Ишлаб чиқаришда тажриба орттириш педагогларнинг амалий билимлари, кўникма ва малакаларини кенгайтиради ва чуқурлаштиради ҳамда ҳар хил ихтисосликдаги касб-ҳунар коллежлари ва олий таълим муассасалари педагог кадрлари малакасини оширишнинг энг самарали шакли ҳисобланади.

Илмий-тадқиқот муассасасида (Фанлар академиясининг илмий муассасалари, тармоқ илмий-тадқиқот институтлари, марказлари, лабораториялар ва ҳоказоларда) тажриба орттириш педагогларни фаннинг замонавий ютуқлари, тегишли мутахассисликлар бўйича уни ривожлантиришнинг устувор йўналишлари, илмий экспериментларни олдинга қўйишнинг самарали методлари билан таништириш, илмий тадқиқотлар ўтказиш мақсадини кўзлайди. У таълимнинг барча даражалари педагог ходимлари учун фойдалидир.

Педагог кадрларнинг хорижда тажриба орттириши Ўзбекистон Республикаси Президентининг «Истеъдод» жамғармаси, хорижий мамлакатлар ва халқаро ташкилотлар томонидан мамлакатимиз таълим тизимини ривожлантириш ва такомиллаштиришга кўмаклашиш учун ажратилган грантларга мувофиқ, шунингдек, таълимни бошқариш органлари билан таълим муассасаларининг ўзлари ўртасида тузилган шартномалар асосида амалга оширилади.

Мустақил ўқиб билим орттириш — таълим даражаси ва сифатига қўйиладиган Давлат талабларига мувофиқ ўқитиладиган фан бўйича янги билимлар, малака ва кўникмаларнинг педагог кадрлар томонидан мустақил ўзлаштирилишидир. Ўқитишнинг мазмуни, қанча давом этиши ва даврийлиги шахсан педагогнинг ўзи томонидан белгиланади.

Мустақил ўқиб билим орттириш шаклида малака оширишни барқарор юқори профессионал рейтингга эга бўлган, замонавий ахборот технологиялари билан ишлашнинг амалий кўникмаларини эгаллаб олган, ўзини ўзи камол топтириш жараёнига танқидий ва ижодий ёндошишга қодир бўлган педагоглар учун тавсия этиш мақсадга мувофиқдир.

Мустақил ўқиб билим орттириш ривожланган демократик давлатлар ўқув юртларида педагог кадрлар малакасини оширишнинг энг кўп тарқалган шакли ҳисобланади. Малака оширишнинг ушбу шакли таълим хизматларининг рақобатли бозори, педагог ходимларнинг ижодий меҳнатини рағбатлантиришнинг таъсирчан механизми мавжуд бўлган жойларда устунлик қилади ва ривожланади.

Ижодий таътил — янги ўқув адабиётлари (дарслик ёки ўқув қўлланма) яратиш замонавий педагогик ахборот технологияларини ишлаб чиқиш ва ўқув-тарбия жараёнига жорий этиш, педагогларнинг касбий фаолияти, йўналиши билан боғлиқ бўлган йирик илмий ишни (монография, диссертация ва ҳоказоларни) тугаллаш учун таълим муассасасининг илмий (педагогик) кенгаши қарори билан педагог кадрларга бериладиган таътил.

Очиқ ўқув машғулотлари — замонавий ахборот-коммуникация технологиялари, ўқитишнинг интерактив методлари қўлланилган ҳолда академик гуруҳларда жадвал бўйича ўтказиладиган олдиндан эълон қилинган муаммо ёки инновация мавзуси бўйича машғулотдир. Очиқ ўқув машғулотларига билимларнинг ушбу соҳасидаги тажрибали педагоглар, олимлар ва мутахассислар мажбурий тартибда таклиф этилади. Ушбу машғулотларнинг сифати таълим муассасасининг кафедрасида ёки илмий-методик (педагогик) кенгашида муҳокама қилинади.

Очиқ ўқув машғулотлари замонавий педагогик ва ахборот технологияларини, ўқитишнинг интерактив методларини пухта ишлаш ва ўқув жараёнига жорий этиш учун тажриба майдони, ёш педагоглар учун педагогик маҳорат мактаби бўлиб хизмат қилади. Олий таълим муассасаларида очиқ маърузалар ўтказиш доцент ва профессор илмий унвонларига талабгорлик қилувчи педагог кадрлар учун мажбурий ҳисобланади.

