Oʻzbekiston Respublikasi Prezidentining “Oʻzbekiston iqtisodiyotida xususiy sektorning ulushi va ahamiyatini tubdan oshirish chora-tadbirlari toʻgʻrisida” 2003-yil 24-yanvardagi PF-3202-son Farmonini bajarish yuzasidan hamda xususiylashtirilgan korxonalarda korporativ boshqarish prinsiplarini yanada joriy etish maqsadida Vazirlar Mahkamasi qaror qiladi:

1. Quyidagilar:

Aksiyadorlik jamiyatining kuzatuvchi kengashi toʻgʻrisidagi Namunaviy nizom 1-ilovaga muvofiq;

Davlatning aksiyadorlik jamiyatlaridagi ishonchli vakili toʻgʻrisidagi Nizom 2-ilovaga muvofiq;

Investitsiya aktivlarining ishonchli boshqaruvchilari toʻgʻrisidagi Nizom 3-ilovaga muvofiq;

Aksiyadorlik jamiyati ijro etuvchi organining rahbarini yollash toʻgʻrisidagi Namunaviy mehnat shartnomasi 4-ilovaga muvofiq tasdiqlansin.

2. Vazirlar Mahkamasi Komplekslari Xususiylashtirilgan korxonalarni boshqarishni takomillashtirish masalalari boʻyicha maxsus komissiya, Oʻzbekiston Respublikasi Adliya vazirligi bilan birgalikda 2003-yil 1-iyulgacha boʻlgan muddatda uyushmalar, korporatsiyalar, kompaniyalar, boshqa xoʻjalik birlashmalarining taʼsis hujjatlarini Prezidentning 2003-yil 24-yanvardagi PF-3202-son Farmoni talablariga muvofiqlashtirsinlar, bunda ularning tarkibiga kiruvchi korxonalarning amaliy faoliyatiga asossiz aralashish imkonini beruvchi qoidalar istisno etilishini nazarda tutsinlar.

Zarurat boʻlganda Vazirlar Mahkamasiga Hukumatning alohida xoʻjalik birlashmalari faoliyatini tashkil etish masalalarini tartibga soluvchi qarorlariga oʻzgartirishlar kiritish yuzasidan takliflar taqdim etilsin.

3. Oʻzbekiston Respublikasi Davlat mulki qoʻmitasi:

2003-2004-yillarda aksiyalar (ulushlar, paylar)ning davlat paketlarini tanlov asosida professional boshqaruvchi kompaniyalarga ishonchli boshqaruvga bosqichma-bosqich berish jadvalini bir oy muddatda ishlab chiqsin va tasdiqlasin;

2003-yil 1-iyulgacha mulkida davlat ulushi 26 foizni va undan koʻproqni tashkil etadigan aksiyadorlik jamiyatlarining davlat aktivlarini boshqarish boʻyicha davlatning ishonchli vakillari bilan aksiyadorlik jamiyatlari professional boshqaruvchi kompaniyalarga ishonchli boshqaruvga berilgan muddatgacha amal qiladigan shartnomalar tuzsin;

zarurat boʻlganda aksiyadorlik jamiyatlarining ustav fondidagi 25 foiz va undan kam miqdordagi davlat aktivlarini boshqarish yuzasidan ishonchli boshqaruvchilar bilan tuzilgan shartnomalarni Vazirlar Mahkamasining “2003-2004-yillarda korxonalarni davlat tasarrufidan chiqarish va xususiylashtirish dasturi toʻgʻrisida” 2003-yil 17-apreldagi 185-son qaroriga muvofiq ular birja va birjadan tashqari bozorlarda toʻliq sotilgungacha boʻlgan davrga uzaytirsin.

4. Belgilab qoʻyilsinki:

taftish komissiyasi aʼzolari oʻz faoliyatining ularning ushbu aksiyadorlik jamiyatlaridagi yollash boʻyicha mehnat faoliyati bilan birga qoʻshib olib borilishiga yoʻl qoʻyilmaydi;

aksiyalar (ulushlar, paylar)ning davlat paketlari qiymatini baholash, yakka tartibdagi loyihalar boʻyicha xususiylashtiriladigan korxonalardan tashqari, baholash tashkilotlari tomonidan qonun hujjatlariga muvofiq amalga oshiriladi va ularni sotishda Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi tomonidan boshlangʻich narx sifatida belgilanadi;

respublika iqtisodiyoti uchun strategik ahamiyatga ega boʻlgan xoʻjalik jamiyatlarining ustav fondlaridagi aksiyalar (ulushlar)ning davlat paketlari Oʻzbekiston Respublikasi Prezidentining, Vazirlar Mahkamasining yoki Aksiyadorlik birlashmalari va kompaniyalaridagi aksiyalarning davlat ulushidan samarali foydalanilishi ustidan monitoring olib borish komissiyasi qaroriga binoan ishonchli boshqaruvga beriladi;

davlatning ishonchli vakili aksiyalar (ulushlar, paylar)ning faqat bitta davlat paketini boshqarishga haqlidir;

aksiyalar (ulushlar, paylar)ning davlat paketlarini boshqarish xarajatlari aksiyalar (ulushlar, paylar)ning davlat paketlari boʻyicha davlat budjetiga tushgan dividendlarning bir qismi hisobiga, ular boʻlmaganda esa — xususiylashtirishdan tushadigan umumiy mablagʻlar hisobiga amalga oshiriladi;

Oʻzbekiston Respublikasi Davlat mulki qoʻmitasi, Moliya vazirligi Adliya vazirligi bilan birgalikda bir oy muddatda davlat aktivlarini boshqarish xizmatlariga haq toʻlash tartibini ishlab chiqsinlar va tasdiqlasinlar.

5. Belgilansinki, 2003-yil 1-fevraldagi holatiga koʻra ustav fondi Oʻzbekiston Respublikasi Markaziy bankining kursi boʻyicha 50 ming AQSH dollaridan kam miqdorda boʻlgan ilgari tashkil etilgan aksiyadorlik jamiyatlari 2004-yil 1-yanvargacha oʻz ustav fondlarini qayta roʻyxatdan oʻtkazish sanasida koʻrsatib oʻtilgan summadan kam boʻlmagan miqdorga keltirishlari yoxud belgilangan tartibda boshqa tashkiliy-huquqiy shakllarga aylantirilishi shart.

6. Oʻzbekiston Respublikasi Hukumatining 5-ilovaga muvofiq qarorlariga oʻzgartirish va qoʻshimchalar kiritilsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Mazkur Nizomda aksiyadorlik jamiyatining Kuzatuvchi kengashini (keyingi oʻrinlarda matnda “Kuzatuvchi kengash” deb yuritiladi) tashkil etish va uning faoliyat tartibini, aʼzolarini saylashni, shuningdek ularning huquq va majburiyatlarini belgilab beruvchi namunaviy normalar mavjud.

Ushbu Nizomning amal qilishi aksiyadorlik tijorat banklariga tatbiq etilmaydi.

Muayyan bir aksiyadorlik jamiyatining Kuzatuvchi kengashi toʻgʻrisidagi Nizom mazkur aksiyadorlik jamiyatining umumiy yigʻilishi tomonidan tasdiqlanadi.

2. Kuzatuvchi kengash jamiyat faoliyatiga umumiy rahbarlikni amalga oshiradi, qonun va ustavda faqat aksiyadorlarning umumiy yigʻilishi vakolatiga kiritilgan masalalar bundan mustasnodir.

Ovoz beruvchi aksiyalarga egalik qiluvchi aksiyadorlar soni oʻttiztadan kam boʻlgan jamiyatda jamiyat ustavida Kuzatuvchi kengash funksiyalari Aksiyadorlar umumiy yigʻilishiga yuklanishi mumkin. Ushbu holda jamiyat ustavida Aksiyadorlarning umumiy yigʻilishini oʻtkazish toʻgʻrisidagi masalani hal etish vakolatiga tegishli boʻlgan jamiyatning muayyan shaxsi yoki organi toʻgʻrisidagi koʻrsatma mavjud boʻlishi kerak.

3. Jamiyat Kuzatuvchi kengashining son tarkibi ustavda yoki Aksiyadorlar umumiy yigʻilishining qarori bilan belgilanadi. Oddiy (odatdagi) yoki boshqa ovoz beruvchi aksiyalarga egalik qiluvchi aksiyadorlar soni 500 dan ortiq boʻlgan ochiq aksiyadorlik jamiyati uchun Kuzatuvchi kengashning son tarkibi yettita aʼzodan kam boʻlishi mumkin emas, oddiy (odatdagi) yoki boshqa ovoz beruvchi aksiyalarga egalik qiluvchi aksiyadorlar 1000 dan ortiq boʻlgan jamiyat uchun esa kamida toʻqqizta aʼzodan kam boʻlishi mumkin emas.

4. Kuzatuvchi kengash vakolatiga quyidagilar kiradi:

jamiyat faoliyatining ustuvor yoʻnalishlarini belgilash;

jamiyat aksiyadorlarining yillik va navbatdan tashqari Umumiy yigʻilishlarini chaqirish, “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi Oʻzbekiston Respublikasi Qonunining 72-moddasi oʻn birinchi qismida nazarda tutilgan hollar bundan mustasno;

Aksiyadorlar umumiy yigʻilishi kun tartibini tayyorlash;

Aksiyadorlar umumiy yigʻilishi oʻtkazilishi sanasini belgilash;

Aksiyadorlar umumiy yigʻilishi oʻtkazilishi toʻgʻrisida xabardor qilish uchun jamiyat aksiyadorlari reyestrini tuzish sanasini belgilash;

jamiyat ustaviga oʻzgartirish va qoʻshimchalar kiritish yoki yangi tahrirdagi ustavni tasdiqlash masalalarini Aksiyadorlar umumiy yigʻilishi qaroriga kiritish, shuningdek auditorlik tekshirishi oʻtkazish, auditorlik tashkilotini va uning xizmatlariga haq toʻlashning cheklangan miqdorini belgilash toʻgʻrisida qaror qabul qilish;

agar jamiyat ustaviga yoki Aksiyadorlar umumiy yigʻilishi qaroriga muvofiq bunday huquq unga berilgan boʻlsa, eʼlon qilingan aksiyalarning soni va tiplari doirasida aksiyalarning nominal qiymatini koʻpaytirish yoki jamiyat tomonidan qoʻshimcha aksiyalar joylashtirilishi yoʻli bilan jamiyat ustav fondi miqdorini koʻpaytirish;

agar jamiyat ustavida oʻzgacha tartib nazarda tutilmagan boʻlsa, chiqarilgan qimmatli qogʻozlarni joylashtirish toʻgʻrisida qaror qabul qilish;

mol-mulkning bozor qiymatini belgilash;

agar jamiyat ustaviga yoki Aksiyadorlar umumiy yigʻilishi qaroriga muvofiq bunday huquq unga berilgan boʻlsa, qonunda nazarda tutilgan hollarda jamiyat tomonidan joylashtirilgan aksiyalar, obligatsiyalar va boshqa qimmatli qogʻozlarni sotib olish toʻgʻrisida qaror qabul qilish;

jamiyatning ijro etuvchi organini tuzish (saylash, tayinlash, yollash va hokazolar), agar jamiyat ustavida bu uning vakolatiga tegishli deb topilgan boʻlsa, ijro etuvchi organning vakolatlarini muddatidan oldin toʻxtatish;

aksiyadorlik jamiyati nomidan ijro etuvchi organ rahbarini (boshqaruv raisini, direktorni) va kollegial ijro etuvchi organ (boshqaruv, direksiya) aʼzolarini bir yil muddatga yollash toʻgʻrisida mehnat shartnomasi tuzish;

agar jamiyat ustavida ushbu masalani hal etish uning vakolatiga tegishli boʻlsa yoki Aksiyadorlar umumiy yigʻilishi tomonidan ushbu masalani hal etish unga topshirilgan boʻlsa, yillik biznes-rejani tasdiqlash;

agar bunday lavozimni joriy etish jamiyat ustavida nazarda tutilgan boʻlsa korporativ maslahatchini tayinlash;

agar jamiyatning ustavida jamiyatning yillik biznes-rejasini tasdiqlash Kuzatuvchi kengash vakolatiga tegishli boʻlmasa yoki Aksiyadorlar umumiy yigʻilishi tomonidan unga topshirilmagan boʻlsa, jamiyatning yillik biznes-rejasini maʼqullash. Bunda jamiyatning kelgusi yil uchun biznes-rejasi joriy yilning 1-dekabridan kechikmay Kuzatuvchi kengash majlisida maʼqullanishi kerak;

ichki audit xizmatini tashkil etish va uning xodimlarini tayinlash;

agar jamiyat ustavida bu uning vakolatiga tegishli deb belgilangan boʻlsa, ijro etuvchi organga toʻlanadigan taqdirlash puli va kompensatsiyalar miqdorini belgilash;

jamiyatning taftish komissiyasi aʼzolariga (taftishchiga) toʻlanadigan taqdirlash puli va kompensatsiyalar miqdori boʻyicha tavsiyalar berish va auditorlik tashkiloti xizmatchilariga haq toʻlashning cheklangan miqdorini belgilash;

aksiyalar boʻyicha dividend miqdori va uni toʻlash tartibi boʻyicha tavsiyalar berish;

jamiyatning zaxira va boshqa jamgʻarmalaridan foydalanish;

jamiyatni boshqarish organlari faoliyati tartibini belgilaydigan hujjatlarni tasdiqlash;

jamiyatning filiallarini tashkil etish va vakolatxonalarini ochish;

jamiyatning shoʻba va boʻysunadigan korxonalarini tashkil etish;

“Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi Oʻzbekiston Respublikasi Qonunining VIII boʻlimida nazarda tutilgan hollarda mol-mulkni sotib olish va begonalashtirish bilan bogʻliq yirik bitishuvlar tuzish;

“Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi Oʻzbekiston Respublikasi Qonunining IX boʻlimida nazarda tutilgan hollarda tuzilishidan manfaatdorlik mavjud boʻlgan bitishuvlarni tuzish;

aksiyadorlik jamiyatining boshqa xoʻjalik jamiyatlarida qatnashishi bilan bogʻliq bitishuvlarni tuzish;

jamiyatning ijro etuvchi organi faoliyatiga tegishli boʻlgan har qanday hujjatlardan toʻsiqsiz foydalanish va Kuzatuvchi kengashga yuklangan vazifalarni bajarish uchun ularni ijro etuvchi organdan olish. Olingan hujjatlardan Kuzatuvchi kengash va uning aʼzolari faqat xizmat maqsadlarida foydalanishi mumkin;

yillik biznes-rejaning bajarilishi toʻgʻrisida jamiyatning ijro etuvchi organi rahbarining hisobotlarini har chorakda eshitish hamda yakka boshchilik qiladigan ijro etuvchi organ, jamiyatning kollegial ijro etuvchi organi rahbari, boshqaruvchi tashkilot yoki boshqaruvchi tomonidan qoʻpol buzishlarga yoʻl qoʻyilganda yoki jamiyat yillik biznes-rejasining tasdiqlangan parametrlarini bajarish barbod qilinganda ular bilan tuzilgan shartnomani muddatidan oldin bekor qilish;

agar ustavga muvofiq unga bunday huquq berilgan boʻlsa, yakka boshchilik qiladigan ijro etuvchi organ (direktor), jamiyatning kollegial ijro etuvchi organi rahbari (boshqaruv, direksiya), boshqaruvchi tashkilot yoki boshqaruvchi tomonidan shartnoma shartlari buzilganda ular bilan tuzilgan shartnomani bekor qilish;

qonunda va jamiyat ustavida Kuzatuvchi kengash vakolatiga tegishli deb belgilangan boshqa masalalarni hal etish.

