Oʻzbekiston Respublikasi Prezidentining “Elektr energiyasi va tabiiy gaz yetkazib berish hamda isteʼmol qilish sohasida toʻlov intizomini yanada mustahkamlash, shuningdek, ijro ishi yuritish tizimini tubdan takomillashtirish chora-tadbirlari toʻgʻrisida” 2017-yil 29-maydagi PF-5059-sonli Farmoni hamda Oʻzbekiston Respublikasi Prezidentining “Oʻzbekiston Respublikasi Bosh prokuraturasi huzuridagi Majburiy ijro byurosi faoliyatini tashkil etish toʻgʻrisida” 2017-yil 30-maydagi PQ-3016-sonli qaroriga muvofiq:

1. Oʻzbekiston Respublikasi Prezidentining ayrim hujjatlariga 1-ilovaga muvofiq oʻzgartish va qoʻshimchalar kiritilsin.

2. Oʻzbekiston Respublikasi Prezidentining ayrim hujjatlari 2-ilovaga muvofiq oʻz kuchini yoʻqotgan deb hisoblansin.

3. Mazkur Farmonning ijrosini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov va Oʻzbekiston Respublikasi Bosh prokurori I.B. Abdullayev zimmasiga yuklansin.

1. Oʻzbekiston Respublikasi Prezidentining 2009-yil 13-martdagi PF-4094-sonli Farmoni bilan tasdiqlangan Oʻzbekiston Respublikasida afv etishni amalga oshirish tartibi toʻgʻrisidagi Nizomda:

a) 11-bandning ikkinchi xatboshidagi “Adliya vazirligi huzuridagi Sud departamenti” soʻzlari “Bosh prokuratura huzuridagi Majburiy ijro byurosi” soʻzlari bilan almashtirilsin;

b) 22-bandning ikkinchi xatboshidagi “Adliya vazirligi huzuridagi Sud departamenti” soʻzlari “Bosh prokuratura huzuridagi Majburiy ijro byurosi” soʻzlari bilan almashtirilsin.

2. Oʻzbekiston Respublikasi Prezidentining ““Oʻztransgaz” aksionerlik kompaniyasi faoliyatini tashkil etishni takomillashtirish chora-tadbirlari toʻgʻrisida” 2006-yil 8-avgustdagi PQ-438-sonli qarori 2-bandining beshinchi xatboshi kuyidagi tahrirda bayon etilsin:

“zamonaviy hisoblash jihozlari va usullarini joriy etgan holda gazning qatʼiy hisobga olinishi, tabiiy gazning isrof qilinishi va asossiz ishlatilishini kamaytirish choralari koʻrilishini taʼminlash”.

3. Oʻzbekiston Respublikasi Prezidentining 2007-yil 27-apreldagi PQ-630-sonli qarori bilan tasdiqlangan Tadbirkorlik subyektlarini ixtiyoriy tugatish va ularning faoliyatini toʻxtatish tartibi toʻgʻrisidagi Nizomda:

a) 18-bandidagi “sud ijrochilari tuman (shahar) boʻlimi” soʻzlari “Oʻzbekiston Respublikasi Bosh prokuraturasi huzuridagi Majburiy ijro byurosi tuman (shahar) boʻlimi (keyingi oʻrinlarda — Byuro)” soʻzlari bilan almashtirilsin;

b) 19¹-bandi quyidagi tahrirda bayon etilsin:

“19¹. Byuroning tuman (shahar) boʻlimi roʻyxatdan oʻtkazgan organning bildirishnomasini olgan sanadan boshlab oʻn kundan kechiktirmay, belgilangan tartibda, ish yuritishda ijro hujjati mavjudligini aniqlaydi, unda tugatilayotgan korxona qarzdor sifatida ishtirok etadi. Tegishli ijro hujjati mavjud boʻlgan taqdirda, davlat ijrochisi qonunda belgilangan tartibda uning yuzasidan ijro ishini tugallaydi va tartib- taomil doirasida tugatishni ijro etish uchun ijro hujjatini tugatuvchiga yuboradi”;

v) 31, 32-bandlarida, 34-bandining toʻqqizinchi xatboshida, 40-bandining sakkizinchi xatboshida, 46-bandining beshinchi xatboshida, 1- va 2-ilovalardagi “Sud departamenti” soʻzlari “Byuro” soʻzi bilan almashtirilsin.

4. Oʻzbekiston Respublikasi Prezidentining 2013-yil 12-sentabrdagi PQ-2036-sonli qarori bilan tasdiqlangan Oʻzbekiston Respublikasi prokuraturasi organlari va muassasalarida xizmatni oʻtash toʻgʻrisidagi Nizomda:

a) mazmuni quyidagicha 5¹-bandi bilan toʻldirilsin:

“5¹. Oʻzbekiston Respublikasi Bosh prokuraturasi huzuridagi Majburiy ijro byurosida xizmatni oʻtash mazkur Nizomda nazarda tutilgan tartibga binoan Oʻzbekiston Respublikasi Bosh prokuraturasi huzuridagi Majburiy ijro byurosida xizmatni oʻtash toʻgʻrisidagi Nizom bilan tartibga solinadi”;

b) 55-bandi mazmuni quyidagicha xatboshi bilan toʻldirilsin:

“Oʻzbekiston Respublikasi Bosh prokuraturasi huzuridagi Majburiy ijro byurosi xodimlarining rotatsiya tartibi Byuro direktori tomonidan Oʻzbekiston Respublikasi Bosh prokurori bilan kelishilgan holda belgilanadi”.

5. Oʻzbekiston Respublikasi Prezidentining 2017-yil 27-fevraldagi PQ-2800-sonli qarori bilan tasdiqlangan forma kiyimida yurish nazarda tutilgan vazirliklar, idoralar va tashkilotlar roʻyxati 4-bandining “Vazirlik, idora va tashkilot nomi” grafasidagi “Adliya vazirligi huzuridagi Sud qarorlarini ijro etish, sudlarni moddiy-texnika jihatidan va moliyaviy taʼminlash departamenti” soʻzlari “Oʻzbekiston Respublikasi Bosh prokuraturasi huzuridagi Majburiy ijro byurosi” soʻzlari bilan almashtirilsin.

6. Oʻzbekiston Respublikasi Prezidentining 2017-yil 14-martdagi PQ-2833-sonli qarori bilan tasdiqlangan Voyaga yetmaganlar ishlari boʻyicha idoralararo komissiyalar toʻgʻrisidagi Nizomning 26-bandi toʻrtinchi xatboshidagi “sud” soʻzi “davlat” soʻzi bilan almashtirilsin.

1. Oʻzbekiston Respublikasi Prezidentining “Oʻzbekiston Respublikasi Adliya vazirligi huzuridagi Sud qarorlarini ijro etish, sudlar faoliyatini moddiy-texnika jihatidan va moliyaviy taʼminlash departamenti faoliyatini yanada takomillashtirish chora-tadbirlari toʻgʻrisida” 2012-yil 29-dekabrdagi PQ-1900-sonli qarori.

2. Oʻzbekiston Respublikasi Prezidentining “Toifalashtirilgan sud ijrochilarining tuman (shahar) boʻlimlari roʻyxatiga oʻzgartirish kiritish toʻgʻrisida” 2014-yil 9-sentabrdagi PQ-2234-sonli qarori.