Мувофиқликни баҳолаш органларини аккредитация қилиш тўғрисида

Қонунчилик палатаси томонидан 2022 йил 7 июлда қабул қилинган
Сенат томонидан 2022 йил 27 декабрда маъқулланган

Ушбу Қонуннинг мақсади мувофиқликни баҳолаш органларини аккредитация қилиш соҳасидаги муносабатларни тартибга солишдан иборат.

2-модда. Мувофиқликни баҳолаш органларини аккредитация қилиш тўғрисидаги қонунчилик

Мувофиқликни баҳолаш органларини аккредитация қилиш тўғрисидаги қонунчилик ушбу Қонун ва бошқа қонунчилик ҳужжатларидан иборатдир.

Агар Ўзбекистон Республикасининг халқаро шартномасида Ўзбекистон Республикасининг мувофиқликни баҳолаш органларини аккредитация қилиш тўғрисидаги қонунчилигида назарда тутилганидан бошқача қоидалар белгиланган бўлса, халқаро шартнома қоидалари қўлланилади.

3-модда. Асосий тушунчалар

Ушбу Қонунда қуйидаги асосий тушунчалар қўлланилади:

аккредитация — мувофиқликни баҳолаш органларининг муайян фаолият соҳасида мувофиқликни баҳолашга доир ишларни бажаришга ваколатлилигини аккредитация органи томонидан расман тасдиқлаш;

аккредитация бўйича баҳоловчи — мувофиқликни баҳолаш органини баҳолаш учун аккредитация органи томонидан тайинланган, мазкур фаолиятни мустақил равишда ёки баҳолаш гуруҳи таркибида амалга оширадиган жисмоний шахс;

аккредитация бўйича кенгаш — миллий аккредитация тизимининг фаолият кўрсатишини баҳолаш, қўйилган мақсадларга эришилишини мониторинг қилиш ва миллий аккредитация тизимини ривожлантириш бўйича тавсиялар ишлаб чиқиш учун ташкил этилган коллегиал маслаҳат органи;

аккредитация бўйича техник эксперт — аккредитация органи томонидан тайинланган, аккредитация бўйича баҳоловчи раҳбарлиги остида ишлайдиган, баҳоланаётган аккредитация соҳасида махсус билимларга ёки кўникмаларга эга бўлган ва баҳолашни мустақил равишда амалга оширмайдиган жисмоний шахс;

аккредитация органи — мувофиқликни баҳолаш органларини аккредитация қилишга оид фаолиятни амалга оширувчи ваколатли орган;

аккредитация соҳаси — фаолиятнинг муайян соҳаси бўлиб, унда аккредитация учун ариза берувчининг ёхуд аккредитация қилинган субъектнинг ваколатлилиги тасдиқланади ёки тасдиқланган бўлади;

аккредитация учун ариза берувчи — аккредитация учун ариза берган мувофиқликни баҳолаш органи;

аккредитация цикли — аккредитация қилинган субъект миллий аккредитация тизими реестрида рўйхатга олинган санадан эътиборан амал қиладиган аккредитация муддати;

аккредитация қилинган субъект — миллий аккредитация тизимида аккредитация қилинган мувофиқликни баҳолаш органи;

апелляция — аккредитация учун ариза берувчининг ёки аккредитация қилинган субъектнинг ўзига нисбатан аккредитация органи томонидан қабул қилинган аккредитацияга доир салбий қарорни қайта кўриб чиқиш тўғрисидаги ёзма сўрови;

даврий баҳолаш — аккредитация қилинган субъект фаолиятининг аккредитация даврида белгиланган талабларга мувофиқлигини аккредитация циклида қайта баҳолаш тартиб-таомили;

мувофиқликни баҳолаш — мувофиқликни баҳолаш объектига нисбатан қўйиладиган талабларга риоя этилишини аниқлашга оид фаолият;

мувофиқликни баҳолаш органи — мувофиқликни баҳолашга оид фаолиятни амалга оширувчи юридик шахс.

4-модда. Аккредитациянинг асосий вазифалари

Аккредитациянинг асосий вазифалари қуйидагилардан иборат:

манфаатдор тарафларнинг аккредитациядан ўтган субъектлар фаолиятига бўлган ишончини таъминлаш;

мувофиқликни баҳолаш соҳасида ягона техника сиёсати амалга оширилишини таъминлаш;

аккредитация қилинган субъектларнинг фаолияти натижалари халқаро даражада тан олиниши ва қабул қилиниши учун шарт-шароитлар яратиш.

