LexUZ sharhi
Mazkur qaror O‘zbekiston Respublikasi Vazirlar Mahkamasining 2017-yil 30-dekabrdagi 1038-sonli “O‘zbekiston matbuot va axborot agentligi to‘g‘risidagi nizomni tasdiqlash, shuningdek, uning faoliyatini takomillashtirish to‘g‘risida”gi qaroriga asosan o‘z kuchini yo‘qotgan.
Yosh avlodni umuminsoniy qadriyatlar asosida, xalqimizning ma’naviy merosiga chuqur hurmat ruhida tarbiyalashni yanada yaxshilash va bu sohada matbuot vositalaridan samarali foydalanish hamda mavjud bolalar nashrlarini moliyaviy jihatdan qo‘llab-quvvatlash maqsadida Vazirlar Mahkamasi qaror qiladi:
1. “G‘uncha”, “Gulxan” jurnallari hamda “Tong yulduzi” va “Solnishko” (“Aziya yunpress”) gazetalarining moliyaviy ta’minoti davlat tasarrufiga olinib, O‘zbekiston Respublikasi Xalq ta’limi vazirligi va Davlat matbuot qo‘mitasi ushbu nashrlarning muassislari etib belgilansin.
2. O‘zbekiston Respublikasi Xalq ta’limi vazirligi va Davlat matbuot qo‘mitasi ushbu nashrlarni yuksak badiiy-tarbiyaviy darajada chiqarilishini ta’minlash, tahririyatlarga tegishli shart-sharoit yaratib berish choralarini ko‘rsinlar.
3. O‘zbekiston Respublikasi Moliya vazirligi muassislar taqdim etgan hisob-kitob asosida 1995-yildan boshlab har yili ushbu jurnallar va gazetalarni nashr etish xarajatlarining olingan foyda evaziga qoplanmagan qismini moliyalashtirish uchun davlat budjetidan mablag‘ ajratishni nazarda tutsin.