Oʻzbekiston Respublikasi Prezidentining “Oʻzbekiston Respublikasi Avtomobil yoʻllari davlat qoʻmitasi va Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasi faoliyatlarini tashkil etish toʻgʻrisida” 2017-yil 14-fevraldagi PQ-2776-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasi toʻgʻrisidagi nizom ilovaga muvofiq tasdiqlansin.

2. Vazirliklar va idoralar bir oy muddatda oʻzlarining idoraviy normativ-huquqiy hujjatlarini ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov zimmasiga yuklansin.

1. Ushbu Nizom Oʻzbekiston Respublikasi Vazirlar Mahkamasi huzuridagi Respublika yoʻl jamgʻarmasining (keyingi oʻrinlarda Jamgʻarma deb ataladi) maqsadi, asosiy vazifalari va funksiyalarini, boshqarish tartibini, shuningdek mablagʻlarni shakllantirish va sarflash tartibini belgilaydi.

2. Jamgʻarma oʻz faoliyatini Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga, Oʻzbekiston Respublikasining boshqa normativ-huquqiy hujjatlariga, shuningdek Jamgʻarmani boshqarish kengashining qarorlariga muvofiq amalga oshiradi.

3. Jamgʻarma oʻz faoliyatida Oʻzbekiston Respublikasi Vazirlar Mahkamasining Hududlarni kompleks rivojlantirish va kommunal soha, transport, kapital qurilish, qurilish industriyasi masalalari kompleksiga boʻysunadi.

4. Jamgʻarma yuridik shaxs hisoblanadi, mustaqil balansga, Oʻzbekiston Respublikasi Moliya vazirligining Gʻaznachiligida gʻaznachilik hisob raqamlariga, tijorat banklarida hisob raqamlariga, Oʻzbekiston Respublikasi Markaziy bankida xorijiy valyutadagi hisob raqamlariga, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga ega.

5. Jamgʻarmaning daromadlari va xarajatlari mablagʻlarni shakllantirish va sarflashning maqsadli yoʻnaltirilganligi saqlanib qolgan holda Oʻzbekiston Respublikasining konsolidatsiyalashgan budjeti tarkibiga kiradi, shuningdek Jamgʻarmaning maxsus yigʻma balansida aks ettiriladi.

6. Jamgʻarma joylashgan joy (pochta manzili): Oʻzbekiston Respublikasi, Toshkent shahri, Istiqlol koʻchasi, 29.

7. Umumiy foydalanishdagi avtomobil yoʻllari tarmogʻini rivojlantirish va takomillashtirish dasturlarini (loyihalarini) hamda ularning zarur tarzdagi texnik holatiga va oʻtkazish qobiliyatiga erishishga yoʻnaltirilgan tadbirlarni moliyalashtirish uchun mablagʻlarni jamlash va ulardan samarali foydalanish Jamgʻarma faoliyatining maqsadi hisoblanadi.

8. Quyidagilar Jamgʻarmaning asosiy vazifalari hisoblanadi:

Respublika yoʻl jamgʻarmasi mablagʻlari tushumi hamda sarfining yillik va choraklik hisobotlarini shakllantirish;

yoʻl xoʻjaligi obyektlarini qurish, rekonstruksiya qilish, taʼmirlash va jihozlashning nomma-nom roʻyxatlarini belgilangan tartibda kelishish;

umumiy foydalanishdagi avtomobil yoʻllaridan foydalanish va ularni saqlash xarajatlari smetasini roʻyxatdan oʻtkazish;

umumiy foydalanishdagi avtomobil yoʻllarini qurish, rekonstruksiya qilish, taʼmirlash, jihozlash hamda ulardan foydalanish borasidagi tadbirlarni tasdiqlangan xarajatlarga muvofiq moliyalashtirish.

9. Yuklangan vazifalardan kelib chiqib Jamgʻarma quyidagi funksiyalarni bajaradi:

a) Respublika yoʻl jamgʻarmasi mablagʻlari tushumi hamda sarfining yillik va choraklik hisobotlarini shakllantirish sohasida:

Jamgʻarma daromadlari va xarajatlarining har yillik balanslari loyihalarini Oʻzbekiston Respublikasining konsolidatsiyalashgan budjeti loyihasiga kiritish uchun ishlab chiqadi va belgilangan muddatlarda Oʻzbekiston Respublikasi Moliya vazirligiga taqdim etadi;

xarajatlarning tasdiqlangan parametrlarini Oʻzbekiston Respublikasi Avtomobil yoʻllari davlat qoʻmitasiga, Yoʻl-qurilish ishlari sifatini nazorat qilish davlat inspeksiyasiga yetkazadi;

boʻlajak yilga Jamgʻarma daromadlari parametrlarini Oʻzbekiston Respublikasi Moliya vazirligi bilan kelishgan holda yillar va oylarga boʻlib chiqib Oʻzbekiston Respublikasi Davlat soliq qoʻmitasiga va Davlat bojxona qoʻmitasiga yetkazadi;

tushish manbalari va respublika mintaqalari boʻyicha Jamgʻarma daromadlari, shuningdek Jamgʻarma xarajatlarining asosiy yoʻnalishlari boʻyicha hisobini yuritadi;

Oʻzbekiston Respublikasi Davlat soliq qoʻmitasi, Davlat bojxona qoʻmitasi va Ichki ishlar vazirligi bilan birgalikda Jamgʻarmaga mablagʻlarni yigʻish va tushumlarning toʻliqligini nazorat qilish ishlarini olib boradi;

daromadlar tushumi prognozi bajarilishini tahlil qiladi hamda Oʻzbekiston Respublikasi Davlat soliq qoʻmitasi va Davlat bojxona qoʻmitasi bilan birgalikda daromadlar tushumi prognozi bajarilishiga salbiy taʼsir koʻrsatgan omillarni bartaraf etish choralarini koʻradi;

Jamgʻarmaning daromadlari va xarajatlari boʻyicha normativ-huquqiy hujjatlar loyihalarini ishlab chiqadi va tegishli organlarga kiritadi;

