а) суғурталанган шахс Ўзбекистон Республикаси Президентининг «Ватан ҳимояси ва эл-юртимиз тинчлиги йўлида ҳалок бўлган ҳарбий хизматчилар ва ходимлар оила аъзоларини ижтимоий қўллаб-қувватлашни кучайтириш чора-тадбирлари тўғрисида» 2023 йил 13 мартдаги ПФ-34-сон Фармонига мувофиқ 2023 йил 1 апрелдан бошлаб Ўзбекистон Республикаси Президенти томонидан эълон қилинган фавқулодда ҳолат (уруш ҳолати) даврида жалб қилинган вақтда, шунингдек, жанговар (ҳарбий) ҳаракатлар олиб борилаётган пайтда яраланганлиги, контузия ёки майиб бўлганлиги оқибатида ҳалок бўлганда — унинг меросхўрларига (меросхўрлик ҳуқуқини тасдиқлайдиган гувоҳнома тақдим этилган тақдирда) тўловни амалга ошириш кунидаги республикада белгиланган базавий ҳисоблаш миқдорининг 200 баравари миқдорида;

б) суғурталанган шахс хизматни ўташ (ҳарбий йиғинлар) даврида ҳалок бўлганда (мазкур банднинг «а» кичик бандида кўрсатилган ҳоллар бундан мустасно) ёки хизмат (ҳарбий йиғинлар)дан бўшагандан сўнг бир йил мобайнида олинган жароҳат (контузия), касалланиш натижасида вафот этганда — унинг меросхўрларига (меросхўрлик ҳуқуқини тасдиқлайдиган гувоҳнома тақдим этилган тақдирда) тўловни амалга ошириш кунидаги республикада белгиланган базавий ҳисоблаш миқдорининг 84 баравари миқдорида;

в) суғурталанган шахс хизматдан бўшагандан кейин бир йил мобайнида унга хизматни ўташ (ҳарбий йиғинлар) билан боғлиқ бўлган ногиронлик белгиланганда: I гуруҳ ногиронлиги бўлган шахсга — ушбу банднинг «б» кичик бандида назарда тутилган тўловнинг 75 фоизи, II гуруҳ ногиронлиги бўлган шахсга — 50 фоизи, III гуруҳ ногиронлиги бўлган шахсга — 30 фоизи миқдорида;