1998 — 2000-yillardagi davrda qishloq xoʻjaligida iqtisodiy islohotlarni chuqurlashtirish Dasturini amalga oshirishni taʼminlash, naslchilik ishlarini takomillashtirish asosida mollar mahsuldorligini oshirish va chorvachilik mahsulotlari yetishtirishni koʻpaytirish maqsadida Vazirlar Mahkamasi qaror qiladi:

1. Oʻzbekiston Respublikasi Qishloq va suv xoʻjaligi vazirligi, Davlat mulki qoʻmitasi, Qoraqalpogʻiston Respublikasi Vazirlar Kengashi, viloyatlar hokimliklari, “Oʻzchorvanaslbirlashma” tarkibiga kiruvchi xoʻjalik yurituvchi subyektlarning:

Oʻzbekiston chorvachilikda naslchilik ishi boʻyicha respublika ishlab chiqarish birlashmasi negizida Oʻzbekiston Respublikasi Qishloq va suv xoʻjaligi vazirligi tizimida 1-ilovaga muvofiq “Nasl-xizmat” nasldor mollar chorvachiligi uyushmasini tashkil etish;

uyushmaga kiruvchi xoʻjalik yurituvchi subyektlarni, aksiyalar paketlarini Oʻzbekiston Respublikasi Prezidentining 1997-yil 31-martdagi PF-1740-son Farmoniga muvofiq taqsimlagan holda, ochiq aksiyadorlik jamiyatlariga aylantirish haqidagi takliflariga rozilik bildirilsin.

2. Quyidagilar “Nasl-xizmat” uyushmasining asosiy vazifalari etib belgilansin:

naslchilik va seleksiya ishlarini olib borish, respublikaning tabiiy-iqlim sharoitlari uchun mollarning mahsuldor zotlarini yaratish;

chorva mollari nasldor buqalarining chuqur muzlatilgan urugʻini yetishtirish, saqlash va sotish;

mulkchilikning turli shakllaridagi chorvachilik xoʻjaliklariga naslchilik ishlari boʻyicha servis xizmati koʻrsatish;

nasldor mollar tayyorlash va sotish;

mollarni sunʼiy qochirishning ilgʻor texnologiyalarini joriy etish;

nasldor mollar koʻrgazmalarini va kim oshdi savdolarini tashkil etish va oʻtkazish;

mollarni qochiruvchi texniklar va mollarning nasli boʻyicha mahsuldorligini hisobga oluvchi mutaxassislar tayyorlash va ularning malakasini oshirish.

3. Belgilansinki:

“Nasl-xizmat” uyushmasining ustav fondi tugatilayotgan Oʻzchorvanaslbirlashmaning mol-mulki, uyushma qatnashchilarining taʼsis badallari hisobiga shakllanadi;

“Nasl-xizmat” uyushmasining xoʻjalik faoliyatini mablagʻ bilan taʼminlash, shu jumladan uning boshqaruv apparati xarajatlari oʻz xoʻjalik faoliyati va xizmatlar koʻrsatish hisobiga amalga oshiriladi;

“Nasl-xizmat” uyushmasi shartnomalar va qabul qilingan majburiyatlar boʻyicha “Oʻzchorvanaslbirlashma”ning huquqiy vorisi hisoblanadi.

4. Belgilansinki:

aksiyadorlik jamiyatlaridagi davlatga tegishli aksiyalar “Nasl-xizmat” uyushmasiga ishonchli boshqaruvga beriladi;

aksiyalar emissiya prospektlariga muvofiq sotilgunga qadar ular ham aksiyalarning davlat paketiga kiradi va uyushmaning ishonchli boshqaruvida boʻladi;

“Nasl-xizmat” uyushmasi oʻz tarkibiga kiruvchi aksiyadorlik jamiyatlarini unga ishonchli boshqaruvga berilgan aksiyalar paketlariga muvofiq boshqaradi.

Oʻzbekiston Respublikasi Davlat mulki qoʻmitasi “Nasl-xizmat” uyushmasi bilan ishonchli boshqaruv shartnomasi tuzsin.

5. Uyushma boshqaruvi ijro etuvchi apparati xodimlarining cheklangan soni 16 nafardan iborat boʻlgan (xizmat koʻrsatuvchi xodimlardan tashqari) tuzilmasiga 2-ilovaga muvofiq rozilik berilsin.

Belgilansinki, “Nasl-xizmat” uyushmasi rahbarlari belgilangan tartibda muassislar umumiy yigʻilishida saylanadilar va Oʻzbekiston Respublikasi Qishloq va suv xoʻjaligi vazirligi hayʼti tomonidan lavozimiga tasdiqlanadilar.

6. Oʻzbekiston qishloq xoʻjaligi ilmiy-ishlab chiqarish markazi “Nasl-xizmat” uyushmasi bilan birgalikda:

davlat naslchilik zavodlarida urchitiladigan rayonlashtirilgan zotli mollar bilan naslchilik ishlarini olib borishni isloh qilish;

“Oʻznaslchilikkorxona” bankida mavjud boʻlgan naslchilik materialidan (buqalarning muzlatilgan urugʻidan) naslchilik xoʻjaliklari urgʻochi mollarida jadal foydalanish;

urchitishning ilgʻor biotexnologiya usullarini, kelib chiqishning ishonchliligini immunogenetik nazorat qilishni, zamonaviy elektron-hisoblash texnikasi negizida naslchilik ishini yuritishning avtomatlashtirilgan tizimini joriy etish;

ichki resurslardan (don va paxtani qayta ishlash korxonalari chiqitlaridan) foydalanish hisobiga mollarning turli yosh guruhlari uchun yemga qoʻshimchalarning yangi turlarini olish boʻyicha tadbirlar ishlab chiqsin.

7. “Nasl-xizmat” uyushmasi seleksiya-naslchilik ishlarini yaxshilash va takomillashtirish hamda mavjud imkoniyatlardan oqilona foydalanish, shuningdek qora-ola mollarni urchitish boʻyicha mavjud naslchilik zavodlari urgʻochi mollarining bosh sonini koʻpaytirish uchun Qashqadaryo viloyatining Mangʻit va Toshkent viloyatining Olmaliq kon-metallurgiya kombinati naslchilik xoʻjaliklarida yetishtirilgan zotdor buqalardan shartnoma asosida keng foydalansin.

10. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Qishloq va suv xoʻjaligi vazirligi, Dehqon va fermer xoʻjaliklari uyushmasi bilan birgalikda qishloq xoʻjaligi korxonalariga, dehqon va fermer xoʻjaliklariga veterinariya va zootexnika xizmatlari koʻrsatish, qoramollarni sunʼiy qochirish boʻyicha pulli xizmatlar koʻrsatish maqsadida joylarda zooveterinariya punktlari sonini 3-ilovaga muvofiq 2000-yilda 1585 taga yetkazsinlar. Ularni tegishli binolar bilan taʼminlasinlar, zarur asbob-uskunalar va priborlar bilan jihozlasinlar.

11. Vazirlar Mahkamasining 1995-yil 12-iyuldagi 268-son qarorining 2-bandi oʻz kuchini yoʻqotgan deb hisoblansin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.M. Olimjonov zimmasiga yuklansin.

Jami — 16 kishi (xizmat koʻrsatuvchi xodimlardan tashqari)