Jamgʻarma daromadlari shakllantirilishi tartibini takomillashtirish va samaradorligini oshirish boʻyicha aniq maqsadga yoʻnaltirilgan ishlarni amalga oshiradi;

b) yoʻl xoʻjaligi obyektlarini qurish, rekonstruksiya qilish, taʼmirlash va jihozlashning nomma-nom roʻyxatlarini belgilangan tartibda kelishish sohasida:

loyiha-qidiruv ishlari, umumiy foydalanishdagi avtomobil yoʻllarini qurish, rekonstruksiya qilish va mukammal taʼmirlashning manzilli roʻyxatlarini kelishadi;

umumiy foydalanishdagi avtomobil yoʻllarini saqlash va joriy taʼmirlash uchun xarid qilinadigan texnologik asbob-uskunalar, texnika va mashina-mexanizmlar roʻyxatini kelishadi;

v) umumiy foydalanishdagi avtomobil yoʻllaridan foydalanish va ularni saqlash xarajatlari smetasini roʻyxatdan oʻtkazish sohasida:

Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish davlat inspeksiyasini, Oʻzbekiston Respublikasi Avtomobil yoʻllari davlat qoʻmitasining markaziy apparatini, Qoraqalpogʻiston Respublikasi va viloyatlar avtomobil yoʻllari hududiy bosh boshqarmalarini saqlashga xarajatlar smetasini roʻyxatdan oʻtkazadi;

umumiy foydalanishdagi avtomobil yoʻllarini saqlashga va joriy taʼmirlashga, shu jumladan Qoraqalpogʻiston Respublikasi va viloyatlar avtomobil yoʻllari hududiy bosh boshqarmalari boʻyicha tuman yoʻllardan foydalanish korxonalarini, yoʻllardan muntazam foydalanish korxonalarini va koʻpriklardan foydalanish korxonalarini saqlashga xarajatlarning yigʻma smetalarini roʻyxatdan oʻtkazadi;

g) umumiy foydalanishdagi avtomobil yoʻllarini qurish, rekonstruksiya qilish, taʼmirlash, jihozlash hamda ulardan foydalanish borasidagi tadbirlarni tasdiqlangan xarajatlarga muvofiq moliyalashtirish sohasida:

umumiy foydalanishdagi avtomobil yoʻllarini qurish, rekonstruksiya qilish, mukammal taʼmirlashning belgilangan tartibda tasdiqlangan manzilli roʻyxatlari asosida Jamgʻarma xarajatlarini, shuningdek umumiy foydalanishdagi avtomobil yoʻllarini saqlash va joriy taʼmirlashga xarajatlarning yigʻma smetalarini moliyalashtiradi;

Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining xalqaro va xorijiy moliya institutlarining qarzlarini jalb etish boʻyicha qarorlariga muvofiq amaldagi investitsiya loyihalari boʻyicha ijro etuvchi organ sifatida ish koʻradi.

10. Jamgʻarma quyidagi huquqlarga ega:

a) qonun hujjatlarida belgilangan tartibda tashqi iqtisodiy faoliyatni amalga oshirish;

b) Jamgʻarmani boshqarish kengashi tomonidan belgilanadigan milliy valyutadagi boʻsh mablagʻlarni Oʻzbekiston Respublikasi tijorat banklaridagi depozitlarga joylashtirish;

v) Oʻzbekiston Respublikasi Markaziy banki bilan tuzilgan bosh bitim asosida xorijiy valyutadagi boʻsh mablagʻlarni xorijiy banklardagi depozitlarda joylashtirish;

g) Oʻzbekiston Respublikasi Prezidentining va Oʻzbekiston Respublikasi Vazirlar Mahkamasining qarorlariga muvofiq xalqaro va xorijiy moliya institutlarining qarzlarini jalb etgan holda amaldagi investitsiya loyihalarini amalga oshirish boʻyicha Jamgʻarma huzuridagi boʻlinmalar faoliyatini tashkil etish;

d) Jamgʻarma faoliyati bilan bogʻliq shartnomalar tuzish;

e) quyidagilardan:

Oʻzbekiston Respublikasi Davlat soliq qoʻmitasi va Davlat bojxona qoʻmitasidan — ajratmalar hisoblanganligi va tushumi, ortiqcha toʻlangan summalar qaytarilishi summasi, Jamgʻarmaga toʻlovlar boʻyicha nedoimkalar miqdori toʻgʻrisidagi tezkor hisobotni, har oylik hisobotlarni, maʼlumotlarni va boshqa maʼlumotlarni olish;

tijorat banklaridan — belgilangan tartibda Jamgʻarma depozitlari harakatlari toʻgʻrisidagi maʼlumotlarni;

Oʻzbekiston Respublikasi Avtomobil yoʻllari davlat qoʻmitasi va Jamgʻarma mablagʻlari sarfi boʻyicha buyurtmachilardan — Jamgʻarma mablagʻlaridan foydalanish yuzasidan buxgalteriya va statistika axborotini olish;

Jamgʻarma qonun hujjatlariga muvofiq boshqa huquqlarga ham ega boʻlishi mumkin.

11. Jamgʻarma:

Oʻzbekiston Respublikasi Davlat soliq qoʻmitasi va Davlat bojxona qoʻmitasi bilan birgalikda tushumlar turlari va respublika mintaqalari boʻyicha Jamgʻarmaning daromadlari prognozi bajarilishining holatini tahlil qilishga va daromadlarning normal tushishiga salbiy taʼsir koʻrsatgan aniqlangan omillar asosida ularni bartaraf etish yuzasidan birgalikda choralar koʻrishga;

avtomobil yoʻllari tarmogʻini qurish, rekonstruksiya qilish, taʼmirlash va saqlash boʻyicha xarajatlarni oʻz vaqtida moliyalashtirishda, respublikaning avtomobil yoʻllari tarmogʻini rivojlantirish va takomillashtirish boʻyicha yagona investitsion va tashqi iqtisodiy faoliyatni amalga oshirishda Oʻzbekiston Respublikasi Avtomobil yoʻllari davlat qoʻmitasiga koʻmaklashishi shart.

12. Jamgʻarma daromadlari quyidagi manbalar hisobiga shakllantiriladi:

Oʻzbekiston Respublikasining Soliq kodeksiga muvofiq Jamgʻarmaga toʻlanadigan majburiy ajratmalar va yigʻimlar;

xalqaro moliya institutlari va boshqa xorijiy donorlarning grantlari;

xayriya ehsonlari;

Jamgʻarmaning milliy valyutadagi vaqtincha boʻsh mablagʻlarini Oʻzbekiston Respublikasining tijorat banklaridagi depozitlarda va xorijiy valyutani xorijiy banklarning depozitlarida joylashtirishdan tushgan daromadlar, shuningdek qonun hujjatlarida taqiqlanmagan boshqa tushumlar.