Илмий ва илмий-методик семинарлар, конференциялар, август ўқишлари ва ҳоказоларда қатнашиш — педагог кадрларнинг педагогика фани ва амалиётининг, ўқитиш методологияси ва технологиясининг таълим муассасаларида муҳим муаммоларни ҳал этишга ва ўқув-тарбия жараёнининг юқори сифатини таъминлашга йўналтирилган долзарб мавзулари бўйича илмий ёки илмий-методик маърузалар (ахборотлар) билан чиқишидир. Олдиндан маълум бўлган мавзу бўйича маъруза (ахборот) тайёрлаш жойларда тегишли тадқиқотлар олиб борилишини ва белгиланган тартибда эълон қилиш учун маърузалар тезислари тайёрланишини назарда тутади.

Педагог кадрларнинг йирик илмий ёки илмий-методик семинарлар, конференцияларда қатнашиши уларга ахборот ва иш тажрибаси билан алмашиш, ўқув жараёнини ташкил этишнинг замонавий тенденциялари ва илғор таълим технологиялари билан танишиш имкониятини беради, уларнинг касб малакаси даражасининг ўсишига кўмаклашади.

Педагог кадрларни қайта тайёрлаш ва уларнинг малакасини оширишнинг юқорида баён қилинган асосий турлари ва шакллари узлуксиз таълим тизимининг барча турлари учун умумий ҳисобланади. Шу билан бирга, таълимнинг ҳар бир тури алоҳида ҳолда уларга кадрлар тайёрлашнинг хусусияти билан боғлиқ равишда педагог кадрлар малакасини оширишнинг бошқа шаклларига ҳам эга бўлиши мумкин.

Педагог кадрлар учун малака оширишнинг тегишли шаклини танлаш ўқув-тарбия жараёни сифати мониторинги (диагностикаси) натижалари ҳамда ўқув йили мобайнидаги ҳар бир педагогнинг касбий малака даражаси, Давлат талабларига мувофиқ ва педагогнинг ўз хоҳишларидан келиб чиққан ҳолда педагог кадрларни ички аттестациядан ўтказиш асосида амалга оширилиши керак.

Малака оширишни ўтказишнинг вақтинчалик параметрлари малака оширишнинг белгиланган шаклларига, малака оширишнинг тўғридан-тўғри турларига эҳтиёж сезган педагогларнинг умумий контингентига ва жойларда ўқув-тарбия жараёни сифати энг юқори даражада таъминланган тақдирда, малака ошириш бўйича таълим муассасалари имкониятларига боғлиқ ҳолда белгиланади.

Малака оширишнинг тўғридан-тўғри шаклларидан муваффақиятли ўтган педагог кадрларга белгиланган намунадаги сертификат берилади.

6. Педагог кадрларни қайта тайёрлаш ва уларнинг малакасини ошириш мазмуни ва сифатига қўйиладиган умумий талаблар

Таълим муассасаларининг таълимнинг тегишли турларига бўлган эҳтиёжи қайта тайёрлаш ва малака ошириш йўналиши, даражаси, ҳажми ва мазмунини шакллантиради, малака талабларини олға суради, таълимнинг ўхшаш технология ва шаклларини танлашни тақозо қилади.

Қайта тайёрлаш мазмуни янги билимлар ва кўникмаларни ўзлаштиришга, малака ошириш эса — педагог кадрларнинг касбий билимлари ва кўникмаларини янгилаш ва чуқурлаштиришга йўналтирилган.

Қайта тайёрлаш ва малака ошириш сифати тингловчилар тайёргарлигининг зарур ва етарли даражаси, уларнинг билимлари ва амалий маҳоратларининг педагог кадрларга қўйиладиган малака талабларига мувофиқлиги билан белгиланади.

Қайта тайёрлаш ва малака ошириш мазмуни ва сифатига қўйиладиган талаблар тегишли таълим дастурлари билан белгиланади.

Қуйидагилар қайта тайёрлаш ва малака ошириш бўйича таълим дастурлари мазмунига қўйиладиган базавий талаблар ҳисобланади:

касблар ва лавозимларга бўлган касбий малака талабларига мувофиқлик;

Давлат мактабгача тарбия талабларига, Умумий ўрта, ўрта махсус, касб-ҳунар ва олий таълим Давлат таълим стандартларига нисбатан изчиллик;

замонавий педагогик технологияларга ўқитиш воситаларига йўналтирилганлик;

дастурлар мазмунининг қайта тайёрлаш ва малака оширишнинг белгиланган турлари ва шаклларига мувофиқлиги.

