Ўзбекистон Республикасининг умумий фойдаланишдаги автомобиль йўллари тармоғини янада ривожлантириш ва такомиллаштириш, шунингдек йўл ишларини маблағ билан таъминлашни яхшилаш мақсадида Вазирлар Маҳкамаси қарор қилади:

1. Ўзбекистон Республикаси Вазирлар Маҳкамасининг «Республика йўл жамғармасини ташкил этиш тўғрисида» 1993 йил 5 июлдаги 334-сон қарорининг 3-банди «а» кичик бандига қуйидаги ўзгартиришлар ва қўшимчалар киритилсин:

иккинчи хатбоши қуйидаги таҳрирда баён қилинсин:

«умумий фойдаланишдаги автомобиль йўлларини тузатиш ҳамда сақлашга, мулкчилик шаклларидан қатъи назар, корхоналар ва ташкилотлар, шу жумладан хорижий инвестициялар иштирокидаги корхоналар ва ташкилотлар томонидан амалга ошириладиган маблағлар ажратиш қуйидаги миқдорларда:

саноат, транспорт, қишлоқ, хўжалиги ва бошқа корхоналар, бирлашмалар ва ташкилотлар, шу жумладан хорижий инвестициялар иштирокидаги корхоналар ва ташкилотлар томонидан — ҳисобот йилида бажарилган ишлар ва хизматларнинг, шу жумладан экспертнинг ҳақиқий жамғармаларидан — 1,2 фоиз миқдорида;

қурилиш, қурилиш-монтаж, тузатиш-қурилиш, ишга тушириш созлаш, лойиҳа-қидирув ва илмий ташкилотлар томонидан — ҳисобот йилида бажарилган ишлар ва хизматлар ҳажмидан — 1,2 фоиз миқдорида;

тайёрлов, воситачилик, савдо, шу жумладан умумий овқатланиш корхоналари, таъминот-сотиш ташкилотлари ва корхоналари томонидан — ҳисобот йилидаги ҳақиқий товар оборотидан — 0,4 фоиз миқдорида;

банклар (Марказий банк муассасалари бундан мустасно), суғурта ташкилотлари (Давлат суғурта ташкилотлари бундан мустасно) ва уларнинг бўлинмалари томонидан — ҳисобот йилидаги ҳақиқий даромаддан — 1,2 фоиз миқдорида;

видеосалонлар (видеокўрсатув пунктлари), кимошди савдолари, казинолар, видео ва аудиокасетталарни кўпайтириш, ижарага беришдан, пул ютуғи бўлган ўйин автомобилларидан фойдаланишдан, лотерея ўйинлари, оммавий концерт-томоша тадбирларини ўтказишдан даромад оладиган корхоналар томонидан — ҳисобот йилидаги ҳақиқий даромаддан — 1,2 фоиз миқдорида»;

тўртинчи хатбоши қуйидаги таҳрирда баён қилинсин:

«сотиб олинган транспорт воситалари қийматидан йиғимлар енгил автомобилларни сотиш қийматидан 5 фоиз миқдорида ва юк автомобиллари ҳамда автобусларни, шу жумладан махсус ва технологик мақсаддаги автомобилларни сотиш қийматидан 15 фоиз миқдорида».

2. Қарор қуйидаги мазмундаги 9-банд билан тўлдирилсин:

«Қорақалпоғистон Республикаси Вазирлар Кенгаши, вилоятлар, шаҳарлар ва туманлар ҳокимликлари йўл органларига йўл жамғармаси маблағларини йиғишда ҳамма жойда ёрдам кўрсатсинлар. Бунда йўл жамғармаси маблағларидан умумий фойдаланишдаги автомобиль йўлларига тааллуқли бўлмаган мақсадларга ажратиш ман этилсин».

3. Вазирлар Маҳкамасининг кўрсатиб ўтилган қарори билан тасдиқланган Республика йўл жамғармаси маблағларини шакллантириш ва улардан фойдаланиш тўғрисида Низомга қуйидаги ўзгартиришлар киритилсин:

а) 7-банднинг бешинчи хатбоши қуйидаги таҳрирда баён қилинсин:

«қурилиш, саноат, транспорт, тайёрлов корхоналари, шу жумладан хорижий инвестициялар иштирокидаги корхоналар томонидан, таъминот-сотиш ва бошқа ташкилотлар, умумий овқатланиш корхоналари, банклар (Марказий банк муассасаларидан ташқари), суғурта ташкилотлари ва уларнинг бўлинмалари (Давлат суғурта ташкилотларидан ташқари) томонидан Вазирлар Маҳкамаси белгиланган миқдорларда»;

б) 8-банднинг иккинчи хатбоши 1 фоиз миқдоридаги ажратма 1,2 фоизга ўзгартирилсин;

в) 19 бандда юк, махсус автомобиллар ва автобусларнинг рўйхатдан ўтказилиши ва қайта рўйхатдан ўтказилиши учун йиғим миқдори улар нархининг 10 фоиз миқдоридан 15 фоизга ўзгартсин.

4. Қуйидагилар ўз кучини йўқотган деб ҳисоблансин:

Ўзбекистон Республикаси Вазирлар Маҳкамасининг 1993 йил 29 июлдаги 261-ф-сон фармойиши 1-банди олтинчи хатбошининг йўлларни сақлаш ва қуришга йиғимлар тўлашдан озод этиш бўйича имтиёзларга доир қисми;

Ўзбекистон Республикаси Вазирлар Маҳкамасининг «Давлат тасарруфидан чиқариш ва хусусийлаштириш жараёнининг самарали ташкил этилишини таъминлаш бўйича қўшимча чора-тадбирлар тўғрисида» 1993 йил 11 августдаги 402-сон қарорига 7-илованинг 5-банди;

Ўзбекистон Республикаси Вазирлар Маҳкамасининг 1993 йил 31 декабрдаги 615-сон қарорининг 14-банди.

5. Мазкур қарор 1997 йил 1 январдан бошлаб кучга киритилади.