“Kichik va xususiy tadbirkorlikni rivojlantirishni ragʻbatlantirish chora-tadbirlari toʻgʻrisida”, “Xorijiy investitsiyalar va xorijiy investorlarning faoliyati kafolatlari toʻgʻrisida” Oʻzbekiston Respublikasi qonunlariga muvofiq, Oʻzbekiston Respublikasida xususiy va kichik tadbirkorlikni rivojlantirishni moliyaviy va texnologik qoʻllab-quvvatlashni taʼminlash maqsadida Vazirlar Mahkamasi qaror qiladi:

1. “Biznes-fond” va “Raanani-Xolding” kompaniyasining mahalliy xomashyodan eksportga moʻljallangan mahsulotlar ishlab chiqarishni kengaytirish maqsadida korxonalarga lizing asosida zamonaviy xorijiy texnologik liniyalar va asbob-uskunalar yetkazib berish yoʻli bilan xususiy tadbirkorlik va kichik biznes loyihalarini qoʻllab-quvvatlash uchun 50 mln. AQSh dollari summasidagi qoʻshma dasturni amalga oshirish toʻgʻrisidagi taklifi maʼqullansin.

2. Maʼlumot uchun qabul qilinsinki:

a) tomonlarning amalga oshiriladigan dasturdagi ishtiroki:

“Raanani-Xolding”niki 35 mln. AQSh dollarini;

“Biznes-fond”niki 15 mln. AQSh dollarini tashkil etadi;

b) quyidagilar:

tovarlarni oʻrash-joylash va qadoqlash;

qishloq xoʻjaligi mahsulotlarini puxta qayta ishlash;

binokorlik materiallari va buyumlari ishlab chiqarish uchun texnologik liniyalar va asbob-uskunalar yetkazib berish yuqorida koʻrsatilgan mablagʻlardan foydalanilishi mumkin boʻlgan faoliyatning ustuvor yoʻnalishlari hisoblanadi;

v) lizing shartlarida xorijiy asbob-uskunalarni yetkazib berishni tashkil etish uchun “Raanani-Xolding” kompaniyasi Oʻzbekiston Respublikasida 100 foiz xorijiy sarmoya ishtirokidagi “Osiyo-Yevropa” trast kompaniyasi” shuʼba korxonasini tashkil etadi.

Asbob-uskunalar “Osiyo-Yevropa trast kompaniyasi” tomonidan lizing asosida yetkazib beriladi, bunda yetkazib beriladigan asbob-uskunalarning 30 foizgachasi qarz oluvchilar tomonidan oʻz mablagʻlari yoki “Biznes-fond”ning kreditlari hisobiga toʻlanadi.

3 “Biznes-fond” va “Osiyo-Yevropa trast kompaniyasi” tomonidan loyihalarni koʻrib chiqish va birgalikda mablagʻ bilan taʼminlash tartibi ilovaga muvofiq tasdiqlansin.

4. Lizing kontraktlarini ularning ustuvorligi, raqobatga bardoshliligi va oʻzini oʻzi qoplashi jihatidan ekspertiza qilishni taʼminlash uchun “Biznes-fond” huzurida Tashqi iqtisodiy aloqalar vazirligi, Davlat mulki qoʻmitasi va boshqa manfaatdor tashkilotlar vakillari ishtirokida ekspert komissiyasi tashkil etish toʻgʻrisidagi taklif qabul qilinsin.

5. Oʻzbekiston Respublikasi Markaziy bankining “Osiyo-Yevropa trast kompaniyasi” shuʼba korxonasi orqali Kanadaning “Raanani-Xolding” kompaniyasining 35 mln. AQSh dollari miqdoridagi valyuta-kredit resurslarini jalb qilish hamda ulardan Oʻzbekiston Respublikasining amaldagi qonunchiligiga muvofiq respublika hududida kichik va xususiy biznesni rivojlantirish uchun foydalanish haqidagi taklifi qabul qilinsin.

7. Toshkent shahar hokimligi “Osiyo-Yevropa trast kompaniyasi” ofisini joylashtirish uchun tegishli joy ajratish masalasini ikki hafta muddatda hal etsin.

8. “Osiyo-Yevropa trast kompaniyasi”ga Oʻzbekistonda ushbu dastur mablagʻlari hisobiga mablagʻ bilan taʼminlanadigan loyihalar boʻyicha soʻmlarda haq toʻlash uchun kelgan xorijiy mutaxassislarning mehmonxonalarda yashashi uchun Oʻzbekiston Respublikasi fuqarolari uchun narxnomalar boʻyicha soʻmlarda haq toʻlash huquqi berilsin.