Қайта тайёрлаш ва малака ошириш бўйича таълим дастурлари тегишли базавий мақсадлар ва малакавий ишлар мазмуни билан тугалланади.

7. Ўқув юкламасининг ҳажми

7.1. Қайта тайёрлаш

Педагог кадрларни қайта тайёрлаш улар асосида таълимнинг тегишли турини бошқариш давлат ваколатли органи томонидан намунавий ўқув дастурлари тасдиқланадиган мақсадли таълим дастурлари бўйича амалга оширилади. Ўқув юкламасини режалаштиришда педагог кадрларнинг мустақил ишлашига алоҳида эътибор қаратилади.

Қайта тайёрлашнинг қанча давом этиши илгари олинган олий таълим даражасига, қайта тайёрлашнинг тури ва кўп меҳнат талаб қилишига, ўқитиш шаклларига боғлиқ бўлади ва асосий ишдан ажралган ҳолда ўқитилганда камида 16 ҳафта (576 соат) бўлиши керак.

Ўқув юкламасининг энг юқори ҳажми ҳафтасига 36 соат этиб белгиланади. Асосий ишдан ажралган ҳолда ўқитишда аудитория машғулотларининг энг юқори ҳажми ҳафтасига 24 соат ҳажмида белгиланиши керак.

Ўқув юкламасининг умумий ҳажми предметлар блоклари бўйича, кадрлар буюртмачиси томонидан белгиланадиган қайта тайёрлашга талаблардан келиб чиққан ҳолда тақсимланади.

7.2. Малака ошириш

Педагог кадрлар малакасини оширишнинг даврийлиги ва қанча давом этиши уни ташкил этиш шаклларига ҳамда педагогнинг малакаси (рейтинги) даражасини ва индивидуал касбий эҳтиёжини ҳисобга олган ҳолда, кадрлар буюртмачиси томонидан белгиланадиган талабларга боғлиқ бўлади.

Педагог кадрлар малакаси ошириш тўғридан-тўғри шаклларининг умумий давом этиш муддати асосий ишдан ажралган ҳолда ўқитишда камида 4 ҳафта (144 соат) этиб белгиланади.

Малака оширишнинг билвосита шаклларининг даврийлиги ва қанча давом этиши таълим муассасаси томонидан таълимнинг тегишли турини бошқаришга давлат ваколатли органи билан келишган ҳолда, лекин ҳар уч йилда камида бир марта белгиланади.

Малака оширишнинг тўғридан-тўғри шакллари учун аудитория машғулотларининг ва мустақил ишларнинг энг юқори ҳажми ҳафтасига 36 соат этиб белгиланади.

8. Педагог кадрларнинг тайёрланганлигига қўйиладиган талаблар.
Умумий малака талаблари

8.1. Умумий талаблар

Кадрлар тайёрлаш миллий дастури замонавий педагог жавоб бериши керак бўлган талаблар комплексини белгилайди. Қуйидагилар мутахассиснинг педагогик ишга тайёрланганлигининг зарур ва етарли даражасини таъминлайдиган асосий (фундаментал) талаблар ҳисобланади:

ўқитиш (дарс бериш) маҳорати;

тарбиялаш маҳорати;

ўқув-тарбия жараёнида гуманитар омилни таъминлайдиган шахсий сифатлар;

таълим олаётганларнинг билимларини холисона назорат қилиш ва баҳолаш маҳорати.

Ўқитиш (дарс бериш) маҳорати қуйидаги талаблар билан белгиланади:

касбий лаёқат ва эрудиция;

психологик-педагогик тайёргарлик;

таълим олувчиларни мустақил фикрлашга ва янги билимлар олишга ўргатиш маҳорати;

ўқув адабиётлари шакллари ва турларини билиш;

янги педагогик ва ахборот технологияларини эгаллаганлик, Интернетнинг глобал тармоғи билан ишлаш бўйича амалий кўникмалар;

педагог кадрлар малакасини оширишнинг асосий шаклларини билиш;

илмий-педагогик ижодиёт методологиясини билиш;

педагогика фани ва соҳасини ривожлантиришнинг асосий йўналишларини билиш;

предметлараро алоқалардан фойдаланиш маҳорати;

риторика ва нотиқлик санъати асосларини билиш;

Болалар ҳуқуқлари тўғрисидаги конвенцияни, «Таълим тўғрисида» ва «Кадрлар тайёрлаш миллий дастури тўғрисида»ги қонунларни, узлуксиз таълим тизимининг асосий атамалари ва тушунчаларини билиш.