Jamiyatning Kuzatuvchi kengashi vakolatiga tegishli boʻlgan masalalar jamiyatning ijro etuvchi organi hal qilishi uchun berilishi mumkin emas.

5. Jamiyatning Kuzatuvchi kengashi raisini saylash qonunda va jamiyat ustavida nazarda tutilgan tartibda bir yil muddatga Aksiyadorlarning umumiy yigʻilishi tomonidan amalga oshiriladi.

Aksiyadorlik jamiyatiga nisbatan qonun hujjatlarida belgilangan tartibda xususiylashtiriladigan aksiyadorlik jamiyatlarini boshqarishda davlat ishtirokining maxsus huquqi (“oltin aksiya”)ni joriy etish toʻgʻrisida qaror qabul qilingan taqdirda:

Aksiyadorlik birlashmalari va kompaniyalaridagi aksiyalar davlat ulushidan samarali foydalanilishi ustidan monitoring olib borish komissiyasi qarori asosida kuzatuvchi kengash tarkibiga davlat vakili tayinlanadi;

ilgari jamiyat ustavida belgilangan kuzatuvchi kengash aʼzolari soni uning tarkibiga tayinlangan davlat vakilini kiritishni hisobga olgan holda koʻpaytiriladi.

6. Jamiyatning Kuzatuvchi kengashi aʼzolari tarkibiga saylangan shaxslar cheklanmagan holda qayta saylanishlari mumkin.

Kuzatuvchi kengashning saylangan aʼzosining vakolatlarini muddatidan oldin toʻxtatish aksiyadorlar umumiy yigʻilishining qaroriga koʻra;

davlatning tayinlangan vakilining vakolatlarini muddatidan oldin toʻxtatish Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazi taklifi boʻyicha Aksiyadorlik birlashmalari va kompaniyalaridagi aksiyalar davlat ulushidan samarali foydalanilishi ustidan monitoring olib borish komissiyasi qaroriga koʻra amalga oshiriladi.

7. Davlat ulushi ustav fondining 25 foizidan ortiq boʻlgan aksiyadorlik jamiyatidagi davlat ishonchli vakili, shuningdek davlat vakili lavozimiga koʻra aksiyadorlik jamiyati Kuzatuvchi kengashi aʼzosi hisoblanadilar, aksiyadorlarning umumiy yigʻilishida saylanmaydilar (qayta saylanmaydilar).

Davlat ayni bir paytda “oltin aksiya”ga hamda aksiyadorlik jamiyatining 25 foizdan ortiq boʻlmagan oddiy aksiyalariga egalik qilgan taqdirda davlat vakili “oltin aksiya” egasi boʻlgan davlat vakolatlarini amalga oshirish bilan bir qatorda davlat aktivlarining ishonchli boshqaruvchisi vakolatlarini ham bajaradi.

8. Jamiyat ijro etuvchi organi aʼzolari Kuzatuvchi kengashga saylanishi mumkin emas. Jamiyat Kuzatuvchi kengashi aʼzolarining faoliyatini ularning ushbu jamiyatda mehnat shartnomasi (kontrakt) boʻyicha faoliyati bilan qoʻshib olib borishiga yoʻl qoʻyilmaydi.

Kuzatuvchi kengashga qonunda nazarda tutilgan tartibda ushbu jamiyatning aksiyadorlari hisoblanmagan shaxslar ham saylanishi mumkin.

9. Jamiyat Kuzatuvchi kengashi tarkibiga saylash uchun nomzodlarga qoʻyiladigan talablar ustav yoki Aksiyadorlarning umumiy yigʻilishi qarori bilan belgilanadi.

10. Aksiyador oʻziga tegishli aksiyalar boʻyicha ovozlarni toʻliq bir nomzodga berishga yoki ularni jamiyat Kuzatuvchi kengashi aʼzoligiga bir necha nomzodlar oʻrtasida taqsimlashga haqlidir.

11. Ovozlarning eng koʻp sonini olgan nomzodlar Kuzatuvchi kengash tarkibiga saylangan deb hisoblanadi.

11¹. Jamiyat Kuzatuvchi kengashi aʼzolarini saylash kumulyativ ovoz berish yoʻli bilan amalga oshiriladi.

11². Kumulyativ ovoz berishda har bir aksiyadorga tegishli boʻlgan ovozlar soni jamiyatning Kuzatuvchi kengashiga saylanishi kerak boʻlgan shaxslar soniga koʻpaytiriladi va aksiyador shu tarzda olingan ovozlarni toʻliq bir nomzodga berishga yoki ovozlarni ikki yoki undan koʻp nomzodlar oʻrtasida taqsimlashga haqlidir.

12. Jamiyat Kuzatuvchi kengashi raisi, agar jamiyat ustavida oʻzgacha hol nazarda tutilmagan boʻlsa, Kuzatuvchi kengash aʼzolari tomonidan uning tarkibidan Kuzatuvchi kengashga saylangan (tayinlangan)aʼzolar umumiy sonining koʻpchilik ovozi bilan saylanadi.

13. Jamiyatning Kuzatuvchi kengashi oʻz raisini Kuzatuvchi kengash aʼzolari umumiy sonining koʻpchilik ovozi bilan qayta saylashga haqlidir, agar jamiyat ustavida boshqacha hol nazarda tutilmagan boʻlsa.

14. Jamiyatning Kuzatuvchi kengashi raisi, agar jamiyat ustavida oʻzgacha hol nazarda tutilmagan boʻlsa, uning ishini tashkil etadi, Kuzatuvchi kengash majlislarini chaqiradi va unga raislik qiladi, majlislarda protokol yuritilishini tashkil etadi, Aksiyadorlar umumiy yigʻilishini ochadi va unda raislik qiladi.

15. Jamiyat Kuzatuvchi kengashining raisi yoʻq boʻlgan hollarda uning vazifasini Kuzatuvchi kengash aʼzolaridan biri bajaradi.

16. Kuzatuvchi kengash raisi, agar Kuzatuvchi kengashning qarori bilan ushbu vakolatlar boshqa shaxsga yuklanmagan boʻlsa, yakka boshchilik qiluvchi ijro etuvchi organ (direktor), kollegial ijro etuvchi organ (boshqaruv, direksiya) rahbari va aʼzolari, boshqaruvchi tashkilot yoki boshqaruvchi bilan tuzilgan shartnomalarni jamiyat nomidan imzolaydi.

17. Jamiyat Kuzatuvchi kengashining majlisi Kuzatuvchi kengash raisining oʻz tashabbusi bilan, Kuzatuvchi kengash, taftish komissiyasi aʼzosi, jamiyatning ijro etuvchi organi, shuningdek jamiyat ustavida belgilangan boshqa shaxslarning talabiga koʻra chaqiriladi.

Jamiyatning ustavida Kuzatuvchi kengash majlisini chaqirish va uni oʻtkazish tartibi belgilanadi. Kuzatuvchi kengash majlisi, qoidaga koʻra, yil choragida kamida bir marta toʻplanadi.

18. Kuzatuvchi kengash yigʻilishini oʻtkazish uchun kvorum jamiyat ustavida belgilanadi, lekin u Kuzatuvchi kengash saylangan (tayinlangan) aʼzolari umumiy sonining 75 foizidan kam boʻlmasligi kerak.

19. Kuzatuvchi kengash aʼzolari soni ustavda nazarda tutilgan 75 foizdan kam boʻlib qolgan hollarda Kuzatuvchi kengashning yangi tarkibini saylash uchun jamiyat aksiyadorlarning favqulodda (navbatdan tashqari) Umumiy yigʻilishini chaqirishga majburdir. Kuzatuvchi kengashning qolgan aʼzolari faqat aksiyadorlarning ana shunday favqulodda (navbatdan tashqari) Umumiy yigʻilishini chaqirish toʻgʻrisida qaror qabul qilishga haqlidir.

20. Jamiyat Kuzatuvchi kengashi majlisidagi qarorlar, agar “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi Qonunda va jamiyat ustavida oʻzgacha hol nazarda tutilmagan boʻlsa, majlisda qatnashayotganlarning koʻpchilik ovozi bilan qabul qilinadi. Jamiyat Kuzatuvchi kengashi majlisida masalalar boʻyicha qarorlar qabul qilishda Kuzatuvchi kengashning har bir aʼzosi bir ovozga ega boʻladi.

Kuzatuvchi kengashning aksiyadorlik jamiyatlarini boshqarishda davlat ishtirokining maxsus huquqi (“oltin aksiya”)dan foydalanayotgan davlat vakili ishtirokisiz qabul qilingan qarorlari, shuningdek davlatning ushbu vakili tomonidan “veto” qoʻyilgan qarorlari ijro etilmaydi.

21. Jamiyat Kuzatuvchi kengashi bir aʼzosining ovozni Kuzatuvchi kengashning boshqa aʼzosiga berishiga yoʻl qoʻyilmaydi.

22. Jamiyat Kuzatuvchi kengashi majlislarida protokol yuritiladi. Kuzatuvchi kengash majlisining protokoli yigʻilish oʻtkazilgandan soʻng 10 kundan kechiktirilmay tuziladi.

23. Majlis protokolida:

uni oʻtkazish joyi va vaqti;

majlisda qatnashuvchi shaxslar;

majlis kun tartibi;

ovoz berishga qoʻyilgan masalalar, ular boʻyicha ovoz berish yakuni;

qabul qilingan qarorlar koʻrsatiladi.

24. Jamiyat Kuzatuvchi kengashi majlisi protokoli jamiyat Kuzatuvchi kengashining majlisda qatnashayotgan aʼzolari tomonidan imzolanadi. Ular protokolning toʻgʻriligi uchun javob beradilar.

25. Kuzatuvchi kengash aʼzosi quyidagi huquqlarga ega:

Kuzatuvchi kengash majlisida shaxsan qatnashish, yigʻilishda muhokama qilinayotgan masala yuzasidan reglament bilan ajratilgan vaqt doirasida soʻzga chiqish;

Kuzatuvchi kengash qaroriga koʻra muayyan davrda aksiyadorlik jamiyatining faoliyati, uni rivojlantirish rejalari toʻgʻrisida axborot olish;

Kuzatuvchi kengashda ishlaganlik uchun (agar taqdirlash puli toʻlash jamiyat aksiyadorlarining Umumiy yigʻilishi qarorida nazarda tutilgan boʻlsa), taqdirlash puli va (yoki) xarajatlarning kompensatsiyasini olish.

Kuzatuvchi kengash aʼzolari oʻrtasida vazifalarni taqsimlash Kuzatuvchi kengash raisi tomonidan Kuzatuvchi kengashning har bir aʼzosi uchun aniq amalga oshiriladi. Kuzatuvchi kengashning har bir aʼzosi uchun taqdirlash puli miqdori faoliyat samaradorligiga qarab Aksiyadorlar umumiy yigʻilishi tomonidan belgilanadi.

26. Kuzatuvchi kengashning jamiyat bitishuv tuzishidan manfaatdor boʻlgan aʼzosi oʻz manfaatdorligi toʻgʻrisida Kuzatuvchi kengashga bitishuv tuzilishi paytigacha maʼlum qilishi shart, bitishuv toʻgʻrisidagi qaror esa Kuzatuvchi kengash tomonidan, qonunda nazarda tutilgan hollarda, tegishli ravishda Kuzatuvchi kengash aʼzolari yoki bunday manfaatdorligi boʻlmagan aksiyadorlarning koʻpchilik ovozi bilan Aksiyadorlarning umumiy yigʻilishi tomonidan qabul qilinadi.

Kuzatuvchi kengashning yoxud aksiyadorlar umumiy yigʻilishining aksiyadorlik jamiyatlarini boshqarishda davlat ishtirokining maxsus huquqi (“oltin aksiya”)dan foydalanayotgan davlat vakili tomonidan “veto” qoʻyilgan qarorlari ijro etilmaydi.

27. Kuzatuvchi kengash aʼzolari, agar ular, ularning er-xotinlari, ota-onalari, bolalari, aka-ukalari, opa-singillari, shuningdek ularning affilyatsiya qilingan barcha shaxslari:

bunday bitishuvning tomonlari hisoblansalar yoki unda vakil yoki vositachi sifatida qatnashsalar;

bitishuvlarning tomoni hisoblangan yoki unda vakil yoki vositachi sifatida qatnashadigan yuridik shaxsning yigirma yoki undan koʻp aksiyalari (ulushlar, paylari) foiziga ega boʻlsalar:

bitishuv tomoni hisoblangan yoki unda vakil yoki vositachi sifatida qatnashadigan yuridik shaxsning boshqaruv organlarida lavozimni egallab turgan boʻlsalar, shaxsiy manfaatdorlikka ega hisoblanadilar.

28. Kuzatuvchi kengash aʼzolari Kuzatuvchi kengash tomonidan u yoki bu qarorlarni qabul qilishga taʼsir koʻrsatganlik uchun bevosita yoki bilvosita haq olish huquqiga ega emas.

29. Kuzatuvchi kengash aʼzolari aksiyadorlik jamiyati imkoniyatlari (mulkiy va nomulkiy huquqlar, xoʻjalik faoliyati sohasidagi imkoniyatlar, aksiyadorlik jamiyatining faoliyati va rejalari toʻgʻrisidagi axborot)dan shaxsiy boylik orttirish maqsadida foydalanish huquqiga ega emas.

30. Kuzatuvchi kengash aʼzolari oʻzlarining lavozim majburiyatlarini halol, shuningdek aksiyadorlik jamiyati manfaatlari yoʻlida ular eng yaxshi deb hisoblaydigan usul bilan amalga oshirishga majburdirlar.

31. Jamiyat Kuzatuvchi kengashining aʼzolari aksiyadorlik jamiyati oldida qonun hujjatlariga va jamiyat ustaviga muvofiq javob beradilar. Bunda ovoz berishda qatnashmagan yoki jamiyatga zarar yetkazuvchi qarorga qarshi ovoz bergan jamiyat Kuzatuvchi kengashi aʼzolari javobgarlikdan ozod qilinadi.

32. Jamiyat yoki jamiyatning joylashtirilgan oddiy aksiyalarining umuman olganda kamida bir foiziga ega boʻlgan aksiyador (aksiyadorlar) jamiyatga yetkazilgan zararlarni qoplash toʻgʻrisida Kuzatuvchi kengash aʼzosiga nisbatan daʼvo bilan sudga murojaat qilishga haqlidir.

1. Ushbu Nizom davlatning ishonchli vakilining asosiy vazifalari, huquqlari va majburiyatlarini, ular tomonidan hisobot topshirish hamda taqdirlash puli olish tartibi va muddatlarini belgilaydi.

2. Davlatning ishonchli vakillari ulardagi davlat ulushi 25 foizdan ortiq boʻlgan xoʻjalik jamiyatlarida davlat ulushi investitsiya aktivlarining ishonchli boshqaruvchilari boshqaruviga berilgan vaqtgacha tayinlanadilar.

3. Davlatning ishonchli vakili xoʻjalik jamiyatida davlatning ishonchli vakili hisoblanadi, aksiyalarning davlat paketi (ulushi) miqdorida beriladigan huquqlar doirasida faoliyat koʻrsatadi.

4. Davlatning ishonchli vakillari Aksiyadorlik birlashmalari va kompaniyalaridagi aksiyalar davlat ulushidan samarali foydalanilishi ustidan monitoring olib borish komissiyasi yoxud uning topshirigʻiga koʻra Xususiylashtirish, monopoliyadan chiqarish va raqobatni rivojlantirish davlat qoʻmitasi Hayʼati tomonidan, shu jumladan tanlov asosida ham tayinlanadilar.

