Кейинги йилларда мамлакатимизда аҳолини уй-жой билан таъминлаш ва уй-жойни сақлаш бўйича сифатли хизматлар кўрсатилишини ташкил этиш борасида кенг кўламли ислоҳотлар амалга оширилмоқда.

Шунингдек кўп квартирали уйларни бошқарувчи ташкилотлар хамда уй-жой мулкдорлари ширкатлари томонидан хизматлар кўрсатилишида барқарорликни таъминлаш мақсадида аҳолига кўрсатиладиган хизматлар учун мажбурий бадаллар ва тўловларнинг ўз вақтида тўлаб борилишини таъминлаш зарурияти юзага келмоқда.

Ушбу Қонун билан Ўзбекистон Республикасининг Фуқаролик процессуал кодексига кўп квартирали уйнинг жойлари мулкдорларидан мажбурий бадаллар ва тўловларни ундириш бўйича суд буйруғини бериш тўғрисидаги ариза билан фуқаролик ишлари бўйича судга мурожаат этилганда аризага илова қилиниши зарур бўлган ҳужжатлар рўйхатини белгилашни назарда тутувчи қўшимчалар киритилмоқда.

Бундан ташқари «Давлат божи тўғрисида»ги Ўзбекистон Республикаси Қонунига кўп квартирали уйларни бошқариш органлари ўзлари кўрсатган хизматлар учун мажбурий тўловлар бўйича қарздорликни ундириш ҳақидаги даъволар, аризалар ва шикоятлар билан фуқаролик ишлари бўйича судларга хамда иқтисодий судларга мурожаат қилишда олдиндан давлат божини тўлашдан озод қилинишини, уларнинг талабларини қаноатлантириш тўлиқ ёки қисман рад этилган тақдирда, давлат божи ушбу шахслардан талабларнинг қаноатлантирилиши рад этилган миқдорига мутаносиб равишда ундирилишини назарда тутувчи қўшимча ва ўзгартиришлар киритилмоқда.

Ушбу Қонун фуқароларнинг ва тадбиркорлик субъектларининг қонуний манфаатларини ҳимоя қилишни сўраб судга мурожаат қилиш ҳуқуқи кафолатларини янада кучайтиришга, шунингдек одил судловга эришиш даражасини янада оширишга хизмат қилади.

1-модда. Ўзбекистон Республикасининг 2018 йил 22 январда қабул қилинган ЎРҚ-460-сонли Қонуни билан тасдиқланган Ўзбекистон Республикасининг Фуқаролик процессуал кодекси (Ўзбекистон Республикаси Олий Мажлиси палаталарининг Ахборотномаси, 2018 йил, 1-сонга 1-илова, № 10, 672-модда; 2019 йил, № 3, 166-модда, № 5, 261-модда, № 9, 592-модда, № 10, 671-модда, № 11, 791, 792-моддалар, № 12, 880-модда; 2020 йил, № 1, 1, 3-моддалар, № 3, 198, 199-моддалар, 2021 йил, № 1, 8-модда, 4-сонга илова, № 8, 803-модда, № 9, 903-модда; 2022 йил, № 3, 216-модда, № 8, 787-модда; 2023 йил, № 4, 269-модда, № 12, 1007-модда; 2024 йил, № 2, 115-модда) 173-моддаси куйидаги мазмундаги учинчи қисм билан тўлдирилсин:

«Кўп квартирали уйнинг жойлари мулкдорларидан мажбурий бадаллар ва тўловларни ундириш ҳақида талаб арз қилинганда суд буйруғини бериш тўғрисидаги аризага куйидагилар ҳам илова қилинади:

1) кўп квартирали уйдаги жойлар мулкдорлари умумий йиғилишининг кўп квартирали уйни бошқариш усулини танлаш тўғрисидаги қарори кўчирма нусхаси;

2) кўп квартирали уйни бошқариш кўп квартирали уйни бошқариш органи томонидан шартнома асосида амалга оширилган тақдирда — кўп квартирали уйни бошқариш шартномасининг кўчирма нусхаси;

3) қарз юзага келган давр кўрсатилган қарз ҳисоб-китоби;

4) қарзни узиш тўғрисидаги талабнинг қарздорга топширилганлигини тасдиқловчи маълумотлар».

2-модда. Ўзбекистон Республикасининг 2020 йил 6 январда қабул қилинган «Давлат божи тўғрисида»ги ЎРҚ-600-сонли Қонунига (Ўзбекистон Республикаси Олий Мажлиси палаталарининг Ахборотномаси, 2020 йил, № 1, 1-модда, № 3, 201-модда, № 5, 298-модда, № 10, 593-модда, № 12, 691-модда; 2021 йил, № 1, 13-модда, 4-сонга илова, № 7, 661-модда, № 8, 800, 803-моддалар, № 10, 968-модда; 2022 йил, № 2, 76-модда, № 3, 214, 216-моддалар, № 4, 340-модда, № 5, 463, 464, 467-моддалар, № 12, 1186-модда; 2023 йил, № 2, 103-модда, № 3, 186-модда, № 4, 265, 269-моддалар, № 6, 444, 445-моддалар, № 7, 538-модда, № 9, 710-модда; 2024 йил, № 1, 5, 6, 7-моддалар, № 2, 101, 105, 107, 108, 111, 112-моддалар) куйидаги қўшимча ва ўзгартиришлар киритилсин:

1) 8-модданинг:

биринчи қисми куйидаги мазмундаги 13²-банд билан тўлдирилсин:

«13²) кўп квартирали уйларни бошқариш органлари — кўрсатилган хизматлар учун мажбурий бадаллар ёки тўловлар бўйича қарздорликни ундириш тўғрисидаги даъволар, аризалар ва шикоятлар билан судга мурожаат қилганда»;

иккинчи қисмидаги «10, 14, 33 — 36-бандларида» деган сўзлар «10, 13², 14, 33 — 36-бандларида» деган сўзлар билан алмаштирилсин;

2) 9-модданинг:

биринчи қисми куйидаги мазмундаги 14³-банд билан тўлдирилсин:

«14³) кўп квартирали уйларни бошқариш органлари — кўрсатилган хизматлар учун мажбурий бадаллар ёки тўловлар бўйича қарздорликни ундириш тўғрисидаги даъволар, аризалар ва шикоятлар билан судга мурожаат қилганда»;

иккинчи қисмидаги «2, 20 ва 21-бандларида» деган сўзлар «2, 14³, 20 ва 21-бандларида» деган сўзлар билан алмаштирилсин.

3-модда. Ўзбекистон Республикаси Вазирлар Маҳкамаси:

ҳукумат қарорларини ушбу Қонунга мувофиқлаштирсин;

республика ижро этувчи ҳокимият органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин;

ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.

4-модда. Ушбу Қонун расмий эълон қилинган кундан эътиборан кучга киради.