Тарбиялаш маҳорати ўқитиш ва тарбиялаш жараёнининг боғлиқлиги, унинг уйғун ривожланган шахсни шакллантиришга, уларда юксак маъданий ва маънавий савияни қарор топтиришга, педагогнинг юксак шахсий сифатларига, унинг ватанпарварлик, обрў ва бурчни ҳис этишига, кенг гуманитар ва гуманистик тайёрлигига, шунингдек ўқувчилар ўртасида тарбиявий ишларни ташкил этишнинг амалий кўникмаларига асосланади.

Педагогнинг ўқув-тарбиявий жараёндаги гуманитар омилни белгилайдиган шахсий сифатларига қуйидагилар киради: талабчанлик, ҳаққонийлик, ҳалоллик, меҳрибонлик, хушмуомалалик. Ушбу сифатлар педагогнинг таълим олувчилар учун аҳамиятини белгилаши керак. Шахсий сифатлар ўқитиш (дарс бериш) ва тарбиялаш маҳоратига таъсир кўрсатади.

Таълим олувчиларнинг билимларини холисона назорат қилиш ва баҳолаш маҳорати психологик-педагогик жиҳатдан ўқитиш (дарс бериш) ва тарбиялаш маҳорати билан узвий боғлиқдир. Педагог таълим олувчиларнинг билимлари ва маҳоратларини холисона баҳолаш принциплари, методлари ва механизмларини билиши, стандартлаштирилган тестларни ишлаб чиқиш, таълим олувчиларнинг ўзлаштиришини назорат қилишнинг турли шаклларини самарали қўлланиш маҳоратига эга бўлиши керак.

Умумий талаблардан ташқари, педагог кадрларга таълим турига кўра алоҳида талаблар қўйилади.

8.2. Мактабгача таълим педагог кадрларига қўйиладиган талаблар

Мактабгача таълим педагог кадрларини қайта тайёрлаш ва уларнинг малакасини ошириш тизими тузилмаси 1-иловада келтирилган.

Педагог ўрта махсус, касб-ҳунар ёки олий педагогик маълумотга эга бўлиши ва қуйидагиларни қўллана олиши керак:

Мактабгача таълим давлат талабларини қўлланиш ва Бошланғич (1—4-синфлар) таълим давлат таълим стандарти тўғрисида тушунчага эга бўлиш;

мактабгача таълим бўйича норматив-ҳуқуқий ва директив ҳужжатлар;

мактабгача таълим шакл ва методлари;

тарбиявий ишлар методологияси ва болаларда миллий мустақиллик ғоялари асосида маънавий-ахлоқий хислатларни шакллантириш;

мактабгача ёшдаги болалар психологияси;

ўқитишнинг интерактив (ўйинлар ташкил этиш) методлари;

болаларни интеллектуал ривожлантириш ва уларни мактабга тайёрлаш бўйича базавий дастурлар;

илмий-методик ишлар ва мустақил таълим асослари;

болалар ва ота-оналар билан муомала қилишда этика ва эстетика нормалари;

белгиланган санитария-гигиена нормалари.

8.3. Умумий ўрта таълим педагог кадрларига қўйиладиган талаблар

Умумий ўрта таълим педагог кадрларини қайта тайёрлаш ва уларнинг малакасини ошириш тизими тузилмаси 1-иловада келтирилган.

Ўқитувчи олий педагогик маълумотга эга бўлиши қуйидагиларни билиши ва улардан фойдалана олиши керак:

Умумий ўрта таълим давлат таълим стандарти (умумий қоидалар), шунингдек, ўқитилаётган предмет бўйича ўқув дастури талаблари;

умумий ўрта таълим тўғрисидаги норматив-ҳуқуқий ва директив ҳужжатлар;

синфлар ва кабинетлар (лабораториялар)ни тегишли ўқув-лаборатория анжомлари билан жиҳозлаш бўйича талаблар;

ўқув-тарбия жараёнини ташкил этиш ва сифатини таъминлаш принциплари;

ўқув предметларининг мазмуни ва уларни ўқитишдаги изчиллик асослари;

ўқувчиларнинг умумий ва ёш психологияси;

ўқитишнинг интерактив методлари;

ўқувчиларни миллий мустақиллик ғоялари асосида маънавий-ахлоқий тарбиялаш методологияси;

ўқувчилар ўртасида касбга йўналтириш ишларини олиб бориш шакл ва методлари;

ўқувчилар ва уларнинг ота-оналари билан муомалада этика ва эстетика нормалари;

синфдан ташқари (дарсдан ташқари) ишларни ташкил этиш ва ўтказиш методикаси;

белгиланган санитария-гигиена нормалари.