9. Oʻzbekiston Respublikasi Tashqi ishlar vazirligi va Ichki Biznes-fondining buyurtmalari boʻyicha “Raanani-Xolding” va “Osiyo-Yevropa trast kompaniyasi”ning respublikaga kelayotgan xodimlariga koʻp martalik vizalar bersinlar.

10. Mazkur qarorning bajarilishini nazorat qilish Bosh vazirning oʻrinbosarlari B.S. Hamidov va V.A. Chjen zimmasiga yuklansin.

1. Mazkur Tartib Oʻzbekiston Respublikasi Vazirlar Mahkamasining “Xususiy tadbirkorlik va kichik biznesni qoʻllab-quvvatlash fondi (Biznes-fondini tashkil etish hamda uning faoliyati masalalari toʻgʻrisida” 1995-yil 26-iyuldagi 291-son qaroriga muvofiq ishlab chiqilgan hamda “Biznes-fond” va “Osiyo-Yevropa trast kompaniyasi” tomonidan tadbirkorlarning loyihalarini koʻrib chiqish hamda birgalikda mablagʻ bilan taʼminlash tartibini belgilab beradi.

2. Faoliyatning quyidagi yoʻnalishlari:

mahsulotni oʻrash-joylash va qadoqlash;

qishloq xoʻjaligi mahsulotlarini qayta ishlash;

binokorlik materiallari va buyumlar ishlab chiqarish boʻyicha zamonaviy xorijiy texnologik liniyalar va asbob-uskunalardan foydalangan holda loyihani amalga oshirishni xohlovchi xususiy (kichik) korxona (keyingi oʻrinlarda — qarz oluvchi) “Biznes-fond”ga quyidagi hujjatlarni taqdim etadi:

loyihaning biznes-rejasi (dastlabki);

korxona balansi nusxasi;

taʼsis hujjatlari nusxalari.

3. “Biznes-fond” “Osiyo-Yevropa trast kompaniyasi” bilan birgalikda loyihani amalga oshirish sharoitlari mavjudligi va mahsulotlar ishlab chiqarish, talab etiladigan texnologiya va asbob-uskunalar xususiyatlarini aniqlash mumkinligi jihatidan dastlabki ekspertiza oʻtkazadi.

5. “Osiyo-Yevropa trast kompaniyasi” asbob-uskunalarni tanlaydi va ularni yetkazib berish qiymatini aniqlaydi, unga quyidagilarning qiymati kiradi:

asbob-uskunalar, transportda tashish va sugʻurta qilish;

oʻrnatish, montaj qilish;

texnologiyani berish;

xodimlarni oʻqitish;

1 yilga ehtiyot qismlar toʻplami va sarflanadigan materiallar;

loyihani boshqarish;

tayyor mahsulot chiqarilgunga qadar ishlab chiqarish liniyasini ishga tushirish uchun ishlab chiqarish materiallari.

6. “Biznes-fond” qarz oluvchi bilan birgalikda loyihani amalga oshirish uchun zarur boʻlgan qoʻshimcha kredit resurslariga boʻlgan ehtiyojni aniqlaydi.

7. “Biznes-fond” “Osiyo-Yevropa trast kompaniyasi” bilan birgalikda loyihaning umumiy qiymatini hisobga olgan holda loyihani amalga oshirish imkoniyatini va uning iqtisodiy jihatdan maqsadga muvofiqligini koʻrib chiqadi.

8. Qarz oluvchi “Biznes-fond”dan olinadigan kreditni sugʻurta qilish masalasida “Madad” sugʻurta agentligiga murojaat qiladi.

9. “Madad” agentligining xulosasi ijobiy boʻlgan taqdirda “Biznes-fond”, “Osiyo-Yevropa trast kompaniyasi” va qarz oluvchi:

“Biznes-fond” bilan qarz oluvchi oʻrtasidagi kredit shartnomasi;

qarz oluvchi bilan “Osiyo-Yevropa trast kompaniyasi” oʻrtasidagi lizing shartlarida asbob-uskunalar yetkazib berish uchun kontrakt loyihalarini tayyorlaydi.

10. “Biznes-fond” huzuridagi ekspert komissiyasi Oʻzbekiston Respublikasi Tashqi iqtisodiy aloqalar vazirligi, Davlat mulki qoʻmitasi, Tashqi iqtisodiy faoliyat milliy banki va boshqa manfaatdor tashkilotlarning vakillari ishtirokida ikki hafta muddatda lizing kontraktini uning ustuvorligi, raqobatga bardoshliligi va oʻzini oʻzi qoplashi jihatidan ekspertizadan oʻtkazadi.