5-модда. Аккредитациянинг асосий принциплари

Аккредитациянинг асосий принциплари қуйидагилардан иборат:

ихтиёрийлик;

холислик ва беғаразлик;

ваколатлилик;

аккредитация тартиб-таомилларининг шаффофлиги ва очиқлиги;

аккредитация шартларининг тенглиги;

махфий ахборотнинг ошкор этилишига йўл қўймаслик;

аккредитацияга оид фаолият билан мувофиқликни баҳолаш фаолиятини қўшиб олиб боришга йўл қўймаслик.

2-боб. Аккредитация соҳасини давлат томонидан тартибга солиш

6-модда. Аккредитация соҳасидаги давлат сиёсатининг асосий йўналишлари

Аккредитация соҳасидаги давлат сиёсатининг асосий йўналишлари қуйидагилардан иборат:

давлат дастурларини ва бошқа дастурларни ишлаб чиқиш ҳамда амалга ошириш;

аккредитация соҳасидаги миллий стандартларни халқаро стандартлар билан уйғунлаштириш;

илғор инновацион ва ахборот-коммуникация технологияларини жорий этиш;

кадрларни тайёрлаш, қайта тайёрлаш ва уларнинг малакасини оширишнинг ягона тизимини ривожлантириш ҳамда такомиллаштириш;

халқаро ҳамкорликни ривожлантириш.

7-модда. Ўзбекистон Республикаси Вазирлар Маҳкамасининг аккредитация соҳасидаги ваколатлари

Ўзбекистон Республикаси Вазирлар Маҳкамаси:

аккредитация соҳасида ягона давлат сиёсати амалга оширилишини таъминлайди;

давлат ва хўжалик бошқаруви органларининг, маҳаллий давлат ҳокимияти органларининг аккредитация соҳасидаги фаолиятини мувофиқлаштиради;

аккредитация соҳасини ривожлантиришнинг устувор йўналишларини белгилайди, давлат дастурларининг ва бошқа дастурларнинг ишлаб чиқилишини ҳамда амалга оширилишини таъминлайди;

LexUZ шарҳи

Қаранг: Ўзбекистон Республикаси Вазирлар Маҳкамасининг 2019 йил 24 апрелдаги 349-сон «Мувофиқликни баҳолаш органларини аккредитациядан ўтказиш соҳасидаги ишларни такомиллаштиришга доир қўшимча чора-тадбирлар тўғрисида»ги қарори.

аккредитация соҳасида халқаро ҳамкорликни ривожлантириш бўйича чоралар кўради.

Ўзбекистон Республикаси Вазирлар Маҳкамаси қонунчиликка мувофиқ бошқа ваколатларни ҳам амалга ошириши мумкин.

LexUZ шарҳи

Қаранг: Вазирлар Маҳкамасининг 2024 йил 14 февралдаги 91-сонли «Мактабгача ва умумий ўрта таълим ташкилотларини аттестациядан ўтказиш ҳамда таълим сифати мониторингини амалга ошириш тизимини такомиллаштириш чора-тадбирлари тўғрисида»ги қарори, Ўзбекистон Республикасининг «Ўзбекистон Республикаси Вазирлар Маҳкамаси тўғрисида»ги Қонуни.

8-модда. Ўзбекистон техник жиҳатдан тартибга солиш агентлигининг аккредитация соҳасидаги ваколатлари

Ўзбекистон техник жиҳатдан тартибга солиш агентлиги аккредитация соҳасидаги махсус ваколатли давлат бошқаруви органидир (бундан буён матнда махсус ваколатли давлат органи деб юритилади).