Jamgʻarmaning vaqtincha boʻsh mablagʻlarini tijorat banklarida joylashtirishdan foizlar tarzida olinadigan daromadlarga soliq solinmaydi.

13. Jamgʻarmaga majburiy ajratmalar va yigʻimlarni toʻlash tartibi va ularning stavkalari miqdorlari har yili Davlat budjeti tasdiqlanishi bilan bir vaqtda belgilanadi va Oʻzbekiston Respublikasi Davlat soliq qoʻmitasi tomonidan toʻlovchilarga yetkaziladi.

14. Jamgʻarmaga tushumlar Oʻzbekiston Respublikasi Moliya vazirligining axborot tizimida ochilgan Jamgʻarma daromadlari boʻyicha tegishli gʻaznachilik hisob raqamlari (2003 gʻaznachilik hisob raqami) orqali Oʻzbekiston Respublikasi Markaziy bankining Toshkent shahar bosh boshqarmasining Hisob-kitob-kassa markazida ochilgan yagona gʻaznachilik hisob raqamiga oʻtkaziladi.

15. Jamgʻarmaga mablagʻlarni yigʻish va tushumlarning toʻliqligini nazorat qilishni taʼminlash Oʻzbekiston Respublikasi Davlat soliq qoʻmitasi, Davlat bojxona qoʻmitasi va Ichki ishlar vazirligi tomonidan amalga oshiriladi.

16. Jamgʻarma mablagʻlari Oʻzbekiston Respublikasi Moliya vazirligining Gʻaznachiligida va uning hududiy boʻlinmalarida:

umumiy foydalanishdagi avtomobil yoʻllarini qurish, loyihalash, rekonstruksiya qilish, taʼmirlash, saqlashga, shu jumladan jihozlashga (qurish, rekonstruksiya qilish, mukammal taʼmirlash uchun texnologik asbob-uskunalar, texnika va mashina-mexanizmlar xarid qilish);

Jamgʻarmaning Ijro etuvchi direksiyasini, Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish davlat inspeksiyasini, Oʻzbekiston Respublikasi Avtomobil yoʻllari davlat qoʻmitasining markaziy apparatini, Qoraqalpogʻiston Respublikasi va viloyatlar hududiy avtomobil yoʻllari bosh boshqarmalarini, tuman yoʻllardan foydalanish korxonalarini, yoʻllardan muntazam foydalanish korxonalarini va koʻpriklardan foydalanish korxonalarini saqlashga xizmat koʻrsatiladigan shaxsiy gʻaznachilik hisob raqamlari orqali sarflanadi.

17. Jamgʻarma mablagʻlarini sarflash boʻyicha:

umumiy foydalanishdagi avtomobil yoʻllarini qurish, loyihalashtirish, qurish, rekonstruksiya qilish va taʼmirlash yuzasidan — “Umumiy foydalanishdagi avtomobil yoʻllarini qurish va rekonstruksiya qilish direksiyasi” DUK;

xoʻjaliklararo qishloq avtomobil yoʻllarini, shaharlar, shahar posyolkalari, qishloqlar va ovullar koʻchalarini loyihalashtirish, qurish, rekonstruksiya qilish va taʼmirlash yuzasidan — Qoraqalpogʻiston Respublikasi va viloyatlar hududiy avtomobil yoʻllari bosh boshqarmalari huzuridagi “Umumiy foydalanishdagi avtomobil yoʻllarini qurish va rekonstruksiya qilish direksiyasi” DUK;

umumiy foydalanishdagi avtomobil yoʻllarini saqlash, joriy taʼmirlash, ularda favqulodda vaziyatlarning oldini olish va oqibatlarini tugatish ishlarini amalga oshirish, umumiy foydalanishdagi avtomobil yoʻllarini foydalanish ehtiyojlari uchun jihozlash (texnologik asbob-uskunalar, texnika va mashina-mexanizmlar xarid qilish) yuzasidan — Oʻzbekiston Respublikasi Avtomobil yoʻllari davlat qoʻmitasi va Qoraqalpogʻiston Respublikasi, viloyatlar hududiy avtomobil yoʻllari bosh boshqarmalari buyurtmachilar hisoblanadilar.

Oʻzbekiston Respublikasi Prezidenti va Oʻzbekiston Respublikasi Vazirlar Mahkamasi, Jamgʻarmani boshqarish kengashi qarori bilan Jamgʻarma mablagʻlari sarfi boʻyicha buyurtmachi funksiyasi boshqa tashkilotlarga ham yuklanishi mumkin.

18. Jamgʻarmaning valyuta mablagʻlari belgilangan tartibda:

umumiy foydalanishdagi avtomobil yoʻllarini qurish, rekonstruksiya qilish va taʼmirlash uchun import boʻyicha yoʻl texnikasi, asbob-uskunalar, texnologiyalar va materiallar xarid qilish boʻyicha Avtomobil yoʻllari davlat qoʻmitasi va hududiy bosh boshqarmalarning xarajatlarini moliyalashtirishga;

Oʻzbekiston Respublikasi Avtomobil yoʻllari davlat qoʻmitasi, uning boʻlinmalari, Vazirlar Mahkamasi huzuridagi Yoʻl-qurilish ishlari sifatini nazorat qilish davlat inspeksiyasi va Jamgʻarmaning malakali kadrlarini chet elda yoki xorijiy mutaxassislarni respublikaga taklif qilib tayyorlashga;

umumiy foydalanishdagi avtomobil yoʻllarini qurish, rekonstruksiya qilish va taʼmirlash uchun Jamgʻarma tomonidan jalb etilgan xorijiy qarzlarni qaytarishga;

Oʻzbekiston Respublikasi Moliya vazirligi bilan kelishgan holda xorijiy valyutani milliy valyutaga konvertatsiya qilish yoʻli bilan umumiy foydalanishdagi avtomobil yoʻllarini qurish, rekonstruksiya qilish va taʼmirlashni moliyalashtirishga sarflanadi.

