Товарлар ва хизматлар ҳақи сифатида аҳолидан тушадиган нақд пул маблағларини қабул қилиш ҳамда ҳисобга олишни тартибга солиш, пул муомаласини мустаҳкамлаш, истеъмолчиларнинг ҳуқуқларини ҳимоя қилишни таъминлаш мақсадида Вазирлар Маҳкамаси қарор қилади:

1. 1995 йилнинг 1 январидан бошлаб Ўзбекистон Республикаси ҳудудида аҳоли билан пул ҳисоб-китобларини амалга оширишда мулкчиликнинг барча шаклларидаги корхоналар, муассасалар ва ташкилотлар томонидан назорат-касса машиналарини мажбурий қўллаш жорий этилсин.

Белгилаб қўйилсинки, 1995 йилнинг 1 июлгача назорат-касса машиналари ўрнатмаган мулкчиликнинг барча шаклларидаги савдо корхоналари, муассасалари ва ташкилотларининг фаолиятлари тўхтатилади.

1995 йилнинг 1 январидан бошлаб касса машиналарига эга бўлмаган ёҳуд рўйхатга олиш пайтида Ўзбекистон Республикаси ҳудудида фойдаланиш учун рухсат этилган назорат-касса машиналарининг Давлат реестрига киритилмаган назорат-касса машиналарига эга бўлган янгидан ташкил этилган савдо корхоналари ва ташкилотларини рўйхатга олиш тақиқлансин.

Мазкур қоида Ўзбекистон Республикаси Молия вазирлиги, Давлат солиқ қўмитаси, Марказий банк ва Адлия вазирлиги томонидан тасдиқланган рўйхатга кўра савдо корхоналари, ташкилотлари, муассасаларининг айрим тоифаларига жорий этилмайди. Булар ўз фаолиятлари хусусиятига қараб аҳоли билан ҳисоб-китобни назорат-касса машиналарисиз амалга оширишлари мумкин.

2. Ўзбекистон Республикаси Молия вазирлиги, Давлат солиқ қўмитаси, Марказий банк, Адлия вазирлиги ўн кун муддатда:

аҳоли билан пул ҳисоб-китобларини амалга оширишда назорат-касса машиналарини мажбурий қўллаш тартиби тўғрисидаги Низомни ишлаб чиқсинлар;

ўз фаолияти хусусиятига кўра аҳоли билан ҳисоб-китобларини назорат-касса машиналарини қўлламасдан амалга ошириши мумкин бўлган савдо корхоналари, ташкилотлари ва муассасаларининг алоҳида тоифалари рўйхатини аниқласинлар.

3. Назорат-касса машиналари жорий этиш бўйича Давлат идоралараро комиссияси таркиби ҳамда «Назорат-касса машиналарини жорий этиш бўйича Давлат идоралараро комиссияси тўғрисида Низом» 1* ва 2-иловаларга мувофиқ тасдиқлансин.

4. Белгилаб қўйилсинки, Ўзбекистон Республикаси ҳудудида фойдаланишга йўл қўйиладиган назорат-касса машиналарининг модели Назорат-касса машиналари бўйича Давлат идоралараро комиссияси томонидан белгиланади ва Ўзбекистон Республикаси ҳудудида фойдаланишга рухсат этилган назорат-касса машиналарининг Давлат реестрига киритилади, сўнгра матбуотда эълон қилинади.

5. «Ўзэлтехсаноат» уюшмасининг назорат-касса машиналарининг 1995 йилдан бошлаб «Фотон» ишлаб чиқариш бирлашмаси томонидан босқичма-босқич ишлаб чиқариш тўғрисидаги таклифи қабул қилинсин.

Ўзбекистон Республикаси Ташқи иқтисодий фаолият миллий банки бутловчи, технология ва назорат-синаш асбоб-ускуналарини хорижий фирмалардан сотиб олиш учун «Ўзэлтехсаноат» уюшмаси томонидан тақдим этилган техник-иқтисодий асослашлар бўйича белгиланган тартибда кредит ажратиш имкониятини кўриб чиқсин.