Махсус ваколатли давлат органи:

аккредитация соҳасида ягона давлат сиёсатини амалга оширади;

аккредитация соҳасидаги норматив-ҳуқуқий ҳужжатлар лойиҳаларини ишлаб чиқади ва уларни ўз ваколатлари доирасида қабул қилади;

мувофиқликни баҳолаш органларининг ваколатлилигига оид талабларни ва мезонларни белгиловчи стандартларни қабул қилади;

аккредитация соҳасида кадрларни тайёрлаш, қайта тайёрлаш ва уларнинг малакасини ошириш тизимини ташкил этади;

аккредитация органи томонидан апелляция ва шикоятларни кўриб чиқиш натижаларини, паритет баҳолашга оид хулосаларни, молиявий ҳисоботларни даврий таҳлил қилишни, стратегик режаларнинг ҳамда аккредитация тизимини ривожлантиришга доир бошқа режаларнинг бажарилишини даврий таҳлил қилишни амалга оширади;

мустақил консалтинг ёки аудиторлик ташкилотларини жалб этиш орқали аккредитация органи фаолиятининг мониторингини амалга оширади;

аккредитация тизимини ривожлантириш ва тартибга солишга оид таклифларни Ўзбекистон Республикаси Вазирлар Маҳкамасига, тақдимномаларни аккредитация органига киритади;

аккредитация бўйича кенгашнинг низомини ва таркибини тасдиқлайди.

Махсус ваколатли давлат органи қонунчиликка мувофиқ бошқа ваколатларни ҳам амалга ошириши мумкин.

LexUZ шарҳи

Қаранг: Ўзбекистон Республикаси Президентининг 2021 йил 2 июндаги ПҚ-5133-сон «Ўзбекистон Республикаси инвестициялар ва ташқи савдо вазирлиги ҳузуридаги Ўзбекистон техник жиҳатдан тартибга солиш агентлиги фаолиятини ташкил этиш чора-тадбирлари тўғрисида»ги қарори.

3-боб. Миллий аккредитация тизими

9-модда. Миллий аккредитация тизими ва унинг иштирокчилари

Миллий аккредитация тизими мувофиқликни баҳолаш органларини аккредитация қилиш қоидаларини ва тартиб-таомилини белгилайдиган норматив-ҳуқуқий ҳужжатларга, шунингдек техник жиҳатдан тартибга солиш соҳасидаги норматив ҳужжатларга мувофиқ давлат миқёсида фаолият кўрсатувчи тизимдир.

Миллий аккредитация тизими иштирокчилари қуйидагилардан иборат:

махсус ваколатли давлат органи;

аккредитация бўйича кенгаш;

аккредитация органи;

аккредитация қилинган субъектлар;

аккредитация бўйича баҳоловчилар ва техник экспертлар;

аккредитация бўйича техник қўмиталар.

10-модда. Аккредитация объекти ва унга нисбатан белгиланган талаблар

Мувофиқликни баҳолаш органларининг муайян аккредитация соҳасида мувофиқликни баҳолаш ишларини бажаришга ваколатлилиги аккредитация объектидир.

Мувофиқликни баҳолаш органларининг ваколатлилигига оид талаблар ва мезонлар Ўзбекистон Республикасининг қонунчилиги, шунингдек халқаро ва миллий стандартлар билан белгиланади.

LexUZ шарҳи

Қаранг: Вазирлар Маҳкамасининг 2019 йил 24 апрелдаги 349-сон қарори билан тасдиқланган Мувофиқликни баҳолаш органларини аккредитациядан ўтказиш тартиби тўғрисидаги низомнинг 3-банди.

11-модда. Аккредитация белгисини қўллаш

Аккредитация қилинган субъект ўзининг аккредитация мақомини кўрсатиш учун аккредитация органи томонидан берилган аккредитация белгисини қўллаши мумкин.

Аккредитация қилинган субъект аккредитация тўғрисидаги гувоҳномани олиш билан бир вақтда унинг амал қилиш муддатида аккредитация белгисини қўллаш ҳуқуқини олади.

Аккредитация қилинган субъект аккредитация белгисига тенг бўлган миллий аккредитация тизими реестрида рўйхатдан ўтказилган рақамга оид матнли ҳаволани ўз хоҳишига кўра қўллаши мумкин.

Аккредитация белгисининг шакли ва уни қўллаш тартиби аккредитация органи томонидан белгиланади.

Аккредитация белгисини қўллаш пулли асосда амалга оширилади. Аккредитация белгисини қўллаш учун тўлов миқдори қонунчиликда белгиланади.

LexUZ шарҳи

Қаранг: Ўзбекистон стандартлаштириш, метрология ва сертификатлаштириш агентлиги бош директорининг 2013 йил 18 сентябрдаги 439-сон буйруғи билан тасдиқланган Ўзбекистон Республикаси Миллий сертификатлаштириш тизимида ишлар ва хизматларга ҳақ тўлаш қоидалари (рўйхат рақами 2516, 11.10.2013 й.).