19. Avtomobil yoʻllarini joriy taʼmirlash va saqlash bilan bogʻliq xarajatlarni moliyalashtirishga Jamgʻarmaning maxsus gʻaznachilik hisob raqamidan tushayotgan pul mablagʻlarini oʻtkazish va ulardan maqsadli foydalanish uchun tegishli foydalanish korxonalari tomonidan xizmat koʻrsatiladigan banklarda 22626 — “Korxonalar va tashkilotlarning maqsadli mablagʻlari” maxsus moliyalashtirish hisob raqamlari ochiladi.

umumiy foydalanishdagi avtomobil yoʻllarini joriy taʼmirlash va saqlash bilan bogʻliq xarajatlarni moliyalashtirish rejalashtirilgan choraklik hajmning 15 foizi miqdorida avans berish yoʻli bilan amalga oshiriladi, keyinchalik tasdiqlangan xarajatlar smetasi doirasida ajratilgan avans toʻlovlari har oyda chegirib tashlangan holda amalda bajarilgan ishlar oyma-oy moliyalashtiriladi.

20. Jamgʻarma mablagʻlari hisobiga umumiy foydalanishdagi avtomobil yoʻllarini qurish, rekonstruksiya qilish, mukammal va joriy taʼmirlashni moliyalashtirish belgilangan tartibda kelishilgan va tasdiqlangan manzilli roʻyxatlar va xarajatlar smetalari asosida har bir obyekt boʻyicha qatʼiyan mablagʻlar limitlari doirasida amalga oshiriladi.

Jamgʻarmaning umumiy foydalanishdagi avtomobil yoʻllarini saqlashga yoʻnaltiriladigan mablagʻlaridan Jamgʻarma bilan kelishuv boʻyicha Oʻzbekiston Respublikasi Avtomobil yoʻllari davlat qoʻmitasi tomonidan tasdiqlanadigan xarajatlarning yigʻma smetalari asosida shakllantiriladigan xarajatlar smetalariga qatʼiy amal qilib foydalaniladi.

21. Avtomobil yoʻllarini va boshqa obyektlarni qurish, rekonstruksiya qilish va mukammal taʼmirlash boʻyicha ishlarni bajarishga buyurtmachi bilan pudrat tashkiloti oʻrtasida tuzilgan shartnomada hamda unga ilova qilinadigan moliyalashtirish jadvalida:

ishlar hajmlari bajarilishi mobaynida moliya yili oxirigacha har oyda chegirib tashlangan holda joriy (prognozlashtirilayotgan) yilga ishlarning shartnoma qiymatining kamida 15 foizi miqdorida avans toʻlovlari;

ajratilgan avans toʻlovlari har oyda chegirib tashlangan holda ishlar qiymatining kamida 95 foizi miqdorida amalda bajarilgan ishlardan kelib chiqib joriy oyma-oy moliyalashtirish;

shartnomada qayd etilgan kafolat muddati tamom boʻlgandan keyin besh foiz miqdorigacha qolgan qismini toʻlash nazarda tutilishi kerak.

22. Jamgʻarma mablagʻlari hisobiga amalga oshiriladigan avtomobil yoʻllarini qurish, rekonstruksiya qilish, saqlash va joriy taʼmirlash uchun texnologik asbob-uskunalar, texnika va mashina-mexanizmlar xarid qilish belgilangan tartibda Oʻzbekiston Respublikasining Investitsiya dasturiga kiritiladi.

23. Tasdiqlangan loyiha-smeta hujjatlari va ular boʻyicha tegishli ijobiy ekspert xulosalari mavjud boʻlishi obyektlarni yoʻl xoʻjaligi obyektlarini qurish, rekonstruksiya qilish va mukammal taʼmirlashning manzilli roʻyxatlariga kiritishning majburiy sharti hisoblanadi.

24. Umumiy foydalanishdagi avtomobil yoʻllaridagi favqulodda vaziyatlarning oldini olish va ularning oqibatlarini tugatish boʻyicha ishlarni moliyalashtirish uchun zaxirada nazarda tutilgan Jamgʻarma mablagʻlarini sarflash Jamgʻarmani boshqarish kengashi tomonidan belgilangan tartibda amalga oshiriladi.

25. Jamgʻarmaning valyuta mablagʻlari hisobiga toʻlanadigan yoʻl-taʼmirlash va qurilish texnikasi, asbob-uskunalar va ularga ehtiyot qismlarni import qilishga barcha kontraktlar majburiy tartibda Oʻzbekiston Respublikasi Investitsiyalar boʻyicha davlat qoʻmitasida qonun hujjatlarida belgilangan tartibda roʻyxatdan oʻtkazilishi kerak.

26. Jamgʻarmaning mablagʻlari xatlanmaydi, olib qoʻyilmaydi yoki umumiy foydalanishdagi avtomobil yoʻllarini saqlash, taʼmirlash, rekonstruksiya qilish va qurish bilan bogʻliq boʻlmagan ehtiyojlarga sarflanmaydi, qonun hujjatlarida nazarda tutilgan hollar bundan mustasno. Joriy yilda foydalanilmaydigan mablagʻlar olib qoʻyilmaydi va maqsadli vazifaga muvofiq keyingi davrda sarflanadi.

27. Manbalar va boʻlajak yilda foydalanish yoʻnalishlari boʻyicha Jamgʻarmaning daromadlari va xarajatlari prognozi Oʻzbekiston Respublikasi Davlat soliq qoʻmitasi bilan kelishgan holda Moliya vazirligi tomonidan tasdiqlangan Jamgʻarmaning daromadlari va xarajatlari tasnifi asosida ishlab chiqiladi.

28. Oʻzbekiston Respublikasi Avtomobil yoʻllari davlat qoʻmitasi va Jamgʻarma mablagʻlari sarfi boʻyicha buyurtmachilar har yili 1-iyundan kech boʻlmagan muddatda Jamgʻarmaga zarur maʼlumotlarni taqdim etadilar, ular asosida Jamgʻarmaning ijro etuvchi direksiyasi har yili 15-iyundan kech boʻlmagan muddatda Jamgʻarmani boshqarish kengashi bilan kelishgan holda joriy yilga kutilayotgan ijroni va kelgusi yilga Jamgʻarma xarajatlari prognozini belgilaydi.