5. Davlatning ishonchli vakillari nomzodlari boʻyicha takliflar Oʻzbekiston Respublikasi Vazirlar Mahkamasining tegishli Komplekslari bilan kelishgan holda Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazi tomonidan kiritiladi.

Bunda davlatning ishonchli vakillari nomzodlari yetarli darajada iqtisodiy bilimlarga, rahbarlik ishida ishlash amaliyotiga ega boʻlgan hamda tayinlash va koʻrsatib oʻtilgan funksiyalarni bajarish paytida tarkibiga xoʻjalik jamiyati kiradigan kompaniyalar, korporatsiyalar, uyushmalar xodimlari boʻlmagan jismoniy shaxslar, shu jumladan davlat hokimiyati va boshqaruv organlari xodimlari, shuningdek investitsiya aktivlarining ishonchli boshqaruvchilari — yuridik shaxslar orasidan tanlab olinadi. Nomzodlarni tanlab olishda korporativ boshqaruv hamda qimmatbaho qogʻozlar bozori sohasida qoʻshimcha maʼlumotga ega boʻlgan shaxslarga ustunlik beriladi.

Yakka ijro etuvchi organ funksiyasini bajargan yoki koʻrsatib oʻtilgan yuridik shaxs bankrot deb eʼtirof etilgan vaqtda yuridik shaxsning ijro etuvchi organi hayʼati tarkibiga kirgan shaxslar davlatning ishonchli vakili etib tayinlanishi mumkin emas.

6. Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazi tayinlangan davlat ishonchli vakili bilan aksiyalarning davlat paketini (ulushini) boshqarish yuzasidan tegishli shartnoma tuzadi.

Davlat ishonchli vakillari bir yildan koʻp boʻlmagan muddatga, ushbu muddatni uzaytirish imkoniyati bilan tayinlanadilar.

Tomonlardan birining shartnomaning amal qilish muddati tugagach uni toʻxtatish toʻgʻrisidagi arizasi mavjud boʻlmagan taqdirda u shartnomada nazarda tutilgan muddatga va aynan oʻsha shartlarda uzaytirilgan hisoblanadi.

7. Davlatning ishonchli vakili vazifalariga quyidagilar kiradi:

aksiyador (muassis, ishtirokchi) sifatida davlat manfaatlarini himoya qilish, xoʻjalik jamiyatidagi mol-mulkning saqlanishini va undan oqilona foydalanilishini taʼminlash.

korxonada iqtisodiy islohotlarni oʻtkazishda, uning moliya-xoʻjalik faoliyatini yaxshilashda, menejment va marketing tizimini takomillashtirishda, shuningdek xususiylashtirishdan keyin qoʻllab-quvvatlashda koʻmaklashish;

ishlab chiqarishni renovatsiya qilish va korxona tomonidan ishlab chiqarilayotgan mahsulotlarni yangilash, raqobatbardoshli mahsulot ishlab chiqarishni taʼminlash maqsadida zamonaviy texnologik asbob-uskunalar va texnologiyalar asosida ishlab chiqarishni rekonstruksiya qilish va texnika bilan qayta jihozlash uchun investitsiyalar jalb etish;

aksiyalarning davlat paketi (ulushi) boʻyicha dividendlardan xoʻjalik jamiyatini rekonstruksiya qilishda va texnika bilan qayta jihozlash uchun maqsadli foydalanilishini taʼminlash.

Oʻzbekiston Respublikasi Vazirlar Mahkamasi va Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazi tomonidan belgilanadigan boshqa vazifalar.

8. Davlatning ishonchli vakili quyidagi huquqlarga ega:

jamiyatning ustavi va amaldagi qonun hujjatlarida belgilangan tartibda aksiyalarning davlat paketi (ulushi) miqdoriga muvofiq aksiyador (muassis, ishtirokchi) sifatida oʻzining barcha vakolatlaridan foydalanish;

xoʻjalik jamiyatining faoliyati toʻgʻrisidagi moliyaviy-iqtisodiy, shu jumladan korxonaning tijorat siri hisoblangan axborotlarni olish.

9. Davlatning ishonchli vakili xoʻjalik jamiyatining ijro etuvchi organi tomonidan amalga oshirilayotgan joriy faoliyatga aralashishga haqli emas, qonun hujjatlarida belgilangan holatlar bundan mustasno.

10. Davlatning ishonchli vakili quyidagilarga majbur:

aksiyalarning davlat paketi (ulushi) bilan beriladigan vakolatlarga muvofiq ushbu Nizomning 7-bandida koʻrsatilgan oʻz vazifalarining bajarilishini taʼminlash;

Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazini oʻz faoliyati natijalari va xoʻjalik jamiyatining moliya-xoʻjalik ahvoli toʻgʻrisida xabardor qilish;

oʻziga yuklangan vakolatlarni amalga oshirish chogʻida unga maʼlum boʻlgan maʼlumotlarni uchinchi shaxslarga oshkor qilmaslik va ulardan davlat manfaatlariga zid boʻlgan maqsadlarda foydalanmaslik;

jamiyatning Kuzatuvchi kengashiga yoki ijro etuvchi organga murojaat qilish yoʻli bilan davlat huquqlari va manfaatlari buzilishini bartaraf etishni talab qilish;

aksiyalarning davlat paketlari boʻyicha hisoblangan dividendlarning oʻz vaqtida budjetga toʻlanishini taʼminlashga yoʻnaltirilgan chora-tadbirlarni koʻrish;

xoʻjalik jamiyatining budjetga majburiy toʻlovlar, davlat maqsadli jamgʻarmalariga, ish haqi boʻyicha qarzi vujudga kelgan taqdirda, shuningdek korxonaning ishlab chiqarish va moliyaviy ahvoli yomonlashganda jamiyatning Kuzatuvchi kengashi tarkibini va ijro etuvchi organini qayta saylash maqsadida aksiyadorlarning (muassislarning, ishtirokchilarning) navbatdan tashqari umumiy yigʻilishi chaqirilishini talab qilish;

11. Davlatning ishonchli vakili tegishli ravishda Aksiyadorlik birlashmalari va kompaniyalaridagi aksiyalar davlat ulushidan samarali foydalanilishi ustidan monitoring olib borish komissiyasi yoki Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazi bilan kelishuvsiz xoʻjalik jamiyatining boshqaruv organlarida boshqa aksiyadorlarning (muassislarning, ishtirokchilarning) vakili boʻlishi mumkin emas;

12. Davlatning ishonchli vakiliga boshqarish xizmatlari koʻrsatganlik uchun taqdirlash puli asosiy va mukofot puli tarzida toʻlanadi.

Davlatning ishonchli vakiliga asosiy taqdirlash puli choraklar boʻyicha taqsimlagan holda yoki ular boshqaradigan aktivlardan olinadigan daromadga nisbatan foizlarda bir yil uchun yozilgan summada belgilanadi. Davlatning ishonchli vakili tomonidan olinadigan asosiy taqdirlash pulining umumiy miqdori va xususiyati shartnomada belgilanadi.

Davlatning ishonchli vakiliga mukofot puli yil natijalari boʻyicha, shartnomaga muvofiq toʻlanadi.

Davlatning ishonchli vakili faoliyatini taqdirlash uning Oʻzbekiston Respublikasi Moliya vazirligi va Xususiylashtirish, monopoliyadan chiqarish va raqobatni rivojlantirish davlat qoʻmitasi tomonidan Adliya vazirligi bilan birgalikda belgilanadigan tartib asosida aksiyalarni (ulushlarni) boshqarishi samaradorligiga bevosita bogʻliq holda amalga oshiriladi.

13. Aksiyalar (ulushlar)ning davlat paketlarini boshqarish xarajatlari, shu jumladan davlatning ishonchli vakili faoliyatini taqdirlash xarajatlari aksiyalar (ulushlar)ning davlat paketlari boʻyicha davlat budjetiga tushgan dividendlarning bir qismi hisobiga, ular boʻlmagan taqdirda esa — xususiylashtirishdan tushadigan umumiy mablagʻlar hisobiga amalga oshiriladi.

14. Davlatning ishonchli vakili oʻzi kuzatuvchi kengashining aʼzosi hisoblanadigan jamiyatning mablagʻlari hisobiga qoʻshimcha taqdirlash puli olishi mumkin. Ushbu holatda taqdirlash puli miqdorlari jamiyatning ichki normativ hujjatlari bilan belgilanadi.

15. Davlatning ishonchli vakillari faoliyatini nazorat qilish Oʻzbekiston Respublikasi Vazirlar Mahkamasining tegishli Komplekslari va Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazi tomonidan:

davlatning ishonchli vakillari tomonidan tasdiqlangan shakllar boʻyicha taqdim etiladigan har choraklik hisobotlarni tahlil qilish asosida;

ularning faoliyatini bevosita korxonada oʻrganish yoʻli bilan;

ular bilan suhbat oʻtkazish yoʻli bilan amalga oshiriladi.

16. Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazi Oʻzbekiston Respublikasi Vazirlar Mahkamasining tegishli komplekslari bilan birgalikda har yili davlatning ishonchli vakillarini attestatsiyadan oʻtkazadi, attestatsiya natijalari boʻyicha ular bilan shartnomani uzaytirish mumkinligi toʻgʻrisida qaror qabul qilinadi.

Davlatning ishonchli vakillarini attestatsiyadan oʻtkazish tartibi Aksiyadorlik birlashmalari va kompaniyalaridagi aksiyalar davlat ulushidan samarali foydalanilishi ustidan monitoring olib borish komissiyasi bilan kelishgan holda Xususiylashtirish, monopoliyadan chiqarish va raqobatni rivojlantirish davlat qoʻmitasi tomonidan tasdiqlanadi.

17. Davlatning ishonchli vakillari faoliyatini oʻrganib chiqish va Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazi tomonidan oʻtkaziladigan attestatsiya natijalariga koʻra, ushbu Nizomga muvofiq, oʻz majburiyatlarini bajarishni taʼminlamagan davlatning ishonchli vakillari almashtiriladi.

18. Davlatning ishonchli vakilini vazifasidan ozod qilish toʻgʻrisidagi qaror tegishli ravishda Aksiyadorlik birlashmalari va kompaniyalaridagi aksiyalar davlat ulushidan samarali foydalanilishi ustidan monitoring olib borish komissiyasi tomonidan (agar davlatning ishonchli vakilini Xususiylashtirish, monopoliyadan chiqarish va raqobatni rivojlantirish davlat qoʻmitasi Hayʼati tayinlansa uning tomonidan):

qoʻyilgan vazifalar va qabul qilingan majburiyatlar davlatning ishonchli vakili tomonidan bajarilmaganda;

davlatning ishonchli vakilining oʻzi oʻz majburiyatlarini bundan keyin bajarishi mumkin emasligi toʻgʻrisida ariza bilan murojaat qilganda;

qonun hujjatlarida va shartnomada nazarda tutilgan boshqa asoslarga koʻra qabul qilinadi.

19. Davlatning ishonchli vakili har chorakda, shartnomada belgilangan muddatlarda oʻz faoliyati toʻgʻrisida Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markaziga va Oʻzbekiston Respublikasi Vazirlar Mahkamasining tegishli Komplekslariga hisobot beradi. Hisobot qogʻozda va magnit manbalarida taqdim etiladi. Belgilangan shakldagi hisobot bilan birga korxonaning moliya-xoʻjalik ahvolini yaxshilash boʻyicha takliflar bilan birgalikda tahliliy axborot taqdim etiladi.

20. Davlatning ishonchli vakili oʻz majburiyatlarining oʻz vaqtida, toʻliq va zarur darajada bajarilishi uchun qonun hujjatlarida belgilangan tartibda javob beradi.

21. Aksiyadorlik jamiyatlaridagi aksiyalarning davlat paketlarini samarali boshqarish boʻyicha davlatning vakillariga yuklangan vazifalar ular tomonidan bajarilmasligi ularning asosiy ish joyidan boʻshatilishigacha boʻlgan intizomiy javobgarlikka olib keladi.

1. Ushbu Nizom investitsiya aktivlarining ishonchli boshqaruvchilariga qoʻyiladigan asosiy talablarni va ular tomonidan investitsiya aktivlarini ishonchli boshqarish amalga oshirilishini belgilaydi.

Qimmatli qogʻozlarni va investitsiya hamda xususiylashtirilgan investitsiya fondlari mol-mulkiga kiruvchi qimmatli qogʻozlarga investitsiya qilinadigan mablagʻlarni ishonchli boshqaruvni amalga oshirish tartibi va shartlari, agar qonun hujjatlarida boshqacha tartib belgilanmagan boʻlsa, ushbu Nizom bilan belgilanadi.

2. Investitsiya aktivlarini ishonchli boshqarish Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Qimmatli qogʻozlar bozorini muvofiqlashtirish va rivojlantirish markazida (keyingi oʻrinlarda matnda “qimmatli qogʻozlar bozorini tartibga solish boʻyicha vakolatli davlat organi” deb yuritiladi) investitsiya aktivlarini ishonchli boshqaruvga litsenziya olgan tijorat tashkilotlari tomonidan shuningdek bank faoliyatini amalga oshirish uchun litsenziyaga ega boʻlgan tijorat banklari bilan amalga oshiriladi.

3. Yuridik va jismoniy shaxslar, davlat hokimiyati va boshqaruv organlaridan tashqari, shuningdek mulkida davlat ulushi boʻlgan korxonalar investitsiya aktivlarining ishonchli boshqaruvchisi muassislari boʻlishi mumkin.

5. Investitsiya aktivlarining ishonchli boshqaruvchisi uning tomonidan boshqariladigan investitsiya aktivlari oʻrtacha yillik qiymatining kamida 5 foizi miqdorida oʻz moddiy aktivlariga ega boʻlishi kerak.

Investitsiya aktivlari ishonchli boshqaruvchisining oʻz moddiy aktivlari miqdori va uning tomonidan boshqariladigan investitsiya aktivlarining sof aktivlari oʻrtacha yillik qiymati Oʻzbekiston Respublikasi Moliya vazirligi bilan kelishuv boʻyicha qimmatli qogʻozlar bozorini tartibga solish boʻyicha vakolatli davlat organi belgilagan tartibda aniqlanadi.

Investitsiya aktivlarining ishonchli boshqaruvchilari oʻz moddiy aktivlarining koʻrsatilgan talablarga muvofiqligi qimmatli qogʻozlar bozorini tartibga solish boʻyicha vakolatli davlat organi tomonidan har chorakda boshqaruvchi kompaniyalar tomonidan taqdim etiladigan hisobotlarga muvofiq nazorat qilinadi.

6. Ushbu Nizomga muvofiq quyidagilar (investitsiya aktivlarini) ishonchli boshqarish obyektlari boʻlishi mumkin:

xoʻjalik yurituvchi subyektlarning qimmatli qogʻozlari, shu jumladan ular tomonidan ishonchli boshqaruv toʻgʻrisida shartnoma tuzilgan vaqtda davlat mulki boʻlgan qimmatli qogʻozlar;

xoʻjalik yurituvchi subyektlarning ularni ishonchli boshqarish toʻgʻrisida shartnoma tuzilgan vaqtda davlat mulki boʻlgan ulushlari (paylari);

muassis tomonidan ishonchli boshqaruvchiga boshqarish uchun berilgan qimmatli qogʻozlarga investitsiya qilish uchun moʻljallangan pul mablagʻlari;

ishonchli boshqaruvchi tomonidan shartnoma boʻyicha oʻz majburiyatlarini bajarish natijasida olingan pul mablagʻlari va qimmatli qogʻozlar.