LexUZ шарҳи

Қаранг: «Саноатконтехназорат» давлат инспекцияси бошлиғининг 2010 йил 15 апрелдаги 126-сон буйруғи билан тасдиқланган Саноат хавфсизлиги соҳасидаги эксперт ташкилотларини аккредитация қилиш ва улар фаолияти устидан инспекция назоратини ўтказиш учун тўловларни амалга ошириш тартиби тўғрисидаги низом (рўйхат рақами 2105, 2010 йил 25 май).

12-модда. Миллий аккредитация тизими реестрини шакллантириш ва юритиш

Миллий аккредитация тизими реестри аккредитация қилинган субъектлар тўғрисидаги, шунингдек аккредитация тўғрисидаги гувоҳномаларнинг жорий мақоми ҳақидаги расмий ахборот базасидир.

Миллий аккредитация тизими реестрини шакллантириш ва юритиш аккредитация органи томонидан амалга оширилади.

Миллий аккредитация тизими реестри танишиб чиқиш учун очиқдир.

Миллий аккредитация тизими реестрини шакллантириш ва юритиш тартиби аккредитация органи томонидан белгиланади.

13-модда. Аккредитация тўғрисидаги гувоҳнома ва аккредитация соҳаси

Аккредитация тўғрисидаги гувоҳнома аккредитация қилинган субъектнинг аккредитациянинг белгиланган соҳасидаги ишларни бажаришга ваколатлилигини тасдиқловчи ҳужжатдир.

Аккредитация соҳаси аккредитация тўғрисидаги гувоҳноманинг ажралмас қисми бўлган иловада белгиланади.

Аккредитация соҳаси техник жиҳатдан тартибга солиш соҳасидаги ҳамда ўлчаш бирлигини таъминлашга доир норматив ҳужжатларга, синаш усулларига (услубиятларига) ёки мувофиқликни баҳолаш органларини аккредитация қилиш тартиб-таомилларини белгиловчи ҳужжатларга мувофиқ белгиланади.

Аккредитация тўғрисидаги гувоҳноманинг шакли аккредитация органи томонидан белгиланади.

Аккредитация тўғрисидаги гувоҳномада кўрсатилган маълумотлар ўзгарган тақдирда, аккредитация қилинган субъект аккредитация тўғрисидаги гувоҳномага тегишли ўзгартишлар ва (ёки) қўшимчалар киритиш учун аккредитация органига мурожаат қилиши мумкин.

Аккредитация тўғрисидаги гувоҳнома аккредитация циклида беш йил муддатга берилади.

LexUZ шарҳи

Аккредитация тўғрисидаги гувоҳномадан бошқа шахснинг фойдаланиши тақиқланади.

14-модда. Аккредитациянинг тан олиниши

Миллий аккредитация тизимидан ташқарида олинган аккредитация Ўзбекистон Республикаси ҳудудида Ўзбекистон Республикасининг халқаро шартномаларига мувофиқ тан олинади.

4-боб. Аккредитация органи

15-модда. Аккредитация органи фаолиятининг шартлари

Аккредитация органи мустақил юридик шахсдир ва у махсус ваколатли давлат органининг тизимига ҳамда ташкилий тузилмасига киради.

Аккредитация органининг фаолияти аккредитация органига нисбатан умумий талабларни белгиловчи халқаро ва миллий стандартлар талабларига мувофиқ ташкил этилиши керак.

Аккредитация органининг фаолиятида қуйидагилар таъминланиши керак:

аккредитация органининг ўзи аккредитация ўтказаётган мувофиқликни баҳолаш органларидан мустақиллиги;

мувофиқликни баҳолаш органларига маслаҳат хизматларини кўрсатишга йўл қўйилмаслиги;

аккредитация қилинадиган мувофиқликни баҳолаш фаолиятини амалга оширишга йўл қўйилмаслиги;

мувофиқликни баҳолаш органларида мулкий ҳуқуқларнинг ва (ёки) бошқарув ҳуқуқининг мавжуд бўлишига йўл қўйилмаслиги;

ўз хизматларидан фойдаланувчилардан беғараз, ҳомийлик ёрдами ёки бошқа моддий ёрдам олинишига йўл қўйилмаслиги.

