Oʻzbekiston Respublikasi Prezidentining “1941 — 1945-yillardagi urush va mehnat fronti faxriylarini ijtimoiy qoʻllab-quvvatlashni yanada kuchaytirish chora-tadbirlari toʻgʻrisida” 2014-yil 13-oktabrdagi PF-4658-son Farmoniga muvofiq, tibbiy xizmat koʻrsatish darajasini va sifatini oshirish hamda sanatoriyda sogʻlomlashtirish hisobiga urush va mehnat fronti faxriylarining salomatligini mustahkamlash uchun qulay shart-sharoitlar yaratish maqsadida Vazirlar Mahkamasi qaror qiladi:

1. Quyidagilar:

1941 — 1945-yillardagi urush va mehnat fronti faxriylarini (keyingi oʻrinlarda urush va mehnat fronti faxriylari deb ataladi) Oʻzbekiston Respublikasi Mehnat va aholini ijtimoiy muhofaza qilish vazirligiga, Oʻzbekiston Kasaba uyushmalari Federatsiyasi Kengashiga hamda davlat va xoʻjalik boshqaruvi organlariga qarashli sanatoriy-sogʻlomlashtirish muassasalarida sogʻlomlashtirish tartibi toʻgʻrisidagi Nizom 1-ilovaga muvofiq;

urush va mehnat fronti faxriylarini Mehnat va aholini ijtimoiy muhofaza qilish vazirligiga, Oʻzbekiston Kasaba uyushmalari Federatsiyasi Kengashiga hamda davlat va xoʻjalik boshqaruvi organlariga qarashli sanatoriy-sogʻlomlashtirish muassasalarida sogʻlomlashtirish sxemasi 2-ilovaga muvofiq tasdiqlansin.

2. Oʻzbekiston Respublikasi Mehnat va aholini ijtimoiy muhofaza qilish vazirligi:

Nogironlarni sogʻlomlashtirish va protezlash milliy markazi tuzilmasida xodimlarining soni 4 nafardan iborat boʻlgan Urush va mehnat fronti faxriylarini sanatoriylarda sogʻlomlashtirishni tashkil etish boʻlinmasi tashkil qilsin;

oʻn kun muddatda urush va mehnat fronti faxriylarini sanatoriylarda sogʻlomlashtirishni tashkil etish boʻlinmasi toʻgʻrisida nizomni tasdiqlasin, unda xodimlarga budjetdan tashqari jamgʻarma mablagʻlari hisobiga lavozim maoshining 50 foizigacha miqdorda ustama belgilashni nazarda tutsin.

3. Oʻzbekiston Respublikasi Sogʻliqni saqlash vazirligi 2014-yil 30-dekabrgacha boʻlgan muddatda barcha urush va mehnat fronti faxriylari yashash joyidagi sogʻliqni saqlash muassasalarida dispanserizatsiyadan oʻtkazilishini taʼminlasin, uning natijalariga koʻra har bir urush va mehnat fronti faxriysiga sanatoriyda sogʻlomlashtirishning tavsiya etilgan yoʻnalishini koʻrsatgan holda sanatoriy-kurort kartasi ochsin.

4. Oʻzbekiston Respublikasi Mehnat va aholini ijtimoiy muhofaza qilish vazirligi Sogʻliqni saqlash vazirligi va “Nuroniy” jamgʻarmasi bilan birgalikda:

2015-yil 20-yanvargacha boʻlgan muddatda — urush va mehnat fronti faxriylarini 2015-yilda sanatoriylarda sogʻlomlashtirishga yoʻllanmalar ajratish uchun ularning roʻyxatlari shakllantirish ishlari tashkil etilishini;

2015-yil 1-fevralgacha boʻlgan muddatda — Oʻzbekiston Respublikasi Vazirlar Mahkamasiga 2015-yilda yoʻllanmalarni taqsimlash rejasining, har bir sanatoriyda urush va mehnat fronti faxriylarini sogʻlomlashtirish uchun har bir oyda ajratilgan yoʻllanmalar sonini koʻrsatgan holda ishlab chiqilishini va tasdiqlashga taqdim etilishini;