8.4. Ўрта махсус, касб-ҳунар таълими педагог кадрларига қўйиладиган талаблар

Ўрта махсус, касб-ҳунар таълими педагог кадрларини қайта тайёрлаш ва уларнинг малакасини ошириш тизими тузилмаси 2-иловада келтирилган.

Ўқитувчи олий маълумотга эга бўлиши, қуйидагиларни билиши ва улардан фойдалана олиши керак:

Ўрта махсус, касб-ҳунар таълими давлат таълим стандарти (умумий қоидалар), Кадрлар тайёрлаш таълими (ихтисоси)нинг тегишли йўналиши бўйича давлат таълим стандарти, шунингдек, ўқитилаётган фан бўйича ўқув дастури;

ўрта махсус, касб-ҳунар таълими тўғрисидаги норматив-ҳуқуқий ва директив ҳужжатлар;

Кейинги таҳрирга қаранг.

умумий касб-ҳунар ва махсус фанларни ўқитиш хусусияти ва методикаси;

чуқур ўрганиладиган фанларни ўқитиш хусусияти ва методикаси;

ўқув фанларининг мазмуни ва уларни ўқитишдаги изчиллик принциплари;

ўқувчиларнинг умумий ва ёш психологияси;

ўқув машғулотларининг ҳар хил турларини (лекциялар, амалий машғулотлар, лаборатория машғулотлари, курс ишлари лойиҳалари, малака бўйича амалий машғулотларни) ўтказиш методикаси;

ўқувчиларни миллий мустақиллик ғоялари асосида маънавий-ахлоқий тарбиялаш методологияси;

ўқувчилар ва уларнинг ота-оналари билан муомалада этика ва эстетика нормалари;

ўқув юкламаларини режалаштириш ва уларнинг бажарилишини назорат қилиш масалалари;

меҳнат бозори эҳтиёжларини ҳисобга олган ҳолда асосий ўқув режаларини ва ўқув фанлари дастурларини такомиллаштириш принциплари;

иқтидорли ўқувчилар билан ишлаш методикаси;

касб-ҳунар таълимида менежмент ва маркетинг асослари;

белгиланган санитария-гигиена нормалари.

8.5. Олий таълим педагог кадрларига қўйиладиган талаблар

Олий таълим педагог кадрларини қайта тайёрлаш ва уларнинг малакасини ошириш тизими тузилмаси 3-иловада келтирилган.

Олий таълим муассасаси ўқитувчиси магистр даражасидан паст бўлмаган олий маълумотга (дипломли мутахассис) эга бўлиши, илмий-тадқиқот фаолиятини олиб бориши, қуйидагиларни билиши ва ижодий қўлланиш кўникмаларига эга бўлиши керак:

Олий таълим давлат таълим стандарти (асосий қоидалар), Кадрлар тайёрлаш тегишли таълим (ихтисос) йўналиши бўйича давлат таълим стандарти, шунингдек, ўқитилаётган фан бўйича ўқув дастури;

олий таълим тўғрисидаги норматив-ҳуқуқий ва директив ҳужжатлар;

бакалавриат йўналишлари ва магистратура ихтисослари бўйича ўқув жараёнини ташкил этиш ва унинг сифатини таъминлашнинг замонавий методлари;

асосий ўқув режалари ва ўқув фанлари дастурларини такомиллаштириш принциплари;

ўқув юкламаларини режалаштириш ва уларнинг бажарилишини назорат қилиш методлари;

ўқув фанлари мазмуни ва уларни ўқитишдаги изчиллик асослари;

талабалар ўртасида миллий мустақиллик ғоялари асосида маънавий-ахлоқий ва тарбиявий ишларни олиб бориш принциплари;

педагогика ва касб-ҳунар бўйича муомала қилиш назарияси ва амалиёти;

таълим жараёни қатнашчилари билан ўзаро муносабатларда этика нормалари ва нутқ маданияти;

чет тиллардан биттасида сўзлашув нутқи асослари;

мустақил таълим олиш йўли билан ўз билимларини такомиллаштириш методлари;

талабаларда танқидий фикрлашни шакллантириш принциплари;

бакалавриат ва магистратура таълим дастурларида изчиллик ва мослашувчанликни ташкилий ва методик таъминлаш;