Давлат органлари ва бошқа ташкилотлар, шунингдек уларнинг мансабдор шахслари аккредитация органининг ушбу Қонунга мувофиқ амалга ошириладиган фаолиятига аралашишга ҳақли эмас.

16-модда. Аккредитация органининг ваколатлари

Аккредитация органи:

аккредитацияни, такрорий аккредитацияни амалга оширади ҳамда аккредитация учун ариза берувчи ваколатлиликка оид белгиланган талабларга ва мезонларга мувофиқ бўлган тақдирда аккредитация қилиш тўғрисида қарор қабул қилади;

аккредитация тўғрисидаги гувоҳномаларни расмийлаштиради, уларга ўзгартишлар ва (ёки) қўшимчалар киритади;

даврий баҳолашни ўтказади;

аккредитация тўғрисидаги гувоҳноманинг шаклини, шунингдек аккредитация белгисининг шаклини ва уни қўллаш тартибини белгилайди;

аккредитация тўғрисидаги гувоҳноманинг амал қилишини тўхтатиб туради, қайта тиклайди ёки тугатади;

аккредитация бўйича баҳоловчиларнинг ва техник экспертларнинг малакасини баҳолашни амалга оширади ҳамда уларнинг рўйхатини юритади;

аккредитация соҳасида ўз ваколатлари доирасида халқаро шартномалар тузади;

миллий аккредитация тизимининг реестрини шакллантириш ва юритиш тартибини белгилайди;

аккредитация бўйича техник қўмиталар, апелляция комиссияси тўғрисидаги низомларни ва уларнинг таркибини тасдиқлайди.

Аккредитация органи қонунчиликка мувофиқ бошқа ваколатларни ҳам амалга ошириши мумкин.

LexUZ шарҳи

Қаранг: Ўзбекистон Республикаси Вазирлар Маҳкамасининг 2021 йил 14 январдаги 16-сон «Тиббиёт ташкилотларини аккредитациядан ўтказиш механизмларини жорий этиш тўғрисида»ги қарори.

17-модда. Аккредитация бўйича техник қўмиталар

Аккредитация бўйича техник қўмиталар аккредитация соҳасидаги маслаҳат органи бўлиб, улар аккредитация масалалари бўйича услубий тавсияларни ишлаб чиқиш, шунингдек зарур бўлганда аккредитация органига унинг аккредитация билан боғлиқ ҳолда қабул қилинаётган қарорларига нисбатан тавсиялар тайёрлаш учун аккредитация органи томонидан ташкил этилади.

Аккредитация бўйича техник қўмиталар юридик шахс бўлмайди.

Аккредитация бўйича техник қўмиталар тўғрисидаги низом ва ушбу қўмиталар таркиби аккредитация органи томонидан тасдиқланади.

18-модда. Апелляция комиссияси

Апелляция комиссияси аккредитация органининг аккредитацияни амалга оширишга, аккредитация қилишни рад этишга, аккредитациянинг амал қилишини тўхтатиб туришга ёки тугатишга, аккредитация соҳасини кенгайтиришга ва қисқартиришга доир қарорлари бўйича апелляцияларни кўриб чиқиш ҳамда қарорлар қабул қилиш мақсадида аккредитация органи ҳузурида тузилади.

LexUZ шарҳи

Апелляция комиссияси кўриб чиқилаётган қарорни қабул қилишда иштирок этмаган аккредитация бўйича баҳоловчилар ва техник экспертлар орасидан шакллантирилади.

Апелляция комиссияси тўғрисидаги низом ва комиссиянинг таркиби аккредитация органи томонидан тасдиқланади.

5-боб. Аккредитацияни амалга ошириш тартиби

19-модда. Аккредитацияни амалга ошириш

Аккредитация органи аккредитацияни аккредитация олиш учун берилган ариза асосида, шунингдек, башарти аккредитацияга оид ишларни бажаришга доир шартнома тузилган бўлса, амалга оширади.

Аккредитация тартиб-таомилидан ўтиш кетма-кетлиги, ушбу Қонун талаблари ҳисобга олинган ҳолда Ўзбекистон Республикаси Вазирлар Маҳкамаси томонидан тасдиқланган аккредитациядан ўтказиш тартибига мувофиқ белгиланади.

