishtirokchilariga kompensatsiyalar toʻlash uchun nazarda tutiladigan;

i) transportda imtiyozli yurishni qoplash uchun nazarda tutiladigan;

k) davlat qarzini toʻlash va unga xizmat koʻrsatish, Oʻzbekiston Respublikasi ishtirokchi boʻlgan xalqaro tashkilotlarga aʼzolik badallarini toʻlash va ularni moliyalashtirishda ishtirok etish uchun moʻljallangan;

l) davlat ehtiyojlari uchun qishloq xoʻjaligi mahsulotlarini yetishtirayotgan qishloq xoʻjaligi korxonalarini moliyaviy qoʻllab-quvvatlash uchun nazarda tutiladigan;

m) saylov va referendumlar oʻtkazish uchun nazarda tutiladigan;

n) budjetlararo transfertlar ajratish uchun nazarda tutiladigan;

o) tijorat banklari va boshqa moliya institutlarining ustav kapitalini shakllantirish va koʻpaytirish uchun nazarda tutiladigan;

p) rezident-yuridik shaxslarga budjet ssudalari ajratish va Oʻzbekiston Respublikasi Moliya vazirligining kredit liniyalarini ochish uchun nazarda tutiladigan;

r) soliq va budjet siyosatining asosiy yoʻnalishlarida nazarda tutilgan tadbirlar hamda moliya yili mobaynida amalga oshirilishi nazarda tutilgan va Davlat budjeti xarajatlarini koʻpaytirishni talab qiladigan boshqa tadbirlar uchun moʻljallangan;

s) davlat maqsadli jamgʻarmalariga oʻtkazib beriladigan;

t) Oʻzbekiston Respublikasi Vazirlar Mahkamasining, Qoraqalpogʻiston Respublikasi respublika budjetining, viloyatlar viloyat budjetlarining va Toshkent shahri shahar budjetining tumanlar va shaharlar budjetlarining zaxira jamgʻarmalarini shakllantirish uchun budjetdan ajratiladigan mablagʻlar.

Bunda ushbu bandda koʻrsatilgan mablagʻlar tegishli moliya organlarining shaxsiy gʻazna hisovaraqlarida aks ettiriladi (mazkur bandning “m”, “s” va “t” kichik bandlarida keltirilgan mablagʻlar bundan mustasno).”.

3. 19-banddagi “Davlat ilmiy-texnik dasturlarini” va “ilmiy-texnik loyihalarning” degan soʻzlar tegishli ravishda “Davlat ilmiy dasturlarini” va “ilmiy loyihalarning” degan soʻzlar bilan almashtirilsin.

4. 21-banddagi “Davlat ilmiy-texnik dasturlarini” degan soʻzlar “Davlat ilmiy dasturlarini” degan soʻzlar bilan almashtirilsin.

5. 24-bandda:

ikkinchi xatboshidagi “kasb-hunar taʼlimi muassasalari” degan soʻzlar “professional taʼlim tashkilotlari” degan soʻzlar bilan almashtirilsin;

oltinchi xatboshidagi “kasb-hunar taʼlimi muassasalarining” degan soʻzlar “professional taʼlim tashkilotlarining” degan soʻzlar bilan almashtirilsin.

6. 30-bandda:

beshinchi xatboshisi quyidagi tahrirda bayon etilsin:

“budjet tashkilotlariga undiriladigan ota-onalar toʻlovlari hisobidan shakllantiriladigan budjetdan tashqari mablagʻlar, shu jumladan oʻquvchilar va tarbiyalanuvchilar davlat maktabgacha taʼlim tashkilotlarida, umumtaʼlim maktablarining kuni uzaytirilgan guruhlarida, maktab-internatlarda, olimpiya zaxiralari kollejlari va boshqa taʼlim tashkilotlarida tarbiyalanayotganligi uchun, oʻquvchilar bolalar musiqa va sanʼat maktablari hamda maktabdan tashqari taʼlim tashkilotlarida taʼlim olganligi uchun, oliy, oʻrta maxsus va professional taʼlim tashkilotlarida taʼlim olganlik uchun, statsionar davolash-profilaktika muassasalarida davolanayotganlar tarkibi ovqatlanishi uchun hamda qonunchilik hujjatlariga muvofiq boshqa turdagi toʻlovlar;”;

oltinchi xatboshidagi “Davlat maktabgacha taʼlim muassasalarida” degan soʻzlar “Davlat maktabgacha taʼlim tashkilotlarida” degan soʻzlar bilan almashtirilsin.

7. 35-bandning yettinchi xatboshisi va 61-bandning oltinchi xatboshisidagi “kasb-hunar taʼlimi muassasalarining” degan soʻzlar “professional taʼlim tashkilotlarining” degan soʻzlar bilan almashtirilsin.

8. 51-bandning beshinchi xatboshisidagi “kasb-hunar kollejlarining” degan soʻzlar “professional taʼlim tashkilotlarining” degan soʻzlar bilan almashtirilsin.