кадрлар буюртмачилари ва меҳнат бозори эҳтиёжларини ҳисобга олган ҳолда ўқув режаларини ва фанлар дастурларини шакллантириш асослари;

талабаларнинг ўз билимини мустақил оширишини ташкилий ва методик таъминлаш;

талабаларнинг билимлари, маҳоратлари ва кўникмаларини рейтинг бўйича назорат қилишни ташкил этиш ва илмий-методик таъминлаш асослари;

кадрлар тайёрлаш сифатига таъсир кўрсатадиган омиллар;

таълим, фан ва ишлаб чиқаришни интеграциялашни ташкил этиш асослари;

иқтидорли талабаларни қидириб топиш, танлаш ва улар билан ишлаш методлари;

олий таълимда менежмент ва маркетинг асослари.

Кейинги таҳрирга қаранг.

Узлуксиз таълим тизими педагог кадрларининг алоҳида лавозим тоифаларга қўйиладиган малака талаблари тегишли таълим турини бошқариш органи томонидан белгиланади.

9. Таълим ҳақидаги ҳужжатлар

Қайта тайёрлаш ёки малака ошириш бўйича таълим дастурларини муваффақиятли бажарган педагог кадрларга тегишли равишда давлат намунасидаги қуйидаги ҳужжатлар берилади:

малака ошириш ҳақидаги сертификат — камида 144 соат ҳажмидаги таълим дастурларини ўтаган шахслар учун;

қайта тайёрлаш ҳақидаги диплом — камида 576 соат ҳажмидаги таълим дастурларини ўтаган шахслар учун.

Таълим ҳақидаги давлат намунасидаги ҳужжатлар Ўзбекистон Республикаси Вазирлар Маҳкамаси томонидан тасдиқланади.

Педагог кадрларни қайта тайёрлаш ва уларнинг малакасини ошириш натижалари тўғрисидаги маълумотлар (шу жумладан билвосита шакллар) ўз вақтида педагогнинг рейтинг дафтарчасида қайд этилади, унинг намуналари ва уни тўлдириш тартиби тегишли таълим турини бошқариш давлат ваколатли органи томонидан тасдиқланади.

10. Педагог кадрларни қайта тайёрлаш ва уларнинг малакасини ошириш тизими норматив ҳужжатлари

Педагог кадрларни қайта тайёрлаш ва уларнинг малакасини ошириш тизими норматив ҳужжатларига ҳозирги вақтдаги Педагог кадрларни қайта тайёрлаш ва уларнинг малакасини оширишга давлат талаблари, педагог кадрларни қайта тайёрлаш ва уларнинг малакасини ошириш тўғрисидаги тегишли низомлар, педагог кадрларни қайта тайёрлаш ва уларнинг малакасини ошириш бўйича намунавий ўқув режалари, ўқув фанларининг намунавий дастурлари, шунингдек белгиланган тартибда таълим соҳасидаги давлат бошқаруви органлари томонидан ишлаб чиқиладиган ва тасдиқланадиган бошқа норматив ҳужжатлар киради.

11. Педагог кадрларни қайта тайёрлаш ва уларнинг малакасини ошириш сифатини баҳолаш

11.1. Кадрларни қайта тайёрлаш ва уларнинг малакасини ошириш сифатини назорат қилиш

Кадрларни қайта тайёрлаш ва уларнинг малакасини ошириш сифатини назорат қилиш қуйидагиларни ўз ичига олиши керак:

кадрларни қайта тайёрлаш ва уларнинг малакасини ошириш бўйича таълим муассасалари томонидан амалга ошириладиган ички назорат. Ички назорат тегишли таълим турини бошқариш давлат ваколатли органи томонидан тасдиқланган низомлар асосида ўтказилади;

фанлар бўйича аттестациядан ўтказишни ҳамда малака ошириш ва қайта тайёрлаш йўналишлари бўйича Педагог кадрларни қайта тайёрлаш ва уларнинг малакасини оширишга давлат талабларига мувофиқ малака ошириш тизими тингловчилари учун — малакани ҳимоя қилиш ишларини ҳамда қайта тайёрлаш курслари тингловчилари учун — курсларни тугатиш ишларини ўз ичига оладиган якуний назорат.

таълимни бошқариш ваколатли органи ва кадрлар буюртмачилари томонидан амалга ошириладиган ташқи назорат.

