Kadrlar tayyorlash milliy dasturida akademik litseylar va kasb-hunar kollejlari tarmogʻini yaratish va rivojlantirish, ularni respublika hududida maqbul joylashtirish va zamonaviy talablarga muvofiq texnika bilan jihozlash boʻyicha belgilangan vazifalarni roʻyobga chiqarish maqsadida Vazirlar Mahkamasi qaror qiladi:

1. 1999—2005-yillarda akademik litseylar va kasb-hunar kollejlarining moddiy-texnika bazasini rivojlantirish hamda mablagʻ bilan taʼminlash dasturi:

akademik litseylarni qayta ixtisoslashtirish xamda ularda oʻquvchilar .oʻrinlarini va yotoqxonalarni ishga tushirish boʻyicha 1—3-ilovalarga*;

respublika mintaqalari boʻyicha akademik litseylarni oliy oʻquv yurtlariga biriktirib qoʻyish boʻyicha 4-ilovaga*;

kasb-hunar kollejlarini qayta ixtisoslashtirish hamda ularda oʻquvchilar oʻrinlarini va yotoqxonalarni ishga tushirish boʻyicha 5—8-ilovalarga*;

vazirliklar, idoralar, korxonalar va tashkilotlar tomonidan 1999-2005-yillarda yangi qurilish va rekonstruksiya qilish hisobiga kasb-hunar kollejlarini ishga tushirish yuzasidan topshiriq boʻyicha 9-ilovaga*;

akademik litseylar va kasb-hunar kollejlarini qurish va qayta ixtisoslashtirishni mablagʻ bilan taʼminlash hajmlari va manbalari boʻyicha 10-ilovaga* muvofiq tasdiqlansin.

2. Belgilansinki:

budjet mablagʻlari, budjetdan tashqari fondlar mablagʻlari, korxonalar va tashkilotlar, homiylarning oʻz mablagʻlari, xorijiy kreditlar akademik litseylar va kasb-hunar kollejlarining moddiy-texnika bazasini rivojlantirish va mablagʻ bilan taʼminlash dasturini mablagʻ bilan taʼminlashning asosiy manbalari hisoblanadi;

Akademik litseylar va kasb-hunar kollejlarining moddiy-texnika bazasini rivojlantirish hamda mablagʻ bilan taʼminlash dasturini amalga oshirishni muvofiqlashtirish Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga yuklanadi;

koʻrsatib oʻtilgan obyektlarni yangidan qurish va qayta ixtisoslashtiriladiganlarini rekonstruksiya qilish faqat Oʻzbekiston Respublikasi Davlat arxitektura va qurilish qoʻmitasining namunaviy loyihalari boʻyicha hamda uning nazoratida amalga oshiriladi.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻrta maxsus, kasb-hunar taʼlimi markazi, Oʻzbekiston Respublikasi Xalq taʼlimi vazirligi, Makroiqtisodiyot va. statistika vazirligi, Moliya vazirligi, boshqa manfaatdor vazirliklar va idoralar bilan birgalikda 1999—2005-yillarda akademik litseylar va kasb-hunar kollejlarining moddiy-texnika bazasini rivojlantirish va mablagʻ bilan taʼminlash. mintaqaviy dasturlarini, akademik litseylarni va kasb-hunar kollejlarini qayta ixtisoslashtirish va ishga tushirishning aniq hududiy dasturlaridan (11-12-ilovalar*) kelib chiqqan holda, bir oy muddatda ishlab chiqsinlar va tasdiqlasinlar, unda quyidagi prinsiplar asos qilib olinsin:

taʼlim muassasalarining yangi turlariga qoʻyilayotgan talablarga muvofiq akademik litseylar va kasb-hunar kollejlarini barpo etish uchun faoliyat koʻrsatib turgan oʻrta maxsus va hunar-texnika taʼlim muassasalarining moddiy-texnika bazasidan, shuningdek boshqa binolar, imoratlar va qurilishi tugallanmagan obyektlardan yuqori darajada foydalanish;

ishlab chiqarish amaliyoti bazalari va oʻquvchilarning yashash joylari yaqinligini hisobga olgan holda kasb-hunar kollejlarini oqilona ixtisoslashtirish va joylashtirish. Zarur hollarda yashash joyi uzoq boʻlgan oʻquvchilar uchun yotoqxonada yashash sharoitlari yaratish;

akademik litseylarni, qoidaga koʻra, oliy taʼlim muassasalari huzurida, shuningdek yuqori malakali pedagog kadrlar maktabiga ega boʻlgan shaharlarda va tumanlar markazlarida tashkil etish;

9-sinf bitiruvchilarini 2005-2006 oʻquv yilidan kechiktirmay oʻqitishning yangi shakllari bilan qamrab olgan xolda ularni yangi tashkil etilayotgan akademik litseylar va kasb-hunar kollejlariga bosqichma-bosqich qabul qilish;

budjet mablagʻlaridan samarali foydalanish va mablagʻ bilan taʼminlashning muqobil manbalarini, shu jumladan korxonalar va tashkilotlar, homiylar mablagʻlarini, toʻgʻridan toʻgʻri xorijiy investitsiyalarni keng jalb qilish.

Mintaqaviy dasturlarda ishga tushirilayotgan akademik litseylar va kasb-hunar kollejlari aniq roʻyxatlarini shakllantirish .nazarda tutilsin va Dastur topshiriqlarining bajarilishi taʼminlansin.