2015-yil 15-fevralgacha boʻlgan muddatda — Oʻzbekiston Respublikasi Moliya vazirligi tomonidan belgilangan cheklangan sutkalik xarajatlarni hisobga olgan holda, Oʻzbekiston Kasaba uyushmalari Federatsiyasi Kengashining Sanatoriya-kurortlar boshqarmasi, davlat va xoʻjalik boshqaruvi organlari sanatoriylari bilan 2015-yilda urush va mehnat fronti faxriylarini sogʻlomlashtirish yuzasidan shartnomalar tuzilishini;

2015-yil 1-martdan boshlab — urush va mehnat fronti faxriylariga 2015-yil uchun sogʻlomlashtirishga yoʻllanmalar berilishini taʼminlasin.

5. Vazirlar Mahkamasining “Nogironlarni sogʻlomlashtirish va protezlash milliy markazini tashkil etish toʻgʻrisida” 2006-yil 17-maydagi 89-son qarori 3-ilovasiga muvofiq qoʻshimchalar va oʻzgartirishlar kiritilsin.

6. Oʻzbekiston Respublikasi Mehnat va aholini ijtimoiy muhofaza qilish vazirligi manfaatdor vazirliklar va idoralar bilan birgalikda bir oy muddatda oʻzlarining normativ-huquqiy hujjatlarini ushbu qarorga muvofiqlashtirsin

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

1. Ushbu Nizom Oʻzbekiston Respublikasi Prezidentining “1941 — 1945-yillardagi urush va mehnat fronti faxriylarini ijtimoiy qoʻllab-quvvatlashni yanada kuchaytirish chora-tadbirlari toʻgʻrisida” 2014-yil 13-oktabrdagi PF-4658-son Farmoniga muvofiq 1941 — 1945-yillardagi urush va mehnat fronti faxriylarini (keyingi oʻrinlarda urush va mehnat fronti faxriylari deb ataladi) sanatoriy-sogʻlomlashtirish muassasalariga (keyingi oʻrinlarda sanatoriylar deb ataladi) yuborish tartibini, shuningdek ularni sogʻlomlashtirish shart-sharoitlarini, muddatlarini va davomiyligini, yoʻllanmalar qiymatini Oʻzbekiston Respublikasi Davlat budjeti mablagʻlari hisobiga toʻlash tartibini belgilaydi.

2. Urush va mehnat fronti faxriylari oʻzlari uchun maqbul muddatlarda yiliga bir marta Oʻzbekiston Respublikasi Mehnat va aholini ijtimoiy muhofaza qilish vazirligi, Oʻzbekiston Kasaba uyushmalari Federatsiyasi Kengashi hamda davlat va xoʻjalik boshqaruvi organlari sanatoriylarida oʻn ikki kunlik sogʻlomlashtirish kursidan tekin oʻtish huquqiga ega.

Urush va mehnat fronti faxriylari sogʻlomlashtiriladigan sanatoriylar roʻyxati Oʻzbekiston Respublikasi Sogʻliqni saqlash vazirligi, Oʻzbekiston Kasaba uyushmalari Federatsiyasi Kengashi va “Nuroniy” jamgʻarmasi tomonidan belgilanadi hamda har yili 1-oktabrgacha boʻlgan muddatda Oʻzbekiston Respublikasi Bosh vazirining oʻrinbosari — Oʻzbekiston Respublikasi Vazirlar Mahkamasining Madaniyat, taʼlim, sogʻliqni saqlash va ijtimoiy muhofaza masalalari kompleksi rahbariga tasdiqlash uchun kiritiladi.

3. 1-guruh nogironligi boʻlgan urush va mehnat fronti faxriylari bir nafar kuzatuvchi shaxs uchun qoʻshimcha tekin yoʻllanma olish huquqiga ega.

Urush va mehnat fronti faxriylarining boshqa toifalari ushbu sanatoriyda boʻsh oʻrin mavjud boʻlgan taqdirda kuzatuvchi shaxs uchun toʻlov asosida qoʻshimcha yoʻllanma olish huquqiga ega.

4. Urush va mehnat fronti faxriylarini sanatoriylarda sogʻlomlashtirish Oʻzbekiston Respublikasi Vazirlar Mahkamasi tomonidan tasdiqlanadigan Yoʻllanmalarni taqsimlash rejasiga muvofiq amalga oshiriladi.

