Oʻzbekiston Respublikasi Vazirlar Mahkamasining 2013-yil 19-apreldagi 108-son “Vazirlar Mahkamasining “Mahsulotlarni sertifikatlashtirish tartibotini soddalashtirishga doir qoʻshimcha chora-tadbirlar toʻgʻrisida” 2004-yil 6-iyuldagi 318-son qaroriga oʻzgartirishlar kiritish haqida”gi qarori (Oʻzbekiston Respublikasi qonun hujjatlari toʻplami, 2013-yil, 17-son, 225-modda) ijrosini taʼminlash maqsadida buyuraman:

1. Oʻzbekiston Respublikasi Milliy sertifikatlashtirish tizimida ishlar va xizmatlarga haq toʻlash qoidalari ilovaga muvofiq tasdiqlansin.

2. Oʻzbekiston davlat standartlashtirish, metrologiya va sertifikatlashtirish markazi tomonidan 1999-yil 28-aprelda tasdiqlangan Ishlarga haq toʻlash tartibi (roʻyxat raqami 722, 1999-yil 11-may) oʻz kuchini yoʻqotgan deb hisoblansin.

3. Mazkur buyruq rasmiy eʼlon qilingan kundan eʼtiboran kuchga kiradi.

Ushbu Qoidalar “Mahsulotlar va xizmatlarni sertifikatlashtirish toʻgʻrisida”gi Oʻzbekiston Respublikasining Qonuni (Oʻzbekiston Respublikasi Oliy Kengashining Axborotnomasi, 1994-y., 2-son, 50-modda), Oʻzbekiston Respublikasi Vazirlar Mahkamasining 2004-yil 5-avgustdagi 373-son “Oʻzbekiston davlat standartlashtirish, metrologiya va sertifikatlashtirish agentligi tuzilmasini takomillashtirish va uning faoliyatini tashkil etish toʻgʻrisida”gi (Oʻzbekiston Respublikasi qonun hujjatlari toʻplami, 2004-y., 31-son, 357-modda), 2011-yil 28-apreldagi 122-son “Sertifikatlashtirish tartibotlarini va sifat menejmenti tizimlarini joriy etishni takomillashtirishga doir qoʻshimcha chora-tadbirlar toʻgʻrisida”gi (Oʻzbekiston Respublikasi qonun hujjatlari toʻplami, 2011-y., 18-son, 178-modda) va 2013-yil 19-apreldagi 108-son “Vazirlar Mahkamasining “Mahsulotlarni sertifikatlashtirish tartibotini soddalashtirishga doir qoʻshimcha chora-tadbirlar toʻgʻrisida” 2004-yil 6-iyuldagi 318-son qaroriga oʻzgartirishlar kiritish haqida”gi (Oʻzbekiston Respublikasi qonun hujjatlari toʻplami, 2013-y., 17-son, 225-modda) qarorlariga muvofiq, akkreditatsiya qilish, nazorat yoʻsinidagi tekshiruv, sertifikatlashtirish, xorijiy muvofiqlik sertifikatlarini tan olish hamda deklaratsiyalash boʻyicha ishlar va xizmatlar uchun toʻlovlarni, shuningdek muvofiqlik belgisidan foydalanganlik uchun bir martalik toʻlovlarni toʻlash tartibini belgilaydi.

1. Bir turdagi mahsulotlarni sertifikatlashtirish organlari, sinov (oʻlchash) laboratoriyalari (markazlar), sertifikatlashtirish sohasidagi tekshiruv organlari, metrologiya xizmatlari va sifat boʻyicha ekspert-auditorlar oʻz faoliyatlarini akkreditatsiya qilinganlik toʻgʻrisidagi guvohnomalar asosida amalga oshiradilar.

2. Oʻzbekiston Respublikasi Milliy sertifikatlashtirish tizimidagi ishlar va xizmatlar narxi shartnoma asosida aniqlanadi.

Bunda akkreditatsiya qilish, nazorat yoʻsinidagi tekshiruv, sertifikatlashtirish, xorijiy muvofiqlik sertifikatlarini tan olish va deklaratsiyalash boʻyicha ishlar va xizmatlarning narxini shakllantirishda xarajatlar tarkibini aniqlash Oʻzbekiston Respublikasi Vazirlar Mahkamasining 1999-yil 5-fevraldagi 54-son “Mahsulot (ishlar, xizmatlar)ni ishlab chiqarish va sotish xarajatlari tarkibi hamda moliyaviy natijalarni shakllantirish tartibi toʻgʻrisidagi nizomni tasdiqlash haqida”gi qaroriga (Oʻzbekiston Respublikasi Hukumati qarorlarining toʻplami, 1999-y., 2-son, 9-modda) muvofiq amalga oshiriladi.

