[
OKOZ:
1.
09.00.00.00 Tadbirkorlik va xo‘jalik faoliyati / 09.17.00.00 Savdo / 09.17.10.00 Alohida turdagi mahsulotlar bo‘yicha savdo;
2.
09.00.00.00 Tadbirkorlik va xo‘jalik faoliyati / 09.18.00.00 Umumiy ovqatlanish / 09.18.01.00 Umumiy qoidalar]
[
TSZ:
1.
Iqtisodiyot / Davlat moddiy zaxirasi]
Qashqadaryo viloyati hokimining
Qarori
Umumiy ovqatlanish mahsulotlarining ayrim turlarini maxsus ajratilgan joylarda sotish tartibini tasdiqlash to‘g‘risida
O‘zbekiston Respublikasi Vazirlar Mahkamasining 2003-yil 13-fevraldagi “O‘zbekiston Respublikasida chakana savdo qoidalarini hamda O‘zbekiston Respublikasida umumiy ovqatlanish mahsulotlarini (xizmatlarini) ishlab chiqarish va sotish qoidalarini tasdiqlash to‘g‘risida”gi 75-sonli
qarori
ijrosini ta’minlash yuzasidan viloyat hududida umumiy ovqatlanish taomlarining ayrim turlarini maxsus ajratilgan joylarda sotish tartibini belgilash maqsadida O‘zbekiston Respublikasi “Mahalliy davlat hokimiyati to‘g‘risida”gi Qonunining
6-moddasiga
asosan qaror qilaman:
1. Viloyat hududida umumiy ovqatlanish maxsulotlari (taomlari) ayrim turlarini maxsus ajratilgan joylarda sotish tartibi (keyingi o‘rinlarda Tartib deb ataladi)
ilovaga
muvofiq tasdiqlansin.
2. Viloyat Favqulodda vaziyatlar boshqarmasi (O. Hazratqulov), Davlat soliq boshqarmasi (A. Bozorov), Davlat sanitariya-epidemiologiya nazorati boshqarmasi (Sh. Sherov), Sanitariya-epidemiologik osoyishtalik markazi (S. Rahimov) Qurilish bosh boshqarmasi (O. Xudoynazarov) va tuman (shahar) hokimliklari ushbu Tartibga rioya etilishini ta’minlasinlar.
3. Mazkur qaror “Qashqadaryo” va “Novosti Kashkadari” gazetalarida e’lon qilinsin hamda hokimlikning qashqadaryo.uz rasmiy veb-saytiga joylashtirilsin.
4. Mazkur qaror rasmiy e’lon qilingan kundan boshlab kuchga kiritilsin.
5. Ushbu qarorning bajarilishini nazorat qilish viloyat hokimining birinchi o‘rinbosari U. Butayev zimmasiga yuklansin.
Hokim Z. MIRZAYEV
Qarshi sh.,
2020-yil 8-avgust,
HQ-688/08-son
Viloyat hokimining 2020-yil 8-avgustdagi HQ-688/08-son
qaroriga
ILOVA
Umumiy ovqatlanish mahsulotlarining ayrim turlarini maxsus ajratilgan joylarda sotish
TARTIBI
I. Umumiy qoidalar
1. Ushbu Tartib Qashqadaryo viloyati hududida majburiy tartibda ustav fondidagi ulushi kamida 51 foiz bo‘lgan mahalliy davlat hokimiyati organi muassisligida tashkil etilgan dehqon (oziq-ovqat) bozorlari va savdo komplekslari (keyingi o‘rinlarda tashkilotlar deb yuritiladi) hududidaumumiy ovqatlanish maxsulotlari (taomlari) ayrim turlarini maxsus ajratilgan joylarda sotish tartib-qoidalarini belgilaydi.
2 Umumiy ovqatlanish maxsulotlari (taomlari) ayrim turlarini uy sharoitlarida tayyorlab kelingan yoki joylardagi vakolatli organ qarori bilan maxsus ajratilgan joylarda ovqatlanish o‘rinlari tashkil etmasdan donali tayyorlash va sotish bo‘yicha xizmat ko‘rsatuvchi — yakka tartibdagi tadbirkor sifatida ro‘yxatdan o‘tgan jismoniy shaxslar tomonidan amalga oshiriladi.