Boshqa har qanday fuqarolik huquqi obyektlari investitsiya aktivlari hisoblanmaydi va ushbu Nizom talablariga muvofiq amalga oshiriladigan ishonchli boshqaruvga berilishi mumkin emas.

7. Ushbu Nizom maqsadlarida quyidagilar investitsiya aktivlarini ishonchli boshqarish muassisi deb eʼtirof etiladi:

investitsiya aktivlari egasi.

davlat mulki boʻlgan investitsiya aktivlariga nisbatan — vakolatli davlat organi.

8. Investitsiya aktivlarini ishonchli boshqarish shartnomasi shartlarini tomonlar Oʻzbekiston Respublikasi Fuqarolik kodeksi talablariga va ushbu Nizom bilan belgilangan xususiyatlarga muvofiq belgilaydilar.

9. Investitsiya aktivlari ishonchli boshqaruvchisining boshqaruv muassisi bilan tuzilgan shartnomasida quyidagilar koʻrsatiladi:

shartnoma tomonlarining nomi;

shartnoma mavzusi;

tomonlarning huquq va majburiyatlari;

ishonchli boshqaruvga beriladigan investitsiya aktivlari roʻyxati;

foyda oluvchi toʻgʻrisidagi koʻrsatma;

investitsiya aktivlarining ishonchli boshqaruvchi tomonidan hisobotlar taqdim etish muddatlari;

ishonchli boshqaruv toʻxtatilgan taqdirda investitsiya aktivlarini oluvchi shaxs (shaxslar);

investitsiyalar maqsadini, investitsiya siyosati yoʻnalishini, investitsiya faoliyatidagi cheklashlarni tavsiflovchi investitsiya deklaratsiyasi (qimmatli qogʻozlarga investitsiyalash uchun moʻljallangan pul mablagʻlari ishonchli boshqaruvga berilgan hollarda);

investitsiya aktivlarining ishonchli boshqaruvchisi faoliyatini cheklash;

investitsiya aktivlarining ishonchli boshqaruvchisiga taqdirlash puli toʻlash va uning xarajatlarini qoplash tartibi;

boshqaruv muassisi xarajatlarini qoplash tartibi;

shartnomaning amal qilishini toʻxtatish asoslari va shartlari;

tomonlarning javobgarligi;

qonun hujjatlariga zid boʻlmagan boshqa qoidalar.

10. Qonunda va ishonchli boshqaruv shartnomasida nazarda tutilgan doirada, oʻz boshqaruviga investitsiya aktivlarini qabul qilgan investitsiya aktivlarining ishonchli boshqaruvchisi ularga nisbatan mulkdorning barcha vakolatlarini amalga oshiradi, shu jumladan:

oʻz tasarrufidagi tasdiqlangan investitsiya aktivlari boʻyicha barcha huquqlarni mustaqil ravishda va oʻz nomidan amalga oshiradi (aksiyalar, ulushlar, paylar) boʻyicha dividendlar olish va obligatsiyalar boʻyicha daromad olish huquqi, xoʻjalik jamiyati aksiyadori (qatnashchisi)ning shaxsiy nomulkiy huquqlari, qimmatli qogʻozni qaytarishga toʻlovni talab qilish huquqi va shu kabilar);

oʻz tasarrufida boʻlgan investitsiya aktivlariga nisbatan barcha huquqlarni mustaqil ravishda va oʻz nomidan amalga oshiradi (qimmatli qogʻozlarni oʻzgaga berish, garovga qoʻyish, qimmatli qogʻozlar bilan har qanday bitishuvlarni yoki amaliy xatti-harakatlarni amalga oshirish huquqi).

11. Ishonchli boshqaruvda boʻlgan qimmatli qogʻozlarga investitsiyalash uchun moʻljallangan pul mablagʻlari tarzidagi investitsiya aktivlarini sarflash mutlaqo maqsadli xususiyatga egadir. Ushbu pul mablagʻlaridan investitsiya aktivlarining ishonchli boshqaruvchisi tomonidan faqat qimmatli qogʻozlarni boshqaruv muassisining mulki etib sotib olish uchun foydalanilishi yoxud ular boshqaruv muassisiga yoki boshqa foyda oluvchiga mulkiy foyda sifatida yoʻnaltirilishi mumkin.

12. Qimmatli qogʻozlarni ishonchli boshqarish boʻyicha faoliyat va qimmatli qogʻozlarga investitsiyalash uchun moʻljallangan pul mablagʻlarini ishonchli boshqarish boʻyicha faoliyat boshqaruv muassisi bilan investitsiya aktivlarining ishonchli boshqaruvchisi oʻrtasida tuziladigan ishonchli boshqaruv toʻgʻrisidagi shartnoma asosida amalga oshiriladi.

13. Shartnomani bajarish jarayonida investitsiya aktivlarining ishonchli boshqaruvchisi tomonidan boshqarish muassisi mulkiga sotib olinadigan qimmatli qogʻozlar ular mulkdor yoki investitsiya aktivlarining ishonchli boshqaruvchisining boshqa vakolatli egalari tomonidan berilgan vaqtdan boshlab ishonchli boshqaruv obyektlariga aylanadi. Bunda ana shunday qimmatli qogʻozlarni berish toʻgʻrisida qoʻshimcha bitimlarning boshqaruv muassisi bilan investitsiya aktivlarining ishonchli boshqaruvchisi oʻrtasida tuzilishi talab qilinmaydi.

14. Shartnomani bajarish jarayonida investitsiya aktivlarining ishonchli boshqaruvchisi tomonidan boshqaruv taʼsischisi mulkiga olinadigan pul mablagʻlari investitsiya aktivlarining ishonchli boshqaruvchisi obyektiga kiritiladi. Bunda investitsiya aktivlari ishonchli boshqaruvchisining ushbu pul mablagʻlarini berish toʻgʻrisida oʻzi bilan boshqaruv taʼsischisi oʻrtasida qoʻshimcha bitimlar tuzishi talab qilinmaydi. Investitsiya aktivlari ishonchli boshqaruvchisining bunday xatti-harakatlarni sodir etish natijasida paydo boʻlgan majburiyatlari koʻrsatib oʻtilgan pul mablagʻlari hisobiga bajariladi.

Investitsiya aktivlarini ishonchli boshqarish shartnomasida investitsiya aktivlarining ishonchli boshqaruvchisi tomonidan boshqaruv taʼsischisi mulkiga olingan barcha pul mablagʻlarining ular investitsiya aktivlarining ishonchli boshqaruvchisi tomonidan olingandan keyin darhol toʻliq hajmda boshqaruv taʼsischisiga berilishi kerakligi nazarda tutilgan taqdirda koʻrsatib oʻtilgan qoida amal qilmaydi.

15. Investitsiya aktivlarining ishonchli boshqaruv toʻgʻrisidagi shartnomaning qonun hujjatlarida belgilangan majburiy shartlardan tashqari qimmatli qogʻozlarga investitsiyalash uchun moʻljallangan pul mablagʻlarini ishonchli boshqaruvga berishni nazarda tutuvchi shartnomada boshqaruv muassisining pul mablagʻlarini yoʻnaltirish va investitsiyalash usullarini belgilovchi boshqaruvchi kompaniyaning investitsiya deklaratsiyasi mavjud boʻlishi kerak.

16. Investitsiya aktivlari ishonchli boshqaruvchisining investitsiya deklaratsiyasi investitsiya aktivlarini ishonchli boshqaruv shartnomasining uzviy qismi hisoblanadi. Investitsiya deklaratsiyasi qoidalari investitsiya aktivlarining ishonchli boshqaruvchisi tomonidan shartnomaning boshqa qoidalari bilan bir xil asoslarda zarur darajada bajarish uchun majburiy hisoblanadi.

Shartnomalarni tuzish boshqaruv muassisining investitsiya deklaratsiyasida bayon qilingan qoidalarni, shu jumladan oʻziga tegishli boʻlgan pul mablagʻlari deklaratsiyaga oʻtkazilgan har qanday investitsiya aktivlari – investitsiyalash obyektlarini investitsiyalashga roziligini bildiradi.

17. Investitsiya aktivlari ishonchli boshqaruvchisining investitsiya deklaratsiyasida quyidagilar boʻlishi kerak:

investitsiya aktivlarini ishonchli boshqaruv maqsadini belgilash (boshqaruv muassisining pul mablagʻlaridan foydalanishning eng yuqori tijorat samaradorligiga erishish yoki boshqa aniq maqsad);

boshqaruv muassisining pul mablagʻlarini investitsiya qilish mumkin boʻlgan investitsiya aktivlari roʻyxati;

shartnoma amal qiladigan butun muddat davomida investitsiya aktivlarining ishonchli boshqaruvchisi amal qilish majbur boʻlgan investitsiya aktivlari tarkibi toʻgʻrisidagi maʼlumotlar (har xil turdagi va emitentdagi qimmatli qogʻozlar nisbati; ishonchli boshqaruvda boʻlgan mazkur boshqaruv muassisining qimmatli qogʻozlari, pul mablagʻlari va investitsiya aktivlarining boshqa turlari oʻrtasidagi nisbat);

mazkur investitsiya deklaratsiyasi qoidalari investitsiya aktivlarining ishonchli boshqaruvchisi uchun amal qiladigan va majburiy hisoblanadigan muddat.

18. Investitsiya aktivlarini ishonchli boshqaruv toʻgʻrisidagi shartnomaning bir qismi hisoblanadigan investitsiya deklaratsiyasi qoidalarining amal qilish muddati umuman shartnomaning amal qilish muddatiga teng yoki undan kam boʻlishi mumkin.

Ushbu investitsiya deklaratsiyasining amal qilish muddati tugagach investitsiya aktivlarini ishonchli boshqaruv shartnomasining tomonlari qoʻshimcha bitim bilan unda koʻrsatilgan muddatga yangi investitsiya deklaratsiyasini amalga kiritishadi.

Investitsiya deklaratsiyasining amal qilish muddati tugagach, agar shartnomaning tomonlaridan hech biri uni oʻzgartirish toʻgʻrisida talab qoʻymasa, ushbu deklaratsiya unda koʻrsatilgan muddatga uzaytirilgan hisoblanadi, lekin bu muddat ushbu deklaratsiya uning bir qismi hisoblanadigan shartnomaning amal qilish muddatidan koʻp boʻlishi mumkin emas.

19. Investitsiya deklaratsiyasining amalda boʻlish muddati boʻyicha koʻrsatma, buning uchun asoslar mavjud boʻlganda, koʻrsatilgan muddat tugagungacha unga oʻzgartirish va qoʻshimchalar kiritish uchun toʻsiq boʻlmaydi.

20. Boshqaruv muassisining amaldagi investitsiya deklaratsiyasiga oʻzgartirish va qoʻshimchalar kiritish toʻgʻrisidagi talabi investitsiya aktivlarining ishonchli boshqaruvchisi uchun majburiy hisoblanadi.

Investitsiya aktivlarining ishonchli boshqaruvchisi koʻrsatib oʻtilgan oʻzgartirishlarga rozi boʻlmagan taqdirda ular boshqaruv muassisi tomonidan shartnomaga ilova qilinadigan bir tomonlama dalolatnoma (bayonot) tuzish yoʻli bilan rasmiylashtiriladi, muassisga investitsiya aktivlarining ishonchli boshqaruvchisi tomonidan muassis talablarini bajarishda mumkin boʻlgan salbiy mulkiy oqibatlar boshlanishi xavfi yuklanadi.

Investitsiya aktivlari ishonchli boshqaruvchisining amaldagi deklaratsiyaga oʻzgartirish va qoʻshimchalar kiritish toʻgʻrisidagi talabi shartnoma tomonlarining shartnomaga ilova qilinadigan tegishli qoʻshimcha bitimlar tuzishi yoʻli bilan qondiriladi.

21. Investitsiya aktivlarining ishonchli boshqaruvchisi tomonidan investitsiya deklaratsiyalari tuzish qoidalari qimmatli qogʻozlar bozorini tartibga solish boʻyicha vakolatli davlat organining normativ hujjatlari bilan belgilanadi.

22. Qimmatli qogʻozlarni ishonchli boshqaruvga berish investitsiya aktivlari ishonchli boshqaruvchisining ularga mulkdorlik huquqi belgilanishiga olib kelmaydi.

23. Qimmatli qogʻozlar bilan ishonchli boshqaruv toʻgʻrisidagi zarur tartibda rasmiylashtirilgan yozma shartnomaning mavjudligi qimmatli qogʻozlarni Investitsiya aktivlarining ishonchli boshqaruvchisiga berish uchun yetarli asos hisoblanadi.

Qimmatli qogʻozlar egalari reyestrlarini yurituvchi shaxslar, shuningdek boshqa har qanday manfaatdor shaxslar va organlar ularga qimmatli qogʻozlarni ishonchli boshqaruvga berish uchun asos sifatida boshqa hujjatlarni taqdim etishni talab qilish huquqiga ega emas.

24. Investitsiya aktivlarining ishonchli boshqaruvchisiga ushbu Nizomda nazarda tutilgan tartibda va asoslarda berilgan investitsiya aktivlari boshqaruv muassisining boshqa mol-mulkidan, shuningdek investitsiya aktivlari ishonchli boshqaruvchisining mol-mulki va oʻz investitsiya aktivlaridan ajratiladi, ularga boshqaruvchi kompaniyaning majburiyatlari boʻyicha undirishlar qaratilishi mumkin emas va ushbu aktivlar, bankrotlik holati vujudga kelganda tanlov massasiga kiritilmaydi.

Investitsiya aktivlari investitsiya aktivlarining ishonchli boshqaruvchisida alohida balansda aks ettiriladi va u boʻyicha mustaqil hisob yuritiladi. Investitsiya aktivlarini ishonchli boshqaruv bilan bogʻliq faoliyat boʻyicha hisob-kitoblar uchun alohida bank hisob raqami ochiladi.

25. Boshqaruv muassislarining pul mablagʻlari hisob raqamlarini yuritish uchun investitsiya aktivlarining ishonchli boshqaruvchilari tomonidan banklarda “boshqaruv muassisining ishonchli boshqaruvga berilgan pul mablagʻlari” deb yozib qoʻyilgan alohida hisob-raqamlari ochiladi. Alohida hisob raqamlari qonun hujjatlarida belgilangan tartibda ochiladi.

Boshqaruv muassislarining pul mablagʻlari hisob raqamlarini yuritish maqsadlari uchun investitsiya aktivlarining ishonchli boshqaruvchisi tomonidan ochiladigan alohida hisob raqamlari soni cheklanmaydi, qonun hujjatlarida nazarda tutilgan hollar bundan mustasno. Alohida hisob raqamlariga xizmat koʻrsatish shartlari bank va investitsiya aktivlarining ishonchli boshqaruvchisi oʻrtasidagi shartnomada belgilanadi.

Alohida hisob raqamlariga faqat ushbu Nizomga muvofiq investitsiya aktivlarining ishonchli boshqaruvchisi bilan shartnoma tuzgan boshqaruv muassislari mablagʻlari kiritiladi.

26. Boshqaruv muassislarining pul mablagʻlarini ajratish investitsiya aktivlarining ishonchli boshqaruvchisi tomonidan unga berilgan pul mablagʻlarini alohida (ajratilgan) balansda hisobga olish yoʻli bilan amalga oshiriladi, ushbu balans boshqaruvchi kompaniya tomonidan qonun hujjatlarida nazarda tutilgan tartibda har bir boshqaruv muassisi va (yoki) pul mablagʻlari hisob raqamini yuritishni nazarda tutuvchi har bir shartnoma uchun ochiladi va yuritiladi.