29. Kelgusi yilga tushumlar manbalari boʻyicha daromadlar prognozi:

Qoraqalpogʻiston Respublikasi, viloyatlar va Toshkent shahri boʻyicha oldingi yilda Jamgʻarmaga mablagʻlarning amaldagi tushumi va daromadlar manbalari boʻyicha joriy yilda kutilayotgan tushumlar;

Qoraqalpogʻiston Respublikasi, viloyatlar va Toshkent shahri boʻyicha Jamgʻarmaga ajratmalar va yigʻimlar boʻyicha hisobot moliya yili oxirida yuridik shaxslarning kreditorlik qarzlari hisobga olingan holda Oʻzbekiston Respublikasi Davlat soliq qoʻmitasi bilan kelishgan holda Oʻzbekiston Respublikasining maqroiqtisodiy koʻrsatkichlari asosida bevosita Jamgʻarma tomonidan ishlab chiqiladi.

30. Foydalanishning asosiy yoʻnalishlari va respublika hududlari boʻyicha kelgusi yilga taqdim etiladigan xarajatlar prognozi oldingi yilda haqiqatda foydalanilgan mablagʻlar va asosiy yoʻnalishlar (avtomobil yoʻllarini loyihalashtirish, qurish, rekonstruksiya qilish, taʼmirlash va saqlash) hududlar boʻyicha joriy yilga tasdiqlangan prognozlar bilan taqqoslanib joriy yilning birinchi choragida kutilayotgan mablagʻlardan foydalanish hisobga olingan holda Jamgʻarma tomonidan Oʻzbekiston Respublikasi Avtomobil yoʻllari davlat qoʻmitasi va Jamgʻarma mablagʻlari sarfi boʻyicha buyurtmachilar bilan birgalikda belgilanadi. Bunda umumiy foydalanishdagi avtomobil yoʻllarida favqulodda vaziyatlarning oldini olish va oqibatlarini tugatish boʻyicha ishlarni moliyalashtirish uchun zaxira (xarajatlar yillik hajmining kamida 3 foizi miqdorida) hosil boʻlishi nazarda tutiladi.

31. Jamgʻarma ishlab chiqilgan kelgusi yilga daromadlar va xarajatlarning prognozini Oʻzbekiston Respublikasi Moliya vazirligiga joriy yilning 1-iyulidan kechikmay qonun hujjatlarida belgilangan muddatlarda taqdim etadi.

32. Jamgʻarma daromadlari va xarajatlarining aniqlashtirilgan prognozi Moliya vazirligi tomonidan Oʻzbekiston Respublikasi Vazirlar Mahkamasiga kelgusi yilga Oʻzbekiston Respublikasi Davlat budjetining asosiy parametrlari prognozi bilan bir vaqtda kiritiladi.

33. Oʻzbekiston Respublikasining Davlat budjeti Oʻzbekiston Respublikasi Oliy Majlisi palatalari tomonidan tasdiqlangandan, shuningdek kelgusi yilga Oʻzbekiston Respublikasi Davlat budjeti parametrlari toʻgʻrisidagi tegishli qaror qabul qilingandan keyin Jamgʻarma besh kun muddatda:

yil choraklari va hududlar boʻyicha boʻlib chiqqan holda kelgusi yilga Jamgʻarma daromadlarining tasdiqlangan asosiy parametrlarini — Oʻzbekiston Respublikasi Davlat soliq qoʻmitasiga va Davlat bojxona qoʻmitasiga;

yil choraklari va oylar boʻyicha boʻlib chiqqan holda kelgusi yilga Jamgʻarma xarajatlarining tasdiqlangan asosiy parametrlarini (yoʻnalishlar) yetkazadi.

34. Jamgʻarma Oʻzbekiston Respublikasi Davlat soliq qoʻmitasi bilan birgalikda daromadlarning tasdiqlangan parametrlari olingan kundan boshlab bir hafta muddatda chorakma-chorak boʻlib chiqib va respublika mintaqalari boʻyicha manbalar boʻyicha daromadlarning yillik prognozini belgilaydi va uni Oʻzbekiston Respublikasi Moliya vazirligi bilan kelishgan holda Qoraqalpogʻiston Respublikasi, viloyatlar va Toshkent shahri davlat soliq boshqarmalariga yetkazadi.

35. Jamgʻarma xarajatlari prognozi olingan kundan boshlab bir oy muddatda kelgusi yilga belgilangan tartibda:

a) Jamgʻarma mablagʻlarini sarflash boʻyicha buyurtmachilar:

Oʻzbekiston Respublikasi Iqtisodiyot vazirligi, Moliya vazirligi va Jamgʻarma bilan kelishilgan avtomobil yoʻllarini qurish va rekonstruksiya qilishning manzilli roʻyxatlarini va umumiy foydalanishdagi avtomobil yoʻllarini saqlash va joriy taʼmirlash uchun xarid qilinadigan texnologik asbob-uskunalar, texnika va mashina-mexanizmlar roʻyxatini;

Oʻzbekiston Respublikasi Avtomobil yoʻllari davlat qoʻmitasi va Jamgʻarma bilan kelishilgan umumiy foydalanishdagi avtomobil yoʻllarini mukammal taʼmirlash boʻyicha manzilli roʻyxatlarni;

Oʻzbekiston Respublikasi Avtomobil yoʻllari davlat qoʻmitasi va Jamgʻarma bilan kelishilgan umumiy foydalanishdagi avtomobil yoʻllarida favqulodda vaziyatlarning oldini olish va oqibatlarini tugatish boʻyicha ishlarni amalga oshirishning manzilli roʻyxatlarini;

avtomobil yoʻllarini qurish, rekonstruksiya qilish, mukammal taʼmirlash hamda umumiy foydalanishdagi avtomobil yoʻllarini saqlash va joriy taʼmirlash uchun xarid qilinadigan texnologik asbob-uskunalar, texnika va mashina-mexanizmlar boʻyicha xarajatlar smetasini;

umumiy foydalanishdagi avtomobil yoʻllarini saqlash va joriy taʼmirlashga, shu jumladan Qoraqalpogʻiston Respublikasi va viloyatlar avtomobil yoʻllari bosh boshqarmalari boʻyicha tuman yoʻllardan foydalanish korxonalarini, yoʻllardan muntazam foydalanish korxonalarini va koʻpriklardan foydalanish korxonalarini saqlashga xarajatlarning yigʻma smetalarini tasdiqlaydi;

b) Oʻzbekiston Respublikasi Avtomobil yoʻllari davlat qoʻmitasi Oʻzbekiston Respublikasi Avtomobil yoʻllari davlat qoʻmitasining markaziy apparatini, Qoraqalpogʻiston Respublikasi va viloyatlar hududiy avtomobil yoʻllari bosh boshqarmalarini, tuman yoʻllardan foydalanish korxonalarini, yoʻllardan muntazam foydalanish korxonalarini va koʻpriklardan foydalanish korxonalarini saqlashga xarajatlar smetalarini tasdiqlaydi;

v) Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish davlat inspeksiyasi Davlat inspeksiyasini saqlashga xarajatlar smetasini tasdiqlaydi;

g) Jamgʻarma xarajatlar smetalarini kelishadi va roʻyxatdan oʻtkazadi, shuningdek ularni tegishli shaxsiy gʻaznachilik hisob raqamiga kiritadi.