3. Monopolist korxonalar va tabiiy monopoliya subyektlarining akkreditatsiya qilish, nazorat yoʻsinidagi tekshiruv, sertifikatlashtirish, xorijiy muvofiqlik sertifikatlarini tan olish va deklaratsiyalash boʻyicha ishlar va xizmatlarining narxi Oʻzbekiston Respublikasi Vazirlar Mahkamasining 2010-yil 28-oktabrdagi 239-son qarori (Oʻzbekiston Respublikasi qonun hujjatlari toʻplami, 2010-y., 42-43-son, 364-modda) bilan tasdiqlangan Tovarlar (ishlar, xizmatlar)ga tartibga solinadigan narxlar (tariflar)ni shakllantirish, deklaratsiya qilish (tasdiqlash) va belgilash hamda ularning qoʻllanilishini davlat tomonidan nazorat qilish tartibi toʻgʻrisida nizomga muvofiq aniqlanadi.

4. Bir turdagi mahsulotlarni sertifikatlashtirish organlari, sinov (oʻlchash) laboratoriyalarini (markazlarini), sertifikatlashtirish sohasidagi tekshiruv organlarini, metrologiya xizmatlari va sifat boʻyicha ekspert-auditorlarni akkreditatsiya qilish qoidalarining (roʻyxat raqami 1596, 2006-yil 17-iyul) (Oʻzbekiston Respublikasi qonun hujjatlari toʻplami, 2006-y., 28-29-son, 283-modda) 9-bandiga muvofiq akkreditatsiya qilish boʻyicha ishlarning toʻlovi arizachi tomonidan har bir bosqich boʻyicha alohida amalga oshiriladi.

5. Natijalaridan qatʼi nazar, akkreditatsiya qilish boʻyicha ishlarni bajarish bilan bogʻliq boʻlgan barcha xarajatlar toʻlanishi lozim.

6. “Mahsulotlar va xizmatlarni sertifikatlashtirish toʻgʻrisida”gi Oʻzbekiston Respublikasi Qonunining 5-moddasiga muvofiq Oʻzbekiston standartlashtirish, metrologiya va sertifikatlashtirish agentligi (bundan buyon matnda “Oʻzstandart” agentligi deb yuritiladi) oʻz vazifalarining bir qismini bir turdagi mahsulotlarni sertifikatlashtirish organlariga va sinov laboratoriyalariga (markazlariga) (bundan buyon matnda akkreditatsiya obyekti deb yuritiladi) oʻtkazishga haqlidir.

7. Akkreditatsiya obyekti akkreditatsiya qilinganida va unga “Oʻzstandart” agentligi oʻz vazifalarining bir qismini (akkreditatsiya qilish sohasini inobatga olgan holda) oʻtkazganda “Oʻzstandart” agentligi va akkreditatsiya obyekti oʻrtasida bitim tuziladi hamda unga muvofiq akkreditatsiya obyekti “Oʻzstandart” agentligiga bajarilgan ishlar va xizmatlar hajmidan ajratmalarni amalga oshiradi.

Akkreditatsiya obyektlarining ajratmalar miqdori “Oʻzstandart” agentligi tomonidan oʻtkazilgan ishlar va xizmatlarning hajmi va turiga bogʻliq boʻladi hamda umumiy tushum hajmining 5 foizidan oshmasligi kerak.

8. Akkreditatsiya obyektlarining faoliyati ustidan nazorat yoʻsinidagi tekshiruv oʻtkazish uchun toʻlov “Oʻzstandart” agentligi va akkreditatsiya obyekti oʻrtasida tuzilgan bitimga asosan haqiqiy sarflarni hisobga olgan holda amalga oshiriladi.

9. Mahsulotlar, xizmatlar va sifat tizimlarini sertifikatlashtirishda haqiqiy sarflarni hisobga olgan holda Mahsulotlarni sertifikatlash qoidalarining (roʻyxat raqami 1458, 2005-yil 18-mart) (Oʻzbekiston Respublikasi qonun hujjatlari toʻplami, 2005-y., 10-11-son, 86-modda) 8-bandida koʻzda tutilgan sertifikatlashtirish bosqichlari toʻlanishi lozim.

10. Natijalaridan qatʼi nazar, sertifikatlashtirish boʻyicha ishlar va xizmatlarni oʻtkazish bilan bogʻliq boʻlgan barcha xarajatlar toʻlanishi kerak.