Investitsiya aktivlarining ishonchli boshqaruvchisi va jismoniy shaxs hisoblanadigan investitsiya aktivlarini ishonchli boshqaruv muassisi oʻrtasidagi hisob-kitoblar qonun hujjatlariga muvofiq amalga oshiriladi.

27. Investitsiya aktivlarini ishonchli boshqaruv muassisi tomonidan pul mablagʻlarini investitsiya aktivlarining ishonchli boshqaruvchisiga berish naqd boʻlmagan pul mablagʻlarini uning tomonidan ochiladigan alohida hisob raqamiga oʻtkazish yoki naqd mablagʻlarni investitsiya aktivlari ishonchli boshqaruvchisining bankdagi hisob raqamiga oʻtkazish yoʻli bilan amalga oshiriladi.

28. Investitsiya aktivlarining ishonchli boshqaruvchisi mijozning pul mablagʻlari hisob raqamiga pul mablagʻlari oʻtkazilganini ular alohida hisob raqami ochilgan bank tomonidan alohida hisob raqamiga oʻtkazilgandan keyin navbatdagi bank kunidan kechikmay oʻz hisobida aks ettirishi shart.

29. Boshqaruv muassisi investitsiya aktivlarini ishonchli boshqaruv toʻgʻrisidagi shartnomani tuzishda investitsiya aktivlarining ishonchli boshqaruvchisi faoliyatini cheklash huquqiga ega, ushbu cheklashlar investitsiya aktivlarining ishonchli boshqaruvchisiga quyidagilarni taqiqlaydi:

oʻz boshqaruvida boʻlgan pul mablagʻlari hisobiga oʻz mulkidagi, oʻz muassisi mulkidagi qimmatli qogʻozlarni sotib olish;

oʻz boshqaruvidagi qimmatli qogʻozlarni oʻz mulkiga, oʻz muassislari mulkiga begonalashtirish, agar qonun hujjatlarida yoki shartnomada boshqacha qoida belgilanmagan boʻlsa;

investitsiya aktivlarining ishonchli boshqaruvchisi ayni bir vaqtda boshqa shaxs tomonida broker (vositachi, ishonchli vakil) sifatida ish koʻradigan bitishuvlar tuzish;

oʻzi va oʻzining muassislari tomonidan chiqarilgan qimmatli qogʻozlarni oʻz boshqaruvida boʻlgan pul mablagʻlari hisobiga sotib olish;

tugatish jarayonida boʻlgan tashkilotlarning qimmatli qogʻozlarini oʻz boshqaruvida boʻlgan pul mablagʻlari hisobiga sotib olish;

oʻziga tobe shaxslar tomonidan chiqarilgan qimmatli qogʻozlarini oʻz boshqaruvida boʻlgan pul mablagʻlari hisobiga sotib olish;

investitsiya aktivlarini oʻziga tobe shaxslarga joylashtirish;

oʻz boshqaruvida boʻlgan qimmatli qogʻozlarni ushbu bandning ikkinchi—sakkizinchi xat boshida belgilangan qimmatli qogʻozlarga almashtirish;

oʻz boshqaruvida boʻlgan qimmatli qogʻozlarni toʻlov muddatini 30 kalendar kundan koʻproq muddatga kechiktirishni yoki uni boʻlib-boʻlib toʻlashni nazarda tutuvchi shartnomalar boʻyicha oʻzgaga berish;

oʻz boshqaruvida boʻlgan qimmatli qogʻozlarni oʻz majburiyatlarini (boshqaruvchi tomonidan ishonchli boshqaruv toʻgʻrisidagi tegishli shartnoma bajarilishi munosabati bilan paydo boʻladigan majburiyatlardan tashqari), oʻz muassislari majburiyatlarini, boshqa har qanday uchinchi shaxslarning majburiyatlarini bajarishni taʼminlash uchun garovga berish;

oʻz boshqaruvida boʻlgan qimmatli qogʻozlarni uchinchi shaxsning depozit tasarrufchisi va (yoki) oluvchisi sifatida belgilangan holda saqlashga berish;

oʻz boshqaruvida boʻlgan pul mablagʻlarini uchinchi shaxslar foydasiga omonatga qoʻyish yoxud koʻrsatilgan mablagʻlarni uchinchi shaxs (shaxslar) tasarrufchisi etib belgilangan hisob raqamiga (hisob raqamlariga) oʻtkazish;

oʻz boshqaruvida boʻlgan pul mablagʻlari hisobiga har qanday uchinchi shaxslar ular boʻyicha toʻlovning oluvchilari etib belgilangan sugʻurta shartnomalarini tuzish (sugʻurta polislarini sotib olish).

Qonun yoki shartnomada investitsiya aktivlarining ishonchli boshqaruvchisi faoliyatiga qoʻshimcha cheklashlar belgilanishi mumkin.

30. Investitsiya aktivlarining ishonchli boshqaruvchisi shartnoma boʻyicha oʻz majburiyatlarini bajarish jarayonida boshqaruv muassislari bilan oldindan kelishmasdan boshqaruvchi kompaniya ayni bir vaqtda, ularning mol-mulkini ishonchli boshqarish toʻgʻrisida shartnomalar tuzilgan ikkala tomonning manfaatlarini ifodalaydigan bitishuvlarni sodir etishga haqli emas.

31. Investitsiya aktivlarining ishonchli boshqaruvchisiga boshqaruv muassisiga xizmatlar koʻrsatganlik uchun taqdirlash puli asosiy va mukofot puli tarzida toʻlanadi.

Investitsiya aktivlarining ishonchli boshqaruvchisiga asosiy taqdirlash puli choraklar boʻyicha taqsimlagan holda yoki ular boshqaradigan aktivlardan olinadigan daromadga nisbatan foizlarda bir yil uchun yozilgan summada belgilanadi. Investitsiya aktivlarining ishonchli boshqaruvchisi oladigan asosiy taqdirlash pulining umumiy miqdori va xususiyatlari shartnomada belgilanadi.

Investitsiya aktivlarining ishonchli boshqaruvchisiga mukofot puli yil natijalari boʻyicha, shartnomaga muvofiq toʻlanadi.

Davlat aktivlarini boshqargan taqdirda investitsiya aktivlarining ishonchli boshqaruvchisi faoliyatini taqdirlash uning Oʻzbekiston Respublikasi Moliya vazirligi va Xususiylashtirish, monopoliyadan chiqarish va raqobatni rivojlantirish davlat qoʻmitasi tomonidan Adliya vazirligi bilan birgalikda belgilanadigan tartib asosida boshqarishi samaradorligiga bevosita bogʻliq holda amalga oshiriladi.

31-1. Investitsiya aktivlarining ishonchli boshqaruvchisi oʻzi kuzatuvchi kengashining aʼzosi hisoblanadigan jamiyatning mablagʻlari hisobiga qoʻshimcha taqdirlash puli olishi mumkin. Ushbu holatda taqdirlash puli miqdorlari jamiyatning ichki normativ hujjatlari bilan belgilanadi.

32. Investitsiya aktivlarini ishonchli boshqarishda investitsiya aktivlarining ishonchli boshqaruvchisi tomonidan qilingan barcha xarajatlar miqdori, ularni toʻlash muddatlari va tartibi hamda investitsiya aktivlarining ishonchli boshqaruvchisini boshqaruv muassisiga koʻrsatilgan xizmatlar uchun taqdirlash puli toʻlash ular oʻrtasida tuziladigan investitsiya aktivlarini ishonchli boshqarish shartnomasida belgilanadi.

Aksiyalar (ulushlar)ning davlat paketlari boʻyicha davlat budjetiga tushgan dividendlar, ular boʻlmagan taqdirda esa — xususiylashtirishdan tushgan umumiy mablagʻlar davlat aktivlarini ishonchli boshqarganlik uchun taqdirlash puli toʻlashning manbalari hisoblanadi. Investitsiya aktivlarini va xususiylashtirish investitsiya fondlarini ishonchli boshqarishni amalga oshirish bilan bogʻliq taqdirlashning xususiyatlari qonun hujjatlariga muvofiq belgilanadi.

33. Investitsiya aktivlarining ishonchli boshqaruvchisini qayta tashkil etish va tugatish qonun hujjatlarida belgilangan tartibda amalga oshiriladi.

Ixtiyoriy ravishda qayta tashkil etish yoki tugatishda investitsiya aktivlarining ishonchli boshqaruvchisi amalga oshiriladigan oʻzgarishlar toʻgʻrisida boshqaruv muassislarini yozma shaklda, agar shartnomada boshqa muddat belgilanmagan boʻlsa, qayta tashkil etish yoki tugatish tartibot-qoidasi boshlangungacha uch oydan kechikmay xabardor qilishi shart.

34. Investitsiya fondlarining investitsiya aktivlarini ishonchli boshqarish qonun hujjatlari talablariga muvofiq boʻlgan hamda investitsiya fondining Kuzatuvchi kengashi bilan shartnoma (kontrakt) tuzgan yoxud ushbu Nizomda belgilangan tartibda qimmatli qogʻozlar boshqaruvini tartibga solish boʻyicha vakolatli davlat organi tomonidan tayinlangan investitsiya aktivlarini ishonchli boshqaruvchi tomonidan amalga oshiriladi.

35. Investitsiya aktivlarini ishonchli boshqaruvchi investitsiya aktivlari va investitsiya fondlarini ishonchli boshqaruvchi, investitsiya aktivlarini va xususiylashtirilgan investitsiya fondini ishonchli boshqaruvchi oʻrtasida tuzilgan shartnomaga (kontraktga), mazkur Nizomga, qimmatli qogʻozlar bozorini tartibga solish boʻyicha vakolatli davlat organining normativ hujjatlariga va amaldagi qonun hujjatlariga muvofiq fondlar aktivlarini boshqarishni amalga oshirishi shart.

36. Fondni taʼsis etish bosqichida investitsiya aktivlarini ishonchli boshqaruvchi bilan Muassislar kengashi raisi shartnoma (kontrakt) tuzadi. Fond aksiyadorlarining birinchi Umumiy yigʻilishi tomonidan shartnoma (kontrakt) tasdiqlangandan keyin investitsiya aktivlarini ishonchli boshqaruvchi bilan shartnoma (kontrakt)ni fondning Kuzatuvchi kengashi raisi qayta tuzadi.

37. Investitsiya fondi bilan investitsiya aktivlarini ishonchli boshqaruvchi oʻrtasidagi shartnoma (kontrakt) Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi tomonidan tasdiqlangan Fondni boshqarish toʻgʻrisida investitsiya aktivlarini ishonchli boshqaruvchisi bilan investitsiya fondining namunaviy kontraktiga yoki fondni boshqarish toʻgʻrisida investitsiya aktivlarini ishonchli boshqaruvchi bilan xususiylashtirilgan investitsiya fondining namunaviy kontraktiga muvofiq tuziladi.

38. Investitsiya aktivlarini ishonchli boshqaruvchi investitsiya fondlarining aktivlarini boshqarishda ushbu fondlar nomidan ish koʻradi. Bunda u investitsiya fondi bilan tuzilgan shartnoma (kontrakt)da investitsiya fondining nomiga havola qilgan holda fondning investitsiya aktivlarini ishonchli boshqaruvchi sifatida ish koʻrayotganligini koʻrsatishi shart.

Investitsiya aktivlarini ishonchli boshqaruvchi investitsiya fondlari aktivlarini ushbu fondlarning aksiyadorlari manfaatlarini koʻzlab boshqarishi shart.

39. Investitsiya aktivlarini ishonchli boshqaruvchining faoliyati investitsiya fondining Kuzatuvchi kengashi va depozitariy tomonidan nazorat qilinadi. Fondning Kuzatuvchi kengashi investitsiya aktivlarini ishonchli boshqaruvchi bilan tuziladigan bitishuvlar roʻyxatini, shuningdek bitishuvlarning xususiyati va hajmi boʻyicha cheklanishini belgilashga haqlidir.

40. Investitsiya aktivlarini ishonchli boshqaruvchi fond aktivlarini boshqarish boʻyicha butun faoliyatni amalga oshiradi, shu jumladan:

Aksiyadorlar umumiy yigʻilishining joyi, muddatlari va kun tartibi toʻgʻrisidagi bildirishnomani tuzadi va yetkazib berishni taʼminlaydi;

Aksiyadorlar umumiy yigʻilishi va fondning Kuzatuvchi kengashi majlisi protokollarini yuritadi;

qonun hujjatlariga muvofiq fondning yillik hisobotlari va boshqa hisobotlarini ishlab chiqadi;

ustav talablariga, shuningdek qonun hujjatlariga muvofiq fondning sof aktivlari qiymati boʻyicha maʼlumotlarni aniqlaydi va eʼlon qiladi;

fond ularning aksiyalari mulkdori boʻlgan aksiyadorlik jamiyatlariga nisbatan fond nomidan aksiyadorlarning barcha huquqlarini amalga oshiradi;

fond aktivini tashkil etadigan pul mablagʻlarini investitsiya fondining bank hisob raqamiga joylashtiradi;

ustav talablariga va amaldagi qonun hujjatlariga muvofiq Investitsiya fondlari toʻgʻrisidagi nizom va Xususiylashtirish investitsiya fondlari toʻgʻrisidagi nizomga koʻra majburiy eʼlon qilinishi nazarda tutilgan investitsiya fondlariga nisbatan maʼlumotlarni, moliyaviy hisobotlar va reklama xususiyatiga ega boʻlgan materiallarni tayyorlash, tarqatish va eʼlon qilishni nazorat qiladi va amalga oshiradi;

investitsiya siyosati masalalari boʻyicha fondning Kuzatuvchi kengashiga maslahat xizmatlari koʻrsatadi;

investitsiya aktivlarini ishonchli boshqaruvchi bilan investitsiya fondi, investitsiya aktivlarini ishonchli boshqaruvchi va xususiylashtirilgan investitsiya fondi oʻrtasida tuzilgan shartnoma (kontrakt)ga muvofiq fondga boshqa xizmatlar koʻrsatadi.

41. Investitsiya aktivlarini ishonchli boshqaruvchi:

qonun hujjatlariga muvofiq buxgalteriya hisobi, shuningdek fondning barcha hujjatlari va hisobotlari yuritilishi;

qimmatli qogʻozlarni fond investitsiya qilgan barcha aksiyadorlik jamiyatlarida boshqaruv organlarida fondning vakilligini;

fond investitsiyalari toʻgʻrisidagi axborotning maxfiyligini taʼminlaydi, shuningdek investitsiya fondini boshqarish uchun boshqaruvchi tomonidan tayinlangan har qanday shaxs ushbu bitim boʻyicha unga tahliliy xizmatlar koʻrsatilishi uchun investitsiya fondiga nisbatan axborotning maxfiyligiga rioya qilinishi uchun (ham xizmatlar koʻrsatish davrida, ham ushbu davr tamom boʻlgandan keyin) kafolat olishi maqsadida tegishli chora-tadbirlar koʻradi (maxfiylik toʻgʻrisidagi kontraktlar tuzilishi ham shu jumlaga kiradi);

fond hujjatlari saqlanishi va rasmiylashtirilishining toʻgʻriligini;

eʼlon qilingan dividendlarning fond aksiyadorlariga oʻz vaqtida va toʻliq toʻlanishini taʼminlaydi.