36. Umumiy foydalanishdagi avtomobil yoʻllarini saqlashga xarajatlarning tasdiqlangan yigʻma smetasi asosida Oʻzbekiston Respublikasi Avtomobil yoʻllari davlat qoʻmitasi va uning hududiy bosh boshqarmalari normativ mezonlarni qoʻllash yoʻli bilan va avtomobil yoʻllarining toifasi, ahamiyati va masofasiga qarab tegishli foydalanish korxonalari boʻyicha Jamgʻarmaning xarajatlari prognozini taqsimlaydi va ularga xizmat koʻrsatishga kontraktlar tuzadi.

37. Majburiy ajratmalarni hisoblab chiqish, hisob-kitobni taqdim etish va toʻlash tartibi Oʻzbekiston Respublikasining Soliq kodeksiga muvofiq amalga oshiriladi.

38. Xoʻjalik yurituvchi subyektlar tarkibiga kiradigan, yuridik shaxslar hisoblanmagan tarkibiy boʻlinmalar Jamgʻarmaga ajratmalarni tuman (shahar) davlat soliq xizmati organlarining gʻaznachilik hisob raqamlariga oʻtkazadilar, ular davlat soliq xizmati organlariga budjetga va Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga toʻlovlar boʻyicha hisob-kitoblarni taqdim etadilar.

39. Avtotransport vositalarini Oʻzbekiston Respublikasi Ichki ishlar vazirligi organlarida roʻyxatdan oʻtkazishda toʻlangan yigʻimlar boʻyicha ortiqcha toʻlangan summani qaytarish toʻlovchining arizasi asosida tuman (shahar) davlat soliq xizmati organining xulosasi va Oʻzbekiston Respublikasi Ichki ishlar vazirligining tegishli organi maʼlumotnomasi taqdim etilganda tegishli tuman (shahar) moliya organi tomonidan amalga oshiriladi. Qaytarish ariza berilgan kundan boshlab oʻttiz ish kuni mobaynida toʻlovchilarning mablagʻlari oʻtkazilgan tegishli tuman (shahar) davlat soliq xizmati organining gʻaznachilik hisob raqamidan toʻlovchining hisob raqamiga amalga oshiriladi.

Xorijiy avtotashuvchilar Oʻzbekiston Respublikasi hududiga kirishda va tranzit oʻtishda toʻlangan yigʻimlar boʻyicha ortiqcha toʻlangan summani qaytarish toʻlovchining ortiqcha toʻlov toʻgʻrisida tegishli bojxona organining va yigʻim toʻlangan xizmat koʻrsatuvchi bankning maʼlumotnomasi bilan tasdiqlangan arizasi asosida Jamgʻarma tomonidan toʻlovchining hisob-kitob raqamiga oʻtkaziladi.

40. Oʻzbekiston Respublikasi Davlat soliq qoʻmitasi har oyda belgilangan muddatlarda Jamgʻarmaning ijro etuvchi direksiyasiga Qoraqalpogʻiston Respublikasi, viloyatlar va Toshkent shahri boʻyicha hisobot oyidan keyingi oyning 1-kunidagi holat boʻyicha hisoblangan va tushgan toʻlovlar, shuningdek Jamgʻarmaga majburiy toʻlovlar turlari boʻyicha qarzdorlik toʻgʻrisidagi tezkor hisobotni taqdim etadi.

41. Jamgʻarmaga majburiy ajratmalar va yigʻimlar boʻyicha imtiyozlar Oʻzbekiston Respublikasining Soliq kodeksiga, boshqa qonunlarga va Oʻzbekiston Respublikasi Prezidentining qarorlariga muvofiq taqdim etiladi.

42. Jamgʻarmani boshqarish kengashi Jamgʻarmani boshqarishning yuqori organi hisoblanadi.

Jamgʻarmani boshqarish kengashi tarkibi Oʻzbekiston Respublikasi Prezidenti tomonidan tasdiqlanadi.

43. Jamgʻarmani boshqarish kengashi:

Jamgʻarma faoliyatining asosiy yoʻnalishlarini belgilaydi;

umumiy foydalanishdagi avtomobil yoʻllari tarmogʻini rivojlantirish va takomillashtirishning belgilangan tartibda tasdiqlangan dasturlaridan (loyihalaridan), shuningdek ularga kompleks xizmat koʻrsatishni, ularning zarur texnik holatini va oʻtkazish layoqatini taʼminlash tadbirlaridan kelib chiqib Jamgʻarmaning ijro etuvchi direksiyasi va Oʻzbekiston Respublikasi Avtomobil yoʻllari davlat qoʻmitasi, Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish davlat inspeksiyasining Jamgʻarma xarajatlarining asosiy yoʻnalishlari, mablagʻlardan foydalanish ustuvorliklari toʻgʻrisidagi takliflarini koʻrib chiqadi;

Jamgʻarma ijro etuvchi direksiyasining amalga oshiriladigan ishlar toʻgʻrisidagi hisobotlarini eshitadi;

Oʻzbekiston Respublikasi Davlat soliq qoʻmitasi ishtirokida Jamgʻarmaga toʻlovlarning toʻliqligini va oʻz vaqtida toʻlanishini taʼminlash masalalari boʻyicha ayrim vazirliklar va idoralarning hisobotlarini eshitadi;

Oʻzbekiston Respublikasi Iqtisodiyot vazirligi, Moliya vazirligi, “Davarxitektqurilish” qoʻmitasi, Avtomobil yoʻllari davlat qoʻmitasi, Oʻzbekiston Respublikasi Vazirlar Mahkamasi huzuridagi Yoʻl-qurilish ishlari sifatini nazorat qilish davlat inspeksiyasi ishtirokida Jamgʻarma mablagʻlari sarfi boʻyicha buyurtmachilarning Jamgʻarma mablagʻlaridan maqsadli foydalanish toʻgʻrisidagi hisobotlarini eshitadi;