4. Oʻzbekiston Respublikasi Makroiqtisodiyot va statistika vazirligi, Moliya vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hamda Oʻzbekiston Respublikasining boshqa manfaatdor vazirliklari va idoralari bilan birgalikda:

1999—2005-yillardagi davrda xar yili ishlab chiqiladigan respublika investitsiya dasturlarida akademik litseylar va kasb-hunar kollejlarining moddiy-texnika bazasini rivojlantirish hamda mablagʻ bilan taʼminlash dasturining amalga oshirilishini taʼminlovchi hajmlarda limitlar va mablagʻ bilan taʼminlash manbalari (shu jumladan budjet mablagʻlari)ni nazarda tutsinlar, zarur hollarda ilgari qabul qilingan investitsiya dasturlari va loyihalarni amalga oshirish muddatlari va mablagʻ bilan taʼminlash manbalarini qayta koʻrib chiqsinlar;

Dasturni amalga oshirish uchun imtiyozli shartlarda toʻgʻridan toʻgʻri xorijiy investitsiyalarni jalb qilish boʻyicha, ushbu maqsadlar uchun Hukumat kafolati berilishini hisobga olgan holda, xalqaro moliya tashkilotlari va boshqa xorijiy investorlar bilan doimiy asosda ish olib borsinlar;

Akademik litseylar va kasb-hunar kollejlarining moddiy-texnika bazasini rivojlantirish hamda mablagʻ bilan taʼminlash dasturi topshiriqlarining bajarilishi amaliyotini hisobga olgan holda zarur xollarda uning koʻrsatkichlariga kiritilishi mumkin boʻlgan tuzatishlar toʻgʻrisida takliflar taqdim etsinlar.

5. Vazirliklar, idoralar, korporatsiyalar, konsernlar, uyushmalar, korxonalar va tashkilotlar oʻz mablagʻlari va jalb qilingan mablagʻlar hisobiga:

9-ilovaga muvofiq kasb-hunar kollejlarining oʻz vaqtida ishga tushirilishini taʼminlasinlar;

akademik-litseylar va kasb-hunar kollejlarining moddiy-texnika bazasini rivojlantirish va mablagʻ bilan taʼminlash mintaqaviy dasturlariga muvofiq oʻz balansidagi oʻrta maxsus va hunar-texnika taʼlim muassasalarini qayta ixtisoslashtirsinlar.

6. Belgilansinki:

yuridik shaxslarning soliqqa tortiladigan daromadi (foydasi) kasb-hunar kollejlari va akademik litseylar qurilishiga, ularni rekonstruksiya qilishga, qayta ixtisoslashtirishga va jihozlashga yoʻnaltiriladigan foyda summasiga kamayadi;

taʼlim muassasalarini jihozlash uchun import qilinadigan oʻquv-laboratoriya asbob-uskunalari boj toʻlovlaridan ozod etiladi.

7. Belgilansinki, akademik litseylar va kasb-hunar kollejlarini zamonaviy asbob-uskunalar bilan toʻliq jihozlash moliyaviy resurslarning topilishiga qarab bosqichma-bosqich amalga oshiriladi.

Oʻzbekiston Respublikasi Davlat arxitektura va qurilish qoʻmitasi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi Oʻzbekiston Respublikasi Makroiqtisodiyot va statistika vazirligi, Moliya vazirligi bilan kelishgan holda akademik litseylar va kasb-hunar kollejlarini asbob-uskunalar bilan jihozlash normativlarini, qurilishlar smetasiga kiruvchi asbob-uskunalarni alohida satrga ajratgan holda, 1998-yil oxirigacha ishlab chiqsinlar va tasdiqlash uchun Vazirlar Mahkamasiga kiritsinlar.

8. Akademik litseylar va kasb-hunar kollejlarini loyihalashtirish va qurish yuzasidan bosh buyurtmachi funksiyalarini bajarish Oʻrta maxsus kasb-hunar taʼlimi markazining akademik litseylar va kasb-hunar kollejlari qurilishi boʻyicha Qoraqalpogʻiston respublika va viloyat direksiyalariga yuklansin, bosh pudratchi etib esa, qoidaga koʻra, akademik litseylar va kasb-hunar kollejlarini qurish va rekonstruksiya qilish boʻyicha hududiy ixtisoslashtirilgan qurilish trestlari belgilansin.

Belgilansinki, Mintaqaviy dasturlarning bajarilishi uchun Qoraqalpogʻiston Respublikasi Vazirlar Kengashining raisi, viloyatlar va Toshkent shahar hokimlari shaxsan javob beradilar.

9. Oʻrta maxsus, kasb-hunar taʼlimi markazi Makroiqtisodiyot va statistika vazirligi Oʻzbekiston Respublikasi Davlat arxitektura va qurilish qoʻmitasi bilan birgalikda 1998-yil 1-dekabrgacha 1999-yilda quriladigan obyektlar boʻyicha tender hujjatlarini toʻliq hajmda tayyorlasin.

10. Qoraqalpogʻiston Respublikasi Vazirlar Kengashi, viloyatlar hokimliklari qishloq xoʻjaligi sohasidagi kasb-hunar kollejlarini tajriba xoʻjaliklari va yordamchi xoʻjaliklar tashkil etish uchun kamida 20 gektar yer maydoni bilan taʼminlasinlar.

11. Vazirlar Mahkamasining 1998-yil 13-maydagi 204-son qarori bilan tuzilgan Hukumat komissiyasi 1999—2005-yillarda akademik litseylar va kasb-hunar kollejlarining moddiy-texnika bazasini rivojlantirish hamda mablagʻ bilan taʼminlash dasturi topshiriqlarining bajarilishi ustidan doimiy monitoringni taʼminlasin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. H. Joʻrabekov va Oʻzbekiston Respublikasi Bosh vazirining oʻrinbosari A. A. Azizxoʻjayev zimmasiga yuklansin.