Бозор муносабатларини ривожлантириш шароитида Ўзбекистон Республикасида кўмир қазиб олиш ва сотиш тизимини такомиллаштириш мақсадида Вазирлар Маҳкамаси қарор қилади:

1. Кўмир қазиб олиш Ўрта Осиё ишлаб чиқариш бирлашмаси («Ўртаосиёкўмир» ИБ) корхоналари ва ташкилотларининг бирлашмани 1-иловага* мувофиқ корхоналар ва ташкилотлар негизида кўмир қазиб олиш ва сотиш акционерлик бирлашмаси («Кўмир» АБ)га айлантириш тўғрисидаги таклифлари қабул қилинсин.

2. Белгилаб қўйилсинки:

«Кўмир» акционерлик бирлашмаси мустақил юридик шахс сифатида очиқ турдаги акционерлик жамияти шаклида ташкил этилади;

давлат номидан Ўзбекистон Республикаси Давлат мулкини бошқариш ва тадбиркорликни қўллаб-қувватлаш давлат қўмитаси, республика ҳамда хорижий юридик ва жисмоний шахслар акционерлик бирлашмасининг қатнашчилари ҳисобланадилар;

«Кўмир» акционерлик бирлашмасининг дастлабки устав фонди давлат тасарруфидан чиқарилаётган корхоналар ва ташкилотларнинг давлат мулки ҳамда амалдаги қонунчиликка мувофиқ давлат тасарруфидан чиқарилмайдиган ва хусусийлаштирилмайдиган корхоналарнинг давлат мулки асосида ташкил этилади;

«Кўмир» акционерлик бирлашмаси «Ўртаосиёкўмир» ишлаб чиқариш бирлашмасининг мажбуриятлари ва у тузган шартномалар бўйича унинг ҳуқуқий вориси ҳисобланган ҳолда, Ўзбекистон Республикасининг амалдаги қонунчилиги асосида, акционерларнинг умумий йиғилиши томонидан тасдиқланган ва Адлия вазирлигида рўйхатдан ўтказилган бирлашма Уставига мувофиқ, молия-хўжалик фаолиятини мустақил равишда амалга оширади.

3. Белгилаб қўйилсинки, «Кўмир» акционерлик бирлашмасининг асосий вазифалари қуйидагилар ҳисобланади:

бозор конъюнктурасидан ва маҳсулот маркетингидан келиб чиққан ҳолда ишлаб чиқаришни ривожлантириш стратегиясини белгилаш, республика кўмир саноати корхоналари –– мулкчиликнинг барча шаклларидаги акционерларнинг фаолиятини ташкил этиш, уларнинг молиявий-иқтисодий аҳволини мустаҳкамлаш;

тармоқда ягона техника сиёсатини юргизиш, илмий-тадқиқот ва лойиҳа ишларини ташкил этиш, ижтимоий вазифаларни ҳал қилиш, кўмир ва бошқа фойдали қазилмаларни қидириш, қазиб олиш ва қайта ишлаш, тижоратчилик фаолиятини амалга ошириш;

«Ўзистиқболстат» давлат қўмитаси билан биргаликда кўмир ишлаб чиқариш ва республиканинг унга бўлган эҳтиёжи, уни аҳолига ва халқ хўжалигига сотиш балансини ишлаб чиқиш.

4. «Кўмир» акционерлик бирлашмасининг ижро этувчи органи тузилмасига 2 ва 2а* иловаларга мувофиқ розилик берилсин.

Бош директор ва унинг ўринбосарлари Вазирлар Маҳкамаси билан келишган ҳолда бирлашма Кенгаши томонидан сайланадилар. «Кўмир» акционерлик бирлашмасининг юқори органи акционерларнинг йиғилиши ҳисобланади.

5. «Кўмир» акционерлик бирлашмаси корхоналари ва ташкилотларини давлат тасарруфидан чиқариш ва хусусийлаштириш бўйича ташкилий чора-тадбирлар 3-иловага* мувофиқ тасдиқлансин.

Савдо ва маиший хизмат корхоналаридан ташқари давлат корхоналари ва ташкилотларини очиқ турдаги акционерлик жамиятларига айлантиришда чиқариладиган акцияларнинг камида 51 фоизини давлат ихтиёрида сақлаб қолиш, 29 фоизигачасини меҳнат жамоаларига сотиш, акцияларнинг камида 20 фоизини ўзбекистонлик ва хорижий юридик ҳамда жисмоний шахсларга эркин сотиш назарда тутилсин.

6. Давлат мулкини бошқариш ва тадбиркорликни қўллаб-қувватлаш давлат қўмитаси «Кўмир» акционерлик бирлашмаси Бошқарувига тармоқ корхоналарининг давлат мулкини ҳамда акцияларнинг давлатга тегишли улушини бошқариш ҳуқуқини берсин.

7. «Кўмир» акционерлик бирлашмаси бир ой муддатда Уставни ишлаб чиқсин ва Вазирлар Маҳкамаси билан келишган ҳолда уни қабул қилсин.

8. «Кўмир» акционерлик бирлашмаси Тошкент шаҳар, М-14, 27-уйга жойлаштирилсин.

9. Ушбу қарорнинг бажарилишини назорат қилиш Бош вазир ўринбосари Қ.Ж. Ҳаққулов зиммасига юклансин.

Раҳбарият

Ер ости кон ишлари технологиялари ва кўмир қазиб олиш бўлими

Очиқ кон ишлари технологиялари ва кўмир қазиб олиш бўлими

Меҳнатни муҳофаза қилиш, хавфсизлик техникаси ва табиатни муҳофаза қилиш бўлими

Маркшейдерлик-геология бўлими

Илмий-техника тараққиёти ва янги техника бошқармаси

Механизация ва алоқа бўлими

Режалаштириш ва молия бошқармаси

Бухгалтерия ҳисоби ва ҳисоботи бўлими

Асосли қурилиш ва ижтимоий ривожлантириш бўлими

Моддий-техника таъминоти ва бутлаш бошқармаси («Ўзкўмирбутлаш»)

Автомобиль транспорти бўлими

Маркетинг ва маҳсулот сотиш бошқармаси

Давлат тасарруфидан чиқариш ва хусусийлаштириш бўлими

Ташқи иқтисодий фаолият бўлими

Махсус бўлим

Ишлар бошқармаси

Раҳбарият ҳузуридаги аппарат