5. Oʻzbekiston Kasaba uyushmalari Federatsiyasi Kengashi hamda davlat va xoʻjalik boshqaruvi organlari oʻzlariga qarashli sanatoriylarda, urush va mehnat fronti faxriylarini sogʻlomlashtirish uchun oʻrinlar soni parametrlaridan kelib chiqqan holda, oʻrinlar fondi (kvotasi)ning 15 foizidan kam boʻlmagan miqdorda joy ajratadilar.

6. Moliya vazirligi huzuridagi Budjetdan tashqari pensiya jamgʻarmasining tuman (shahar) boʻlimlari har yili 1-sentabrgacha boʻlgan muddatda tuman (shahar) tibbiyot birlashmalariga urush va mehnat faxriylari roʻyxatlarini taqdim etadilar.

7. Tuman (shahar) tibbiyot birlashmalari har yili urush va mehnat faxriylari roʻyxatlari olingandan keyin oʻn kun muddatda roʻyxatlarni urush va mehnat faxriylari yashaydigan joydagi tibbiyot muassasalariga yetkazadilar.

8. Tibbiyot muassasalari tuman (shahar) tibbiyot birlashmalari tomonidan taqdim etilgan urush va mehnat faxriylari roʻyxatlari boʻyicha har yili 15-oktabrgacha boʻlgan muddatda urush va mehnat faxriylarini majburiy dispanserizatsiyadan oʻtkazadilar, uning natijalariga koʻra sanatoriyda sogʻlomlashtirishning zarur yoʻnalishi aniqlanadi.

9. Urush va mehnat fronti faxriysini dispanserizatsiyadan oʻtkazish natijalari asosida uning tibbiy kartasida sanatoriyda sogʻlomlashtirishning zarur yoʻnalishi va zid koʻrsatmalar (ular mavjud boʻlganda) koʻrsatilgan holda tegishli yozuv qayd etiladi.

10. Tibbiy kartadagi yozuv asosida tibbiyot muassasasi urush va mehnat fronti faxriysiga belgilangan shakldagi sanatoriy-kurort kartasi rasmiylashtiriladi, ushbu karta rasmiylashtirilgan kundan boshlab ikki oy mobaynida amal qiladi va yoʻllanma olish uchun asos hisoblanadi.

Zaruriyat boʻlganda, urush va mehnat fronti faxriysining salomatligi oʻzgargan taqdirda sanatoriy-kurort kartasiga oʻzgartirishlar kiritilishi mumkin.

11. Tibbiyot muassasalari har yili 20-oktabrgacha boʻlgan muddatda dispanserizatsiyadan oʻtgan urush va mehnat fronti faxriylarining roʻyxatini sogʻlomlashtirishning talab qilinadigan yoʻnalishini va tavsiya etilayotgan muddatini koʻrsatgan holda tuzadilar, roʻyxatni tuman (shahar) bandlikka koʻmaklashish va aholini ijtimoiy muhofaza qilish markaziga taqdim etadilar.

12. Tibbiyot muassasasi rahbari urush va mehnat fronti faxriylarini dispanserizatsiyadan oʻtkazishning belgilangan muddatlari taʼminlanishi uchun, shuningdek tibbiyot va sanatoriy-kurort kartasida sogʻlomlashtirishning zarur yoʻnalishi toʻgʻrisidagi yozuvlarning toʻgʻriligi va ularning faxriyning salomatligi holatiga mos kelishi uchun shaxsan javob beradi.

13. Sanatoriyga yoʻllanma olish uchun urush va mehnat fronti faxriylari tuman (shahar) bandlikka koʻmaklashish va aholini ijtimoiy muhofaza qilish markaziga quyidagi hujjatlarni taqdim etadilar:

ushbu Nizomga 1-ilovaga muvofiq shakl boʻyicha ariza;

pasportining nusxasi;

urush faxriysi guvohnomasi yoki 1941 — 1945-yillarda mehnat frontida qatnashganlik toʻgʻrisidagi hujjat nusxasi;

sogʻlomlashtirishning tavsiya etilgan yoʻnalishi va mavjud zid koʻrsatmalar yozilgan sanatoriy-kurort kartasi.