11. Ekspert komissiyasining xulosasi ijobiy boʻlgan taqdirda:

“Biznes-fond” bilan Qarz oluvchi oʻrtasida kredit shartnomasi;

“Osiyo-Yevropa trast kompaniyasi” bilan qarz oluvchi oʻrtasida lizing boʻyicha asbob-uskunalar yetkazib berishga kontrakt rasmiylashtiriladi.

12. “Biznes-fond” qarz oluvchiga kredit shartnomasiga muvofiq kredit ajratadi, kreditning foiz stavkasi va muddati biznes-rejaga muvofiq belgilanadi.

13. Qarz oluvchi asbob-uskunalar yetkazib berish boʻyicha tuzilgan kontrakt qiymatining 30 foizini oʻz mablagʻlari hisobidan yoki “Biznes-fond”dan olingach kredit hisobidan soʻmlarda “Osiyo-Yevropa trast kompaniyasi”ga avans tariqasida toʻlaydi.

14. “Osiyo-Yevropa trast kompaniyasi” soʻmlarni belgilangan tartibda EMVga konvertatsiya qiladi va tanlov asosida chet eldan asbob-uskunalar xarid qiladi.

15. “Osiyo-Yevropa trast kompaniyasi” kontrakt qiymatining qolgan qismi (70%) hisobidan qarz oluvchiga lizing boʻyicha asbob-uskunalar yetkazib beradi, ularni montaj qiladi hamda ishga tushiradi. Lizing shartnomasi shartlari “Biznes-fond”, “Osiyo-Yevropa trast kompaniyasi” va qarz oluvchi oʻrtasidagi kelishuvga koʻra har bir loyihaning xususiyatlari hisobga olingan holda belgilanadi hamda quyidagi umumiy prinsiplarga asoslanadi:

lizing muddati loyihaning biznes-rejasi bilan belgilanadi (3 yilgacha);

lizing boʻyicha toʻlovlar asbob-uskunalarni oʻrnatish tugallangandan va ishlab chiqarish boshlangandan keyin 3 oy oʻtgandan soʻng boshlanadi;

foiz stavkasi xuddi shunday kreditlar va investitsiyalarni kreditlashning xalqaro normalaridan oshmaydi (dollar hisobida 68% yillik foyda doirasida);

lizing boʻyicha oylik yoki choraklik haq toʻlash muayyan muddat uchun asosiy qarzni toʻlashdan va haq toʻlash paytida asosiy qarzning toʻlanmagan qismi uchun foiz toʻlovlaridan iborat boʻladi;

qarz oluvchi lizing boʻyicha “Osiyo-Yevropa trast kompaniyasi”ga soʻmlarda haq toʻlaydi.

16. Qarz oluvchi lizing boʻyicha “Osiyo-Yevropa trast kompaniyasi”ga toʻlovlarni va “Biznes-fond” kreditini qaytarishni qarz oluvchi va “Osiyo-Yevropa trast kompaniyasi” oʻrtasidagi lizing kontraktning va “Biznes-fond” bilan qarz oluvchi oʻrtasidagi kredit shartnomasining ajralmas qismi hisoblangan jadvallarga muvofiq amalga oshiradi. Bunda “Osiyo-Yevropa trast kompaniyasi” kredit tavakkalchiligi “Biznes-fond”ning tavakkalchiligidan sezilarli darajada ortiq boʻlgan taqdirda qarz oluvchi lizing boʻyicha toʻlovlarni “Biznes-fond” tomonidan qarz oluvchiga aylanma mablagʻlarni toʻldirishga berilgan kreditni hisobga olgan holda “Biznes-fond” va “Osiyo-Yevropa trast kompaniyasi” tavakkalchiliklari balansiga erishilgunga qadar faqat “Osiyo-Yevropa trast kompaniyasi”ga toʻlaydi.

17. Qarz oluvchi lizing boʻyicha toʻlovlarni “Osiyo-Yevropa trast kompaniyasi”ga va kredit boʻyicha “Biznes-fond”ga oʻz vaqtida toʻlash majburiyatini bajarmagan taqdirda “Osiyo-Yevropa trast kompaniyasi” “Biznes-fond” bilan kelishuvga koʻra lizingga berilgan asbob-uskunalarni sotish choralarini koʻradi hamda sotishdan olingan mablagʻlardan qarz oluvchining “Osiyo-Yevropa trast kompaniyasi”ga va “Biznes-fond”ga qarzlarini toʻlash uchun qarz oluvchining kreditorlardan har biriga (“Biznes-fond”ga va “Osiyo-Yevropa trast kompaniyasi”ga) toʻlanmagan qarzlariga mutanosib ravishda toʻlash uchun foydalanadi.