Oʻzbekiston Respublikasi Vazirlar Mahkamasiga Jamgʻarmaning daromadlari va xarajatlarini shakllantirish tartibini takomillashtirish toʻgʻrisida takliflar kiritadi;

zarurat boʻlganda Jamgʻarmaning daromadlari (manbalar boʻyicha) va xarajatlari prognoz parametrlariga umumiy tasdiqlangan parametrlar doirasida oʻzgartirish va aniqliklar kiritadi;

avtomobil yoʻllarini qurish, rekonstruksiya qilish va taʼmirlashning manzilli dasturiga oʻzgartirish va qoʻshimchalar kiritadi;

Jamgʻarma mablagʻlarini umumiy foydalanishdagi avtomobil yoʻllarini qurish, rekonstruksiya qilish, taʼmirlash va saqlash bilan bogʻliq boʻlmagan xarajatlarga yoʻnaltirish masalalarini koʻrib chiqadi;

Jamgʻarmaning ijro etuvchi direksiyasi xodimlari mehnatiga haq toʻlash va ularni moddiy ragʻbatlantirish shartlarini belgilaydi;

Jamgʻarma daromadlaridan foydalanish va xarajatlari bilan bogʻliq boshqa vakolatlarni amalga oshiradi.

44. Jamgʻarmani boshqarish kengashining majlislari zaruriyatga koʻra, biroq yil choragida kamida bir marta oʻtkaziladi.

Jamgʻarmani boshqarish kengashining qarorlari Kengash aʼzolarining oddiy koʻpchilik ovozi bilan qabul qilinadi. Ovozlar teng boʻlganda Jamgʻarmani boshqarish kengashi raisining ovozi hal qiluvchi ovoz hisoblanadi.

45. Jamgʻarmani boshqarish kengashining oʻz vakolatlari doirasida qabul qilingan qarorlari vazirliklar, idoralar va boshqa tashkilotlar tomonidan bajarilishi majburiy hisoblanadi.

46. Ijro etuvchi direksiya Jamgʻarmaning ijro etuvchi organi hisoblanadi, uning boshqaruv tuzilmasi va xodimlari soni qonun hujjatlarida belgilangan tartibda belgilanadi.

Ijro etuvchi direksiyani saqlash budjet tashkilotlari uchun belgilangan tartibda tasdiqlangan xarajatlar smetasi asosida Jamgʻarma mablagʻlari hisobiga amalga oshiriladi.

47. Ijro etuvchi direksiya Jamgʻarmaning daromadlari va xarajatlari ijrosi toʻgʻrisida buxgalteriya hisobotini tuzadi va Jamgʻarmani boshqarish kengashi tomonidan tasdiqlangandan keyin belgilangan muddatlarda uni Oʻzbekiston Respublikasi Moliya vazirligiga taqdim etadi.

48. Ijro etuvchi direksiyaga Oʻzbekiston Respublikasi Prezidenti tomonidan lavozimga tayninlanadigan va lavozimdan ozod etiladigan direktor boshchilik qiladi va maqomi boʻyicha vazir oʻrinbosariga tenglashtiriladi.

49. Ijro etuvchi direktorning Oʻzbekiston Respublikasi Vazirlar Mahkamasi bilan kelishgan holda Ijro etuvchi direktor tomonidan lavozimga tayninlanadigan va lavozimdan ozod etiladigan oʻrinbosari boʻladi.

50. Jamgʻarmaning Ijro etuvchi direktori:

Jamgʻarma faoliyatiga umumiy rahbarlik qiladi va Jamgʻarmaga yuklangan vazifalar va funksiyalar bajarilishi uchun shaxsan javob beradi;

Jamgʻarmaning shtat jadvalini va xarajatlar smetasini tasdiqlaydi;

Jamgʻarma xodimlarini belgilangan tartibda lavozimga tayninlaydi va lavozimdan ozod qiladi;

Jamgʻarmani boshqarish kengashi bilan kelishgan holda xodimlarning belgilangan soni va mehnatga haq toʻlash fondi doirasida tuzilmaga oʻzgartirishlar kiritadi;

Jamgʻarma mablagʻlarini yigʻish va sarflash masalalari boʻyicha tushuntirishlar beradi;

ushbu Nizomga va boshqa qonun hujjatlariga muvofiq boshqa vakolatlarni amalga oshiradi.

51. Jamgʻarmaning ijro etuvchi direksiyasi belgilangan tartibga muvofiq buxgalteriya hisobi yuritilishi, Jamgʻarmaning daromadlari va xarajatlari ijrosi toʻgʻrisidagi hisobot tuzilishi va taqdim etilishi uchun javob beradi.

Jamgʻarmaning ijro etuvchi direksiyasi har oyda, hisobot oyidan keyingi oyning 10-kunidan kechikmay:

oʻz faoliyati toʻgʻrisida — Oʻzbekiston Respublikasi Vazirlar Mahkamasining Hududlarni kompleks rivojlantirish va kommunal soha, transport, kapital qurilish, qurilish industriyasi masalalari kompleksiga hisobot;

Oʻzbekiston Respublikasi Moliya vazirligi tomonidan tasdiqlangan shakl boʻyicha Jamgʻarmaning daromadlari va xarajatlari ijrosi toʻgʻrisida — Oʻzbekiston Respublikasi Moliya vazirligiga hisobot taqdim etadi.

52. Oʻzbekiston Respublikasi Davlat soliq qoʻmitasi, Davlat bojxona qoʻmitasi va Ichki ishlar vazirligi:

Jamgʻarmaga majburiy ajratmalar va yigʻimlar hisoblanishi, toʻliq va oʻz vaqtida toʻlanishi ustidan nazorat qilinishini;

toʻlovlar boʻyicha Jamgʻarmaga majburiy ajratmalar va yigʻimlar hisobi yuritilishini;

xoʻjalik yurituvchi subyektlar tomonidan Jamgʻarmaga majburiy ajratmalar hisoblanishi va toʻlanishining toʻgʻriligini tekshirish davlat soliq xizmati organlari tomonidan amalga oshirilishini taʼminlaydilar.