Kuzatuvga muhtoj boʻlgan 1-guruh nogironi boʻlgan urush va mehnat fronti faxriylari oʻzini kuzatib borayotgan shaxs toʻgʻrisidagi maʼlumotlarni (pasportining nusxasi va ushbu shaxs nogironni amalda parvarish qilayotganligi toʻgʻrisida fuqarolarning oʻzini oʻzi boshqarish organining maʼlumotnomasini) ham taqdim etadi.

Taqdim etilgan hujjatlar ushbu Nizomga 2-ilovaga muvofiq shakl boʻyicha Arizalarni roʻyxatdan oʻtkazish daftarida roʻyxatdan oʻtkaziladi.

14. Tuman (shahar) bandlikka koʻmaklashish va aholini ijtimoiy muhofaza qilish markazlari tuman (shahar) tibbiyot birlashmalari bilan birgalikda, zarur boʻlgan yoʻnalish, sanatoriyning nomi va sogʻliqni tiklash uchun oʻzi xohlagan muddat koʻrsatilgan holda ariza bergan shaxslar roʻyxatlarini shakllantiradilar, ularni “Nuroniy” jamgʻarmasi boʻlinmalarida kelishadilar hamda yoʻllanmalar ajratish yuzasidan har yili 15-noyabrgacha boʻlgan muddatda Nogironlarni reabilitatsiya qilish va protezlash milliy markaziga buyurtmanoma taqdim etadilar.

15. Yoʻllanmalar tushganda tuman (shahar) bandlikka koʻmaklashish va aholini ijtimoiy muhofaza qilish markazi uch kun muddatda bu haqda urush va mehnat fronti faxriylarini xabardor qiladi va sogʻlomlashtirish uchun yoʻllanmalarni rasmiylashtiradi.

16. Tushgan yoʻllanmalarni tegishli sanatoriylarga rasmiylashtirish urush va mehnat fronti faxriysining familiyasi, ismi, otasining ismi, muhr bilan tasdiqlangan yoʻllanmani bergan muassasa nomi koʻrsatilgan holda tuman (shahar) bandlikka koʻmaklashish va aholini ijtimoiy muhofaza qilish markazi tomonidan amalga oshiriladi.

Tuman (shahar) bandlikka koʻmaklashish va aholini ijtimoiy muhofaza qilish markazi yoʻllanmalarning urush va mehnat fronti faxriylarining yashash joyiga yetkazilishini taʼminlaydilar.

17. Yoʻllanma unda koʻrsatilgan muddatda haqiqiy hisoblanadi.

Urush va mehnat fronti faxriysi salomatligining holatiga yoki boshqa asosli sabablarga koʻra yoʻllanmadan belgilangan muddatda foydalanish imkoniyatiga ega boʻlmagan taqdirda, yoʻllanmada koʻrsatilgan sanatoriyga kelish muddatidan kamida 15 kundan kech boʻlmagan muddatda bu haqda, faxriyning istagini hisobga olgan holda, yoʻllanmaning amal qilish muddatini keyingi chorakdan oldin boʻlmagan muddatga koʻchirish toʻgʻrisida tuman (shahar) bandlikka koʻmaklashish va aholini ijtimoiy muhofaza qilish markaziga xabar berishi shart. Yoʻllanmada koʻrsatilgan muddatlarni kalendar yil mobaynida ikki martadan ortiq koʻchirishga yoʻl qoʻyilmaydi. Boshqa hollarda ushbu yil uchun yoʻllanma foydalanilgan hisoblanadi.

18. Sanatoriyda sogʻlomlashtirishdan ixtiyoriy ravishda voz kechilganda yoʻllanma navbatlilik tartibida boshqa urush va mehnat fronti faxriysiga rasmiylashtirilishi mumkin.