LexUZ шарҳи

Қаранг: Ўзбекистон Республикаси Вазирлар Маҳкамасининг 2019 йил 7 майдаги 381-сон «Қурилиш соҳасида айрим фаолият турларини лицензиялаш ва аккредитация қилиш тўғрисида»ги қарори.

Аккредитациядан ўтиш натижаси ижобий бўлганда аккредитация циклига аккредитация қилиш тўғрисида қарор қабул қилинади ва аккредитация тўғрисидаги гувоҳнома расмийлаштирилади.

Аккредитациядан ўтказиш тартибида белгиланган барча зарур ҳужжатлар ва маълумотлар тақдим этилмаган тақдирда, аккредитация органи аккредитацияни ўтказишни рад этади.

Аккредитация учун ариза берувчининг аккредитация натижаларига кўра, ариза берилган аккредитация соҳасидаги мувофиқликни баҳолаш ишларини бажаришга ваколатлилиги тасдиқланмаган тақдирда, аккредитация органи аккредитация қилишни рад этиш тўғрисида қарор қабул қилади.

LexUZ шарҳи

Аккредитация қилиш тўғрисида қарор қабул қилинган тақдирда, аккредитация органи ва аккредитация қилинган субъект ўртасида аккредитациядан кейинги шартнома тузилади, унда қуйидагилар акс эттирилади:

аккредитация органи ва аккредитация қилинган субъект ўртасидаги ўзаро муносабатлар, шу жумладан тарафларнинг ҳуқуқлари, мажбуриятлари ва жавобгарлиги;

аккредитация қилинган субъектни даврий баҳолашни амалга ошириш шартлари;

аккредитация белгисини қўллаш шартлари.

LexUZ шарҳи

20-модда. Даврий баҳолаш

Даврий баҳолаш аккредитация қилинган субъектларнинг уларга нисбатан белгиланган ваколатлиликка оид талабларга ва мезонларга доимий мувофиқлигини аниқлаш, шунингдек уларнинг мувофиқлигини қайта тасдиқлаш мақсадида ўтказилади.

Даврий баҳолаш тартиб-таомили ҳамда унинг муддатлари аккредитациядан ўтказишнинг Ўзбекистон Республикаси Вазирлар Маҳкамаси томонидан белгиланган тартибига мувофиқ аниқланади ва у аккредитациянинг ажралмас қисми бўлади. Даврий баҳолаш чоғида аккредитация қилинган субъект билан ишларни бажаришга доир шартнома тузилади.

LexUZ шарҳи

21-модда. Аккредитациянинг амал қилиши ва такрорий аккредитация

Аккредитация, агар аккредитациянинг амал қилиши тугатилмаган бўлса, аккредитация тўғрисидаги гувоҳномада кўрсатилган муддат давомида амал қилади.

Аккредитациянинг амал қилиши тугатилган тақдирда, унинг амал қилиши қайта тикланмайди.

Такрорий аккредитация, башарти аккредитация қилинган субъект аккредитациянинг амал қилиши тугагунига қадар ариза берган бўлса, ушбу субъектнинг аввалги фаолияти натижалари ҳисобга олинган ҳолда амалга оширилади.

22-модда. Аккредитациянинг амал қилишини тўхтатиб туриш, қайта тиклаш ва тугатиш

Аккредитациянинг амал қилиши аккредитация органининг қарори билан белгиланган тартибда тўхтатиб турилади, қайта тикланади ёки тугатилади.

Аккредитациянинг амал қилиши аккредитация қилинган субъектнинг ташаббусига кўра тўхтатиб турилиши, қайта тикланиши ёки тугатилиши мумкин.

Аккредитация органининг аккредитациянинг амал қилишини тўхтатиб туриш ва тугатиш тўғрисидаги қарори устидан апелляция комиссиясига ёки суд тартибида шикоят қилиниши мумкин.

Аккредитациянинг амал қилишини тўхтатиб туриш, қайта тиклаш ва тугатиш тартиб-таомиллари Ўзбекистон Республикаси Вазирлар Маҳкамаси томонидан тасдиқланган аккредитациядан ўтказиш тартибида белгиланади.