42. Investitsiya aktivlarini ishonchli boshqaruvchi quyidagi huquqlarga ega:

fondlarning cheklanmagan miqdordagi investitsiyalarini boshqarish;

fondlar nomidan qimmatli qogʻozlar bilan bitishuvlar tuzish, pul mablagʻlarini qimmatli qogʻozlarga investitsiya qilish uchun fondning pul mablagʻini tasarruf etish, qonun hujjatlariga, ustavga va investitsion deklaratsiyaga muvofiq fondlarning aktivlari bilan boshqa bitishuvlarni amalga oshirish;

fondning nomidan fond bilan tuzilgan shartnoma (kontrakt)ga muvofiq fondning moliyaviy-xoʻjalik faoliyati bilan bogʻliq bank hujjatlarini va boshqa hujjatlarni imzolash;

aksiyalar chiqarilishini hisobga olish va depozitariy uchun majburiy hisoblangan fond aktivlarini joylash yuzasidan farmoyishlar chiqarish;

investitsiya fondlari sof aktivlarini baholash tartibi toʻgʻrisidagi nizomlarga, investitsion deklaratsiyaga va investitsiya fondlari faoliyati cheklanishiga muvofiq fondlar faoliyati bilan bogʻliq xarajatlarni moliyalashtirish uchun fondlarning pul mablagʻlaridan foydalanish;

fond Kuzatuvchi kengashining barcha majlislarida kuzatuvchi sifatida ovoz berish huquqisiz bir nafar vakilga ega boʻlish huquqiga ega, faoliyat yoki fondlarni boshqarish toʻgʻrisida investitsiya aktivlarining ishonchli boshqaruvchisi bilan shartnoma (kontrakt) tuzish shartlari bilan bogʻliq masalalar boʻyicha majlislarda muhokama yoki ovoz berish yuz beradigan majlislarning davrlari bundan mustasno;

fond ustaviga va amaldagi qonun hujjatlariga muvofiq navbatdan tashqari Aksiyadorlar umumiy majlisini va Kuzatuvchi kengashni chaqirishni talab qilish;

fondning Kuzatuvchi kengashidan tuzilgan shartnoma (kontrakt)ga va fond ustaviga muvofiq investitsiya aktivlarini ishonchli boshqaruvchi tomonidan fond nomidan oʻz vazifalari bajarilishi uchun bank hujjatlarini va boshqa hujjatlarni imzolash huquqini yoki boshqa vakolatlarni berishni (ishonchnoma berish yoʻli bilan) talab qilish.

43. Investitsiya aktivlarini ishonchli boshqaruvchi quyidagilarga majbur:

a) ustav qoidalariga, Kuzatuvchi kengash va fond aksiyadorlari umumiy yigʻilishi qarorlariga, ushbu Nizomga, shuningdek boshqa qonun hujjatlariga muvofiq investitsiyalarni va qimmatli qogʻozlar portfelini samarali boshqarishni taʼminlash hamda fondlar aksiyadorlarining manfaatlarini himoya qilish uchun imkoni boʻlgan barcha saʼy-harakatlarni amalga oshirish;

b) operatsiyalarni amalga oshirish, shu jumladan fond aksiyalari yoki fondning oxirgi yillik balans hisobotiga muvofiq qiymati fond aktivlari qiymatining 10 foizidan oshadigan fondning boshqa qiymatlari oldi-sotdisi boʻyicha bitishuvlarni amalga oshirishda fondning Kuzatuvchi kengashining yozma roziligini olish;

v) ustavga muvofiq fond aksiyalariga yozilish boʻyicha qimmatli qogʻozlar bozorining professional qatnashchisi bilan zarur tayyorgarlik ishlarini olib borish hamda unga yozilish natijasida olingan barcha mablagʻlarni fondning hisob raqamiga kechiktirmasdan oʻtkazish majburiyatini yuklash;

g) fondga tegishli boʻlgan barcha naqd mablagʻni, cheklar va naqd boʻlmagan toʻlovlarni fondning bank hisob raqamiga darhol oʻtkazish;

d) fondning bank hisob raqamidan mablagʻlar oʻtkazish boʻyicha barcha toʻlov topshiriqlarini ushbu topshiriqlar bankka taqdim etilishidan oldin imzolash uchun qimmatli qogʻozlarning Markaziy depozitariysiga taqdim etish;

e) har bir moliyaviy chorak tugallangandan keyin 30 kun mobaynida Kuzatuvchi kengashga quyidagi hujjatlar shaklida ushbu davr uchun fond ishi toʻgʻrisidagi hisobotni taqdim etish:

hisobot davrining boshi va oxiri boʻyicha fondning buxgalteriya balansi, moliyaviy natijalar va daromadlardan foydalanish toʻgʻrisidagi hisobot, shuningdek buxgalteriya hisobotining boshqa shakllari;

hisobot davrida maxsus davlat krediti olinishi, undan foydalanilishi va uning qaytarilishi toʻgʻrisidagi hisobot;

Kuzatuvchi kengash tomonidan belgilangan hisobot davrida investitsiya yoki xususiylashtirilgan investitsiya fondining qimmatli qogʻozlari va boshqa aktivlari bilan sodir etilgan bitishuvlar roʻyxati;

belgilangan shakl boʻyicha hisobot davri mobaynida investitsiya yoki xususiylashtirilgan investitsiya fondi mablagʻlari hisobiga investitsiya aktivlarini ishonchli boshqaruvchi tomonidan qilingan xarajatlar toʻgʻrisidagi hisobot;

j) Kuzatuvchi kengashni investitsiya aktivlarini ishonchli boshqaruvchi rahbarlari tarkibidagi oʻzgarishlar toʻgʻrisida oʻz vaqtida xabardor qilish;

z) aksiyadorlarning yillik umumiy yigʻilishi oʻtkazilishi kunidan 30 kun oldin Kuzatuvchi kengashga fond faoliyati toʻgʻrisidagi balans hisobotni, shu jumladan sof aktivlar qiymati toʻgʻrisidagi hisobotni, foyda va zararlar toʻgʻrisidagi hisobotni, maxsus davlat kreditlari olinganligi, undan foydalanganligi va uning qaytarilganligi toʻgʻrisidagi hisobotni, shuningdek har bir aniq holatda fondning mustaqil auditorlari tomonidan tasdiqlangan hisobot davrining oxirgi kunida tuzilgan buxgalteriya hisobotining boshqa shakllarini taqdim etish;

i) fondlarning investitsiya portfelini tashkil etadigan barcha aktivlarni qimmatli qogʻozlar Markaziy depozitariysida saqlash;

k) fondlarning aksiyalari bilan bitishuvlar boʻyicha hisob-kitobda xato qilingan taqdirda mablagʻlar fond hisob raqamiga qaytarilishini yoki kompensatsiya qilinishini taʼminlash;

l) Xususiylashtirish investitsiya fondlarida buxgalteriya hisobining xususiyatlari toʻgʻrisidagi nizomda belgilangan hajmda va muddatlarda qimmatli qogʻozlar bozorini tartibga solish boʻyicha vakolatli davlat organiga hisobot taqdim etish.

44. Investitsiya fondi Kuzatuvchi kengash nomidan quyidagilarga majbur:

investitsiya aktivlarini ishonchli boshqaruvchisining yozma talabiga koʻra fondning aktivlarini boshqarish yuzasidan tuzilgan shartnoma (kontrakt)ga, investitsion deklaratsiyaga va ustav fondiga muvofiq ishonchli boshqaruvchi oʻz majburiyatlari bajarilishi uchun unga hujjatlarni imzolash huquqini berishi uchun (ishonchnoma berish yoʻli bilan) barcha zarur chora-tadbirlarni koʻrish;

investitsiya aktivlarini ishonchli boshqaruvchi tomonidan fond bilan tuzilgan shartnoma (kontrakt) boʻyicha oʻz majburiyatlari bajarilishini nazorat qilish.

Fond investitsiya aktivlarini ishonchli boshqaruvchi tomonidan shartnoma (kontrakt) bajarilmagan yoki zarur darajada bajarilmagan taqdirda uni bekor qilish huquqiga ega.

45. Investitsiya aktivlarini ishonchli boshqaruvchi investitsiya aktivlarini ishonchli boshqaruvchining qonun hujjatlarida taqiqlangan xatti-harakatlari natijasida fond koʻrgan zarar uchun fond oldida javob beradi.

46. Investitsiya aktivlarini ishonchli boshqaruvchi fond aktivlarini boshqarish boʻyicha faoliyatni amalga oshirishda quyidagilarga haqli emas:

fond nomidan qonun hujjatlarida nazarda tutilgan investitsiya va xususiylashtirish investitsiya fondlari faoliyatida cheklashlar boʻlgan xatti-harakatni amalga oshirish;

uning natijasida qimmatli qogʻozlar bozorini boshqarish boʻyicha vakolatli davlat organi tomonidan tasdiqlangan normativ hujjatlar talablari, shu jumladan aktivlar tuzilmasiga qoʻyiladigan talablar buziladigan bitishuvlarni sodir etishga;

xususiylashtirish investitsiya fondi tomonidan xususiylashtirilgan korxonalarning aksiyalari uchun toʻlovni kechiktirish shaklida berilgan maxsus davlat kreditlaridan tashqari investitsiya portfelini tashkil etadigan fondning aktivlari hisobiga qaytarilishi kerak boʻlgan qarz mablagʻlarini jalb etish;

fondning aktivlarini boshqarish yoki uchinchi shaxslarning majburiyatlarini ijro etish bilan bogʻliq boʻlmagan oʻz majburiyatlarini ijro etishni taʼminlash uchun fondning investitsiya portfelini tashkil etadigan aktivlardan foydalanish;

xususiylashtirilgan korxonalarning aksiyalaridan va davlatning qimmatli qogʻozlaridan tashqari xususiylashtirilgan investitsiya fondi aktivlari hisobiga qimmatli qogʻozlarni sotib olish;

fondning aktivlari hisobiga oʻzining affilyatsiya qilingan shaxslaridan investitsiyalash obyektlarini sotib olishga yoxud bunday aktivlarni ularga berish;

oʻzi boshqaradigan investitsiya fondlarining aksiyalarini sotib olish;

oʻzining affilyatsiya qilingan shaxslari tomonidan chiqarilgan qimmatli qogʻozlarni, shuningdek oʻzining affilyatsiya qilingan shaxslari tomonidan boshqariladigan investitsiya fondlarining aksiyalarini sotib olish;

fondlarning investitsiya aktivlarini oʻzining affilyatsiya qilingan shaxslariga, depozitariyga, fondning mustaqil auditoriga, shuningdek davlat organiga joylashtirish;

fondning investitsiya portfelini tashkil etadigan aktivlarini oʻz mulki qilib sotib olish, oʻz mol-mulkini fondning aktivini tashkil etadigan mol-mulk tarkibiga berish; investitsiya aktivlarini ishonchli boshqaruvchiga mukofot puli toʻlashda xato aniqlangan taqdirda, qimmatli qogʻozlar bozorini boshqarish boʻyicha vakolatli davlat organining normativ hujjatlarida nazarda tutilgan boshqa hollarda investitsiya fondi chiqimlarining belgilangan normalaridan ortiqcha xarajatlarni toʻlash, pul mablagʻlarini fond aktiviga qaytarish uchun oʻz pul mablagʻlaridan foydalanish hollari bundan mustasno;

boshqa investitsiya aktivlarini ishonchli boshqaruvchi, uning affilyatsiya qilingan shaxslari, investitsiya fondining mustaqil auditori tomonidan chiqarilgan qimmatli qogʻozlarni sotib olish;

fondning mol-mulkini investitsiya aktivlarini ishonchli boshqaruvchining oʻzi tomonidan yoki investitsiya aktivlarini ishonchli boshqaruvchini nazorat qiluvchi yoxud uning nazorati ostidagi shaxslar tomonidan chiqarilgan qimmatli qogʻozlarga investitsiya qilish boʻyicha toʻgʻridan-toʻgʻri yoki uchinchi shaxslar orqali bitim tuzish, shuningdek fondning mol-mulkini fondning Kuzatuvchi kengashining oldindan berilgan yozma roziligisiz investitsiya aktivlarini ishonchli boshqaruvchi iqtisodiy manfaatga ega boʻlgan korxonalarning qimmatli qogʻozlariga investitsiya qilish;

fondning Kuzatuvchi kengashi ruxsatisiz ustav fondida fondning ulushi besh va undan ortiq foizni tashkil etadigan korxona tomonlardan biri boʻlgan bitishuvlarga nisbatan biror-bir uchinchi shaxsga maslahat berish;

fondning qonun hujjatlarida, fond ustavida yoki investitsion deklaratsiyada taqiqlangan faoliyati turlari bilan bogʻliq qarorlarni qabul qilish.

Qonun hujjatlarida investitsiya aktivlarini ishonchli boshqaruvchi faoliyatiga qoʻshimcha cheklashlar belgilanishi mumkin.

47. Investitsiya aktivlarini ishonchli boshqaruvchi bilan ustav fondida besh yoki undan ortiq foiz miqdoridagi ulush tegishli boʻlgan korxona bilan har qanday shartnoma (kontrakt) fondning Kuzatuvchi kengashi tomonidan maʼqullanishi kerak.

48. Fond bilan fond Kuzatuvchi kengashi aʼzolari, shuningdek investitsiya aktivlarini ishonchli boshqaruvchining Kuzatuvchi kengash aʼzolari va mansabdor shaxslari iqtisodiy manfaatga ega boʻlgan yuridik shaxs oʻrtasidagi har qanday bitishuv fondning Kuzatuvchi kengashi tomonidan maʼqullanishi kerak.

Koʻrsatib oʻtilgan shaxslar, agar ular ustav fondida besh va undan ortiq foizdagi ulush fondga tegishli boʻlgan yoki fond aksiyalarining besh yoki undan ortiq foizi unga tegishli boʻlgan yuridik shaxsga nisbatan mehnat yoki fuqarolik-huquqiy munosabatlarda boʻlsalar, yoxud mulkdor yoki kreditor huquqlariga ega boʻlsalar iqtisodiy manfaatga ega deb hisoblanadi.

49. Investitsiya aktivlarini ishonchli boshqaruvchining mansabdor shaxslariga aksiyalarni fond birjasida (fond boʻlimlarini tashkil etgan boshqa birjalarda) sotuvga qoʻyish yuzasidan ekspertizada qatnashish taqiqlanadi.

50. Fond faoliyatiga cheklovlar investitsiya aktivlarini ishonchli boshqaruvchi ijro etishi uchun majburiy hisoblanadi.

51. Fondga koʻrsatilgan xizmatlar uchun investitsiya aktivlarini ishonchli boshqaruvchiga taqdirlash puli fond tomonidan asosiy va mukofot pulini taqdirlash shaklida toʻlanadi.

Investitsiya aktivlarini ishonchli boshqaruvchiga asosiy taqdirlash puli choraklar boʻyicha taqsimlagan holda, bir yil uchun qatʼiy belgilab qoʻyilgan summada belgilanadi. Investitsiya aktivlarini ishonchli boshqaruvchi tomonidan olinadigan asosiy taqdirlash pulining umumiy miqdori fond sof aktivlari oʻrtacha yillik qiymatining 5 foizidan ortiq boʻlmasligi kerak. Koʻrsatib oʻtilgan summaga fondni boshqarish toʻgʻrisidagi shartnoma (kontrakt)ni bajarish boʻyicha investitsiya aktivlarini ishonchli boshqaruvchining barcha xarajatlarini qoplash summasi kiritiladi, Investitsiya fondlari toʻgʻrisidagi nizomga muvofiq fond hisobiga tegishli boʻlgan xarajatlar bundan mustasno.