19. Har bir sanatoriy boʻyicha urush va mehnat fronti faxriylarini sogʻlomlashtirish uchun oylarga taqsimlangan va ajratilgan oʻrinlar soni koʻrsatilgan holda yoʻllanmalarni taqsimlash rejasi har yili 1-dekabrgacha boʻlgan muddatda Nogironlarni reabilitatsiya qilish va protezlash milliy markazi tomonidan Oʻzbekiston Respublikasi Sogʻliqni saqlash vazirligining Davolash-profilaktika yordamini tashkil etish bosh boshqarmasi, Oʻzbekiston Kasaba uyushmalari Federatsiyasi Kengashining Sanatoriy-kurortlar boshqarmasi bilan birgalikda ishlab chiqiladi hamda Oʻzbekiston Respublikasi Mehnat va aholini ijtimoiy himoya qilish vaziri, Sogʻliqni saqlash vaziri, “Nuroniy” jamgʻarmasi raisi, Oʻzbekiston Kasaba uyushmalari Federatsiyasi Kengashi raisi bilan kelishilgandan keyin Oʻzbekiston Respublikasi Mehnat va aholini ijtimoiy himoya qilish vazirligi tomonidan Oʻzbekiston Respublikasi Bosh vazirining oʻrinbosari — Oʻzbekiston Respublikasi Vazirlar Mahkamasining Madaniyat, taʼlim, sogʻliqni saqlash va ijtimoiy muhofaza masalalari kompleksi rahbari tomonidan tasdiqlash uchun Oʻzbekiston Respublikasi Vazirlar Mahkamasiga yuboriladi.

Yoʻllanmalarni taqsimlash rejasi sogʻliqni saqlash muassasalarida dispanserizatsiyadan oʻtgan urush va mehnat fronti faxriylarining soni va sogʻlomlashtirish yoʻnalishi toʻgʻrisidagi maʼlumotlar asosida shakllantiriladi.

20. Yoʻllanmalarni taqsimlashning tasdiqlangan rejasiga muvofiq Nogironlarni reabilitatsiya qilish va protezlash milliy markazi, idoraviy mansubligidan qatʼi nazar, kelgusi kalendar yil uchun oʻrinlar ajratishning oylar boʻyicha rejasini sanatoriylarga yetkazadi.

21. Zarurat boʻlganda, yil mobaynida Yoʻllanmalarni taqsimlash asosli sabablardan (tibbiy koʻrsatkichlar, urush va mehnat fronti faxriylarining rad etishi va shu kabilardan) kelib chiqqan holda oʻzgartirishlar kiritilishi mumkin. Oʻzgartirishlar Nogironlarni reabilitatsiya qilish va protezlash milliy markazi tomonidan Oʻzbekiston Respublikasi Mehnat va aholini ijtimoiy muhofaza qilish vazirligi hamda “Nuroniy” jamgʻarmasi bilan kelishilgan holda kiritiladi.

Ushbu holatda Nogironlarni reabilitatsiya qilish va protezlash milliy markazi har chorak oxirgi oyining 25-sanasigacha boʻlgan muddatda kelgusi chorak uchun oʻrinlar ajratishning tuzatishlar kiritilgan parametrlarini sanatoriylarga yetkazadi.

22. Yoʻllanmalarni taqsimlashning tasdiqlangan yillik rejasiga muvofiq Nogironlarni reabilitatsiya qilish va protezlash milliy markazi har qaysi yilning birinchi oʻn kunligidan kechikmay Oʻzbekiston Kasaba uyushmalari Federatsiyasi Kengashining Sanatoriy-kurortlar boshqarmasi, davlat va xoʻjalik boshqaruvi organlarining sanatoriylari bilan keyingi yil uchun urush va mehnat fronti faxriylarini sogʻlomlashtirish yuzasidan shartnomalar tuzadi, ularda urush va mehnat fronti faxriylari uchun beriladigan oʻrinlar soni hamda sogʻlomlashtirish qiymati koʻrsatiladi.

Urush va mehnat fronti faxriylarini sogʻlomlashtirish yuzasidan shartnomalar tanlov savdolari oʻtkazilmasdan tuziladi.

23. Yoʻllanmalarni taqsimlash rejasiga va sanatoriylar bilan tuzilgan shartnomalarga muvofiq sanatoriylar urush va mehnat fronti faxriylarini qabul qilishni taʼminlaydilar.

24. Yoʻllanmalarni ajratish Nogironlarni reabilitatsiya qilish va protezlash milliy markazi tomonidan, tuman (shahar) bandlikka koʻmaklashish va aholini ijtimoiy muhofaza qilish markazlari shakllantirgan buyurtmanomalarga muvofiq amalga oshiriladi.

