“Xo‘jalik yurituvchi subyektlar faoliyatini davlat tomonidan nazorat qilish to‘g‘risida”gi O‘zbekiston Respublikasi Qonunining 6-moddasiga va Vazirlar Mahkamasining 2014-yil 5-avgustdagi 216-son qarori bilan tasdiqlangan Davlat ekologik nazoratini amalga oshirish tartibi to‘g‘risidagi nizomning 22-bandiga muvofiq, shuningdek, tabiatni muhofaza qilish to‘g‘risidagi qonunlariga rioya etilishi ustidan davlat ekologik nazoratini amalga oshirish yuzasidan O‘zbekiston Respublikasi Ekologiya va atrof muhitni muhofaza qilish davlat qo‘mitasining vazifalari va funksiyalari amalga oshirilishini ta’minlash maqsadida Vazirlar Mahkamasi qaror qiladi:
1. O‘zbekiston Respublikasi Hukumatining ilovaga muvofiq ayrim qarorlariga o‘zgartirish va qo‘shimchalar kiritilsin.
2. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — “O‘zbekiston temir yo‘llari” AJ boshqaruvi raisi A.J. Ramatov va O‘zbekiston Respublikasi Ekologiya va atrof muhitni muhofaza qilish davlat qo‘mitasi raisi B.T. Qo‘chqorov zimmasiga yuklansin.
O‘zbekiston Respublikasi Hukumatining ayrim qarorlariga kiritilayotgan o‘zgartirish va qo‘shimchalar
1. Vazirlar Mahkamasining 2012-yil 5-yanvardagi qarori (O‘zbekiston Respublikasi QT, 2012-y., 1-son, 1-modda) bilan tasdiqlangan Davlat va xo‘jalik boshqaruvi organlari, mahalliy davlat hokimiyati organlari xodimlarining xizmat guvohnomasi to‘g‘risidagi namunaviy nizomda:
a) 3-bandga “Tashqi ishlar vazirligi,” so‘zlaridan keyin “O‘zbekiston Respublikasi Ekologiya va atrof muhitni muhofaza qilish davlat qo‘mitasi” so‘zlari qo‘shilsin;
b) 3-ilovaga izohning 1-bandiga “Tashqi ishlar vazirligi,” so‘zlaridan keyin “O‘zbekiston Respublikasi Ekologiya va atrof muhitni muhofaza qilish davlat qo‘mitasi” so‘zlari qo‘shilsin.
2. Vazirlar Mahkamasining 2014-yil 20-oktabrdagi 290-son qarori (O‘zbekiston Respublikasi QT, 2014-y., 10-son, 108-modda) bilan tasdiqlangan O‘simlik dunyosi obyektlaridan foydalanish va o‘simlik dunyosi obyektlaridan foydalanish sohasida ruxsat berish tartib-taomillaridan o‘tish tartibi to‘g‘risidagi nizomga 14-ilovaga izohdagi “(grek yong‘og‘i, pista, nok, olma, shuningdek, qarag‘ay, archaning barcha turlari, sharq tuyya daraxti, eman, shumtol, zarang daraxti, qayin) uchun jismoniy shaxslarga jarima” so‘zlari “(grek yong‘og‘i, pista, nok, olma, shuningdek, qarag‘ay, archaning barcha turlari, sharq tuyya daraxti, eman, chinor, shumtol, zarang daraxti, qayin) uchun jismoniy shaxslardan undirish” so‘zlari bilan almashtirilsin.
3. Vazirlar Mahkamasining 2017-yil 23-maydagi 310-son qarori (O‘zbekiston Respublikasi QHT, 2017-y., 21-son, 397-modda) bilan tasdiqlangan O‘zbekiston Respublikasi Ekologiya va atrof muhitni muhofaza qilish davlat qo‘mitasi to‘g‘risidagi nizomning 22-bandiga quyidagi mazmundagi xatboshi qo‘shilsin:
“Davlat ekologiya qo‘mitasi tizimi xodimlariga Davlat ekologiya qo‘mitasi raisi tomonidan tasdiqlanadigan O‘zbekiston Respublikasi Ekologiya va atrof muhitni muhofaza qilish davlat qo‘mitasi xodimlarining xizmat guvohnomasi to‘g‘risidagi nizomga muvofiq xizmat guvohnomalari beriladi”.
Keyingi tahrirga qarang.