11. Sertifikatlangan mahsulot va sifat tizimining nazorat yoʻsinidagi tekshiruvini oʻtkazish boʻyicha ishlar va xizmatlarning toʻlovi, haqiqiy sarflardan kelib chiqib, muvofiqlik belgisini ishlatish huquqi boʻyicha bitim asosida amalga oshiriladi.

12. Xorijiy muvofiqlik sertifikatlarini tan olish boʻyicha ishlar va xizmatlarning toʻlovi Vazirlar Mahkamasining 2011-yil 28-apreldagi 122-son qarori bilan tasdiqlangan Oʻzbekiston Respublikasi hududiga olib kiriladigan texnologik uskunalar va ularning qismlariga xorijiy mamlakatlarning akkreditatsiya qilingan sertifikatlashtirish organlari tomonidan berilgan muvofiqlik sertifikatlarini tan olish tartibi toʻgʻrisida nizom va Mahsulotlarni sertifikatlash qoidalariga (roʻyxat raqami 1458, 2005-yil 18-mart) muvofiq tan olish jarayonini amalga oshirish boʻyicha haqiqiy sarflardan kelib chiqib amalga oshiriladi.

13. Deklaratsiyalash yoʻli bilan mahsulotlarning belgilangan talablarga muvofiqligini tasdiqlash boʻyicha ishlar va xizmatlar toʻlovi Mahsulotning xavfsizlik talablariga muvofiqligini deklaratsiyalash tartibi toʻgʻrisida nizomga (roʻyxat raqami 1465, 2005-yil 6-aprel) (Oʻzbekiston Respublikasi qonun hujjatlari toʻplami, 2005-y., 14-son, 107-modda) muvofiq deklaratsiyalash yoʻli bilan mahsulotlarning belgilangan talablarga muvofiqligini tasdiqlash jarayonini amalga oshirish boʻyicha haqiqiy sarflardan kelib chiqib amalga oshiriladi.

14. Sertifikatlashtirish ishlar va xizmatlarining narxini shakllantirishda “Oʻzstandart” agentligining rentabellik meʼyori “Oʻzstandart” agentligi tomonidan belgilanadi hamda 20 foizdan oshmasligi lozim.

15. Muvofiqlik belgisidan foydalanishni nazarda tutuvchi sxemalar boʻyicha amalga oshirilgan sertifikatlashtirishning natijalari ijobiy boʻlganda, bir turdagi mahsulotlarni sertifikatlashtirish organi bilan ishlab chiqaruvchi korxona (sertifikatsiyaga nomzod) oʻrtasida bitim tuziladi, unga koʻra bitimda belgilangan muddatlarda ishlab chiqaruvchi korxona muvofiqlik belgisidan foydalanganlik uchun sertifikatlashtirish organiga bir martalik toʻlovni toʻlaydi.

16. Bir martalik toʻlov sertifikatlashtirilgan mahsulotlarni sotishdan qoʻshilgan qiymat va aksiz soliqlarini chegirib rejalashtirilgan tushumlardan kelib chiqqan holda, muvofiqlik sertifikatini rasmiylashtirish kunidagi respublikada belgilangan eng kam ish haqidan kelib chiqib, ushbu Qoidalarning ilovasida koʻrsatib oʻtilgan miqdor asosida hisoblanadi.

17. Sertifikatlashtirilgan mahsulotlarni sotishdan rejalashtirilgan tushum miqdorining tasdigʻi boʻlib, sertifikatlashtirilgan mahsulotlarni ishlab chiqarish uskunasining quvvati koʻrsatilgan holda, ishlab chiqaruvchi korxonaning rahbarlik vazifalarini va buxgalteriya hisobi va moliyaviy boshqarish vazifalarini amalga oshiruvchi shaxslari, shuningdek rejalashtirish boʻlimi boshligʻi (shtatlar jadvalida koʻzda tutilgan boʻlsa) imzolari va muhr bilan tasdiqlangan yozma arizasi hisoblanadi.

18. Ishlar va xizmatlarning haqqoniy sermashaqqatliligini aniqlashda javobgarlik, akkreditatsiya va nazorat yoʻsinidagi tekshiruv boʻyicha — “Oʻzstandart” agentligiga, sertifikatlashtirish, xorijiy muvofiqlik sertifikatlarini tan olish hamda deklaratsiyalash boʻyicha — sertifikatlashtirish organi rahbarlari zimmasiga yuklatiladi.

19. Mazkur Qoidalar talablariga rioya qilish ustidan davlat nazoratini “Oʻzstandart” agentligi amalga oshiradi.

20. Ushbu Qoidalar Oʻzbekiston Respublikasi Moliya vazirligi bilan kelishilgan.