6. «Ўзэлтехсаноат» уюшмаси, «Ўзбексавдо» давлат уюшмаси, «Ўзмаишийхизмат» уюшмаси, Ўзбекбирлашув назорат-касса машиналарига техника хизмати кўрсатиш бўйича минтақавий марказлар ва шохобчалар барпо этишни, ушбу шохобчаларнинг ташкил қилиниш ва фаолият кўрсатишини тартибга солувчи норматив ҳужжатларни ишлаб чиқиш ва чиқаришни 1995 йилнинг 1 февралигача бўлган муддатда таъминласинлар.

7. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:

жойларда назорат-касса машиналарига техника хизмати кўрсатувчи минтақавий марказлар ва пунктларни барпо этишда ёрдам кўрсатсинлар;

назорат-касса машиналарига эга бўлмаган ёхуд Ўзбекистон Республикаси ҳудудида фойдаланиш учун рухсат этилган назорат-касса машиналарининг Давлат реестрига киритилмаган аҳоли билан пул ҳисоб-китобларини амалга оширувчи янги ташкил этилаётган корхоналар, муассасалар ва ташкилотларнинг рўйхатдан ўтказилишига йўл қўймаслик устидан қаттиқ назорат ўрнатсинлар.

8. Ўзбекистон Республикаси Вазирлар Маҳкамасининг 1994 йил 11 апрелдаги 195-сон қарори 15 бандининг учинчи хатбоши ўз кучини йўқотган деб ҳисоблансин.

9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Б. С. Ҳамидов, Ю. Ф. Пайгин ва М. З. Усмонов зиммасига юклансин.

1. Ўзбекистон Республикасида назорат-касса машиналарини жорий этиш бўйича давлат идоралараро комиссияси Ўзбекистон Республикаси қонунлари асосида ишлайди ҳамда Ўзбекистон Республикаси Конституциясига, Вазирлар Маҳкамаси қарорларига, Ўзбекистон Республикаси Президенти фармойишлари ва фармонларига ҳамда ушбу Низомга амал қилади.

2. Қуйидагилар Давлат идоралараро комиссиясининг асосий вазифалари ҳисобланади:

Ўзбекистон Республикасидан қўллашга рухсат этилган назорат-касса машиналарига нисбатан техникавий талабларни ишлаб чиқиш ва тасдиқлаш;

республикада қўллашга рухсат этилган назорат-касса машиналари моделларини Давлат реестри тарзида белгилаш;

республикада қўллашга рухсат этилган назорат-касса машиналари Давлат реестрини шакллантириш, жорий этиш ва унга доимо тузатишлар киритиб бориш;

республикани назорат-касса машиналари билан таъминлаш, назорат-касса машиналаридан фойдаланган ҳолда аҳоли билан пул ҳисоб-китоблари тизимининг фаолият кўрсатишини таъминлаш бўйича тадбирлар режасини ва инновация дастурини ишлаб чиқиш ҳамда ушбу тадбирларни амалга ошириш;

назорат-касса машиналарини республикадаги корхоналар томонидан ишлаб чиқарилиши учун уларнинг моделларини тасдиқлаш;

хизматлар кўрсатиш соҳасини назорат-касса машиналари билан таъминлаш ва улардан фойдаланишга доир идоралараро масалаларни ҳал этиш.