11.2. Таълим муассасаларининг кадрларни қайта тайёрлаш ва уларнинг малакасини ошириш бўйича фаолиятини баҳолаш тартиби

Таълим муассасаларининг кадрларни қайта тайёрлаш ва уларнинг малакасини ошириш бўйича фаолиятини баҳолаш тартиби қайта тайёрлаш ва малака ошириш бўйича таълим муассасаларини давлат аттестациясидан ўтказиш ва аккредитация қилиш тўғрисидаги Низом билан тартибга солинади ҳамда Давлат тест марказининг кадрлар тайёрлаш сифатини назорат қилиш, педагог кадрларни ва таълим муассасаларини аттестациядан ўтказиш бошқармаси томонидан, белгиланган тартибда амалга оширилади.

Кейинги таҳрирга қаранг.

Педагог кадрларни қайта тайёрлаш ва уларнинг малакасини оширишга қўйиладиган давлат талабларига
1-ИЛОВА

Мактабгача таълим ва умумий ўрта таълим педагог кадрларини қайта тайёрлаш ва уларнинг малакасини ошириш тизими тузилмаси

Кейинги таҳрирга қаранг.

Педагог кадрларни қайта тайёрлаш ва уларнинг малакасини оширишга қўйиладиган давлат талабларига
2-ИЛОВА

Ўрта махсус, касб-ҳунар таълими педагог кадрларини қайта тайёрлаш ва уларнинг малакасини ошириш тизими тузилмаси

Кейинги таҳрирга қаранг.

Педагог кадрларни қайта тайёрлаш ва уларнинг малакасини оширишга қўйиладиган давлат талабларига
3-ИЛОВА

Олий таълим педагог кадрларини қайта тайёрлаш ва уларнинг малакасини ошириш тизими тузилмаси

Кейинги таҳрирга қаранг.

Вазирлар Маҳкамасининг
2006 йил 16 февралдаги 25-сон қарорига
2-ИЛОВА

Қайта тайёрлаш ҳақида давлат намунасидаги

Диплом

(тавсифи)

Қайта тайёрлаш тўғрисидаги диплом А4 форматли оқ қоғозда офсет усулида беш хил рангдан фойдаланган ҳолда: матн учун — қора рангда, расмлар тасвири учун — яшил, кўк, қизил рангларда, фон учун — оч пушти рангда босиб чиқарилади.

Варақнинг чап қисмида четидан 10 мм чекинган ҳолда эни 32 мм бўлган Ўзбекистон Республикаси Давлат байроғи тасвирланган тасма жойлаштирилади. Тасманинг юқори қисмида диаметри 30 мм бўлган Давлат герби, паст қисмида эса — 35 мм ўлчамли иккита квадрат қўшилишидан ҳосил бўлган саккиз қиррали юлдуз, юлдузнинг ўртасида муҳр учун 25 мм диаметрли оқ айлана жойлашган.

Варақнинг қолган қисмида юқорида лотин ёзуви билан давлат тилида «OʼZBEKISTON RESPUBLIKASI. Qayta tayyorlash haqida DIPLOM» сўзлари босилади. Диплом икки лотин ҳарфи — QТ ва олти рақамли сондан иборат тартиб рақами билан таъминланган. Барча матн нақшли растрдан иборат оч пушти ранг фонда босиб чиқарилади.

Диплом:

— босиб чиқаришнинг икки усули — офсет ва юқори усули;

— ёруғлик воситасида нусха кўчиришни қийинлаштириш учун очиқ ранглар;

— нақшли растр;

— ҳар хил рангли растрлардан фойдаланиш йўли билан турли рангларни ташкил этиш;

— махсус қоғозлар;

— ўзгарадиган рақамлардан иборат тартиб рақами қўлланган ҳолда олтита ҳимояга эга.



Ўзбекистон Республикаси герби
	Oʼzbekiston Respublikasi
	Qayta tayyorlash haqida
	DIPLOM
	QT № 000000

____________________________________________________________________________
(Pedagogning familiyasi, ismi, otasining ismi)
200___ yil ___________________________________ dan 200____________________ gacha
__________________________________________________________________________ da
(Qayta tayyorlash taʼlim muassasasining nomi)
____________________________________________________________ soatga moʼljallangan
____________________________________________________________________________
(Qayta tayyorlash kursining nomi)
qayta tayyorlsh kursida taʼlim olib, _________________________________________________
___________________________________________ mavzusida bitiruv ishini Davlat attestatsiya
komissiyasida __________________________________________ bahoga himoya qildi va unga
_________________________________________________________________ huquqi berildi

Muhr oʼrni

Rektor ___________
Sana ____________	Qayd raqami __________

Вазирлар Маҳкамасининг
2006 йил 16 февралдаги 25-сон қарорига
3-ИЛОВА

Малака ошириш ҳақида давлат намунасидаги

Сертификат

(тавсифи)

Малака ошириш тўғрисидаги сертификат А4 форматли оқ қоғозда офсет усулида беш хил рангдан фойдаланган ҳолда: матн учун — қора рангда, расмлар тасвири учун — яшил, кўк, қизил рангларда, фон учун — оч кул рангда босиб чиқарилади.