Yoʻllanmalar asosan urush va mehnat fronti faxriylari yashaydigan mintaqada joylashgan sanatoriylarga ajratiladi. Ushbu mintaqada talab qilinadigan sogʻlomlashtirish yoʻnalishidagi sanatoriy mavjud boʻlmagan taqdirda yoki boʻsh oʻrinlar mavjud boʻlmaganda yoʻllanmalar respublika mintaqalaridagi eng yaqin joylashgan tegishli sogʻlomlashtirish yoʻnalishidagi sanatoriylarga, ularda oʻrinlar mavjudligidan kelib chiqqan holda ajratilishi mumkin;

Ajratilgan yoʻllanmalar sanatoriyga yetib kelishning belgilangan sanasigacha bir oydan kech boʻlmagan muddatda bevosita urush va mehnat fronti faxriysiga yoki uning qonuniy vakiliga berish uchun tuman (shahar) bandlikka koʻmaklashish va aholini ijtimoiy muhofaza qilish markaziga yuboriladi.

Nogironlarni reabilitatsiya qilish va protezlash milliy markazi berilgan yoʻllanmalar reyestrini yuritadi.

25. Urush va mehnat fronti faxriysiga ajratilgan yoʻllanma uning sanatoriyda sogʻlomlashtirish vaqtiga doir talablariga muvofiq boʻlmagan taqdirda boshqa sanatoriyga yoʻllanma ajratish yoki sogʻlomlashtirish muddatini koʻchirish masalasi, uning talablarini qondirish imkoniyati mavjudligini hisobga olgan holda, yakka tartibda hal etiladi.

Ushbu masalalarni hal etish hokimlikning, “Nuroniy” jamgʻarmasining, tuman (shahar) tibbiyot birlashmasining vakili hamda tuman (shahar) bandlikka koʻmaklashish va aholini ijtimoiy muhofaza qilish markazi direktori ishtirokida Komissiya tuziladi.

26. Sanatoriylarning rahbarlari tuzilgan shartnomaga muvofiq oʻrinlarning zarur miqdorda boʻlishini taʼminlash yuzasidan shaxsan javob beradilar.

Sanatoriy urush va mehnat fronti faxriylarini qabul qilishni hamda yoʻllanmada koʻrsatilgan muddatlarda sogʻlomlashtirish uchun oʻrin berishni rad etgan taqdirda urush va mehnat fronti faxriysi yaqin joydagi tuman (shahar) bandlikka koʻmaklashish va aholini ijtimoiy muhofaza qilish markaziga darhol murojaat qiladi, markaz vakili murojaat qilingan kundan boshlab bir kundan kechikmay rad etishning holatlarini aniqlash va tegishli choralar koʻrish uchun sanatoriyga boradi.

27. Oʻzbekiston Kasaba uyushmalari Federatsiyasi Kengashi, davlat va xoʻjalik boshqaruvi organlari sanatoriylarida urush va mehnat fronti faxriylarini sogʻlomlashtirishga xarajatlarni moliyalashtirish Nogironlarni sogʻlomlashtirish va protezlash milliy markazi xarajatlarining belgilangan tartibda roʻyxatdan oʻtkazilgan smetasida yoʻllanmalar uchun toʻlovga har yili maqsadli tartibda nazarda tutiladigan budjet mablagʻlari hisobiga amalga oshiriladi.

Oʻzbekiston Respublikasi Mehnat va aholini ijtimoiy muhofaza qilish vazirligi sanatoriylarida urush va mehnat fronti faxriylarini sogʻlomlashtirish ular taʼminoti uchun har yili nazarda tutiladigan budjet mablagʻlari doirasida amalga oshiriladi.

28. Sanatoriylarda 12 kunlik sogʻlomlashtirish yoʻllanmalari qiymatini toʻlash uchun kalendar yildagi xarajatlarning cheklangan miqdori har yili 10-noyabrgacha boʻlgan muddatda, Oʻzbekiston Respublikasi Vazirlar Mahkamasi tomonidan ushbu Nizomning 2-bandiga muvofiq tasdiqlanadigan roʻyxatga kiritilgan sanatoriylarda sogʻlomlashtirish uchun yoʻllanmalarning oʻrtacha qiymatidan kelib chiqqan holda, Oʻzbekiston Respublikasi Moliya vazirligi tomonidan belgilanadi.

