Oʻzbekiston Respublikasi Prezidentining “Oʻzbekiston Respublikasi Fanlar akademiyasi tuzilmasini yanada maqbullashtirish hamda respublika akademik ilm-fani va oliy taʼlimining integratsiyasini mustahkamlash chora-tadbirlari toʻgʻrisida” 2014-yil 8-iyuldagi PQ-2204-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Prezidentining “Oʻzbekiston Respublikasi Fanlar akademiyasi tuzilmasini yanada maqbullashtirish hamda respublika akademik ilm-fani va oliy taʼlimining integratsiyasini mustahkamlash chora-tadbirlari toʻgʻrisida” 2014-yil 8-iyuldagi PQ-2204-son qarori bilan Toshkent davlat sharqshunoslik instituti huzurida Abu Rayhon Beruniy nomidagi Sharq qoʻlyozmalari markazi (keyingi oʻrinlarda Markaz deb ataladi) tashkil etilganligi, uning asosiy vazifalari va faoliyati yoʻnalishlari belgilanganligi, tashkiliy tuzilmasi tasdiqlanganligi maʼlumot uchun qabul qilinsin.

2. Belgilab qoʻyilsinki:

Markaz davlat muassasasi shaklidagi yuridik shaxs hisoblanadi, oʻz muhriga, Oʻzbekiston Respublikasi Moliya vazirligining Gʻaznachiligida hisob raqamlariga va bank hisob raqamlariga ega;

Markaz direktori — Toshkent davlat sharqshunoslik institutining prorektori Oʻzbekiston Respublikasi Oliy va oʻrta maxsus taʼlim vazirining buyrugʻi bilan belgilangan tartibda lavozimga tayinlanadi va lavozimdan ozod qilinadi.

3. Oʻzbekiston Respublikasi Oliy va oʻrta maxsus taʼlim vazirligi Toshkent davlat sharqshunoslik instituti bilan birgalikda 2014-yil 1-sentabrgacha boʻlgan muddatda:

Oʻzbekiston Respublikasi Prezidentining “Oʻzbekiston Respublikasi Fanlar akademiyasi tuzilmasini yanada maqbullashtirish hamda respublika akademik ilm-fani va oliy taʼlimining integratsiyasini mustahkamlash chora-tadbirlari toʻgʻrisida” 2014-yil 8-iyuldagi PQ-2204-son qaroriga muvofiq oʻtkazilayotgan attestatsiya yakunlariga koʻra Markazni yosh mutaxassislar hamda qadimiy sharq qoʻlyozmalarini va tarixiy hujjatlarni saqlash va turkumlashtirish, ilmiy tavsiflarni tuzish va qoʻlyozmalarni ilmiy sharhlab tarjima qilish sohasida ish tajribasiga ega boʻlgan yuqori malakali ilmiy-pedagog kadrlar bilan toʻldirishda koʻmaklashsinlar;

Markazga yuklangan sharq qoʻlyozmalarini saqlash, kataloglashtirish va oʻrganish bilan bogʻliq vazifalardan kelib chiqqan holda uning faoliyatini rivojlantirishga yoʻnaltirilgan chora-tadbirlar kompleksini ishlab chiqsinlar va tasdiqlasinlar;

Oliy taʼlim yoʻnalishlari va mutaxassisliklari klassifikatoriga, Oliy taʼlimning davlat taʼlim standartlariga, Toshkent davlat sharqshunoslik institutining dasturlari va oʻquv rejalariga tashkil etilgan Markaz uchun yuqori malakali kadrlar tayyorlashni, shu jumladan manbashunoslik, matnshunoslik va sharq falsafasi boʻyicha kadrlar tayyorlashni taʼminlashni hisobga olgan holda oʻzgartirishlar kiritsinlar;

Oʻzbekiston Respublikasi Tashqi ishlar vazirligi hamda xalqaro tashkilotlar bilan birgalikda Markaz faoliyati doirasida Markaz faoliyatining asosiy yoʻnalishlari boʻyicha xalqaro ekspertlar va maslahatchilarni hamkorlikka jalb etish va tajriba almashish masalasini ishlab chiqsinlar.