53. Oʻzbekiston Respublikasi Davlat soliq qoʻmitasi va Davlat bojxona qoʻmitasi har oyda, hisobot oyidan keyingi oyning 10-kunidan kechikmay Jamgʻarmaning Ijro etuvchi direksiyasiga hisobot davridan keyingi oyning 1-kunidagi holatiga koʻra Qoraqalpogʻiston Respublikasi, viloyatlar va Toshkent shahri, shuningdek vazirliklar va idoralar boʻyicha Jamgʻarmaga majburiy ajratmalar va yigʻimlar hisoblanishi va tushgan summalar, shuningdek ushbu ajratmalar va yigʻimlar yuzasidan qarzdorlik toʻgʻrisida tezkor hisobotni taqdim etadilar.

Jamgʻarmaning Ijro etuvchi direksiyasi Oʻzbekiston Respublikasi Davlat soliq qoʻmitasi va Davlat bojxona qoʻmitasidan Jamgʻarmaga majburiy ajratmalar va yigʻim toʻlanishidan mablagʻlar tushumiga oid qoʻshimcha maʼlumotlarni soʻrash huquqiga ega.

54. Oʻzbekiston Respublikasi Avtomobil yoʻllari davlat qoʻmitasi va Jamgʻarma mablagʻlari sarfi boʻyicha boshqa buyurtmachilar har oyda, hisobot davridan keyingi oyning 5-kunidan kechikmay Jamgʻarma tomonidan tasdiqlangan shakl boʻyicha Jamgʻarmaning avtomobil yoʻllarini loyihalashtirish, qurish, rekonstruksiya qilish va mukammal taʼmirlashga va yoʻl xoʻjaligini jihozlashga, shuningdek umumiy foydalanishdagi avtomobil yoʻllarini saqlashga ajratilgan mablagʻlaridan foydalanish boʻyicha hisobotlarni taqdim etadilar.

55. Jamgʻarma Oʻzbekiston Respublikasi Davlat soliq qoʻmitasi bilan birgalikda respublika mintaqalari boʻyicha Jamgʻarmaga majburiy ajratmalar va yigʻimlar tushumidan Jamgʻarmaning daromadlari prognozi bajarilishining holatini tahlil qiladi hamda daromadlarning oʻz vaqtida va toʻliq tushishiga salbiy taʼsir koʻrsatgan aniqlangan omillar asosida ularni bartaraf etish yuzasidan birgalikda chora-tadbirlar koʻradi.

56. Jamgʻarma mablagʻlaridan asosli va maqsadli foydalanilishi ustidan nazorat qilish Oʻzbekiston Respublikasi Moliya vazirligi tomonidan amalga oshiriladi.

57. Jamgʻarmaning ijro etuvchi direksiyasi:

avtomobil yoʻllarini loyihalashtirish, qurish, rekonstruksiya qilish va mukammal taʼmirlash boʻyicha bajarilgan ishlar va amalga oshirilgan kassa xarajatlari toʻgʻrisida — Oʻzbekiston Respublikasi Avtomobil yoʻllari davlat qoʻmitasi va Jamgʻarma mablagʻlari sarfi boʻyicha buyurtmachilarning hisobot maʼlumotlari;

umumiy foydalanishdagi avtomobil yoʻllarini saqlash va joriy taʼmirlash, shuningdek Oʻzbekiston Respublikasi Avtomobil yoʻllari davlat qoʻmitasining markaziy apparatini, Qoraqalpogʻiston Respublikasi va viloyatlar avtomobil yoʻllari hududiy bosh boshqarmalarini, tuman yoʻllardan foydalanish korxonalarini, yoʻllardan muntazam foydalanish korxonalarini va koʻpriklardan foydalanish korxonalarini saqlash boʻyicha bajarilgan ishlar va amalga oshirilgan kassa xarajatlari toʻgʻrisida — Oʻzbekiston Respublikasi Avtomobil yoʻllari davlat qoʻmitasining hisobot maʼlumotlari;

bajarilgan ishlar va Davlat inspeksiyasini saqlashga amalga oshirilgan kassa xarajatlari toʻgʻrisida — Yoʻl-qurilish ishlari sifatini nazorat qilish Davlat inspeksiyasining hisobot maʼlumotlari asosida Jamgʻarma mablagʻlaridan maqsadli va oqilona foydalanilishi monitoringini olib boradi.

58. Jamgʻarmaning Ijro etuvchi direksiyasi:

Jamgʻarma mablagʻlari sarfi boʻyicha buyurtmachilar tomonidan Jamgʻarmaga tegishli hisobotlarni taqdim etilmagan yoki tekshirilmagan yoxud ishonchli boʻlmagan hisobotlar taqdim etilganda — ular taqdim etilgungacha boʻlgan muddatga;

Jamgʻarma mablagʻlari sarfi boʻyicha buyurtmachilar tomonidan xarajatlar smetalari belgilangan muddatda taqdim etilmagan hollarda — ular taqdim etilgungacha boʻlgan muddatga;

Jamgʻarma mablagʻlari sarfi boʻyicha buyurtmachilar tomonidan nazarda tutilgan ajratiladigan mablagʻlarni oʻzgartirishga soʻrovlar kelishish uchun taqdim etilgan hollarda — ular tomonidan soʻrovlar asosida tayyorlangan xarajatlar smetalariga barcha tegishli oʻzgarishlar taqdim etilishigacha boʻlgan muddatga va ular muvaffaqiyatli solishtirilgan yoki oʻzgartirishlar kiritish rad etilishi toʻgʻrisida Jamgʻarmaning yozma bildirishnomasi boʻlganda;

qonun hujjatlarida nazarda tutilgan boshqa hollarda budjet tasnifi xarajatlarining tegishli boʻlimlari, boblari, paragraflari va moddalari boʻyicha buyurtmachilarning Jamgʻarma mablagʻlari sarfi boʻyicha xarajatlarini toʻxtatib qoʻyish huquqiga egadir.

59. Tasdiqlangan xarajatlar smetasiga muvofiq Jamgʻarma mablagʻlaridan qatʼiy maqsadli va samarali foydalanilishi uchun javobgarlik Jamgʻarma mablagʻlari sarfi boʻyicha buyurtmachilarning rahbarlari zimmasiga yuklanadi.

60. Jamgʻarmani qayta tashkil etish va tugatish qonun hujjatlarida belgilangan tartibda amalga oshiriladi.