LexUZ sharhi
Mazkur Farmon O‘zbekiston Respublikasi Prezidentining 2016-yil 28-dekabrdagi PF-4906-sonli “O‘zbekiston faxriylarni ijtimoiy qo‘llab-quvvatlash “Nuroniy” jamg‘armasi faoliyatini yanada takomillashtirish chora-tadbirlari to‘g‘risida”gi Farmoniga asosan o‘z kuchini yo‘qotgan.
1. O‘zbekistonda o‘tkazilayotgan ijtimoiy siyosatning samaradorligini oshirish, keksalarni ijtimoiy himoya qilish va ularning yosh avlodni tarbiyalashdagi faolligini oshirish maqsadida ilovada ko‘rsatilgan qator Respublika jamoat tashkilotlari, vazirliklar, muassasalar, korxonalarning, O‘zbekiston faxriylarni ijtimoiy qo‘llab-quvvatlash “Nuroniy” jamg‘armasini ta’sis etish haqidagi takliflari qabul qilinsin.
2. Jamg‘arma o‘zini-o‘zi mustaqil boshqaruvchi, mablag‘ bilan ta’minlovchi va mustaqil faoliyat ko‘rsatuvchi nohukumat jamoat birlashmasi ekanligi ta’kidlansin.
3. Jamg‘arma quyidagi maqsad va vazifalarni o‘z faoliyatining asosi etib belgilanganligi e’tiborga olinsin:
— respublikada o‘tkazilayotgan kuchli ijtimoiy siyosatni amalga oshirishda, ayniqsa urush va mehnat faxriylari, nogironlarni e’zozlash, ularning atrofida ehtiromli muhit hosil qilish, g‘urur, moddiy, ma’naviy, tibbiy yordam ko‘rsatish choralarini ko‘rishda faol qatnashish;
— mustaqil O‘zbekistonni yangilash va rivojlantirishning ma’naviy-axloqiy negizlarini mustahkamlash, faxriylarning ijtimoiy-siyosiy hayotda faol ishtirok etishlari, bor bilim va salohiyatlarini istiqlol ishiga safarbar etishlari, mustabid sovet tuzumining xalqimiz, o‘lkamiz taraqqiyotiga yetkazgan zararini chuqur tahlil qilish hamda jamoatchilikka yetkazishlari uchun zarur shart-sharoitlar yaratish;
— milliy qadriyatlarimiz, o‘zbekona erksevarlik, vatanparlik, mehnatsevarlik, totuvlik, boshqalarga izzat-ikrom hislarini avloddan-avlodga o‘tib yanada boyishiga hissa qo‘shish, yoshlarni ona Vatanga, xalqimizga, istiqlol ishiga sadoqat, buyuk kelajak uchun kurashchanlik ruhida tarbiyalashda samarali faoliyat ko‘rsatish;
— faxriylar va nogironlarning moddiy sharoitini yaxshilash, ular uchun belgilangan imtiyozlarning, nafaqa to‘g‘risidagi qonunchilikning to‘la va o‘z vaqtida amalga oshirilishida rahnamolik qilish, bu borada ijrochi hokimiyat organlariga ko‘maklashish, keksalar, yordamga muhtoj va boshqa turli tabaqalarga savdo, madaniy-maishiy, tibbiy yordamlar ko‘rsatish, shu maqsadga yo‘naltirilgan ishlab chiqarish, tijorat, noshirlik, xayriya ishlarini amalga oshirish, ommaviy tadbirlar o‘tkazish;
4. Jamg‘armani qo‘llab-quvvatlash, uning faoliyati uchun zarur shart-sharoitlar yaratish, davlat idoralari, jamoat tashkilotlari hamda ishlab chiqarish korxonalari rahbarlari, tadbirkorlar, boshqa yuridik shaxslar va fuqarolarning keksa avlod oldidagi farzandlik burchi deb hisoblansin.
5. Jamg‘arma barcha yuridik va jismoniy shaxslar, shu jumladan xorijiy homiylar uchun ochiq ekanligi ma’lum qilinsin.
6. Joylarda jamg‘armaning tegishli tuzilmalarini tashkil etish bilan bog‘liq bo‘lgan masalalarni hal qilish Qoraqalpog‘iston Respublikasi Vazirlar Kengashi, viloyatlar, Toshkent shahar hokimliklari zimmasiga yuklatilsin.
Oldingi tahrirga qarang.
(7-band O‘zbekiston Respublikasi Prezidentining 2009-yil 17-iyundagi PF-4116-sonli Farmoniga asosan o‘z kuchini yo‘qotgan — O‘R QHT, 2009-y., 25-son, 282-modda)
8. O‘zbekiston Respublikasi Vazirlar Mahkamasi “Nuroniy jamg‘armasining faoliyat ko‘rsatishi bilan bog‘liq bo‘lgan masalalar yuzasidan tegishli qaror qabul qilsin.