29. Nogironlarni reabilitatsiya qilish va protezlash milliy markazi:

10-oktabrgacha boʻlgan muddatda — kelgusi yil uchun 12 kunlik sogʻlomlashtirish yoʻllanmalarining qiymati va oʻrinlarning umumiy soni, shu jumladan urush va mehnat fronti faxriylarini sogʻlomlashtirish uchun ajratiladigan yoʻllanmalar qiymati toʻgʻrisida takliflar olish uchun Oʻzbekiston Kasaba uyushmalari Federatsiyasi Kengashining Sanatoriy-kurortlar boshqarmasiga talabnoma yuboradi;

1-noyabrgacha boʻlgan muddatda — olingan maʼlumotlarni sanatoriylarda 12 kunlik sogʻlomlashtirish yoʻllanmalari qiymatini toʻlash xarajatlarining cheklangan miqdorini aniqlash uchun Oʻzbekiston Respublikasi Moliya vazirligiga yuboradi;

12 kunlik sogʻlomlashtirish yoʻllanmalarining qiymati toʻgʻrisida sanatoriylardan olingan takliflardan kelib chiqqan holda, ularni toʻlash uchun xarajatlarning tasdiqlangan cheklangan miqdori, shuningdek urush va mehnat fronti faxriylarining kutilayotgan soni hamda kelgusi yil uchun ajratiladigan budjet mablagʻlarining prognoz hajmlari asosida, Oʻzbekiston Kasaba uyushmalari Federatsiyasi Kengashining Sanatoriy-kurortlar boshqarmasi, davlat va xoʻjalik boshqaruvi organlarining sanatoriylari bilan shartnomalar tuzadi;

moliya yili boshida, qonun hujjatlarida nazarda tutilgan tartibda, ushbu kalendar yil uchun shartnomalar summasining 15 foizi miqdorida oldindan toʻlovni amalga oshiradi.

30. Urush va mehnat fronti faxriylari sogʻlomlashtirilgan Oʻzbekiston Kasaba uyushmalari Federatsiyasi Kengashining Sanatoriy-kurortlar boshqarmasi, davlat va xoʻjalik boshqaruvi organlari sanatoriylari har oyda Nogironlarni sogʻlomlashtirish va protezlash milliy markaziga ular asosida amalda foydalanilgan yoʻllanmalardan (amalda foydalanilgan kunlar sonidan qatʼi nazar) kelib chiqib, toʻlangan avansni hisobga olgan holda uzil-kesil hisob-kitoblar amalga oshiriladigan bajarilgan ishlar dalolatnomalarini va oʻzaro hisob-kitoblarni taqqoslash dalolatnomalarini taqdim etadilar.

31. Yoʻllanmadan faqat unda koʻrsatilgan shaxs foydalanishi mumkin. Yoʻllanmaning boshqa shaxsga berilishiga yoʻl qoʻyilmaydi.

32. Sanatoriyga kelgan urush va mehnat fronti faxriylarida pasporti, sogʻliqni saqlash muassasasi tomonidan berilgan sanatoriy-kurort kartasi (tibbiy xulosa) va yoʻllanma boʻlishi kerak.

33. Urush va mehnat fronti faxriylari standart tartib raqamlari bilan taʼminlanadilar. Urush va mehnat faxriylarini kuzatib keluvchi shaxslarga, qoidaga koʻra, faxriy joylashgan palatada joy beriladi.

34. Urush va mehnat fronti faxriylari sanatoriyning davolovchi shifokori tayinlagan barcha zarur tibbiy muolajalar bilan birinchi navbatda taʼminlanadilar.

35. Urush va mehnat fronti faxriysining sanatoriyda boʻlishi tugagach muassasa rahbari Nogironlarni sogʻlomlashtirish va protezlash milliy markaziga yoʻllanmaning qaytish (yirtma) talonini joʻnatadi, unda urush va mehnat fronti faxriysining ushbu sanatoriyda haqiqatda boʻlgan davri koʻrsatiladi.