Investitsiya aktivlarini ishonchli boshqaruvchiga mukofot puli taqdirlash puli shartnoma (kontrakt)ga binoan yil natijalari boʻyicha, biroq fond aksiyadorlariga yil mobaynida hisoblangan dividendlar hisobga olingan holda fond sof aktivlari yillik oʻsishi summasidan, Oʻzbekiston Respublikasi Markaziy banki tomonidan belgilangan moliyalashtirish stavkasi boʻyicha sof aktivlarni depozitlarda joylashtirishda yuz beradigan oʻsishdan 7 foizdan ortiq boʻlmagan miqdorda toʻlanadi.

52. Fondga koʻrsatilgan xizmatlar uchun investitsiya aktivlarini ishonchli boshqaruvchiga taqdirlash puli toʻlash miqdori, muddatlari va tartibi ular oʻrtasida tuziladigan shartnoma doirasida belgilanadi.

53. Litsenziyaning amal qilishini toʻxtatib turish yoki toʻxtatish, litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22 — 24-moddalarida nazarda tutilgan hollarda va tartibda amalga oshiriladi.

54. Litsenziyaning amal qilishini toʻxtatib turishga olib kelgan holatlar hisobga olingan holda qimmatli qogʻozlar bozorini boshqarish boʻyicha davlat vakolatli organi investitsiya aktivlarini ishonchli boshqaruvchi uchun quyidagi xatti-harakatlarni taqiqlab qoʻyishga haqlidir:

investitsiya portfellarini joylashtirish;

investitsiya portfellarini sotib olish;

fondning investitsiya portfelini tashkil etadigan mol-mulk hisobiga mol-mulk sotib olish;

fondning investitsiya portfelini tashkil etadigan mol-mulkni begonalashtirish.

55. Investitsiya aktivlarini ishonchli boshqaruvchining faoliyatida jinoyat belgilari aniqlangan taqdirda qimmatli qogʻozlar bozorini boshqarish boʻyicha davlat vakolatli organi tegishli materiallarni huquqni muhofaza qilish organlariga beradi.

56. Fond yangi investitsiya aktivlarini ishonchli boshqaruvchi bilan kontrakt tuzishidan oldin litsenziyaning amal qilishi toʻxtatilgan taqdirda fondning Kuzatuvchi kengashi qimmatli qogʻozlar bozorini boshqarish boʻyicha davlat vakolatli organi bilan kelishgan holda fondning investitsiya portfelini tashkil etadigan investitsiya aktivlarini vaqtincha ishonchli boshqaruvchini tayinlaydi.

Litsenziyaning amal qilishi toʻxtatilgan paytdan boshlab investitsiya aktivlarini ishonchli boshqaruvchi oʻz faoliyatini qimmatli qogʻozlar bozorining professional qatnashchisi sifatida amalga oshirishga haqli emas hamda vaqtincha ishonchli boshqaruvchi tayinlangan paytdan boshlab ikki ish kuni mobaynida investitsiya fondining investitsiya portfelini tashkil etadigan investitsiya aktivlarini ishonchli boshqaruvchiga tegishli boʻlgan barcha hujjatlarni va investitsiya fondining boshqa hujjatlarini berishi shart.

57. Investitsiya aktivlarini ishonchli boshqaruvchini qayta tashkil etish va tugatish tijorat tashkilotlari uchun belgilangan tartibda amalga oshiriladi.

58. Investitsiya aktivlarini ishonchli boshqaruvchi iqtisodiy nochorlik belgilari boʻyicha va bankrot deb eʼlon qilinganda sud tartibida tugatilganda uning fondlar bilan kontraktlari belgilangan tartibda bekor qilinadi.

59. Investitsiya aktivlarini ishonchli boshqaruvchi fondlar bilan kontraktlarni bekor qilishda fondning Kuzatuvchi kengashi tomonidan vakil qilingan shaxsga fondning barcha hujjatlarini va Kuzatuvchi kengash yoki investitsiya aktivlarini ishonchli boshqaruvchi-voris tomonidan asosli ravishda soʻraladigan har qanday axborotni beradi.

60. Fond, uning aksiyadorlari va investitsiya aktivlarini ishonchli boshqaruvchi oʻrtasidagi nizolar sud tartibida hal etiladi.

1. “__________________” aksiyadorlik jamiyati nomidan, keyinchalik “Jamiyat” deb yuritiladigan aksiyadorlik jamiyati Ustavi asosida ish koʻruvchi Kuzatuvchi kengash raisi bir tomon boʻlib va keyinchalik “Direktor”*) deb yuritiladigan _______________ ikkinchi tomon boʻlib quyidagilar toʻgʻrisida mazkur mehnat shartnomasini tuzdilar:

2. Umumiy qoidalar.

2.2. Shartnoma asosiy ish joyi boʻyicha shartnoma hisoblanadi.

2.3. Shartnoma bir yil muddatga tuziladi.

Amalda boʻlish muddati tamom boʻlgandan soʻng mehnat shartnomasi navbatdagi yilga uzaytirilishi yoki yangi bir yil muddatga tuzilishi mumkin. Mehnat shartnomasi yangi muddatga tuzilayotganda uning shartlari mazkur mehnat shartnomasi shartlaridan farq qilishi mumkin.

2.6. Direktor oʻz faoliyatida amaldagi qonun hujjatlariga, Jamiyat ustaviga, Aksiyadorlar umumiy yigʻilishi va Jamiyat Kuzatuvchi kengashining qarorlariga amal qiladi. Direktor lavozimi boʻyicha Jamiyat kollegial ijro etuvchi organining (Jamiyatning yakkaboshchilik asosida ish koʻruvchi ijro etuvchi organining) rahbari hisoblanadi.

2.7. Direktor oʻz huquqlarini amalga oshirish va majburiyatlarini bajarishda Jamiyat manfaatlarini koʻzlab ish koʻrishi va Jamiyatga nisbatan oʻz majburiyatlarini halol va oqilona bajarishi kerak.

3. Direktorning majburiyatlari.

Direktor quyidagilarga majbur:

3.1. Oʻz vakolati doirasida Jamiyatning samarali va barqaror ishlashini taʼminlagan holda uning joriy faoliyatiga rahbarlik qilish, faqat Aksiyadorlarning umumiy yigʻilishi va Kuzatuvchi kengash vakolatiga kiritilgan masalalar bundan mustasnodir.

3.2. Aksiyadorlar umumiy yigʻilishi va Jamiyatning Kuzatuvchi kengashi qarorlari bajarilishini tashkil etish;

3.3. Aksiyadorlar yigʻilishiga va Jamiyatning Kuzatuvchi kengashiga yillik biznes-reja bajarilishining borishi toʻgʻrisidagi choraklik hisobotlarni, shuningdek oʻz vakolatiga tegishli boʻlgan ishlarning holati toʻgʻrisidagi axborotlarni belgilangan muddatlarda taqdim etish;

3.4. Jamiyatni rivojlantirish dasturlari va biznes-rejalar ishlab chiqilishiga rahbarlik qilish, ularning bajarilishini tashkil etish va nazorat qilish;

3.5. Jamiyatning shartnoma majburiyatlari bajarilishini taʼminlash;

3.6. Ishlab chiqarishni va ijtimoiy sohani rivojlantirish uchun zarur boʻlgan miqdorda foyda olinishini taʼminlash;

3.7. Jamiyat faoliyatida qonuniylikni taʼminlash;

3.8. Jamiyatda buxgalteriya hisobi va hisoboti tashkil etilishini, uning zarur holatda boʻlishi va ishonchliligini taʼminlash, yillik hisobot va boshqa moliyaviy hisobotlarning tegishli organlarga, shuningdek, aksiyadorlarga, kreditorlarga va boshqa maʼlumotlarni oluvchilarga joʻnatiladigan Jamiyat faoliyati toʻgʻrisidagi maʼlumotlarning oʻz vaqtida taqdim etilishini taʼminlash;

3.9. Jamiyat taftish komissiyasi va Jamiyat auditorining talabiga koʻra Jamiyat moliya-xoʻjalik faoliyati toʻgʻrisidagi hujjatlarni toʻsiqsiz taqdim etish;

3.10. Davlat statistika hisobotlari toʻliqligini va ularning tegishli organlarga oʻz vaqtida taqdim etilishini taʼminlash;

3.11. Ishlab chiqarish birliklari, sexlar va Jamiyatning boshqa tarkibiy boʻlinmalarining samarali hamkorlik qilishini taʼminlash;

3.12. Jamiyatning tijorat siri boʻlgan axborotni saqlash, agar bunday axborotni uchinchi shaxslarga berish uning vazifalari doirasiga kirmasa. Jamiyatning tijorat siri boʻlgan maʼlumotlar roʻyxati Kuzatuvchi kengash tomonidan belgilanadi;

3.13. Xizmat yoki tijorat siri hisoblangan axborotning jamiyat xodimlari tomonidan saqlanishini taʼminlash;

3.14. Jamiyatning kollegial ijro etuvchi organi majlislari oʻtkazilishini tashkil etish, Jamiyat nomidan hujjatlarni va ijro etuvchi organ yigʻilishlari protokollarini imzolash;

3.15. Jamiyatni malakali kadrlar bilan taʼminlash, Jamiyat xodimlarining bilimi, malakasi, tajribasi va qobiliyatlaridan yaxshiroq foydalanish chora-tadbirlarini koʻrish;

3.16. Mehnat va texnologiya intizomi saqlanishini, ijtimoiy kafolatlarga rioya etilishini va Jamiyat xodimlari mehnati muhofaza qilinishini taʼminlash;

3.17. Ish beruvchining vakillari jamoa muzokaralarida qatnashishini taʼminlash. Jamoa shartnomalari va bitimlarini tuzishda ish beruvchi sifatida ish koʻrish. Jamoa shartnomasi boʻyicha majburiyatlarni bajarish;

3.18. Uzoq muddat davom etadigan xizmat safarlarini va taʼtillardan foydalanish vaqtini Kuzatuvchi kengash bilan kelishib olish. Uzoq vaqt boʻlmaydigan shaxsning vazifalarini bajaruvchi shaxs toʻgʻrisida Kuzatuvchi kengashni xabardor qilish;

3.19. ___________________ (boshqa majburiyatlar);

3.20. ___________________ (boshqa majburiyatlar).

4. Jamiyatning majburiyatlari.

Jamiyat quyidagilarga majbur:

4.1. Qonun, jamiyat Ustavi va mazkur mehnat shartnomasida Direktor vakolatiga tegishli deb topilgan faoliyatga aralashmaslik;

4.2. Mazkur mehnat shartnomasi shartlariga qatʼiy amal qilish;

4.3. Direktor oʻz majburiyatlarini samarali bajarishi va huquqlarini amalga oshirishi uchun uni zarur vositalar va materiallar bilan taʼminlash;

4.4. ___________________ (boshqa majburiyatlar);

4.5. ___________________ (boshqa majburiyatlar).

5. Direktorning huquqlari.

Direktor quyidagi huquqlarga ega:

5.1. Qonun, Jamiyat Ustavi va mazkur mehnat shartnomasida uning vakolatiga tegishli deb topilgan Jamiyat joriy faoliyatiga rahbarlik qilishga doir barcha masalalarni mustaqil ravishda hal etish;

5.2. Jamiyat nomidan ishonchnomasiz ish koʻrish, shu jumladan boshqa tashkilotlar va organlar bilan oʻzaro hamkorlikda uning manfaatlarini himoya qilish, bank muassasalarida hisob-kitob raqamlari va boshqa hisob raqamlari ochish, bitishuvlar tuzish, faqat Aksiyadorlar umumiy yigʻilishi va Kuzatuvchi kengash vakolatiga kiritilgan bitishuvlar tuzish bundan mustasno, Jamiyat Ustavida kelishib olingan doirada mol-mulk va pul mablagʻlarini tasarruf etish, shartnoma va kontraktlar tuzish, ishonchnomalar berish va yozishmalar olib borish;

5.3. Jamiyat tuzilmasi va shtat jadvalini tasdiqlash, xodimlar bilan mehnat shartnomalari tuzish hamda ularni bekor qilish;

5.4. Jamoa muzokaralarida va jamoa shartnomalarini tuzishda Jamiyat nomidan ish koʻrish;

5.5. Oʻz vakolatiga kiritilgan masalalar boʻyicha Jamiyatning barcha xodimlari tomonidan bajarilishi majburiy boʻlgan buyruqlar chiqarish va koʻrsatmalar berish;

5.6. Jamiyat xodimlarini ragʻbatlantirish;

5.7. Jamiyat xodimlaridan ichki tartib qoidalari, Jamiyatda amalda boʻlgan boshqa qoidalarning, shuningdek mehnat shartnomasi shartlarining bajarilishini talab qilish. Jamiyat xodimlari tomonidan mehnat intizomi buzilgan hollarda Jamiyat xodimlariga nisbatan intizomiy jazo choralarini qoʻllash;

5.8. Jamiyat xodimi bilan mehnat shartnomasi tuzishda xodim uchun Jamiyatning xizmat va tijorat siri hisoblangan maʼlumotlar hajmi va tarkibini aniqlash;

5.9. ___________________ (boshqa huquqlar);

5.10. ___________________ (boshqa huquqlar).

6. Jamiyatning huquqlari.

Jamiyat quyidagi huquqlarga ega:

6.1. Direktorning amaldagi qonun hujjatlariga, Jamiyat ustaviga, aksiyadorlar yigʻilishlari va Jamiyat Kuzatuvchi kengashi qarorlariga rioya etishini nazorat qilish;

6.2. Direktordan mazkur mehnat shartnomasi boʻyicha majburiyatlarni halol va toʻla hajmda bajarishni talab qilish;

6.3. Direktorni ragʻbatlantirish;

6.4. Direktorga intizomiy jazo berish;

6.5. ___________________ (boshqa huquqlar);

6.6. ___________________ (boshqa huquqlar).

7. Mehnatga haq toʻlash. Taʼtil berish. Direktorning ijtimoiy-maishiy taʼminoti.

Mazkur mehnat shartnomasida nazarda tutilgan majburiyatlarni bajarganlik uchun direktorga:

7.1. Bir oyda _____soʻm miqdorida lavozim maoshi toʻlanadi.

Jamiyat boʻyicha umuman, shu jumladan qonun hujjatlariga muvofiq belgilanadigan eng kam oylik ish haqi oshirilishi munosabati bilan Direktorning lavozim maoshi ish haqi oshishining umumiy koeffitsiyentiga oʻzgaradi.

7.2. Jamiyat Kuzatuvchi kengashi bilan kelishgan holda:

lavozim maoshining ________ foizi miqdorida mukofot;

_______ soʻm miqdorida yoki lavozim maoshining ________ foizi miqdorida ish yakunlari boʻyicha haq toʻlash;

____ soʻm miqdorida yoki lavozim maoshining _____ foizi miqdorida har yilgi taʼtilga moddiy yordam koʻrsatish;

7.3. Jamiyatda amalda boʻlgan qoidalar bilan nazarda tutilgan boshqa toʻlovlar va haqlar;

7.4. Direktorga muddati _________ ish kuni boʻlgan har yilgi haq toʻlanadigan taʼtil belgilanadi;

7.5. Mazkur mehnat shartnomasi amalda boʻlgan davrda Direktor vafot etgan hollarda uning oilasiga lavozim maoshining ________ miqdorida bir yoʻla nafaqa beriladi.