3. Umumiy ovqatlanish maxsulotlari (taomlari) ayrim turlarini, donali tayyorlash, pishirish va sotish uchun maxsus ajratilgan joylar yengil konstruktiv qurilgan va shaharsozlik, sanitariya va yong‘in xavfsizligi normalari va talablariga javob beradigan, oziq-ovqat mahsulotlarini vaqtincha saqlash, masallik tayyorlash, pishirish va personal shaxsiy gigiyenasiga rioya etish imkoniyatiga ega bo‘lishi kerak.
4. Ushbu Tartibda quyidagi asosiy tushunchalar qo‘llaniladi:
umumiy ovqatlanish maxsulotlari (taomlari) ayrim turlari
— masallig‘i uy sharoitida yoki vakolatli organ tomonidan maxsus ajratilgan joylarda tayyorlanib, ovqat pishirish vositalarida pishiriladigan va sotiladigan donali taomlar (somsa, blinchik, cheburek, manti, xonim, sosiskali kulcha, fast-fud va boshqa donali taomlar);
maxsus ajratilgan joy —
tuman (shahar) hokimliklari tomonidan belgilangan tartibda ajratilgan, umumiy ovkatlanish maxsulotlari (taomlari) ayrim turlari tayyorlanadigan va sotiladigan joy;
talabgor
— uy sharoitida yoki maxsus ajratilgan joylarda ovqatlanish joylarini tashkil etmasdan umumiy ovqatlanish maxsulotlari (taomlari) ayrim turlarini tayyorlash va sotish istagini bildirgan yakka tartibdagi tadbirkor;
vakolatli organ
— tuman (shahar) hokimliklari;
vakolatli davlat organlari
— viloyat Favqulodda vaziyatlar boshqarmasi, Davlat soliq boshqarmasi, Davlat sanitariya-epidemiologiya nazorati boshqarmasi, Sanitariya-epidemiologik osoyishtalik markazi, Qurilish bosh boshqarmasi;
joylashish sxemasi
— vakolatli organ tomonidan maxsus ajratilgan joylarning oldindan tasdiqlangan joylashuvi.
II. Tegishli hududlarda maxsus joylarni ajratish va joylashish sxemasini tuzish
5. Tuman (shahar) hokimliklari tomonidan tashkilotlar ma’muriyati taklifiga binoan umumiy ovqatlanish maxsulotlari (taomlari) ayrim turlarini tayyorlash va sotish uchun maxsus ajratilgan joy tanlangan kundan keyin 1 ish kuni davomida vakolatli davlat organlari (Davlat sanitariya-epidemiologiya nazorati boshsarmasi va uning tuman (shahar) fshiallari bundan mustasno) bilan kelishish uchun yuboriladi.
Vakolatli davlat organlari mazkur kelishishni 3 ish kunida amalga oshirishi lozim.
Umumiy ovqatlanish maxsulotlari (taomlari) ayrim turlarini tayyorlash va sotish uchun maxsus ajratilayotgan joyni kelishish asoslari ko‘rsatilib rad etilgan taqdirda, vakolatli organlar tomonidan 2 ish kuni davomida yangi taklif tayyorlanib, qayta kelishish uchun yuboriladi.
6. Vakolatli davlat organlari bilan kelishish uchun maxsus ajratilayotgan joy alohida ko‘rsatilgan holda tashkilot hududining umumiy joylashish sxemasi taqdim etilishi lozim.
7. Tashkilot hududidagi maxsus ajratilayotgan joylar sanitariya qoidalari va gigiyena normalari, yong‘indan saqlanish va shaharsozlik normalariga javob bergan taqdirda kelishiladi.
8. Maxsus ajratilgan joylarning soni hududning ijtimoiy-iqtisodiy rivojlanganlik darajasi, savdo aylanmasining yuqori va pastligi, aholining kunlik iste’mol talabidan kelib chiqib vakolatli organlar tomonidan belgilanadi.