Варақнинг қолган қисмида юқорида лотин ёзуви билан давлат тилида «OʼZBEKISTON RESPUBLIKASI. Malaka oshirish haqida SERTIFIKAT» сўзлари босилади. Сертификат икки лотин ҳарфи — MO ва олти рақамли сондан иборат тартиб рақами билан таъминланган. Барча матн нақшли растрдан иборат оч кул ранг фонда босиб чиқарилади.

Сертификат:

— босиб чиқаришнинг икки усули — офсет ва юқори усули;

— ёруғлик воситасида нусха кўчиришни қийинлаштириш учун очиқ ранглар;

— нақшли растр;

— ҳар хил рангли растрлардан фойдаланиш йўли билан турли рангларни ташкил этиш;

— махсус қоғозлар;

— ўзгарадиган рақамлардан иборат тартиб рақами қўлланган ҳолда олтита ҳимояга эга.



Ўзбекистон Республикаси герби

Oʼzbekiston Respublikasi
Malaka oshirish haqida
SERTIFIKAT
MO № 000000
____________________________________________________________________________
(Pedagogning familiyasi, ismi, otasining ismi)
_______200___ yil _________________________ dan 200________________________ gacha
_________________________________________________________________________ da
(Malaka oshirish taʼlim muassasasining nomi)
jami ___________________________________________________________________ soatli
____________________________________________________________________________
(Malaka oshirish kursining nomi)
boʼyicha malakasini oshirdi.
Muhr oʼrni
Rektor ______________
Sana _______________	Qayd raqami ________

Вазирлар Маҳкамасининг
2006 йил 16 февралдаги 25-сон қарорига
4-ИЛОВА

Ўзбекистон Республикаси Ҳукуматининг айрим қарорларига киритилаётган ўзгартиришлар

1. Вазирлар Маҳкамасининг «Ўрта махсус, касб-ҳунар таълими муассасалари учун педагог кадрлар тайёрлаш тизимини такомиллаштириш чора-тадбирлари тўғрисида» 2001 йил 4 октябрдаги 400-сон қарори билан тасдиқланган 2010 йилгача бўлган даврда ўрта махсус, касб-ҳунар таълими тизими педагог ва муҳандис-педагог кадрларини тайёрлаш, қайта тайёрлаш ва уларнинг малакасини ошириш дастурида:

1) III бўлимнинг иккинчи кичик бўлимида:

бешинчи хатбошидаги «малакаси 3 йилда бир марта оширилади» сўзлари «малакасини ошириш даврийлиги ушбу муассасалар эҳтиёжига қараб белгиланади» сўзлари билан алмаштирилсин;

ўн бешинчи хатбоши чиқариб ташлансин;

2) 2-илова ўз кучини йўқотган деб ҳисоблансин.

Кейинги таҳрирга қаранг.

2. Вазирлар Маҳкамасининг 2004 йил 1 мартдаги 100-сон қарори (Ўзбекистон Республикаси ҚТ, 2004 й., 3-сон, 20-модда) билан тасдиқланган Нодавлат таълим муассасалари фаолиятини лицензиялаш тўғрисидаги низом 6-бандининг еттинчи хатбоши чиқариб ташлансин.

(Ўзбекистон Республикаси қонун ҳужжатлари тўплами, 2006 й., 6-7-сон, 39-модда; 2011 й., 25-сон, 260-модда; 2012 й., 33-34-сон, 390-модда; Қонун ҳужжатлари маълумотлари миллий базаси, 10.06.2019 й., 09/19/473/3258-сон, 30.09.2019 й., 09/19/821/3833-сон; 28.04.2021 й., 09/21/243/0388-сон; Қонунчилик маълумотлари миллий базаси, 04.06.2021 й., 09/21/345/0522-сон; 23.12.2024 й., 09/24/867/1045-сон; 16.12.2025 й., 09/25/791/1167-сон)