LexUZ шарҳи

23-модда. Аккредитация соҳасини кенгайтириш ва қисқартириш

Аккредитация соҳасини кенгайтириш ва қисқартириш аккредитация қилинган субъектнинг аккредитация соҳасига аккредитациядан ўтказиш тартибига мувофиқ ўзгартишлар киритиш орқали аккредитация органи томонидан амалга оширилади.

24-модда. Аккредитацияга, даврий баҳолашга ва аккредитация соҳасини кенгайтиришга оид ишларни бажаришга доир шартномалар

Аккредитация, даврий баҳолаш ва аккредитация соҳасини кенгайтириш ушбу Қонунга, шунингдек аккредитация органи ва аккредитация учун ариза берувчи ёки аккредитация қилинган субъект ўртасида қонунчилик талабларига мувофиқ тузиладиган шартномага асосан амалга оширилади.

Аккредитацияга, аккредитация қилинган субъектни даврий баҳолашга ва аккредитация соҳасини кенгайтиришга оид ишларни бажаришга доир шартнома тарафларнинг келишувига кўра бошқа шартларни ҳам ўз ичига олиши мумкин.

Ушбу моддада назарда тутилган хизматларнинг қиймати сарфланган вақт ва хизмат сафарлари харажатларидан келиб чиққан ҳолда белгиланади.

Шартномага мувофиқ аккредитацияга оид ишларни бажариш билан боғлиқ бўлган барча харажатлар аккредитация учун ариза берувчи томонидан, даврий баҳолашга ва аккредитация соҳасини кенгайтиришга оид ишларни бажариш билан боғлиқ бўлган харажатлар эса, уларнинг натижаларидан қатъи назар, аккредитация қилинган субъект томонидан тўланади.

Аккредитацияга, даврий баҳолашга ва аккредитация соҳасини кенгайтиришга оид ишларни бажаришга сарфланган вақтнинг ҳисоб-китоб услубиёти аккредитация органи томонидан белгиланади ҳамда унинг расмий веб-сайтига жойлаштирилади.

25-модда. Аккредитация учун ариза берувчининг ҳуқуқ ва мажбуриятлари

Аккредитация учун ариза берувчи қуйидаги ҳуқуқларга эга:

аккредитация органига аккредитация учун ариза билан мурожаат қилиш;

аккредитацияга оид ишларни бажариш учун шартнома тузиш;

аккредитация органининг қарори устидан апелляция комиссиясига апелляция бериш ва (ёки) суд тартибида шикоят қилиш.

Аккредитация учун ариза берувчи қонунчиликка ҳамда аккредитацияга оид ишларни бажаришга доир шартномага мувофиқ бошқа ҳуқуқларга ҳам эга бўлиши мумкин.

Аккредитация учун ариза берувчининг зиммасида аккредитация қилиш тўғрисидаги қонунчилик талабларига, мувофиқликни баҳолаш органларига нисбатан халқаро ва миллий стандартларда, аккредитация соҳасидаги халқаро ташкилотларнинг ҳужжатларида белгиланган талабларга ва мезонларга риоя этиш, шунингдек аккредитация жараёнида уларнинг бажарилаётганлигини исботлаш мажбуриятлари бўлади.

26-модда. Аккредитация қилинган субъектнинг ҳуқуқ ва мажбуриятлари

Аккредитация қилинган субъект:

аккредитация органига аккредитация соҳасини кенгайтириш ва қисқартириш, такрорий аккредитациядан ўтказиш тўғрисида ариза билан мурожаат қилиш;

аккредитация органига аккредитация тўғрисидаги гувоҳномага ўзгартишлар ва (ёки) қўшимчалар киритиш, аккредитация тўғрисидаги гувоҳноманинг амал қилишини тўхтатиб туриш, қайта тиклаш ва тугатиш ҳақидаги ариза билан мурожаат қилиш;

аккредитация белгисини ушбу Қонун талабларига ва Ўзбекистон Республикаси Вазирлар Маҳкамаси томонидан тасдиқланган аккредитациядан ўтказиш тартибига мувофиқ қўллаш;

аккредитация органининг қарори устидан апелляция комиссиясига апелляция бериш ва (ёки) суд тартибида шикоят қилиш ҳуқуқига эга.