9. Donabay umumiy ovqatlanish maxsulotlari (taomlari) ayrim turlari masalliqlarini uy sharoitida tayyorlab kelib pishirib sotish yoki maxsus ajratilgan joyda tayyorlab, pishirib sotish joylarining joylashish sxemasi tashkilot ma’muriyati taklifiga binoan vakolatli organlari tomonidan tuziladi hamda joylashuv sxemasi xaritasi tashkilotga kirish joyi qismida ko‘rinarli tarzda joylashtirilishi shart.
Umumiy ovqatlanish maxsulotlari (taomlari) ayrim turlarini sotish uchun maxsus joylarni ajratish har ikki yilda bir marta qayta ko‘rib chiqiladi.
III. Umumiy ovqatlanish mahsulotlarini (taomlarini) maxsus ajratilgan joylarda sotish talab va shartlar
10. Talabgor tashkilot ma’muriyati bilan tuzilgan ijara shartnomasi asosida uy sharoitida yoki vakolatli organ qarori bilan maxsus ajratilgan joylarda umumiy ovqatlanish maxsulotlari (taomlari) ayrim turlarini tayyorlash va sotish bo‘yicha xizmat ko‘rsatadi.
Ushbu xizmat ko‘rsatish faoliyati bilan shug‘ullanish uchun ruxsatnoma talab etilmaydi.
Xizmat ko‘rsatish faoliyatini amalga oshirish davomida nazorat-kassa texnikasi qo‘llanilmaydi.
Umumiy ovqatlanish maxsulotlari (taomlari) ayrim turlarini tayyorlash va sotishni amalga oshirishning majburiy talablari va shartlari quyidagilardan iborat:
sanitariya qoidalari va gigiyena normalari;
yong‘indan saqlanish normalari;
texnika xavfsizligi qoidalariga rioya qilinishi lozim.
Talabgorlar va ular tomonidan yollangan xodimlar qonun hujjatlarida belgilangan tartibda to‘liq tibbiy ko‘rikdan o‘tishlari shart.
Umumiy ovqatlanish mahsulotlari (taomlari) ayrim turlari uy sharoitida tayyorlansa, ovqat masalliqlari vaqtincha saqlanishi, taom tayyorlanishi, pishirilishi jarayoni va foydalaniladigan xonalar hamda jihozlar sanitariya qoidalari va gigiyena normalariga muvofiqligi yakka tartibdagi tadbirkorning zimmasiga yuklanadi.
Maxsus ajratilgan joylarda maishiy chiqindilarni yig‘ish uchun qopqoqli chiqindi qutilari bo‘lishi lozim.
11. Umumiy ovqatlanish maxsulotlari (taomlari) ayrim turlarini tashkilotlarning kirish yo‘laklari, avtomobil to‘xtash joylarida, bozor va savdo kompleksi hududida joylashgan savdo magazinlariga kirish yo‘llariga tutash joylar, hojatxona, chiqindixonaga 25 metr va undan kam masofada joylashgan hududlarda tayyorlash va sotishga yo‘l qo‘yilmaydi.
IV. Ushbu Tartibga rioya etilishini nazorat qilish
12. Ushbu Tartibga rioya etilishini nazorat qilish qonun hujjatlarida belgilangan tartibda vakolatli davlat organlari tomonidan amalga oshiriladi.
V. Yakunlovchi qoidalar
13. Ushbu Tartib asosida faoliyat olib boruvchi talabgorlarning soni cheklanmaydi.
14. Maxsus ajratilgan joylarda umumiy ovqatlanish maxsulotlari (taomlari) ayrim turlarini tayyorlash va sotish davomida muhandislik- kommunikatsiya tarmoqlariga ulanish talabgorlar tomonidan qonun hujjatlarida belgilangan tartibga muvofiq amalga oshiriladi.
15. Ushbu Tartib talablarini buzgan aybdor shaxslar qonun hujjatlarida belgilangan tartibda javobgar bo‘ladilar.
(Qonun hujjatlari ma’lumotlari milliy bazasi, 10.08.2020-y., 11/20/HQ-688/08/1156-son)