LexUZ sharhi
Mazkur qaror O‘zbekistan Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
O‘zbekiston Respublikasi Prezidentining 1999-yil 7-iyuldagi F-1030-son farmoyishi bilan tashkil etilgan respublika komissiyasi tomonidan vazirliklar, idoralar va boshqa respublika organlari xodimlarining chet el xizmat safarlariga borishini o‘rganish materiallari xizmat safarlari natijalari O‘zbekistonning tashqi siyosiy va tashqi iqtisodiy aloqalari yanada rivojlanishiga, iqtisodiyotda tarkibiy o‘zgartirishlarni amalga oshirishga, investitsiyalar va zamonaviy texnologiyalarni jalb etishga, O‘zbekiston Respublikasining jahon hamjamiyatidagi mavqeyini mustahkamlashga ko‘maklashganligidan dalolat bermoqda.
Shu bilan birga bir qancha davlat-aksiyadorlik kompaniyalari, uyushmalar va xo‘jalik birlashmalarida o‘tkazilgan tekshirishlar natijasida rahbarlar va mutaxassislarning chetga chiqishi qoidalari qo‘pol ravishda buzilishi, valyuta mablag‘laridan noo‘rin foydalanish, xizmat safarlari natijalari samarali qo‘llanilishi ustidan nazorat qilmaslik hollari aniqlandi.
Xorijiy mamlakatlarga xizmat safarlariga borishni yanada tartibga solish va ularning natijalarini samarali qo‘llash ustidan nazoratni kuchaytirish maqsadida Vazirlar Mahkamasi qaror qiladi:
1. Vazirliklar, idoralar va boshqa respublika organlari xodimlarining chet el xizmat safarlariga borishining asoslanganligini tekshirish bo‘yicha respublika komissiyasi tomonidan tayyorlangan ma’lumotnoma ma’lumot uchun qabul qilinsin va mavjud kamchiliklarni bartaraf etish yuzasidan amaliy chora-tadbirlar ko‘rish uchun Vazirlar Mahkamasi Komplekslariga, vazirliklar va idoralarga, Qoraqalpog‘iston Respublikasi Vazirlar Kengashiga, viloyatlar va Toshkent shahar hokimliklariga yuborilsin.
2. “O‘zbekiston temir yo‘llari” davlat-aksiyadorlik kompaniyasi, Tovar ishlab chiqaruvchilar va tadbirkorlar palatasi, “Yog‘moytamakisanoat” uyushmasi, Davlat mulki qo‘mitasi va Olmaliq kon-metallurgiya kombinati rahbarlari tomonidan asoslanmagan ravishda chet el xizmat safarlariga borishlarga yo‘l qo‘yilganligi, xizmat safarlari natijalari tahlil qilinmayotganligi va ular samaradorligiga qat’iy baho berilmayotganligi qayd etilsin. Chet el xizmat safarlarini rejalashtirishda respublika iqtisodiyotini rivojlantirishning ustuvor yo‘nalishlarini amalga oshirish hamda tarmoqning aniq muammolarini hal etish bilan bog‘liq bo‘lgan masalalarni amaliy hal etishga zarur e’tibor berilmayapti.
3. Davlat intizomini va chet elga chiqishning belgilangan tartibini qo‘pol ravishda buzganligi, xizmat mavqeyini suiiste’mol qilganligi va chet elda xizmat safarida bo‘lish davrida yo‘l qo‘ygan shaxsiy nokamtarligi uchun O‘zbekiston Respublikasi Davlat geologiya qo‘mitasi raisi T.Sh. Shoyoqubov va Davlat geologiya qo‘mitasi raisining birinchi o‘rinbosari G.A. Abdurahmonovning, “O‘zbekiston temir yo‘llari” davlat-aksiyadorlik kompaniyasi raisi N.E. Ermetovning bundan buyon egallab turgan lavozimlarida qolishi maqsadga muvofiq emas deb hisoblansin.
O‘zbekiston Respublikasi Prezidenti I.A. Karimovdan ularni egallab turgan lavozimlaridan ozod qilish to‘g‘risidagi masalani ko‘rib chiqish iltimos qilinsin.
4. Olmaliq kon-metallurgiya kombinati bosh direktori V.N. Sigedin va “Yog‘moytamakisanoat” uyushmasi raisi A.B. Jamolov ular tomonidan mansabdor shaxslarning asossiz ravishda chet elga xizmat safarlariga borishiga yo‘l qo‘yilganligi va valyuta mablag‘laridan noo‘rin foydalanilganligi uchun ogohlantirilsin.
Tovar ishlab chiqaruvchilar va tadbirkorlar palatasi raisi M.A. Sobirovning e’tibori mansabdor shaxslarning asossiz ravishda chet el xizmat safarlariga borishlari va ularning samaradorligi ustidan zarur nazoratning yo‘qligiga qaratilsin.