4. Markazga ilmiy-tadqiqot institutlari va markazlarning xodimlarini, oliy taʼlim muassasalarining, shu jumladan xorijiy oliy taʼlim muassasalarining olimlari va oʻqituvchilarini Toshkent davlat sharqshunoslik institutining katta ilmiy xodimlari-izlanuvchilarini, magistratura va bakalavriati talabalarini shartnoma asosida tadqiqotlarga jalb etish, shuningdek Markazning xodimlarini hamda tadqiqotlar uchun jalb etiladigan mutaxassislar va ekspertlarni xorijiy tadqiqot markazlariga va oliy taʼlim muassasalariga stajirovka va oʻqishga yuborish huquqi berilsin.

5. Quyidagilar Markaz faoliyatini moliyalashtirishning asosiy manbalari etib belgilansin:

Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasi hamda Oʻzbekiston Respublikasi Oliy va oʻrta maxsus taʼlim vazirligi tomonidan oʻtkaziladigan grant tanlovlari natijalari boʻyicha ajratiladigan mablagʻlar, shuningdek tashkil etiladigan Markaz kutubxonasini Sharq qoʻlyozmalari fondi bilan birgalikda noyob ilmiy obyekt sifatida saqlash uchun ajratiladigan maqsadli budjet mablagʻlari;

xoʻjalik faoliyatidan, shu jumladan noshirlik faoliyatidan tushadigan mablagʻlar, xalqaro moliyaviy institutlar va boshqa institutlarning, xorijiy hukumat tashkilotlari va donorlik tashkilotlarining grantlari, shuningdek qonun hujjatlarida taqiqlanmagan boshqa manbalar.

6. Markaz quyidagi manzilga joylashtirilsin: Toshkent shahri, M. Ulugʻbek tumani, Mirzo Ulugʻbek koʻchasi, 81.

7. Yozma meros yodgorliklari mavjudligi va saqlanganligini oʻrganish hamda ularni saqlash joylarini turkumlashtirish boʻyicha takliflarni ishlab chiqish yuzasidan ilovaga muvofiq tarkibda ishchi guruh tashkil etilsin.

Ishchi guruh (A. Ikramov) oʻrganish yakunlari boʻyicha joriy yil oxirigacha:

barcha davlat muassasalari va taniqli xususiy kolleksiyalar boʻyicha qoʻlyozmalar, toshbosma usulidagi nashrlar va boshqa tarixiy hujjatlarning toʻliq reyestrini tayyorlasin;

qoʻlyozmalarning tarixiy-madaniy va ilmiy ahamiyatidan kelib chiqib, ularning zarur talablarga, shu jumladan kimyoviy va bakterial ochiq ishlov berish oʻtkazilishiga, namlik va harorat rejimini muayyan darajada saqlashga, shuningdek tegishli mehnat va moddiy resurslar mavjudligiga rioya qilgan holda saqlash joylarida saqlanishini taʼminlash imkoniyatiga alohida eʼtibor berib qoʻlyozmalarni saqlash joylarini tizimlashtirish yuzasidan takliflar kiritsin;

saqlanayotgan qoʻlyozmalarni va yozma merosning boshqa yodgorliklarini, ayniqsa xususiy kolleksiyalardagi qoʻlyozmalar va yozma meros yodgorliklarini doimiy ravishda toʻldirish, skanerlash va raqamlashtirish boʻyicha kompleks chora-tadbirlarni ishlab chiqsin va amalga oshirsin, ularda aholida saqlanayotgan tarixiy hujjatlarni ixtisoslashtirilgan davlat muassasalariga saqlash uchun topshirishni ragʻbatlantirish chora-tadbirlarini nazarda tutsin.

8. Oʻzbekiston Respublikasi Moliya vazirligi 2016-yildan boshlab Oʻzbekiston Respublikasi Davlat budjeti parametrlarida Markazda saqlanayotgan qadimiy qoʻlyozmalarning eng zamonaviy xalqaro standartlarga muvofiq saqlanishi va bosqichma-bosqich restavratsiya qilinishini taʼminlash uchun qoʻshimcha mablagʻlarni, shu jumladan zarur reaktivlar va sarflash materiallari sotib olish uchun mablagʻlarni nazarda tutsin.