Аккредитация қилинган субъектлар ўз фаолиятини мувофиқлаштириш, шунингдек умумий манфаатларини илгари суриш ва ҳимоя қилиш мақсадида, қонунчиликнинг барча талабларига, миллий аккредитация тизимида аккредитация қилиш тартибини ва тартиб-таомилларини белгиловчи қоидаларга, қўлланмаларга, йўриқномаларга ҳамда бошқа ҳужжатларга риоя этган ҳолда, аккредитация қилинган субъектларнинг уюшмаларини ташкил этиши мумкин.

Аккредитация қилинган субъект қонунчиликка ва даврий баҳолашга оид ишларни бажаришга, аккредитация соҳасини кенгайтиришга доир шартномага, шунингдек аккредитациядан кейинги шартномага мувофиқ бошқа ҳуқуқларга ҳам эга бўлиши мумкин.

Аккредитация қилинган субъект:

аккредитация органига мувофиқликни баҳолаш ишларининг бажарилиши юзасидан ўз фаолияти тўғрисида ахборот тақдим этиши;

даврий баҳолашни ўтказишга оид ишларни бажаришга доир шартномаларни бундай баҳолашнинг даврийлигига мувофиқ тузиши;

Ўзбекистон Республикасининг қонунчилигида ўзига нисбатан белгиланган талабларга, шунингдек халқаро ва миллий стандартларда, аккредитация соҳасидаги халқаро ташкилотларнинг ҳужжатларида назарда тутилган талабларга ва мезонларга риоя этиши;

даврий баҳолаш ва аккредитация соҳасини кенгайтириш ишларини амалга ошириш чоғида аккредитация бўйича баҳоловчиларнинг ва техник экспертларнинг ишлаши учун зарур шарт-шароитлар яратиши;

Миллий аккредитация тизими реестрида рўйхатдан ўтказилган рақамига ҳавола қилиши ёхуд ўзининг фақат аккредитация соҳаси татбиқ этиладиган мувофиқликни баҳолаш ишларига нисбатан аккредитация қилинганлиги тўғрисида бошқача шаклда билдириши шарт.

Аккредитация қилинган субъектнинг зиммасида қонунчиликка ва даврий баҳолашга, аккредитация соҳасини кенгайтиришга оид ишларни бажаришга доир шартномага, шунингдек аккредитациядан кейинги шартномага мувофиқ бошқа мажбуриятлар ҳам бўлиши мумкин.

6-боб. Якунловчи қоидалар

27-модда. Аккредитацияга доир ишларни молиялаштириш

Аккредитацияга доир ишларни молиялаштириш Ўзбекистон Республикаси Давлат бюджети маблағлари, аккредитация бўйича хизматлар кўрсатишдан олинган маблағлар, аккредитация белгисини қўллаганлик учун ажратмалар, шунингдек қонунчиликда тақиқланмаган бошқа манбалар ҳисобидан амалга оширилади.

Аккредитация органининг аккредитация бўйича халқаро ташкилотлардаги иштироки учун тўланадиган аъзолик бадаллари Ўзбекистон Республикаси Давлат бюджетидан молиялаштирилади.

28-модда. Низоларни ҳал этиш

Аккредитация соҳасидаги низолар қонунчиликда белгиланган тартибда ҳал этилади.

29-модда. Аккредитация қилиш тўғрисидаги қонунчиликни бузганлик учун жавобгарлик

Аккредитация қилиш тўғрисидаги қонунчиликни бузганликда айбдор шахслар белгиланган тартибда жавобгар бўлади.

30-модда. Ушбу Қонуннинг ижросини, етказилишини, моҳияти ва аҳамияти тушунтирилишини таъминлаш

Ўзбекистон техник жиҳатдан тартибга солиш агентлиги ва бошқа манфаатдор ташкилотлар ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.

31-модда. Қонунчиликни ушбу Қонунга мувофиқлаштириш

Ўзбекистон Республикаси Вазирлар Маҳкамаси:

ҳукумат қарорларини ушбу Қонунга мувофиқлаштирсин;

давлат бошқаруви органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.

32-модда. Ушбу Қонуннинг кучга кириши

Ушбу Қонун расмий эълон қилинган кундан эътиборан олти ой ўтгач кучга киради.

Ўзбекистон Республикасининг Президенти Ш. МИРЗИЁЕВ

Тошкент ш.,

2023 йил 27 февраль,

ЎРҚ-820-сон

(Қонунчилик маълумотлари миллий базаси, 28.02.2023 й., 03/23/820/0114-сон)