5. Vazirlar, davlat qo‘mitalari raislari, idoralarning rahbarlari, Qoraqalpog‘iston Respublikasi Vazirlar Kengashi Raisi, viloyatlar va shaharlar hokimlari chet el xizmat safarlariga borishning asoslanganligi va samaradorligi, shuningdek valyuta mablag‘laridan samarali foydalanilishi va ular boshchilik qilayotgan tashkilotlar mansabdor shaxslarining safarlar yakunlari bo‘yicha o‘z vaqtida hisobotlar taqdim etishi uchun shaxsan javob berishlari to‘g‘risida ogohlantirilsin.
6. Vazirliklar, idoralar va xo‘jalik birlashmalari rahbarlarining chet el xizmat safarlariga borishlari asoslanganligi va samaradorligi uchun shaxsiy mas’uliyat Bosh vazirning tegishli o‘rinbosarlari — O‘zbekiston Respublikasi Vazirlar Mahkamasi Komplekslari rahbarlariga yuklansin.
7. Belgilansinki, vazirliklar, idoralar, boshqa respublika organlari rahbarlari, rahbarlarning o‘rinbosarlari va ularga tenglashtirilgan shaxslarning chet el xizmat safarlariga chiqishi, ularning maqomi va xizmat safari maqsadidan qat’i nazar, O‘zbekiston Respublikasi Prezidenti Devoni yoki Vazirlar Mahkamasi bilan yozma shaklda kelishilishi majburiydir.
Birinchi o‘rinbosardan boshlab barcha mansabdor shaxslarning xorijiy safarga chiqish reja-topshiriqlari vazirlik (idora) rahbari tomonidan majburiy tasdiqlanishi amaliyotga kiritilsin.
Keyingi tahrirga qarang.
8. Vakolatxonalarda ishlash uchun yoki chet el xizmat safariga borishda vazirliklar va idoralarning mansabdor shaxslari muayyan mamlakatga kelgach O‘zbekiston Respublikasi elchixonasi (konsulligi)ni (borgan mamlakatida ular mavjud bo‘lgan taqdirda) xizmat safari maqsadi va muddatlari to‘g‘risida majburiy tartibda xabardor qilishi zarurligi e’tirof etilsin.
Vazirliklar, idoralar va boshqa respublika organlari rahbarlari chet el xizmat safaridan qaytganlardan keyin majburiy tartibda bir hafta muddatda Kompleks rahbari — O‘zbekiston Respublikasi Bosh vaziri o‘rinbosariga, O‘zbekiston Respublikasi Tashqi ishlar vazirligi va Tashqi iqtisodiy aloqalar vazirligiga, respublikaning tashqi iqtisodiy aloqalari istiqbollarini tahlil qilish uchun ma’lumotlar bazasini shakllantirish maqsadida, safar va erishilgan natijalar to‘g‘risidagi qisqa hisobotlar nusxalarini topshirishlari kerak.
Keyingi tahrirga qarang.
Keyingi tahrirga qarang.
9. O‘zbekiston Respublikasi Moliya vazirligi Markaziy bank va Tashqi ishlar vazirligi bilan birgalikda O‘zbekiston Respublikasi tashqarisiga xizmat safari xarajatlari uchun mablag‘lar berish tartibini va chet elda xorijiy valyutadagi mablag‘larni sarflash normalari (ovqatlanish va yashash uchun)ni, ularni bo‘linadigan mamlakat shart-sharoitlariga muvofiqlashtirishni va avvalo “O‘zbekiston havo yo‘llari” milliy aviatsiya kompaniyasi yo‘nalishlaridan foydalanishni nazarda tutgan holda, bir oy muddatda qayta ko‘rib chiqsin va tasdiqlasin.
10. O‘zbekiston Respublikasi Tashqi ishlar vazirligi Tashqi iqtisodiy aloqalar vazirligi, Moliya vazirligi va Adliya vazirligi bilan birgalikda O‘zbekiston Respublikasining chet eldagi vakolatxonalari faoliyati tartibi to‘g‘risidagi nizomni ikki oy muddatda ishlab chiqsin, unda mutaxassislarni xizmat safariga yuborish muddatlari va ularni almashtirish tartibini nazarda tutsin hamda tasdiqlash uchun belgilangan tartibda Vazirlar Mahkamasiga kiritsin.
LexUZ sharhi
Qarang: O‘zbekiston Respublikasi Vazirlar Mahkamasining 2000-yil 24-martdagi 102-sonli “O‘zbekiston Respublikasining chet ellardagi vakolatxonalari to‘g‘risidagi nizomlarni tasdiqlash haqida”gi qarori.