36. Ajratiladigan oʻrinlarning talab qilingan miqdorda boʻlishini, sanatoriylarda urush va mehnat fronti faxriylari uchun sogʻlomlashtirishning zarur darajadagi sifatini va qulay shart-sharoitlarni taʼminlash maqsadida Oʻzbekiston Respublikasi Sogʻliqni saqlash vazirligi “Nuroniy” jamgʻarmasi bilan birgalikda har yili kamida bir marta sanatoriylarni ajratilgan oʻrinlari sonining va sifat parametrlarining urush va mehnat fronti faxriylarini sogʻlomlashtirish boʻyicha belgilangan talablarga muvofiqligi yuzasidan tekshiruvni amalga oshiradi, bunda ularning gerontologik xususiyatlarini hisobga oladi va Oʻzbekiston Respublikasi Moliya vazirligiga hamda Mehnat va aholini ijtimoiy muhofaza qilish vazirligiga tegishli xulosani taqdim etadi.

37. Sanatoriylar tomonidan urush va mehnat fronti faxriylarini sogʻlomlashtirish uchun joylarning Yoʻllanmalarni taqsimlashning tasdiqlangan rejasiga muvofiq ajratilganligi yuzasidan javobgarlik Oʻzbekiston Kasaba uyushmalari Federatsiyasi Kengashi hamda ushbu sanatoriylar oʻzlarining tasarrufida boʻlgan davlat va xoʻjalik boshqaruvi organlari rahbarlariga yuklanadi.

Sanatoriylar rahbarlari Nogironlarni reabilitatsiya qilish va protezlash milliy markaziga taqdim etiladigan maʼlumotlarning ishonchliligi va asoslanganligi, shuningdek koʻrsatiladigan xizmatlar sifati uchun Oʻzbekiston Respublikasining qonunchiligiga muvofiq javob beradilar.

38. Yoʻllanmalar Nogironlarni reabilitatsiya qilish va protezlash milliy markazi tomonidan bosmaxona usulida bosilgan, tartib raqamiga ega boʻlgan maxsus blankalarda tayyorlanadi, ular “1941 — 1945-yillardagi urush va mehnat fronti faxriylari uchun yoʻllanma” soʻzlari yozilgan tegishli shtamp bilan tasdiqlanadi hamda ularda qaytarma (yirtma) talon boʻladi.

39. Urush va mehnat fronti faxriylariga berilgan va ular tomonidan foydalanilgan yoʻllanmalar hisobi tuman (shahar) bandlikka koʻmaklashish va aholini ijtimoiy muhofaza qilish markazlari tomonidan yuritiladi.

40. Tuman (shahar) bandlikka koʻmaklashish va aholini ijtimoiy muhofaza qilish markazlari yoʻllanmalarning oʻz vaqtida va maqsadli berilishini, shuningdek ularni berishda navbatlilikka rioya etilishini taʼminlaydilar.

41. Ushbu Nizomga rioya etilishini nazorat qilish Oʻzbekiston Respublikasi Moliya vazirligiga, Sogʻliqni saqlash vazirligiga, Mehnat va aholini ijtimoiy muhofaza qilish vazirligiga hamda “Nuroniy” jamgʻarmasiga yuklanadi.

1. 2-bandga quyidagi mazmundagi xatboshi qoʻshilsin:

“sanatoriy-sogʻlomlashtirish muassasalari bilan birgalikda 1941 — 1945-yillardagi urush va mehnat fronti faxriylarini sogʻlomlashtirish chora-tadbirlarini ishlab chiqish va amalga oshirish”.

2. 4-bandga quyidagi mazmundagi toʻrtinchi xatboshi qoʻshilsin:

“1941 — 1945-yillardagi urush va mehnat fronti faxriylarini Mehnat va aholini ijtimoiy muhofaza qilish vazirligiga, Oʻzbekiston Kasaba uyushmalari Federatsiyasi Kengashiga hamda davlat va xoʻjalik boshqaruvi organlariga qarashli sanatoriy-sogʻlomlashtirish muassasalarida sogʻlomlashtirish sohasidagi faoliyatni tashkil qiladi va muvofiqlashtiradi”;

toʻrtinchi xatboshi beshinchi xatboshi deb hisoblansin.

3. 1-ilova matni quyidagi tahrirda bayon qilinsin: