|
Ҳужжат кучини йўқотган " " 22.02.2021
|
Ўзбекистон Республикаси Вазирлар Маҳкамасининг
қарори
КАФОЛАТЛАНГАН СУВ ТАЪМИНОТИНИ ЯХШИЛАШ ВА СИРДАРЁНИНГ МАВЖУД СУВ РЕСУРСЛАРИДАН ОҚИЛОНА ФОЙДАЛАНИШ ЧОРА-ТАДБИРЛАРИ ТЎҒРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Суғориладиган ерларни, айниқса қишлоқ хўжалиги экинларини оммавий суғориш даврида сув билан кафолатли таъминлаш, шунингдек Сирдарёнинг республика ҳудудидаги мавжуд сув ресурсларидан оқилона фойдаланиш мақсадида Вазирлар Маҳкамаси қарор қилади:
1. Ўзбекистон Республикаси Қишлоқ ва сув хўжалиги вазирлигига 2003 йил 1 июлгача Наманган вилоятидаги Резаксой ва Кенкулсой сув омборлари қурилишини уларни лойиҳалаш билан бир пайтда олиб боришга рухсат этилсин.
Ўзбекистон Республикаси Қишлоқ ва сув хўжалиги вазирлиги Резаксой ва Кенкулсой сув омборлари қурилишини 2003 йилда Қишлоқ ва сув хўжалиги вазирлигига ажратилган марказлаштирилган капитал қўйилмалар доирасида 2003 йилги қурилишларнинг аниқ рўйхатига киритсин.
«Давархитектқурилиш» қўмитаси Резаксой ва Кенкулсой сув омборлари қурилиши техник-иқтисодий асосланишини ва ишчи лойиҳасини белгиланган тартибда идорадан ташқари давлат экспертизасидан ўтказилишини ташкил этсин.
2. Қуйидагилар:
Ўзбекистон Республикаси Қишлоқ ва сув хўжалиги вазирлиги асосий иншоотларни (тўғонлар, насос станциялари, каналлар, автойўллар, кўприклар ва бошқаларни) лойиҳалаш ва қуриш бўйича буюртмачи этиб;
«Ўзбекнефтгаз» миллий холдинг компанияси газ қувурини сув босадиган зонадан ўз маблағлари ҳисобига кўчириш бўйича буюртмачи ва пудратчи этиб;
«Ўзбекэнерго» давлат-акциядорлик компанияси электр узатиш линиясини сув босадиган зонадан ўз маблағлари ҳисобига кўчириш ҳамда Ўзбекистон Республикаси Қишлоқ ва сув хўжалиги вазирлиги томонидан бериладиган маблағлар ҳисобига янги электр узатиш линияларини ва трансформатор ёрдамчи станцияларини қуриш бўйича буюртмачи ва пудратчи этиб;
«Ўзавтойўл» давлат концерни автомобиль йўлларини Ўзбекистон Республикаси Қишлоқ ва сув хўжалиги вазирлиги томонидан бериладиган маблағлар ҳисобига сув босадиган зонадан кўчириш бўйича буюртмачи ва пудратчи этиб белгилансин.
3. Ўзбекистон Республикаси Қишлоқ ва сув хўжалиги вазирлиги Наманган вилоятидаги Резаксой ва Кенкулсой сув омборларини қуриш учун пудрат ташкилотларини танлаб олиш бўйича танлов савдолари (тендер) сифатли ўтказилишини таъминласин.
4. Ўзбекистон Республикаси Иқтисодиёт вазирлиги ва Молия вазирлиги 2003 йил I ярим йиллигида марказлаштирилган капитал қўйилмаларни ўзлаштириш натижаларига кўра Резаксой ва Кенкулсой сув омборлари қурилишига республиканинг 2003 йилги Инвестиция дастурида тасдиқланган капитал қўйилмалар умумий лимитлари доирасида қўшимча капитал қўйилмалар лимитлари ажратиш имкониятини кўриб чиқсинлар.
5. «Ўзбекистон темир йўллари» давлат-акциядорлик компанияси, Наманган вилояти ҳокимлиги автоташувчилар ҳудудий уюшмалари билан биргаликда Қишлоқ ва сув хўжалиги вазирлиги, Сув омборларини қуриш ва улардан фойдаланиш дирекцияси, кўрсатиб ўтилган қурилиш объектларига жалб қилинган бошқа вазирликлар ва идоралар буюртманомаларига кўра юклар ташиб берилишини белгиланган тартибда таъминласинлар.
6. Ўзбекистон Республикаси Қишлоқ ва сув хўжалиги вазирлиги, «Ўзавтойўл» давлат концерни, «Ўзбекэнерго» давлат-акциядорлик компанияси, бошқа пудрат ташкилотлари кўрсатиб ўтилган объектларда зарур техник ва моддий ресурсларни жамласинлар, ишга тушириладиган комплексларнинг 2005 йил вегетация давригача фойдаланишга топширилишини таъминласинлар.
7. Мазкур қарорнинг бажарилишини назорат қилиш Ўзбекистон Республикаси Президентининг Давлат маслаҳатчиси И.Ҳ. Жўрабеков ва Ўзбекистон Республикаси Бош вазирининг ўринбосари Р.С. Азимов зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
2003 йил 25 январь,
46-сон