7.6. Mazkur mehnat shartnomasi muddatidan oldin bekor qilinganda Jamiyat Kuzatuvchi kengashi tomonidan Direktorga ishdan boʻshatish nafaqasi toʻlash toʻgʻrisida qaror qabul qilinishi mumkin. Ishdan boʻshatish nafaqasi toʻlash shartlari va uning miqdori Direktorning Jamiyatdagi ish muddati uzunligiga va mazkur mehnat shartnomasi bekor qilinishi sabablariga koʻra Jamiyat Kuzatuvchi kengashi tomonidan belgilanadi.

8. Mehnat shartnomasining boshqa shartlari.

8.1. Direktorning boshqa korxonalar, tashkilotlar va muassasalarda oʻrindoshlik tarzida lavozimni egallashiga faqat Jamiyat Kuzatuvchi kengashining roziligi bilan yoʻl qoʻyiladi, u bunday oʻrindoshlikni bir hafta muddatda koʻrib chiqishi kerak;

8.2. Direktor oʻzining aybli harakatlari (yoki harakatsizligi) bilan jamiyatga yetkazilgan zarar uchun Oʻzbekiston Respublikasi Mehnat kodeksida va boshqa qonun hujjatlarida nazarda tutilgan tartibda javob beradi;

8.3. Mazkur mehnat shartnomasiga oʻzgartirish va qoʻshimchalar mehnat shartnomasi tomonlarining kelishuviga koʻra quyidagi hollarda kiritilishi mumkin:

amaldagi qonun hujjatlariga oʻzgartirishlar kiritilganda;

Jamiyat Ustavi oʻzgarganda;

mazkur mehnat shartnomasi tomonlaridan xohlagan birining tashabbusi bilan.

Oʻzgartirish va qoʻshimchalar mazkur mehnat shartnomasining ajralmas qismi hisoblanadigan yozma holdagi qoʻshimcha kelishuv bilan rasmiylashtiriladi.

8.4. Mazkur mehnat shartnomasiga doir nizolar va anglashilmovchiliklar tomonlarning kelishuviga koʻra, kelishuvga erishilmagan hollarda esa amaldagi qonun hujjatlarida belgilangan tartibda hal etiladi;

8.5. _________________ (boshqa shartlar);

8.6. _________________ (boshqa shartlar).

9. Mehnat shartnomasini toʻxtatish.

9.1. Mazkur mehnat shartnomasi uning muddati tugashi bilan toʻxtatiladi;

9.2. Mazkur mehnat shartnomasi:

9.2.1 Direktor tomonidan:

mazkur mehnat shartnomasi boʻyicha majburiyatlar uning tomonidan toʻliq hajmda bajarilishiga toʻsqinlik qiluvchi kasallik yoki nogironlik hollarida;

mazkur mehnat shartnomasi boʻyicha majburiyatlar Jamiyat tomonidan buzilgan hollarda;

boshqa uzrli sabablarga koʻra muddatidan oldin bekor qilinishi mumkin;

9.2.2 Jamiyat tomonidan:

Oʻzbekiston Respublikasi Mehnat kodeksida nazarda tutilgan asoslarga koʻra;

Aksiyadorlar umumiy yigʻilishi yoki Kuzatuvchi kengash qaroriga koʻra (agar jamiyat ustavida unga bunday huquq berilgan boʻlsa), shu jumladan aksiyadorlarning huquqlari buzilganda, korxonaning moliya-xoʻjalik faoliyati jiddiy ravishda yomonlashganda, mahsulotlarni sotish, ishlarni bajarish, xizmatlar koʻrsatish hajmlari asossiz qisqartirilganda, Jamiyatning iqtisodiy nochorligi (bankrotligi) belgilari mavjudligi yoki uning paydo boʻlish xavfi boʻlganda, davlat budjeti oldida barqaror qarzdorlik paydo boʻlganda muddatidan oldin bekor qilinishi mumkin.

9.3. _______________ (toʻxtatishning boshqa shartlari);

9.4. _______________ (toʻxtatishning boshqa shartlari).

Mazkur shartnoma bir xil yuridik kuchga ega boʻlgan ikki nusxada tuzildi. Birinchi nusxasi Jamiyatda, ikkinchisi Direktorda saqlanadi.

1. Oʻzbekiston Respublikasi Vazirlar Mahkamasining “Aksiyalar paketlarini joylashtirishni takomillashtirish hamda davlat mulki negizida tashkil etilgan aksiyadorlik jamiyatlarini boshqarishda aksiyadorlar rolini oshirish chora-tadbirlari toʻgʻrisida” 1997-yil 18-avgustdagi 404-son qarorining 3 va 5-bandlari oʻz kuchini yoʻqotgan deb hisoblansin.

2. Oʻzbekiston Respublikasi Vazirlar Mahkamasining “Davlat tasarrufidan chiqarish va xususiylashtirish jarayonida tashkil etilgan aksiyadorlik jamiyatlari ustav jamgʻarmasidagi davlat ulushi toʻgʻrisida” 1998-yil 30-iyundagi 272-son qarorining 1-bandi oʻz kuchini yoʻqotgan deb hisoblansin.

3. Oʻzbekiston Respublikasi Vazirlar Mahkamasining “Aksiyadorlik jamiyatlarini boshqarish tizimini takomillashtirishga doir chora-tadbirlar toʻgʻrisida” 1998-yil 22-avgustdagi 361-son qarorida (Oʻzbekiston Respublikasi QT, 1998-y., 8-son, 31-modda):

a) 1-bandning uchinchi, beshinchi va yettinchi xatboshi oʻz kuchini yoʻqotgan deb hisoblansin;

b) qarorga 1-ilovada:

1.4-bandning ikkinchi gapi quyidagi tahrirda bayon qilinsin: “Aksiyadorlarning Umumiy hisobot yigʻilishida yakka boshchilik qiluvchi ijro etuvchi organ, kollegial ijro etuvchi organ rahbari bilan tuzilgan shartnomalarni uzaytirish mumkinligi yoki toʻxtatish toʻgʻrisidagi masala, jamiyat faoliyati toʻgʻrisidagi yillik hisobot va qonunda nazarda tutilgan boshqa masalalar majburiy tartibda koʻrib chiqiladi”;

2.1-bandda:

“z” kichik band quyidagi tahrirda bayon qilinsin:

“z) jamiyat ijro etuvchi organini tuzish (saylash, tayinlash, yollash va hokazolar), uning vakolatlarini muddatidan oldin toʻxtatish, agar jamiyat ustavida ushbu masalalarni hal etish Kuzatuvchi kengash vakolatlariga kiritilmagan boʻlsa, yakka boshchilik qiluvchi ijro etuvchi organ, kollegial ijro etuvchi organ rahbari tomonidan jamiyat yillik biznes-rejasining tasdiqlangan parametrlarini bajarishda qoʻpol buzilishlarga yoʻl qoʻyilgan yoki uni bajarish barbod qilingan taqdirda, ular bilan tuzilgan shartnomalar Kuzatuvchi kengash tomonidan muddatidan oldin toʻxtatilgan hollar bundan mustasno”;

“l” kichik bandning “jamiyat” soʻzidan oldin “jamiyatning yillik biznes-rejalarini (ushbu masalani hal etish jamiyat ustavida Kuzatuvchi kengashning vakolatlariga tegishli deb topilgan yoki Aksiyadorlarning umumiy yigʻilishi tomonidan unga topshirilgan hollar bundan mustasno)” soʻzlari qoʻshilsin;

“m” kichik band oʻz kuchini yoʻqotgan deb hisoblansin;

“s” kichik bandning toʻrtinchi xatboshi quyidagi mazmundagi xatboshilar bilan almashtirilsin:

“— bitishuv tarafi hisoblangan yoki unda vakil yoki vositachi sifatida qatnashayotgan yuridik shaxsning boshqaruv organlarida lavozimni egallab turgan boʻlsa.

Bunda tuzilishidan manfaatdorlik mavjud boʻlgan jamiyat bilan bitishuv tuzish toʻgʻrisidagi qaror ovoz beruvchi aksiyalar egalari boʻlgan, bitishuvdan manfaatdor boʻlmagan aksiyadorlarning koʻpchilik ovozi bilan Aksiyadorlar umumiy yigʻilishida quyidagi hollarda: 1) agar bitishuv boʻyicha toʻlov summasi va bitishuv mavzusi boʻlgan mol-mulk qiymati jamiyat aktivlari qiymatining besh foizidan ortiq boʻlsa; 2) agar bitishuv va (yoki) oʻzaro bogʻliq boʻlgan bir necha bitishuv jamiyatning ovoz beruvchi aksiyalarini yoki ilgari joylashtirilgan ovoz beruvchi aksiyalarning besh foizidan ortiq boʻlgan miqdorda ovoz beruvchi aksiyalarga konvertatsiya qilinadigan boshqa qimmatli qogʻozlarini joylashtirish hisoblansa qabul qilinadi”;

“t” kichik banddagi “qonun hujjatlarida” soʻzlari “qonunda” soʻzi bilan almashtirilsin;

oxirgi xatboshi quyidagi tahrirda bayon qilinsin:

“a”, “b”, “v”, “d”, “r” kichik bandlarida nazarda tutilgan masalalar boʻyicha qarorlar Aksiyadorlarning umumiy yigʻilishida ishtirok etuvchi ovoz beruvchi aksiyalar egalari boʻlgan aksiyadorlar toʻrtdan uch qismining koʻpchilik ovozi bilan qabul qilinadi”;

3.5-band quyidagi tahrirda bayon qilinsin:

“Aksiyadorlarning umumiy yigʻilishida aksiyadorlar roʻyxatiga kiritilgan, Umumiy yigʻilishda qatnashish huquqiga ega boʻlgan aksiyadorlar, ularning vakolatli vakillari, jamiyat auditori, jamiyat Kuzatuvchi kengashi va ijro etuvchi organlari aʼzolari, jamiyat taftish komissiyasi aʼzolari hozir boʻlish huquqiga ega boʻladilar (Kuzatuvchi kengashni va jamiyat nazorat organlarini saylash boʻyicha ovoz berish byulleteniga kiritilgan nomzodlarni, shuningdek yakka boshchilik qiluvchi ijro etuvchi organ va jamiyatning kollegial ijro etuvchi organi rahbarini tayinlash boʻyicha koʻrsatib oʻtilgan shaxslarni ham taklif etish tavsiya etiladi)”;

4.2-bandning birinchi xatboshidan “olinganligi albatta tasdiqlanadigan” soʻzlari chiqarib tashlansin;

4.4-bandning birinchi xatboshiga “jamiyat moliya-xoʻjalik faoliyati yillik tekshirish natijalari boʻyicha xulosasi” soʻzlaridan keyin “yakka boshchilik qiluvchi ijro etuvchi organ, kollegial ijro etuvchi organ bilan tuzilgan shartnomalarni uzaytirish mumkinligi yoki toʻxtatish toʻgʻrisida Kuzatuvchi kengashning xulosasi” soʻzlari qoʻshilsin;

4.6-band va 4.7-bandning ikkinchi xatboshidagi “Taftish komissiyasiga” soʻzlaridan keyin “(taftishchiga)” soʻzi qoʻshilsin;

4.9-bandda:

birinchi xatboshiga “Taftish komissiyasiga” soʻzlaridan keyin “(taftishchiga)” soʻzi qoʻshilsin;

quyidagi mazmundagi uchinchi xatboshi qoʻshilsin:

“— aksiyador (aksiyadorlar) mazkur Nizomning 4.6-bandida nazarda tutilgan jamiyatning ovoz beruvchi aksiyalari miqdoriga egalik qilmaydi”;

4.10 va 4.11-bandlardagi “Taftish komissiyasiga” soʻzlaridan keyin “(taftishchiga)” soʻzi qoʻshilsin;

6.5-banddagi “aksiyadorlar umumiy sonining kamida 60 foizi” soʻzlari “jamiyatning tarqatilgan va joylashtirilgan ovoz beruvchi aksiyalarining jami boʻlib kamida 60 foiziga egalik qiluvchi aksiyadorlar (ularning vakillari)” soʻzlari bilan almashtirilsin.

7.2-bandning ikkinchi gapi quyidagi tahrirda bayon qilinsin: “Bunda Aksiyadorlar umumiy yigʻilishi prezidiumi tarkibiga lavozimiga koʻra Kuzatuvchi kengash raisi kiradi”;

7.7-band quyidagi tahrirda bayon qilinsin:

“7.7. Sanoq komissiyasi tarkibi uch kishidan kam boʻlishi mumkin emas. Sanoq komissiyasiga jamiyat Kuzatuvchi kengashi aʼzolari, jamiyat Taftish komissiyasi aʼzolari, kollegial ijro etuvchi organ aʼzolari, yakka boshchilik qiluvchi ijro etuvchi organ, teng ravishda boshqaruvchi tashkilot yoki boshqaruvchi, shuningdek nomzodlar tomonidan ushbu lavozimlarga koʻrsatiladigan shaxslar kirishi mumkin emas.”;

8.7-band oʻz kuchini yoʻqotgan deb hisoblansin;

v) qarorga 2-ilova oʻz kuchini yoʻqotgan deb hisoblansin;

g) qarorga 3-ilovada:

1.1-bandning uchinchi va toʻrtinchi gapi quyidagi tahrirda bayon qilinsin:

“Aksiyadorlar umumiy yigʻilishining qaroriga koʻra ijro etuvchi organ vakolatlari shartnoma boʻyicha, shu jumladan tanlov asosida tijorat tashkilotiga (boshqaruvchi tashkilotga) yoki yakka tartibdagi tadbirkorga (boshqaruvchiga) berilishi mumkin. Agar jamiyat ustavida oʻzgacha hol nazarda tutilmagan boʻlsa, shartnoma shartlari Kuzatuvchi kengash tomonidan belgilanadi”;

2.2-band quyidagi tahrirda bayon qilinsin:

“2.2. Aksiyadorlik jamiyatining Ijro etuvchi organi rahbari va uning shaxsiy tarkibi, agar jamiyat ustavida ushbu masalalarni hal etish jamiyat Kuzatuvchi kengashi vakolatiga tegishli deb topilmagan boʻlsa, jamiyat Aksiyadorlari umumiy yigʻilishi tomonidan saylanadi (tayinlanadi, yollanadi va hokazo). Jamiyat ustaviga muvofiq yoki tegishli ravishda Aksiyadorlar umumiy yigʻilishi yoki jamiyat Kuzatuvchi kengashining qaroriga koʻra yakka boshchilik qiluvchi ijro etuvchi organ, kollegial ijro etuvchi organ rahbari tanlov asosida tayinlanishi mumkin”;

2.3-bandga “oddiy koʻpchilik ovoz bilan” soʻzlaridan keyin “Aksiyadorlarning umumiy yigʻilishi tomonidan yoki” soʻzlari qoʻshilsin;

2.4-bandning birinchi xatboshi quyidagi tahrirda bayon qilinsin:

“Aksiyadorlik jamiyati ijro etuvchi organi aʼzoligiga nomzodlarni koʻrib chiqish va tasdiqlash Aksiyadorlar umumiy yigʻilishi yoki Kuzatuvchi kengash tomonidan yakka tartibda amalga oshiriladi. Ijro etuvchi organ aʼzoligiga nomzod jamiyatga oʻzining jinoiy javobgarlikka tortilganligi faktlari toʻgʻrisida maʼlum qilishi shart”;

2.5-bandga “koʻrib chiqilayotganda” soʻzlaridan keyin “aksiyadorlar umumiy yigʻilishi tomonidan yoki” soʻzlari qoʻshilsin”.