LexUZ sharhi
Mazkur Farmon O‘zbekiston Respublikasi Prezidentining 2020-yil 8-iyuldagi PF-6021-sonli “O‘zbekiston Respublikasi Prezidentining ayrim hujjatlariga o‘zgartirishlar kiritish, shuningdek, ba’zilarini o‘z kuchini yo‘qotgan deb hisoblash to‘g‘risida”gi Farmoniga asosan 2020-yil 1-avgustdan o‘z kuchini yo‘qotadi.
Xususiy tijorat banklarini tashkil qilish va ularning faoliyat ko‘rsatishi uchun qulay shart-sharoitlarini yaratish, xususiy sarmoyani jalb etish va undan xo‘jalik oborotida samarali foydalanish maqsadida:
O‘zbekiston Respublikasi hududida ishlab turgan tijorat banklari bilan bir qatorda xususiy tijorat banklari tashkil qilinishi mumkin, muassislar — jismoniy shaxslarning mazkur banklardagi ulushi ustav kapitalining kamida 50 foizini tashkil etadi, qolgan qismi esa davlatga qarashli bo‘lmagan yuridik shaxslarga tegishli bo‘ladi;
O‘zbekiston Respublikasining fuqarolari xususiy tijorat banklarining ustav kapitaliga mablag‘larini o‘z daromadlari to‘g‘risidagi deklaratsiyani taqdim etmasdan qo‘shishlari mumkin;
xususiy tijorat banklari tashkil etilgan paytdan boshlab ikki yil mobaynida budjetga daromad solig‘i to‘lashdan ozod qilinadi, bunda bo‘shaydigan mablag‘lar ularning moddiy-texnika bazasini mustahkamlashga va infrastrukturani rivojlantirishga yo‘naltiriladi;
Keyingi tahrirga qarang.
xususiy tijorat banki ustav kapitalining eng oz miqdori 250 ming EKYuga teng summada belgilanadi va bank faoliyatining dastlabki uch yili davomida o‘zgartirilmay saqlab turiladi;
Keyingi tahrirga qarang.
faoliyat boshlangandan keyin olti oy o‘tgach, xususiy tijorat bankiga xorijiy valyutada operatsiyalar o‘tkazishga litsenziya berilishi mumkin.
2. O‘zbekiston Respublikasining Markaziy banki Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda kassa uzellarini sotib olish va ular bilan uskunalashda, binolarni Markaziy bank tomonidan belgilangan talablarga muvofiq jihozlashda xususiy tijorat banklariga zarur yordam bersin.
3. Nazorat organlari faoliyatini muvofiqlashtiruvchi respublika kengashi xususiy tijorat banklarining faoliyatiga nazorat organlarining asossiz aralashuviga yo‘l qo‘ymasin.
4. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari xususiy tijorat banklariga moslashtirilgan xonalarni shartnoma asosida sotib olishda yordam ko‘rsatsinlar.
5. O‘zbekiston Respublikasi Adliya vazirligi Markaziy bank bilan birgalikda bir oy muddatda qonunchilikka ushbu Farmondan kelib chiqadigan o‘zgarish va qo‘shimchalar bo‘yicha takliflar tayyorlab taqdim etsin.
Markaziy bankka bir hafta muddatda o‘zining normativ aktlari va yo‘riqnomalarini mazkur Farmon talablariga muvofiq holga keltirish tavsiya qilinsin.
6. Ushbu Farmonning bajarilishini nazorat qilish O‘zbekiston Respublikasi Markaziy banki va Moliya vazirligi zimmasiga yuklansin.