3. Давлат идоралараро комиссияси ўзига юклатилган вазифаларга мувофиқ:

савдо ва хизматлар кўрсатиш соҳаси корхоналарининг назорат-касса машиналарини қўллаган ҳолда аҳоли билан ҳисоб-китобларни амалга ошириш, жорий этиш ва фаолият кўрсатишини таъминлаш бўйича вазирликлар ва идоралараро, ҳокимликлар ва корхоналар ишини мувофиқлаштиради ҳамда назорат қилади;

назорат-касса машиналарига нисбатан республикада амалда бўлган техникавий талабларга мувофиқ уларни синаб кўришни ва экспертизадан ўтказишни ташкил қилади;

назорат-касса машиналарининг янги моделларини Давлат реестрига киритиш тўғрисида талабномаларни кўриб чиқади ва қарор қабул қилади ҳамда маънавий эскирган ва талабларга номувофиқ бўлган назорат-касса машиналари учун мумкин бўлган фойдаланиш муддатларини белгилайди;

турли идораларнинг назорат-касса машиналарини жорий этиш, уларнинг ишлаш имкониятини қўллаб-қувватлаш ва улардан фойдаланиш масалалари бўйича ўзаро ҳамкорлик қилишига тааллуқли бўлган ҳужжатларни кўриб чиқади ва тасдиқлайди;

савдо ва хизматлар кўрсатиш соҳаси корхоналарида назорат-касса машиналаридан фойдаланиш устидан назоратни ташкил қилади;

савдо ва хизматлар кўрсатиш соҳаси корхоналарида назорат-касса машиналарини жорий қилишга ва улардан фойдаланишга доир барча зарур ахборотларни республика Ҳукуматига тақдим этади.

4. Давлат идоралараро комиссиясига қуйидаги ҳуқуқлар берилади:

вазирликлар, идоралар ва корхоналардан Давлат идоралараро комиссиясининг ҳуқуқ доирасига кирувчи масалалар бўйича ахборотни талаб қилиш ва олиш;

вазирликлар, идоралар, ташкилотлар ва корхоналар раҳбарларининг назорат-касса машиналарини жорий этиш ҳамда ишлатиш масалалари бўйича ҳисоботларини эшитиш;

республикада назорат-касса машиналари билан таъминлаш, уларни жорий этиш ва ишлатиш масалалари бўйича республика вазирликлари, идоралари, ҳокимликлари ва корхоналари томонидан бажарилиши мажбурий бўлган қарорлар қабул қилиш;

зарурат бўлганда ишчи гуруҳлар, вақтинчалик меҳнат жамоалари тузиш ва уларнинг ишида қатнашиш учун вазирликлар, идоралар, шунингдек, мулкчилик шаклларидан қатъи назар, корхоналар, мутахассисларини белгиланган тартибда жалб этиш.

5. Давлат идоралараро комиссияси таркибига:

Молия вазирлиги;

Адлия вазирлиги;

Давлат солиқ қўмитаси;

«Ўзбексавдо» уюшмаси;

Ўзбекбирлашув;

«Ўзмаишийхизмат уюшмаси;

«Ўзэлтехсаноат» уюшмаси;

Марказий банк вакиллари киради.

6. Давлат идоралараро комиссиясининг шахсий таркиби Вазирлар Маҳкамасининг қарори билан тасдиқланади.

7. Давлат идоралараро комиссияси раиси:

комиссия ишларини ташкил этади ва унинг зиммасига юклатилган вазифаларнинг бажарилиши учун жавоб беради;

комиссия фаолият ҳамда республикада назорат-касса машиналари билан таъминлаш, уларни жорий этиш ва ишлатишга доир ишларнинг аҳволи тўғрисида Вазирлар Маҳкамасига ҳисоб беради.

8. Давлат идоралараро комиссияси ўз ишларини унинг раиси томонидан тасдиқланган режаларга мувофиқ ташкил қилади.

9. Давлат идоралараро комиссияси мажлисини унинг раиси, у бўлмаган вақтда эса ўринбосари ўтказади.

Давлат идоралараро комиссиясининг мажлиси баённома тарзида расмийлаштирилади. Давлат идоралараро комиссиясининг мажлис баённомалари ва унинг фаолиятига оид бошқа ахборотлар мажлис ўтказилгандан кейин 5 кун мобайнида, материалларни жўнатиш йўли билан, комиссия аъзоларига ҳамда бошқа манфаатдор ташкилотлар ва шахсларга маълум қилинади.