9. Toshkent shahar hokimligi tomonidan Oʻzbekiston Respublikasi Fanlar akademiyasi bilan birgalikda Mirzo Ulugʻbek tumani, Mirzo Ulugʻbek koʻchasi, 81-uy manzilida Markaz kutubxonasining yangi binosini qurish uchun yer uchastkasi ajratilganligi maʼlumot uchun qabul qilinsin.

10. Markaz kutubxonasi binosini qurish boʻyicha:

Oʻzbekiston Respublikasi Oliy va oʻrta maxsus taʼlim vazirligining “Yagona buyurtmachi xizmati” injiniring kompaniyasi — buyurtmachi etib;

“ToshuyjoyLITI” ochiq aksiyadorlik jamiyati — bosh loyihalashtiruvchi etib;

bosh pudratchi Oʻmon Sultonligining Oʻzbekistondagi diplomatik missiyasi tomonidan buyurtmachi bilan birgalikda oʻtkazilayotgan tanlov natijalari boʻyicha belgilansin.

11. Oʻzbekiston Respublikasi Davlat arxitektura va qurilish qoʻmitasi Markazning yangi kutubxonasini qurish ishlari bajarilishining sifati ustidan davlat arxitektura-qurilish nazoratini oʻrnatsin.

12. Oʻzbekiston Respublikasi Iqtisodiyot vazirligi, “Oʻzqurilishmateriallari” aksiyadorlik kompaniyasi va “Oʻzmetkombinat” ochiq aksiyadorlik jamiyati Markaz kutubxonasi binosini qurish uchun bosh loyihalashtiruvchining asoslangan hisob-kitoblari boʻyicha bosh pudratchiga sement va metall prokati boshqariladigan narxlar boʻyicha ajratilishini nazarda tutsinlar.

13. Vakolatli tijorat banklariga Markaz kutubxonasini qurish davrida bank operatsiyalarini amalga oshirishda Oʻmon Sultonligi Elchixonasining, buyurtmachi va pudrat tashkilotlarining Markaz kutubxonasi binosini qurish loyihasini moliyalashtirish uchun maxsus ochilgan hisob raqamlarini vositachilik yigʻimlari undirilishidan ozod qilish tavsiya etilsin.

14. Oʻzbekiston Respublikasi Tashqi ishlar vazirligi Oʻzbekiston Respublikasi Oliy va oʻrta maxsus taʼlim vazirligining buyurtmanomalariga binoan Markaz kutubxonasi binosini qurish loyihasini amalga oshirishda ishtirok etadigan xorijiy mutaxassislarga koʻp martalik vizalar bir yil muddatga konsullik yigʻimlari va boshqa yigʻimlar undirilmasdan belgilangan tartibda rasmiylashtirilishini taʼminlasin.

15. Oʻzbekiston Respublikasi Ichki ishlar vazirligi Oʻzbekiston Respublikasi Oliy va oʻrta maxsus taʼlim vazirligining buyurtmanomalariga binoan Markaz kutubxonasi binosini qurish loyihasini amalga oshirishda ishtirok etayotgan xorijiy mutaxassislarga koʻp martalik vizalar berilishini va ularning muddati uzaytirilishini, shuningdek ularning Oʻzbekiston Respublikasida vaqtinchalik yashash joyida vaqtincha roʻyxatdan oʻtkazilishini va vaqtincha roʻyxatdan oʻtkazish muddati uzaytirilishini davlat bojlarini undirmasdan taʼminlasin.

16. “Oʻzbekiston havo yoʻllari” milliy aviakompaniyasi Oʻzbekiston Respublikasi Tashqi ishlar vazirligining buyurtmanomalariga binoan Markaz kutubxonasi binosini qurish loyihasini amalga oshirishda ishtirok etayotgan xorijiy mutaxassislarga Toshkent shahrining xalqaro aeroporti VIP zali orqali toʻlov undirmasdan tekin xizmat koʻrsatilishini belgilangan tartibda taʼminlasin.

17. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.