LexUZ sharhi
Mazkur Farmon O‘zbekistan Respublikasi Prezidentining 2021-yil 6-apreldagi PF-6200-sonli “Suv resurslaridan foydalanish sohasida davlat boshqaruvi va nazorat tizimini yanada takomillashtirish hamda suv xo‘jaligi obyektlari xavfsizligini ta’minlash chora-tadbirlari to‘g‘risida”gi Farmoniga asosan o‘z kuchini yo‘qotgan.
Xalq xo‘jaligining faoliyat ko‘rsatishi, qishloq xo‘jaligi ekinlaridan barqaror hosil olinishi katta va alohida muhim suv xo‘jaligi obyektlarining ishonchli hamda bexatar ishlashiga bog‘liqdir.
Mana shunday shart-sharoitlarni ta’minlash bunday obyektlarning texnik holati ustidan nazorat kuchaytirilishini, turli vazirliklar va idoralar faoliyati muvofiqlashtirilishini, Markaziy Osiyo davlatlaridagi suv xo‘jaligi tashkilotlarining bahamjihat harakat qilishlarini taqozo etadi.
Katta va alohida muhim suv xo‘jaligi obyektlarining ishonchli texnik holatini hamda bexatar ishlashini ta’minlash maqsadida:
1. O‘zbekiston Respublikasi Vazirlar Mahkamasi huzurida Katta va alohida muhim suv xo‘jaligi obyektlarining texnik holatini hamda bexatar ishlashini nazorat qilish davlat inspeksiyasi (bundan bu yog‘iga “Davsuvxo‘jaliknazorat”) tashkil qilinsin.
2. Belgilab qo‘yilsinki, “Davsuvxo‘jaliknazorat” davlat nazorat organi hisoblanib, quyidagi asosiy vazifalarning hal etilishini ta’minlaydi:
katta va alohida muhim suv xo‘jaligi obyektlaridan foydalanishda ularning ishonchli texnik holatini ta’minlash ustidan nazoratni amalga oshirish hamda bexatar ishlashini ta’minlash;
katta va alohida muhim suv xo‘jaligi obyektlarining bexatarligi mezonlari hamda qoidalarini ishlab chiqishni tashkil qilish va tasdiqlash;
manfaatdor vazirliklar va idoralar bilan birgalikda katta va alohida muhim suv xo‘jaligi obyektlari texnik holatining ishonchliligi hamda bexatar ishlashini ekspertizadan o‘tkazish;
tegishli vazirliklar va idoralar bilan birga katta va alohida muhim suv xo‘jaligi obyektlarining texnik holati hamda bexatar ishlashi bilan bog‘liq hodisalarning oldini olishga doir takliflarni ishlab chiqish;
katta va alohida muhim suv xo‘jaligi obyektlarini qurish hamda qayta qurish loyihalarini ekspertizadan o‘tkazishni tashkil etish, ularni barpo etish sifati va foydalanishga qabul qilinishi ustidan nazoratni amalga oshirish;
katta va alohida muhim suv xo‘jaligi obyektlarining ishonchli muhofazasi tashkil etilishini nazorat qilish;
tegishli vazirliklar va idoralar bilan birgalikda katta va alohida muhim davlatlararo hamda chegara bo‘yi suv xo‘jaligi obyektlaridan puxta va bexatar foydalanish masalalarining Markaziy Osiyo davlatlari bilan bartaraf etilishini ta’minlash;
katta va alohida muhim suv xo‘jaligi obyektlaridan foydalanishda ularning ishonchli texnik holatini oshirish masalalarini ko‘rib chiqish hamda ularni O‘zbekiston Respublikasi Vazirlar Mahkamasiga kiritish.
3. Belgilab qo‘yilsinki, “Davsuvxo‘jaliknazorat”ning o‘z vakolatlari doirasida qabul qilingan qarorlari vazirliklar, idoralar, korporatsiyalar, konsernlar uyushmalar, korxonalar, muassasalar, tashkilotlar va mahalliy davlat hokimiyati organlari tomonidan ijro etish uchun majburiy hisoblanadi.